1, 2. (a) Isua chuan a ṭhian hnai takte hnênah eng tehkhin thu nge a hrilh? (A thupui chunga milem en rawh.) (b) Kêl leh berâm tehkhin thu chungchângah eng nge kan hriat ngai?

ISUA chuan a ṭhian hnai tak Petera te, Andria te, Jakoba te, leh Johana te chu a bia a. Anni chuan Isua’n bâwih rinawm leh fing tak tehkhin thu te, nula thianghlim sâwm tehkhin thu te, leh talent tehkhin thu te a sawi chu an hre tawh a ni. Isua chuan a thusawi chu tehkhin thu dang pakhatin a titâwp a. “Hnam zawng zawng” chunga rorêl tûra “mihring Fapa” a lo kal hun tûr chungchâng a sawi a ni. He tehkhin thu hian a zirtîrte chu a va tiphûr dâwn êm! Tehkhin thu-ah Isua chuan pâwl pahnih chanchin a sawi a, kêl leh berâm angin a ṭhen hrang a. Chu bâkah, “Lalber” tâna ‘unaute’ anga sawi pâwl pathumna pawimawh tak chu a târ lang bawk a ni.—Matthaia 25:31-46 chhiar rawh.

² Isua’n mite nakin hun tûr chungchâng a sawi avângin, Jehova mite chuan hun rei tak ata tawh he tehkhin thu hi an lo ngaihven hle a. Isua chuan boral hlen tûr an awm laiin chatuana nung tûrte pawh an awm thu a târ lang a ni. Kan nun chu Isua sawi  thutakte kan hriatthiam a, kan nunpui dânah a innghat a. He thuziakah hian hêng zawhnate hi sawiho a ni ang: Engtin nge Pathian Jehova’n he tehkhin thu kan hriatthiamna chu zâwi zâwia a tihfiah? He tehkhin thu hian thu hrilh rawngbâwlna a pawimawhzia a sawi uar tih engvângin nge kan sawi theih? Tute’n nge thu hril tûrin mawhphurhna chu dawng? Engvângin nge tûn hi “Lal” leh, Lalin ‘ka unaute’ tia a kohte chunga rinawm hun a nih?

3, 4. (a) Kêl leh berâm tehkhin thu hre thiam tûrin eng thilte nge kan hriat ngai? (b) Kum 1881 chhuak Zion’s Watch Tower-in engtin nge he tehkhin thu hi a lo hrilhfiah?

³ Kêl leh berâm tehkhin thu dik taka hre thiam tûr chuan, thil pawimawh tak pathum kan hriat a ngai a, chûngte chu: tehkhin thu-a sawi lante nihna, rorêlna hun, leh kêl a nih loh leh berâm anga ngaih an nih chhante chu a ni.

⁴ Kum 1881 chhuak Zion’s Watch Tower chuan “Lalber” tia koh bawk “mihring Fapa” chu Isua a ni tih a târ lang a. Bible Zirlai hmasate chuan King James Version-a “ka unaute” tih chu Krista nêna rorêl tûrte sawina a nih bâkah, lei nun ṭha famkim nei zawng zawngte sawina niin an hre thiam a ni. Anni chuan kêl zîng ata berâm hlîrna chu Krista Kum Sâng Rorêl chhûnga thleng tûr angin an ngai a. Chu bâkah, anni chuan mite chu Pathian hmangaihna dân anga an nun avânga berâm ang mite ni tûrah an ngai a ni.

5. Kum 1920 chho bâwr vêl khân, kan hriatthiamna chu eng anga siam ṭhat nge a nih?

⁵ Kum 1920 chho tîr lamah, Jehova chuan a mite chu he tehkhin thu hre fiah lehzual tûrin a ṭanpui a. Vênnainsâng [English] October 15, 1923 chhuak chuan “mihring Fapa” chu Isua a ni tih a nemnghet a ni. Mahse, chu chuan Krista unaute nihna a rawn sâwr zîm a, anni chu amah nêna vâna rorêltu tûrte chauh an ni a, berâmte tih chu Krista Lalram rorêlna hnuaia lei lam beiseina neite an nih thu Bible ṭanchhanin ṭha takin a hrilhfiah a ni. Kêl leh berâm hlîr hun chungchângah eng nge a sawi? Thuziak chuan, Krista unaute’n vânah Kum Sâng Rorêlnaah Isua an rêlpui dâwn avângin, chu mi hunah chuan leia awm tûrte tân anni chu ṭanpui theih emaw, ngaihthah theih emaw a ni lo va. Chuvângin, kêl zîng ata berâm hlîrna chu Kum Sâng Rorêlna inṭan hmain a thleng ang tih a târ lang a ni. Mi chu berâm ang a nih chhan chungchângah, thuziak chuan miin Isua chu Lala a pawm a, Lalramin dinhmun ṭha zâwk a thlen ang tih a beisei avângin berâm anga pawm a ni ang tiin thu tâwp a siam a ni.

6. Kum 1990 chho bâwr vêl khân, kan hriathiamna chu eng anga siam ṭhat nge a nih?

⁶ Chu hriatthiamna thar avângin, Jehova mite chuan, he khawvêl suaksual tâwpa Lalram thuchah an chhân lêt dân azirin, mite chu kêl, a nih loh leh berâm anga rorêlsak an ni ang tih an ring a ni. Mahse, kum 1990 chho lai hâwl vêlah chuan kan hriatthiamna chu siam ṭhat a ni leh a. October 15, 1995, Vênnainsâng [English] thuziak pahnihah chuan Matthaia 24:29-31 (chhiar rawh) leh Matthaia 25:31, 32-a chuang Isua thusawi inanna laite chu a târ lang a ni. (Chhiar rawh.) * Eng thu tlûkna nge kan siam theih? Thuziak hmasa zâwk chuan: “Kêl leh berâm chunga rorêlna chu nakin huna lo la thleng tûr a ni,” a ti. Eng hunah nge ni ang? “Chu chu Matthaia 24:29, 30-a sawi ‘hrehawm nasa tak’ a inṭan hnu, mihring  Fapa chu ‘a ropuina nêna’ a lo kal hunah a ni ang. . . . Tichuan, he khawvêl suaksual tâwpah, Isua chuan rorêlna chu chelhin ro a rêl ṭan ang.”

7. Tûnah eng hriatthiamna fiah tak nge kan neih?

⁷ Tûnah chuan, kêl leh beram tehkhin thu chu fiah takin kan hre thiam tawh a. Chûng thu-a tel mite nihna chungchângah, Isua chu Lalber, “mihring Fapa” a ni. “Ka unaute” a tih hian vâna Krista nêna rorêltu tûr thlarauva hriak thih unaunu leh unaupate a kâwk a ni. (Rom 8:16, 17) “Kêl” leh “berâm” chuan hnam zawng zawnga mi tinte a kâwk a. Anni chu thlarau thianghlima hriak thih an ni lo. An chunga rorêlna chu eng hunah nge a lo thlen ang? Chu chu lo thleng mai tawh tûr hrehawm nasa tak tâwp lamah a ni ang. A nih chuan, mi chu kêl, a nih loh leh berâm anga rorêlsak an nih chhan chu eng nge ni? Leia Krista hriak thih unau a la bângte an cheibâwl dânah a innghat a ni. He kal hmang tâwpna a hnaih tawlh tawlh rual hian, Pathian Jehova’n he tehkhin thu leh Matthaia bung 24 leh 25-a chhinchhiah tehkhin thu dangte min hriatthiamtîr avângin kan va lâwm tak êm!

8, 9. Engvângin nge berâmte chu “mi fel” tia koh an nih?

⁸ Kêl leh berâm tehkhin thu-ah, Isua chuan thu hrilhna chungchâng chu a sawi lang fak lo va. A nih chuan, engvângin nge chu chuan thu hrilh a pawimawhna uar takin a târ lang kan tih theih?

⁹ A hmasa berah chuan, Isua’n tehkhin thu hmangin a zirtîr tih chhinchhiah ang che. Ani chuan kêl leh berâm tak takte hlîr chungchâng a sawi lo tih a chiang hle si a. Chutiang bawkin, berâm anga ruat tûrte chuan Isua unaute zînga tuemaw ber hnênah ei tûr leh sin tûrte pe tak takin, enkawlin tân inahte an kan tak tak ang a tihna a ni lo. Chu aimahin, ani chuan entîrnei berâmte neih tûr rilru put hmang a sawina zâwk a ni. Berâmte chuan Krista’n leiah hriak thih unau a nei tih an hriat avâng leh, he ni hnuhnûng hun khirh tak chhûnga hriak thihte rinawm taka an ṭanpui avângin, anni chu Isua’n “mi fel” tiin a ko a ni.—Mt. 10:40-42; 25:40, 46; 2 Tim. 3:1-5.

10. Engtin nge berâmte chuan Krista unaute chungah ngilneihna an lantîr theih?

¹⁰ A pahnihnaah chuan, Isua thusawia a chhehvêl thute hi ngaihtuah ang che. Ani chuan a lo awm lehna leh khawvêl tâwpna chhinchhiahna chungchâng a sawi a ni. (Mt. 24:3) A thusawi hmasa lamah, Isua chuan chhinchhiahna danglam tak a sawi a—Lalram chanchin ṭha chu “khawvêl zawng zawngah hrilhin a awm ang,” tiin. (Mt. 24:14) Tin, kêl leh berâm tehkhin thu a sawi hmain, talent tehkhin thu a sawi bawk. Thuziak hmasaa kan sawiho tawh angin, Isua’n chu tehkhin thu a sawi chhan chu “a unaute,” thlarauva hriak thih a zirtîrte chu thu hrilh rawngbâwlnaah ṭhahnemngai takin an tel tûr a ni tih sawi uar nân a ni. Mahse, Krista a lo awm leh chhûnga awm leia hriak thih tlêm tê chuan harsatna nasa tak leh lian tham tak an tâwk a—chu chu, tâwpna a lo thlen hmaa “hnam zawng zawng” hnêna thu hrilh zawh vek a ni. Kêl leh berâm tehkhin thu chuan hriak thihte’n ṭanpuina an dawng dâwn tih a târ lang. Chuvângin, berâm anga an chungthu rêlsak tûrte chuan Krista unaute chunga ngilneihna an lantîr theih dân bul ber chu thu hrilh rawngbâwlnaa anmahni ṭanpui hi a ni. Chutiang ṭanpuinaah chuan eng nge tel? An tîsa lam mamawh pêk leh thlamuanna pêk ringawt mai nge ni a, thil dang a la ngai tel zâwk?

11. Eng zawhna nge lo chhuak thei a, engvângin nge?

¹¹ Tûn laia Isua zirtîr mi maktaduai riatte chu thlarauva hriak thih an ni lo va. Isua’n hriak thih a bâwihte hnêna a pêk talent-te chu an dawng ve lo. (Mt. 25:14-18) Chuvângin, zawhna lo chhuak ta chu, ‘Thlarauva hriak thih ni ve lote chuan thu hril tûrin mawhphurhna an nei tak tak em le?’ tih a ni. An neih chhan tam takte zînga ṭhenkhat chu i lo en ang u.

12. Matthaia 28:19, 20-a chhinchhiah Isua thusawi aṭangin eng nge kan hriat theih?

¹² Isua’n a zirtîr zawng zawngte chu thu hril tûrin thu a pe. A thawhleh hnuah, Isua chuan a hnungzuite chu zirtîr siam tûr leh, a thupêk “zawng zawng” pawm tûra zirtîr tûrin a hrilh a. Chûng thupêk zîngah chuan thu hril tûra mawhphurhna pawh a tel a ni. (Matthaia 28:19, 20 chhiar rawh.) Chuvângin, an beisei chu vâna rorêl a ni emaw, leia nun a ni emaw pawh ni se, Krista zirtîr zawng zawngte chuan thu an hril tûr a ni.—Tirh. 10:42.

13. Johana hmuh inlârna chuan eng nge a târ lan a, engvângin nge?

¹³ Thu Puan bu chuan thu hrilhna chu hriak thihte leh mi dangte hmanga thawh a ni ang tih a târ lang. Isua chuan tirhkoh Johana chu inlârnaah “mo,” Krista nêna vâna rorêl tûr hriak thih 1,44,000-te’n mite hnêna ‘nunna tui a thlâwna la’ tûra an sâwm lai chu a hmuhtîr a. (Thup. 14:1, 3; 22:17) Chu entîrnei tui chuan, Krista tlanna inthawina zâra sual leh thihna ata zalên tûra Pathian Jehova ruahmanna siam chu a kâwk a ni. (Mt. 20:28; Joh. 3:16; 1 Joh. 4:9, 10) Tlanna chu kan thu hrilhnaa thu pawimawh tak a ni a, hriak thihte chuan mite’n tlanna an hlâwkpui theih dân zirtîrna kawngah hma an hruai a ni. (1 Kor. 1:23) Mahse, inlârnaah Johana chuan mo pâwl ni lo, pâwl dangte pawh a hmu a. Anni pawh, “Lo kal rawh!” tia sawi ve tûra tih an ni. Anni  chuan thu âwih takin mi dangte chu nunna tui la tûrin an sâwm lehchhâwng a. He pâwl pahnihna hi leia nun beiseina neite an ni. Chuvângin, he inlârna hian “lo kal rawh” tih sâwmna pawm zawng zawngte’n mi dangte hnêna thu hrilh theihna chanvo an nei tih a târ lang chiang hle.

14. “Krista dân” zawmnaah chuan eng nge tel?

¹⁴ “Krista dân” hnuaia awm zawng zawngte chuan thu an hril tûr a ni. (Gal. 6:2) Jehova chuan dân chihnih a nei lo va. Entîr nân, ani chuan Israel mite hnênah: “Chu mi rama piang leh, hnam dang in zînga awmte tân hian dân angkhat a awm tûr a ni,” tiin a hrilh a. (Ex. 12:49; Lev. 24:22) Kristiante chu Mosia Dân hnuaiah an awm lo va. Mahse, kan vai hian hriak thih kan ni emaw, ni lo emaw pawh ni se, “Krista dân” hnuaiah kan awm a ni. Chu dânah chuan Isua zirtîrna zawng zawng a tel a. Isua zirtîrna zînga langsâr ber chu a hnungzuitute chuan hmangaihna an lantîr tûr a ni tih hi a ni. (Joh. 13:35; Jak. 2:8) Chu bâkah, Pathian, Krista, leh kan ṭhenawmte kan hmangaihzia kan lantîr theih dân kawng pawimawh tak pakhat chu Lalram chanchin ṭha hrilh hi a ni.—Joh. 15:10; Tirh. 1:8.

15. Isua thupêk chu a hnungzuitu zawng zawngte tân a ni tih engvângin nge kan sawi theih?

¹⁵ Mi tlêm tê hnêna Isua thusawi chu mi tam tak tân pawha hman theih a ni. Entîr nân, Isua chuan zirtîr 11-te chauh chu Lalram thuthlung thlunpui mah se, chu thuthlung chu 1,44,000-te tân a ni. (Lk. 22:29, 30; Thup. 5:10; 7:4-8) Chutiang bawkin, thu hril tûrin Isua’n a hnungzuitu tlêm tête—a thawhleh hnua an hnêna a inlârnate—hnênah thu a pe a. (Tirh. 10:40-42; 1 Kor. 15:6) Mahse, kum zabi khatnaa a hnungzuitu rinawm zawng zawngte chuan Isua thusawi chu an beng ngeiin hre lo mah se, an tân pawh a ni tih an hria a ni. (Tirh. 8:4; 1 Pet. 1:8) Chutiang bawkin tûn laiah pawh, Isua chuan Lalram thu hriltu maktaduai riatte chu thu hril tûrin a mi mal takin a be lo va. Mahse, anni chuan Krista an ring tûr a ni tih leh, chu an rinna chu thu hrilhna hmanga târ lang tûr an ni tih an hria a ni.—Jak. 2:18.

16-18. Engtin nge berâm nih inbeiseite chuan Krista unaute chu an ṭanpui a, engvângin nge tûnah an tih a ngaih?

¹⁶ Setana chuan leia awm Krista hriak thih unau a la bângte chu a do va, a hun neih “tlêm tê chauh” chu a ral thuai dâwn avângin a do nasa lehzual dâwn a ni. (Thup. 12:9, 12, 17) Fiahna nasa tak kârah pawh, hriak thihte chuan thu hrilhna campaign ropui berah hma an hruai a. Isua chuan a awmpuiin, theih tâwp an chhuahnaah a kaihruai tih rinhlelh rual a ni lo.—Mt. 28:20.

¹⁷ A ni têla pung chho zêl berâmte chuan thu hrilhnaah mai ni lo va, kawng dang pawha Krista unaute ṭanpui chu chanvo hlu angin an ngai a ni. Entîr nân, anni chuan thawhlâwmte thawhin, Kingdom Hall sakna te, Assembly Hall sakna te, leh branch office sakna te an ṭanpui a; chu bâkah, hma hruai tûra “bawi rinawm, fing tak” ruatte kaihhruaina chu rinawm takin an zâwm bawk a ni.—Mt. 24:45-47; Heb. 13:17.

¹⁸ Rei lo têah vântirhkohte chuan hrehawm nasa tak thlentîrtu tûr tihboralna thlipui chu an thlah ang. Hei hi leia a la bâng Krista hriak thih unaute’n chhinchhiahna hnunhnûng ber an dawn hunah a lo thleng ang. (Thup. 7:1-3) Armageddon a lo thlen hmain, hriak thihte chu vânah lâk chhoh an ni ang. (Mt. 13:41-43) Chuvângin, tûn hi berâm anga rorêlsak beiseina neite tân Krista unaute rinawm taka ṭanpui hun a ni. (w15-E 03/15)