1, 2. (a) Vifwanyisa muka vize Yesu ashimutwilile namasepa jenyi azangile? (Talenu muvwimbimbi wakulivanga.) (b) Vyuma muka twatela kutachikiza hachifwanyisa chamikoko navapembe?

LIKUMBI limwe Yesu apwile nakushimutwila namasepa jenyi azangile, vaPetulu, naAndelei, naYakova, naYowano. Avalwezele chifwanyisa chandungo wakushishika wakuzangama, nachamapwevo vavajike 10, nachajitalende. Kufumaho akukulwile chihande chenyi nachifwanyisa chikwavo nawa. Avulukile vyalwola luze “Mwanamutu” mwakeza nakusopesa “vaka-mafuchi osena.” Pundu vene, echi chifwanyisa chakwachile kumichima yavava tumbaji. Muchifwanyisa kana, Yesu avulukile mazavu avali, lizavu limwe lyamikoko kaha likwavo lyavapembe. Kufumaho, avulukile nawa lizavu likwavo lyalilemu lyamuchitatu, lizavu ‘lyavandumbu jaMwangana.’—Tangenu Mateu 25:31-46.

² Vatu jaYehova vanafwilanga kutachikiza echi chifwanyisa hamyaka yayivulu. Kaha vanalinginga kanawa kufwila kuchitachikiza, mwomwo Yesu hano apwile nakuhanjika havyuma navikasoloka kuvatu. Alumbunwine ovyo vatu vamwe navakatambwila kuyoya chahaya myaka yosena novyo nawa vatu vamwe navakavanongesela haya myaka yosena. Kuyoya chetu chinapendamina hakutachikiza nakulinga  vyuma ahanjikile Yesu muchifwanyisa echi. Mwomwo yavyumevi tunashimutwila, twatela kulihulisa ngwetu: Uno Yehova natukafwe ngachilihi chikoki chikoki twivwishise echi chifwanyisa? Mwomwo ika natwambila ngwetu echi chifwanyisa chasolola nge mulimo wakwambulula wapwa waulemu? Uno veya vahana ou mulimo wakwambulula? Kaha mwomwo ika natwambila ngwetu luno hilwola lwakuliluula kuli “Mwangana” nakuli vaze avuluka ngwenyi “vandumbwami”?

3, 4. (a) Vishina muka twatela kutachikiza numbanyi tutachikize kanawa chifwanyisa chamikoko navapembe? (b) Mu 1881, Kaposhi Kakutalila alumbunwine ngachilihi echi chifwanyisa?

³ Hakusaka tutachikize kanawa mwalumbunukila echi chifwanyisa chamikoko navapembe, chatete twatela kutachikiza Mwanamutu chipwe ngwetu Mwangana, namikoko navapembe, navandumbu jaMwangana. Chamuchivali twatela kutachikiza lwola mwakeza Mwanamutu nakuhandununa chipwe ngwetu kusopesa mikoko navapembe. Chamuchitatu, mwomwo ika vatu vamwe navakavavulukila ngwavo mikoko kaha veka ngwavo vapembe?

⁴ Mu 1881, Kaposhi Kakutalila avulukile hatoma ngwenyi “Mwanamutu” uze vavuluka nawa ngwavo “Mwangana,” apwa Yesu. Vaka-Kulinangula Mbimbiliya vakulivanga vafwelelele ngwavo vaze avulukile Mwangana ngwenyi “vandumbwami” vemanyinako vaze navakayula hamwe naKulishitu navatu vosena vaze navakayoyela hano hamavu omu navakalinga hivanakupuka lyehi mwosena. Vashinganyekele ngwavo mulimo wakuhandununa mikoko kuvapembe naukapwako muMyaka Likombakaji yaChiyulo chaYesu. Kaha nawa vafwelelele ngwavo vatu vaze vali nakulondezeza zangi yaKalunga vakiko navakavuluka ngwavo mikoko.

5. Muji 1920, valumwineko ngachilihi vyuma twafwelela?

⁵ Muji 1920, Yehova akafwile vatu jenyi vevwishise kanawa echi chifwanyisa. Kaposhi Kakutalila kaOctober 15, 1923, etavilile hatoma nge “Mwanamutu” apwa Yesu. Oloze alumbunwine kuzachisa Visoneka nge vandumbu jaKulishitu vemanyinyineko kaha vaze navakayula hamwe naikiye mwilu, kaha ava vandumbu jaKulishitu vosena navakapwa mwilu halwola lwaChiyulo chaMyaka Likombakaji. Ou kaposhi alumbunwine nawa nge mikoko vemanyinyineko vatu vaze vakwechi lutalililo lwakukayoyela hano hamavu muchiyulo chaKulishitu navandumbwenyi. Kaha hakuwana nge echi chifwanyisa chambile ngwacho ava mikoko veji kukafwanga vandumbu jaMwangana, ngocho mulimo wakuhandununa chipwe ngwetu wakusopesa mikoko navapembe watela kupwako shimbu vandumbu jaYesu vawavisa vachili hano hamavu, shimbu kanda Chiyulo chaMyaka Likombakaji chiputuke. Echi chihande chakukulwile ngwacho vatu vamwe navakavavuluka ngwavo mikoko mwomwo vetavilile Yesu kupwa Mwata wavo nakufwelela ngwavo Wangana ukiko naukakumisa maukalu avatu osena.

6. Mu 1995, valumwine ngachilihi vyuma twafwelela?

⁶ Mwomwo yavyumevi valumwineko, twashinganyekelenga ngwetu vatu vapwile nakuvahandununa kupwa mikoko chipwe vapembe mulwola luno lwachikukulwishi chakatwamino kamyaka yino. Twashinganyekele ngwetu, nge mutu netavila mujimbu waWangana, kaha apwa mukoko, oloze nge nakane, kaha apwa pembe. Oloze kuheta mu 1995, vyumevi twafwelelele vavyalumwine. Vihande vivali vyapwile muKaposhi Kakutalila kaOctober 15, 1995 vyahanjikile hatoma omu alifwana mazu aYesu atwama hali Mateu 24:29-31 (tangenu) nawaze ahali Mateu 25:31, 32. (Tangenu.) * Vyuma muka vakukulwile? Muchihande chimwe vambile ngwavo: “Mulimo wakuhandununa mikoko kuvapembe naukapwako kulutwe.” Lwola  muka? “Naukapwako omu nalukaputuka ‘luyando’ luze vavuluka hali Mateu 24:29, 30, omu Mwanamutu ‘mwakeza naupahu waunene.’ . . . Halwola kanelu lwakunongesa katwamino kano kakuhuka, hakiko Yesu mwakatwama nakusopesa vatu nakuvanongesa.”

7. Uno muchano muka tunatachikiza kanawa makumbi ano?

⁷ Makumbi ano tunatachikiza kanawa echi chifwanyisa chamikoko navapembe. Yesu ikiye “Mwanamutu” chipwe ngwetu Mwangana uze vavuluka muchifwanyisa echi. Vaze vavuluka ngwavo ‘vandumbu jaMwangana’ vapwa malunga namapwevo vawavisa, vaze navakayula hamwe naKulishitu mwilu. (Loma 8:16, 17) Kaha ‘mikoko navapembe’ vemanyinako vatu vakumafuchi osena. Ava vatu kavavawavisa nashipilitu yajilako. Uno lwola muka navakavasopesa? Kusopesa kana nachikapwako kumakumishilo aluyando lwalunene luli nakwiza. Uno vyuma muka navikalingisa vatu vamwe vakavavuluke ngwavo mikoko veka ngwavo vapembe? Chili kutwamiso yavo vali nakutwaminamo navandumbu jaKulishitu vawavisa hano hamavu. Omu kukuma chakatwamino kamyaka yino chili nakupandama hakamwihi, tuli nakusakwilila Yehova hakutukafwa chikoki chikoki mangana tutachikize kanawa echi chifwanyisa navifwanyisa vyeka vize vasoneka hali Mateu kapetulu 24 na 25.

8, 9. Mwomwo ika mikoko navakavavulukila ngwavo “vaka-kwoloka”?

⁸ Muchifwanyisa chamikoko navapembe, Yesu kavuluka hatoma mulimo wakwambululako. Jino mwomwo ika natwambila ngwetu echi chifwanyisa chasolola nge mulimo wakwambulula wapwa waulemu?

⁹ Chatete, tachikizenu ngwenu Yesu apwile nakunangula chishina chimwe kuzachisa chifwanyisa. Kapwile nakuhanjika hamulimo uvene wakuhandununa mikoko kuvapembeko. Kaha nawa Yesu kapwile nakulumbununa ngwenyi vatu vosena vaze navakavuluka ngwavo mikoko vatela kulisa vandumbwenyi vawavisa, nakuvavwika, nakuvazakama, nakuvatambukila kachi nge vali nakuviza chipwe nge vali mutumengako. Oloze Yesu mwakavuluka ava mikoko vachifwanyisa kupwa “vaka-kwoloka” mwomwo vali nakumona vawavisa vaze vachili hano hamavu kupwa chikupu hivandumbu jaKulishitu, kaha ava mikoko vali nakuliluula nakukafwa ava vawavisa mumakumbi ano akukuminyina amakalu.—Mateu 10:40-42; 25:40, 46; Chimo. 2, 3:1-5.

10. Uno mikoko vatela kukafwa ngachilihi vandumbu jaKulishitu?

¹⁰ Chamuchivali, achitalenu hamujimbu wosena apwile nakuhanjika Yesu. Apwile nakuhanjika vyachinjikizo chakukatachikijilaho kupwako chenyi nachikukulwishi chakatwamino kamyaka yino. (Mateu 24:3) Kumaputukilo achechi chihande chenyi, Yesu avulukile chuma chachilemu chize nachikasolola kupwako chenyi ngwenyi, mujimbu wamwaza waWangana “navakawambulula hamavu hosena.” (Mateu 24:14) Kaha nawa shimbu kanda ahanjike echi chifwanyisa chamikoko navapembe, ahanjikile chatete chifwanyisa chajitalende. Nganomu twashimutwilanga muchihande chinafumuho, Yesu ahanjikile echi chifwanyisa mangana akolezeze tumbaji twenyi vawavisa vaze avulukile ngwenyi ‘vandumbwenyi’ mangana vazate nangolo mulimo wakwambulula. Oloze vawavisa vaze vanasale hano hamavu vanapu vavandende chikuma, kaha mulimo vavahana wakwambulila “vaka-mafuchi osena” shimbu kanda kukuma chizenga, waunene chikuma. Echi chifwanyisa chamikoko navapembe chasolola nge vatu vaze navakavuluka ngwavo “mikoko” vatela kukafwa ava vandumbu jaYesu vawavisa. Kaha jila yimwe yamwaza yakukafwilamo ava vandumbu jaKulishitu shina kwazana mumulimo wakwambulula. Uno twatela kukumina kaha hakuhana jimbongo jakukundwiza mulimo wakwambulula, nakuvakolezeza vazate nangolo mulimo kanou nyi?

11. Chihula muka tunahase kulihulisa, kaha mwomwo ika?

¹¹ Makumbi ano, tumbaji twaYesu vanavulu nakuheta kafwe jimiliyoni 8, kaha vavavulu kavapwa vakuwavisa nashipilituko. Yesu kavahana jitalende jize ahana vandungo yenyi vawavisako. (Mateu 25:14-18) Ngocho vamwe vanahase kulihulisa ngwavo, ‘Kachi nge Yesu kanguhana jitalendeko, kaha mwomwo ika ngwatela kuzata ou mulimo wakwambulula?’ Tutalenu vyuma vimwe vyalingisa tukukulule ngwetu navaze kavawavisako vatela kuzata mulimo wakwambulula.

12. Vyuma muka natulinangula kumazu aYesu aze vasoneka hali Mateu 28:19, 20?

¹² Yesu alwezele tumbaji twenyi vosena ngwenyi vatela kwambulula. Omu Yesu vamusangwile, alwezele vaka-kumukavangiza vayenga nakutunga tumbaji nakuvanangula valamenga “vyuma vyosena” vize avalwezele. Vyuma vimwe avalwezele vize vatelelele kulweza ava tumbaji vavahya shina kuzata mulimo wakwambulula. (Tangenu Mateu 28:19, 20.) Ngachize, tumbaji twaKulishitu vosena vatela kwambulula, numba vapwa nalutalililo lwakukayoyela mwilu chipwe hano hamavu.—Vili. 10:42.

13. Uno chakumwenesa amwene Yowano chasolola vyuma muka, kaha mwomwo ika?

¹³ Mukanda waKusoloka wahanjika nge mulimo wakwambulula navauzatanga kuli vaze vawavisa navatu veka. Yesu alwekesele kaposetolo Yowano chakumwenesa ‘chamwenga’ uze ali nakusanyika vatu vezenga nakutambula “meya akuyoya awana.” Ou mwenga emanyinako vaze vawavisa 144,000 vaze navakayula hamwe naKulishitu mwilu. (Kuso. 14:1, 3; 22:17) Awa meya achifwanyisa emanyinako wana wandando yakusokola yaKulishitu uze naukakafwa vatu vakayoye chakuzeneka shili nakufwa. (Mateu 20:28; Yowa. 3:16; Yowa. 1, 4:9, 10) Vaze vawavisa vali nakunangula vatu natwima vyandando kaneyi yakusokola nomu vanahase kunganyala kundando kana. (Koli. 1, 1:23) Oloze muchakumwenesa echi, Yowano amwene nawa vatu veka vaze kavapwa mulizavu lyamwengako. Navakiko vavalweza kwamba ngwavo, “Twaya!”  Veji kwononokanga nakusanyika vatu vezenga nakutambula meya akuyoya awana. Eli lizavu lyamuchivali lyemanyinako vaze vatwama nalutalililo lwakukayoyela hano hamavu. Ngocho, echi chakumwenesa chasolola hatoma nge vosena vaze veji kwitavilanga mutambi wakuvasanyika ngwavo “twaya,” navakiko vakwechi mulimo wakwambulilako vakwavo.

14. Uno kwononoka “lushimbi lwaKulishitu” chasakiwa tulinge ika?

¹⁴ Vosena vaze veji kwononokanga “lushimbi lwaKulishitu” vatela kwambulula. (Ngale. 6:2) Yehova asaka vaka-kumulemesa vosena vononokenga jishimbi jojimwe. Chakutalilaho, alwezele vaIsalele ngwenyi: “Kuli mutu wakusemukila mulifuchi lyenu nakuli mwiza uze ali nakutwama nayenu kukapwe lushimbi lumwe.” (Kulo. 12:49; Levi 24:22) Vaka-Kulishitu kaveshi kukavangiza Jishimbi jaMose josenako. Oloze tuvosena numba tupwa vawavisa chipwe tumikoko veka, twatela kwononoka “lushimbi lwaKulishitu.” Lushimbi kana lwatalisa kuvyuma vyosena vize anangwile Yesu. Chuma chachilemu anangwile Yesu shina chakwamba ngwenyi vaka-kumukavangiza vatela kupwa nazangi. (Yowa. 13:35; Yako. 2:8) Kaha jila yimwe tweji kusolwelangamo ngwetu twazanga Kalunga naKulishitu navakwetu vatu shina kwambulula mujimbu wamwaza waWangana.—Yowa. 15:10; Vili. 1:8.

15. Mwomwo ika natwambila ngwetu vaka-kukavangiza Yesu vosena vatela kwononoka lushimbi lwakwambulula?

¹⁵ Vyuma ahanjikilenga Yesu kuli tumbaji twenyi vavandende lwola lumwe vyatalishile nakuli tumbaji vavavulu. Chakutalilaho, Yesu alikashile chivwasano chaWangana natumbaji twenyi 11 kaha, oloze echi chivwasano chatalisa kuli vaze 144,000 vosena. (Luka 22:29, 30; Kuso. 5:10; 7:4-8) Kaha nawa omu Yesu asangukile, vaka-kumukavangiza vavandende kaha vakiko vapwileko omu avahanyine lushimbi lwakwambulula. (Vili. 10:40-42; Koli. 1, 15:6) Oloze tumbaji twenyi vakushishika vosena vamulikulukaji lyamyaka lyakulivanga vatachikijile ngwavo navakiko vatela kwambulula numba tuhu kavapwileko omu Yesu ahanyine elu lushimbi. (Vili. 8:4; Petu. 1, 1:8) Chochimwe namakumbi ano, twatachikiza ngwetu twatela kwambulula, numba tuhu katwevwile Yesu mwatulweza tuzate ou mulimoko. Etu vaka-kwambulula Wangana tunahete jino jimiliyoni 8. Twatachikiza ngwetu kachi nge natwambulula, natusolola ngwetu twafwelela chikupu muli Kulishitu.—Yako. 2:18.

16-18. Uno tunahase kukafwa ngachilihi vandumbu jaKulishitu, kaha mwomwo ika twatela kulingila ngocho oholili vene ngana?

¹⁶ Satana ali nakulwa jita navandumbu jaKulishitu vawavisa vaze vanasale hano hamavu, kaha mwatwalaho lika kuvanyemukila mwomwo kaze “kashimbu kakandende” vamuhana kali nakuya nakukuma jino. (Kuso. 12:9, 12, 17) Numba tuhu vawavisa vali nakumona vyeseko vyavinene, oloze mulimo wakwambulula uli nakuzovoloka chikuma makumbi ano. Pundu vene, Yesu ali navakiko, kaha nawa ali nakuvatwaminyina.—Mateu 28:20.

¹⁷ Etu navakavuluka ngwavo mikoko, etu tuli nakuvulilako lika, twachimona kupwa hikutokwa kukafwa vandumbu jaKulishitu mumulimo wakwambulula. Tweji kuvakafwanga nawa hakuhana jimbongo jakukundwiza mulimo kana, nahakuzata nangolo milimo yakutunga jiZuvo jaWangana, najiZuvo jaKukunguluka Chachinene, namitango. Kaha nawa nge natwononoka nakuliluula kuli vakulwane navandumbwetu veka vaze vatongola kuli “ndungo wakushishika wakuzangama,” kaha natusolola ngwetu twasaka kukafwa vandumbu jaKulishitu.—Mateu 24:45-47; Hepe. 13:17.

¹⁸ Kalinwaha vandumbu jaKulishitu vaze vachili hano hamavu vavalamike tutachikijilo twamakumishilo. Kufumaho, vangelo navakecha jize jipeho jiwana jahamavu, kaha luyando lwalunene nalukaputuka. (Kuso. 7:1-3) Shimbu kanda jita yaAlamangetone yiputuke, Yesu mwakambata vawavisa nakuya navo mwilu. (Mateu 13:41-43) Kachi nge tuli nakusaka vakatuvuluke ngwavo mikoko omu mwakeza Yesu, kahanyi luno lukiko lwola twatela kuliluula nakukafwa vandumbu jaKulishitu.