1, 2. (a) Iesu be ena turadia dekenai dahaka parabole ia herevalaidia? (Laulau ginigunana itaia.) (b) Mamoe bona nanigosi ena parabole amo dahaka ita diba be namo?

IESU be ena turadia Petero, Andrea, Iamesi, bona Ioane dekenai igui hesiai tauna mai ena kamonai bona mai ena kara maoromaoro, rami-hebou kekeni 10, bona talent edia parabole ia herevalaia. Iena hereva dokonai parabole ma ta ia gwauraia. Unai parabole amo “taunimanima ena Natuna” ese “bese iboudiai” do ia hahemaoro henia karana ia herevalaia. Iena hahediba taudia be unai parabole dekenai idia hoa! Parabole lalonai Iesu be orea rua ia herevalaia, ginigunana be mamoe oreana bona iharuana be nanigosi oreana. Bena ia ese orea ihatoina ia herevalaia, idia be “King” ena “tadikaka” (NW).—Mataio 25:31-46 duahia.

² Idaunega amo Iehova ena taunimanima be unai parabole idia laloa bada, badina Iesu ese taunimanima edia helaro ia herevalaia. Ia hahedinaraia dahaka dainai haida be mauri hanaihanai do idia abia bona haida do idia mase. Iesu ena hereva ita lalopararalaia bona badinaia be gau badana. Unai dainai inai stadi lalonai, inai henanadai do ita haerelaidia: Edena dala ai Iehova ese ita ia durua parabole ita lalopararalaia totona?  Edena dala ai ita diba unai parabole ese haroro gaukara ia herevalaia? Daika ese haroro gaukara ena hahegani ia abia? Dahaka dainai hari “King” bona ena “tadikaka” ita durua be namo?

3, 4. (a) Mamoe bona nanigosi ena parabole ita lalopararalaia totona, dahaka gaudia ita diba be namo? (b) Lagani 1881 ai, edena dala ai Zion’s Watch Tower ese parabole ena anina ia herevalaia?

³ Mamoe bona nanigosi ena parabole ita lalopararalaia totona, namona be inai gaudia toi ita diba: (1) “Taunimanima ena Natuna” o “King,” mamoe bona nanigosi, bona King ena “tadikaka” be daidia idia laulaulaia? (2) Edena negai “taunimanima ena Natuna” ese mamoe bona nanigosi ia hapararaia o hahemaoro henia? Bona (3) dahaka dainai haida be mamoe bamona taudia bona ma haida be nanigosi bamona taudia?

⁴ Lagani 1881 ai, Zion’s Watch Tower ese ia hahedinaraia unai “taunimanima ena Natuna” eiava “King,” be Iesu. Bible Student taudia idia laloparara King James Version Baibel ai inai hereva “egu tadikaka” be Keriso ida do idia lohia taudia bona gabeai tanobada ai mauri goevadaena idia abia taudia ia herevalaia. Idia laloa mamoe bona nanigosi hapararaia karana be Keriso ena Lagani 1,000 Lohia Negana ai do ia vara. Bona idia abia dae Dirava ena lalokau taravatudia idia badinaia taudia be Iesu ese do ia gwauraidia mamoe bamona taudia.

5. Lagani 1920 bamona ai, dahaka diba matamata ita abia?

⁵ Lagani 1920 ena matamanai, Iehova ese ena taunimanima ia durua unai parabole ena diba matamata idia abia totona. The Watch Tower October 15, 1923 ese ia hahedinaraia “taunimanima ena Natuna” be Iesu. To, Baibel siri haida amo idia hahedinaraia Keriso ena “tadikaka” be ia ida guba ai do idia lohia taudia, bona ia hahedinaraia mamoe be Keriso ena Basileia ese ia lohiaia tanobadana ai do idia noho taudia. Edena negai mamoe bona nanigosi do idia hapararaia? Unai magasin ma ia gwau, Lagani 1,000 Lohia Negana lalonai Keriso ena tadikaka be ia ida guba amo do idia lohia, unai dainai tanobada oreana ta ese idia do ia durua diba lasi. Unai dainai, mamoe bona nanigosi hapararaia karana be Lagani 1,000 Lohia Negana ia do hamatamaia lasi neganai do ia vara. Unai magasin ia gwau, mamoe bamona taudia be idia abia dae Iesu be edia Lohiabada bona Basileia ese mauri do ia hanamoa.

6. Lagani 1990 ai, edena diba ma haida ita abia?

⁶ Iehova ena taunimanima be unai diba matamata idia abia neganai, idia laloa inai tanobada dokonai Basileia ena sivarai ia abia dae tauna be mamoe bamona tauna, bona ia abia dae lasi tauna be nanigosi bamona tauna. To, lagani 1990 huanai, unai lalohadai idia haidaua. October 15, 1995, Gima Kohorona ena atikol rua ese Iesu ena hereva Mataio 24:29-31 (duahia) bona Mataio 25:31, 32 (duahia) ai ia hahegeregerea. * Unai atikol be dahaka idia hahedinaraia? Ginigunana ia gwau: “Mamoe bona nanigosi kota henidia negana be do vairai.” Edena negai do ia vara? “Mataio 24:29, 30 ese ia gwauraia ‘negana dikana’ do ia matamaia bona taunimanima ena Natuna be ‘mai ena hairai danu do ia mai’. . . Unai neganai, tanobada oromana dikana ibounai ena dokona  neganai, Iesu do ia kota karaia bona davana do ia henia.”

7. Hari dahaka ita lalopararalaia namonamo?

⁷ Hari, mamoe bona nanigosi parabolena ita lalopararalaia namonamo. Unai parabole ese ia herevalaia taudia ese daidia idia laulaulaia? King o “taunimanima ena Natuna” be Iesu. Inai hereva “egu tadikaka” be horoa tatau bona hahine, Keriso ida guba ai do idia lohia taudia. (Roma 8:16, 17) “Mamoe” bona “nanigosi” be bese idauidau taudia. Idia be lauma helaga ese ia horoa lasi. Hahemaoro negana be edena negai? Unai hahemaoro negana be ia mai noho hisihisi badana ena dokonai do ia vara. Bona dahaka dainai Iesu ese taunimanima be mamoe eiava nanigosi bamona do ia hahemaoro henia? Badina ia ura taunimanima be ena horoa tadikaka idia kara henia hegeregerena ia hahemaoro henia. Ena be tanobada ena dokona be kahirakahira, to ita moale badina Iehova ese unai parabole bona Mataio karoa 24 bona 25 edia parabole ena anina ia hahedinaraia!

8, 9. Dahaka dainai Iesu ia gwau mamoe bamona taudia be “kara maoromaoro” taudia?

⁸ Mamoe bona nanigosi parabolena lalonai, Iesu be haroro gaukara ia gwauraia lasi. Vadaeni, dahaka dainai ita gwau unai parabole be haroro gaukara ia herevalaia?

⁹ Ginigunana be, Iesu be parabole amo taunimanima ia hadibaia. To, ia be mamoe bona nanigosi korikoridia hapararaia karana ia herevalaia lasi. Unai hegeregerena, ia gwau lasi mamoe bamona taudia be Iesu ena tadikaka do idia ubua, dabua idia henia, gorere neganai idia naria o dibura ai idia noho neganai idia vadivadi henia. To, idia ese ena tadikaka idia kara henia dalana ia herevalaia. Iesu ia gwau mamoe bamona taudia be “kara maoromaoro” taudia, badina idia laloparara Keriso ena horoa tadikaka oreana be tanobada ai idia do noho. Bona inai nega dokona ai idia ese horoa taudia idia durua.—Mat. 10:40-42; 25:40, 46; 2 Tim. 3:1-5.

10. Edena dala ai mamoe bamona taudia be Keriso ena tadikaka dekenai hebogahisi idia hahedinaraia diba?

¹⁰ Gau iharuana be, Iesu ena hereva ita laloa. Ia be ena noho negana bona nega oromana ena dokona ai do idia vara gaudia ia herevalaia. (Mat. 24:3) Iesu ese ia hahedinaraia mai anina bada toa ta do ia hedinarai, unai be Basileia ena sivarai namona be “tanobada ibounai dekenai do idia harorolaia.” (Mat. 24:14) Bona mamoe bona nanigosi parabolena ia do gwauraia lasi neganai, ia ese talent parabolena ia gwauraia. Vanegai stadi ai, Iesu ese talent parabolena amo ena horoa hahediba taudia, iena “tadikaka” unai, ia hadibaia haroro gaukara idia goadalaia totona. To, tanobada ai idia do noho horoa taudia be orea maragina bona idia be gaukara badana do idia karaia, unai be “bese ibounai” do idia haroro henia gabeai dokona do ia ginidae. Mamoe bona nanigosi ena parabole ese ia hahedinaraia horoa taudia be mai edia durua taudia. Unai dainai, mamoe bamona taudia ese hebogahisi idia hahedinaraia dalana ta be Keriso ena tadikaka idia durua haroro gaukara idia karaia totona. To, edena dala ai mamoe bamona taudia ese heduru idia henia diba? Moni, kohu o hagoadaia herevadia sibona amo heduru idia henia be hegeregere, a?

11. Dahaka henanadai ia vara diba, bona dahaka dainai?

¹¹ Hari, Iesu ena hahediba taudia ibounai be 8 milioni, to idia momo be horoa  taudia lasi. Idia be Iesu ese horoa taudia dekenai ia henia talent idia abia lasi. (Mat. 25:14-18) To henanadai be inai: ‘Haroro gaukara ena hahegani be lauma helaga ese ia horoa lasi taudia ese idia badinaia danu, a?’ Oibe. Mani badina haida ita herevalaia.

12. Mataio 28:19, 20 ai, Iesu ena hereva amo dahaka ita diba?

¹² Iesu be iena hahediba taudia ibounai ia hagania idia haroro totona. Iesu ia toreisi lou murinai, ia murinai idia raka taudia ia hamaoroa hahediba taudia halaoa gaukarana idia karaia, bona ia hadibaia “gaudia ibounai” do idia badinaia. Danu ia haganidia do idia haroro. (Mataio 28:19, 20 duahia.) Unai dainai, Keriso ena hahediba taudia ibounai idia haroro be namo, herevana edia helaro be guba ai do idia lohia eiava tanobada ai do idia noho.—Kara 10:42.

13. Ioane ena matahanai ese dahaka ia hahedinaraia, bona dahaka dainai?

¹³ Apokalupo bukana ese ia hahedinaraia haroro gaukara be horoa taudia bona ma haida ese do idia karaia. Iesu ese aposetolo Ioane dekenai matahanai ta ia henia, ia ese “headava matamata hahine” ia itaia, unai hahine ese Keriso ida guba ai do idia lohia 144,000 horoa taudia ia laulaulaia. Idia ese taunimanima idia boiria davana lasi “mauri ranuna” idia inua totona. (Apok. 14:1, 3; 22:17) Unai mauri ranuna ese Keriso ena mauri davalaia boubouna ia laulaulaia, Iehova ese unai boubou amo taunimanima be kara dika bona mase amo ia hamauria. (Mat. 20:28; Ioa. 3:16; 1 Ioa. 4:9, 10) Unai mauri davalaia boubouna be iseda haroro gaukara ena badina badana. Bona horoa taudia be unai gaukara idia gunalaia, bona taunimanima idia durua unai boubou gauna idia dibaia bona namo idia abia. (1 Kor. 1:23) To, Ioane ese matahanai lalonai ma haida ia itaia danu, idia be headava matamata hahine ena orea taudia lasi. Idia danu idia hagania do idia boiboi, idia gwau: “Mai!” Idia ese unai hahegani idia  abia dae bona ma haida idia boiria mauri ranuna idia inua totona. Unai orea iharuana taudia edia helaro be tanobada ai do idia mauri. Unai dainai, unai matahanai ese ia hahedinaraia, inai boiboi herevana “mai” idia abia dae taudia ibounai edia maduna be ma haida do idia haroro henia.

14. “Keriso ena taravatu” ita badinaia totona, dahaka ita karaia be namo?

¹⁴ “Keriso ena taravatu” henunai idia noho taudia ibounai idia haroro be namo. (Gal. 6:2) Iehova ena taunimanima be Iena taravatu tamona idia badinaia. Hegeregere, Israela taudia ia hamaoroa: “Taravatu be tamona, Israela tauna momokani iena, bona idau bese tauna umui huanai ia noho iena.” (Eso. 12:49; Lev. 24:22) Keristani taudia be Mose ena Taravatu henunai idia noho lasi. To ita ibounai, horoa taudia o mamoe ma haida, be “Keriso ena taravatu” henuna ita noho. Unai taravatu be Iesu ese ia hadibaia gaudia ibounai. To unai gaudia ibounai amo lalokau be mai anina bada. (Ioa. 13:35; Iam. 2:8) Bona Dirava, Keriso, bona iseda dekena taudia dekenai lalokau ita hahedinaraia dalana badana be Basileia ena sivarai namona ita harorolaia.—Ioa. 15:10; Kara 1:8.

15. Edena bamona ita diba Iesu ena hahegani be ita ibounai totona?

¹⁵ Iesu ese orea maragina dekenai ia gwauraia herevana be orea badana dekenai ia gwauraia danu. Hegeregere, ena be Iesu ese ena aposetolo taudia 11 ida Basileia ta totona kontraka ta ia karaia, to 144,000 taudia be unai kontraka lalonai idia noho. (Luka 22:29, 30; Apok. 5:10; 7:4-8) Unai hegeregerena, ena be Iesu be ena hahediba taudia haida sibona—ia toreisi lou neganai idia dekenai ia hedinarai taudia—ia hagania do idia haroro. (Kara 10:40-42; 1 Kor. 15:6) To, aposetolo edia negai idia noho abidadama taudia ibounai idia diba unai hahegani idia badinaia be namo. (Kara 8:4; 1 Pet. 1:8) Danu, Iesu ese unai hahegani ia henia neganai, hari idia noho Basileia harorolaia taudia 8 milioni be idia noho lasi. To idia diba Keriso idia abidadama henia totona haroro gaukara idia karaia be gau badana.—Iam. 2:18.

16-18. Edena dala ai mamoe bamona taudia ese Keriso ena tadikaka idia durua? Bona dahaka dainai hari unai bamona idia karaia be namo?

¹⁶ Satani ia diba iena “nega be ia kwadogi” dainai, ia ese Keriso ena horoa tadikaka tanobada ai ia tuari henia noho. (Apok. 12:9, 12, 17) Ena be Satani ese horoa taudia dekenai hahetoho ia havaraia, to idia be haroro gaukara badana idia gunalaia noho. Ita diba Iesu be idia ida ia noho bona idia ia hakaua.—Mat. 28:20.

¹⁷ Mamoe orea badana idia moale Keriso ena tadikaka idia durua haroro gaukara bona gaukara ma haida idia karaia totona. Hegeregere, kontribusen moni idia henia, bona Kingdom Hall, Assembly Hall, bona brens ofesi haginia gaukarana idia durua. Danu, “igui hesiai tauna mai ena kamonai bona mai ena kara maoromaoro” ese ia abia hidi gunalaia taudia idia badinaia.—Mat. 24:45-47; Heb. 13:17.

¹⁸ Kahirakahira Keriso ena tadikaka oredia tanobada ai ese edia maka ginigabena do idia abia. Unai murinai aneru ese idia dogoatao hisihisi badana ena lai 4 do idia rakatania. (Apok. 7:1-3) Aramagedono ia do vara lasi neganai, horoa taudia be guba do idia lao. (Mat. 13:41-43) Unai dainai, hari be nega namona Iesu ese ia gwauraia mamoe bamona taudia ese Keriso ena tadikaka idia badinaia bona durua.