1, 2. 1) ¿Tijatyë Jesus tyukmëtmaytyak ja myëtnaymyaayëbëty? (Ixë dibujë mä tsyondaˈaky.) 2) ¿Tiko jyëjpˈamëty nnijäˈäwëm wiˈix yajnimaytyaˈaky ja borreegë mëdë tsyiibë?

JESUS yëˈë nety tëgok tyukmëtmaytyakypy ja myëtnaymyaayëbë Pedro, Andrés, Santiago etsë Juan, ja ijxpajtën mä yajnimaytyaˈaky ja tuumbë diˈib kuwijy, ja nimäjkpë toˈoxyˈënäˈk ets ja talentë. Ta net tnimaytyaky jatuˈugë ijxpajtën, mä yajmaytyaˈaky ko myinäˈäny ja “Naxwinyëdë Jäˈäyëtyë Kyudënaabyë” ets tpayoˈoyaˈanyë jäˈäy. Ets ko dyajnaywyäˈkxäˈänyëty majtsk grupë “nidëgekyë naxwinyëdë jäˈäyëty”. Tuk grupë dyajnaxäˈäny extëmë “borreegë” ets ja tuk grupë extëmë “tsyiibë”. Perë Jesus nan ojts tmaytyaˈaky jatuˈugë grupë: ja myëguˈuktëjk (käjpxë Matewʉ 25:31-46).

² Ëtsäjtëm nan nnijawëyäˈänëm wiˈix yajnimaytyaˈaky ja ijxpajtën diˈibë Jesus myaytyak. ¿Tiko? Yëˈko Jesus jyënany ko näägë jäˈäy jukyˈatandëp winë xëë etsë wiinkpëty kutëgoyandëp. Pääty jyëjpˈamëty nnijäˈäwëm wiˈix nyikejy ets  ti mbäät nduˈunëm parë njukyˈäjtëm winë xëë. Nan jëjpˈam ets nnijäˈäwëm wiˈix yaˈˈatsoojëmbityë tyäˈädë yajtëˈëwën: ¿Wiˈixë Jyobaa të xypyudëjkëm parë njaygyujkëm ja ijxpajtën diˈibë Jesus myaytyak? ¿Wiˈix nnijäˈäwëm ko tyäˈädë ijxpajtën yëˈë xytyukˈijxëm ko jëjpˈam parë ngäjpxwäˈkxëm? ¿Pënaty mbäät kyäjpxwäˈkxtë? Ets ¿tiko jyëjpˈamëty xëmë nmëduˈunëmë Dios ets nbudëjkëmë Jesus mëdë myëguˈuktëjk?

3, 4. 1) ¿Ti tëgëk pëky mbäät nnijäˈäwëm parë njaygyujkëm mä yajnimaytyaˈaky ja borreegë etsë tsyiibë? 2) Mä rebistë diˈib 1881, ¿wiˈix tnimaytyaky ja borreegë etsë tsyiibë?

³ Parë njaygyujkëm ti yˈandijpy mä yajnimaytyaˈaky ja borreegë etsë tsyiibë, min nˈokˈijxëm tëgëk pëky. Myëduˈuk, ¿pën yajtijp ja “Naxwinyëdë Jäˈäyëtyë Kyudënaabyë”, ja myëguˈuktëjk, ja borreegë etsë tsyiibë? Myëmajtsk, ¿näˈä ja “Naxwinyëdë Jäˈäyëtyë Kyudënaabyë” twinˈixäˈäny pënaty borreegë etsë tsyiibë? Ets myëdëgëëk, ¿tiko näägë jäˈäy dyajnaxäˈäny extëmë borreegë o tsyiibë?

⁴ Mä jëmëjt 1881, tyäˈädë rebistë tnimaytyaky ko ja “Naxwinyëdë Jäˈäyëtyë Kyudënaabyë”, yëˈë yajtijpë Jesus. ¿Pën yajtijp ja myëguˈuktëjk? Tyäˈädë rebistë tnimaytyaky ko yëˈë pënaty mëdë Jesus yˈanaˈamäˈäny jam tsäjpotm ets nanduˈun pënaty jukyˈatandëp yä Naxwiiny ko nety të jyëmbittë wäˈäts jäˈäy. ¿Näˈä netyë Jesus twinˈixäˈäny pënaty näjxtëp extëmë borreegë etsë tsyiibë? Jaa mä nety yˈaneˈemy Tuk Mil Jëmëjt. ¿Ets tiko nety näägë jäˈäy dyajnaxäˈäny extëmë borreegë? Yëˈko të nety dyaˈixëdë mä jyukyˈäjtën ko tsyojktëbë Dios.

5. Mä rebistë diˈib 1923, ¿wiˈix yajnimaytyaky ja borreegë etsë tsyiibë?

⁵ Ko tiempë nyajxy, ta Jyobaa tpudëjkë pënaty mëduunëp parë yajxon tjaygyukëdët ti Jesus myaytyak. Ets ja ojts yajkäjpxˈoyë mä La Atalaya 15 äämbë oktuubrë 1923, jap tnimaytyaky ko ja “Naxwinyëdë Jäˈäyëtyë Kyudënaabyë” yëˈë yajtijpë Jesus. Per ¿pënë nety yajtijp ja myëguˈuktëjk? Yëˈëyë pënaty mëët yˈanaˈamäˈäny jam tsäjpotm. Ets ¿pën näjxp extëmë borreegë? Pënaty jukyˈatandëp yä Naxwiiny mä Jesus yˈanaˈamäˈäny. ¿Näˈä Jesus twinˈixäˈäny ko yëˈëjëty duˈun extëmë borreegë? Jaa ko netyë Jesusë myëguˈuktëjk yˈakjukyˈattë yä Naxwiiny, mä kyaˈˈanaˈamtsondaˈakynyëm Tuk Mil Jëmëjt. ¿Tiko? Yëˈko pënaty jukyˈatandëp yä Naxwiiny pyudëkëyandëp ja Jesusë myëguˈuktëjk mientrës jyukyˈattë yä Naxwiiny. Ets ¿tiko nyaxäˈändë extëmë borreegë? Mët ko tmëbëktë Jesus ets ko Diosë yˈAnaˈam Kutujkën yëˈë yajminaambyë jotkujkˈäjtën.

6. ¿Wiˈixë tyäˈädë ijxpajtën ojts yajnimaytyaˈaky mä rebistë diˈib 1995?

⁶ Jeky të nmëbëjkëm ko jaa jäˈäy nyaxtë extëm borreegë pën myëdooˈijttëbë Diosë yˈayuk, ets pën kyaj, ta nyaxtë extëmë tsyiibë. Per mä rebistë La Atalaya 15 äämbë oktuubrë 1995, ta yajkäjpxˈoˈoyë. Jap ojts yaˈijxkijpxyë Matewʉ 24:29-31 mëdë Matewʉ 25:31, 32 (käjpx). Ets tnimaytyaky ko Jesus ja tpayoˈoyaˈanyë jäˈäy ko myinët “mët niˈigyë mëjˈäjtën” ko nety tyuny jyatyëty ja mëk ayoˈon. *

7. ¿Wiˈix yajnimaytyaˈaky ja tsyiibë mëdë borreegë? Oknimaytyäˈäk.

 ⁷ Tyam yajxon njaygyujkëm wiˈix nyikejˈyë tyäˈädë maytyaˈaky. ¿Pën yajtijp ja “Naxwinyëdë Jäˈäyëtyë Kyudënaabyë”? Yëˈë Jesus. ¿Pën yajtijp ja myëguˈuktëjk? Yëˈë pënatyë Jyobaa të wyinˈixëdë mët yëˈëgyëjxmë myëjää ets yˈanaˈamäˈändë mëdë Jesus jam tsäjpotm (Romanʉs 8:16, 17). ¿Pënaty yajtijp tsyiibë etsë borreegë? Yëˈë jäˈäy diˈib yajpatp mä tukëˈëyë nax käjpn. ¿Näˈä yajpayoˈoyäˈändë? Ko nety jyëjpkëxanë ja mëk ayoˈon, diˈib tim tsojk tsondäˈägäämp. ¿Ets wiˈix nyigëxëˈëgäˈäny pën näjxp extëmë tsyiibë o borreegë? Jesus yëˈë yˈixaampy wiˈixë nety të tpudëkëdë pënaty nëjkxandëp tsäjpotm diˈib akwëˈëmdëp yä Naxwiiny. Ngukäjpxëmë Jyobaa ko xytyukjaygyujkëm wiˈix nyikejˈyë tyäˈädë maytyaˈaky ets diˈib yajnimaytyakp mä Matewʉ kapitulo 24 etsë 25.

8, 9. ¿Tiko Jesus ojts dyajnaxy ja borreegëty extëm diˈib “jikyˈäjttëp tëyˈäjtën mëët”?

⁸ Ko Jesus tmaytyaky ja tsyiibë mëdë borreegë yëˈë xytyukniˈˈijxëm ko jëjpˈam ets ngäjpxwäˈkxëm, oy tkakuwijtsë mä tyäˈädë maytyaˈaky. ¿Wiˈix nnijäˈäwëm?

⁹ Jesus kyaj yëˈë tjantsy myaytyäˈägany ja tsyiibë mëdë borreegë, jeˈeyë ojts dyajtuny extëmë ijxpajtën. Pääty parë näjxëm extëmë borreegë nan kyaj yëˈë tˈandijy ko tsojkëp nyajkäˈäy nyaˈukëm pënaty nëjkxandëp tsäjpotm, nmoˈoyëmë wyit nyijam, nguentˈäjtëm ko pyëk yˈixëdët o nguˈijxëm ko yˈittët pujxndëgoty. Pääty, ¿ti Jesus myaytyäˈägan? Ko yëˈë yajnaxaampy extëmë borreegë pënaty yˈëxkäjptëp ja Jesusë myëguˈuktëjk ets pyudëjkëdëp mä tiempë jyëjpkëxanë. Päätyë Jesus nanduˈun yajnaxëdë extëm “diˈibë jikyˈäjttëp tëyˈäjtën mëët” (Matewʉ 10:40-42; 25:40, 46; 2 Timotee 3:1-5).

10. ¿Wiˈix mbäädë borreegë tpudëkëdë ja myëguˈuktëjkë Jesus?

¹⁰ Per ¿tiko nety dyajtëgoyˈattë naybyudëkë ja Jesusë myëguˈuktëjk? Min nˈokˈijxëm. Mä netyë Jesus tkanimaytyaˈakynyëm ja borreegë etsë tsyiibë, yëˈë nety jamë yˈëxpëjkpëty tyukmëtmaytyakypy tijaty tunan jatanëp mä tiempë diˈib jëjpkëxanëp (Matewʉ 24:3). Të nety tˈanëëmë ko mä tadë tiempë yajkäjpxwäˈkxäˈäny Diosë yˈAnaˈam Kyutujkënë abëtsemy nyaxwinyëdë (Mateo 24:14, Traducción del Nuevo Mundo [TNM]). Ets ko tnimaytyaky ja talentë, yëˈë tyukjaygyujkë pënaty nëjkxandëp tsäjpotm ko mëkë nety tyunäˈändë parë yajkäjpxwäˈkxët ja oybyë ayuk. Per ¿wiˈixë nety mbäät kyäjpxwäˈkxtë abëtsemy nyaxwinyëdë pën niwaanë yˈakwëˈëmdë mä ja tiempë jyëjpkëxanë? Ko Jesus tnimaytyaky ja borreegë mëdë tsyiibë, ta jyënany ko borreegë yëˈë diˈib pyudëkëyandëp pënaty nëjkxandëp tsäjpotm. ¿Wiˈix? Tuk pëky, ko nbudëjkëm mä yajkäjpxwaˈkxyë oybyë  ayuk. Per ¿jeˈeyëdaa tsyekyëty nmëjämoˈoyëm o nyäjkëmë meeny sentääbë parë yajkäjpxwäˈkxëdë oybyë ayuk?

11. ¿Ti mbäät nnayajtëˈëwëm?

¹¹ Tyam, ja jyaajëty tuktujk miyongë Jesusë yˈëxpëjkpë. Ets nimay yëˈë diˈib kyaj tˈawixtë ja jukyˈäjtënë jam tsäjpotm. Jesus kyaj yëˈë tmooy ja talentë, o kyaj yëˈë ttuknipëjky parë kyäjpxwäˈkxtët. Yëˈë ojts yajmoˈoytyë talentë pënaty nëjkxandëp tsäjpotm (Mateo 25:14-18, TNM). Pääty waˈan nnayajtëˈëwëm: “Pënë Jesus yëˈë myooy ja talentë pënaty nëjkxandëp tsäjpotm, ¿tsojkëp nanduˈun kyäjpxwäˈkxtët pënaty näjxtëp extëmë borreegë?”. Min nˈokˈijxëm taxk pëky tiko mbäät kyäjpxwäˈkxtë.

12. ¿Ti xytyukniˈˈijxëm extëmë Jesus jyënany mä Matewʉ 28:19, 20?

¹² Myëduˈuk, Jesus niˈamukë ojts ttukˈaneˈemy ja yˈëxpëjkpëty ets kyäjpxwäˈkxtët. Ko nety të jyukypyeky, ta tˈanmääy ja yˈëxpëjkpëty ets nëjkx kyäjpxwäˈkxtë ets dyaˈëxpëktëdë jäˈäy extëmë nety të tniˈanaˈamë. Ets pënaty mëbëjkëdëp ets panëjkxëdëp, ta nanduˈun kyäjpxwäˈkxtët (käjpxë Matewʉ 28:19, 20). ¿Ti tyäˈädë xytyukniˈˈijxëm? Ko niˈamukë mbäät ngäjpxwäˈkxëm oy njukyˈatäˈänëm tsäjpotm o yä Naxwiiny (Apostʉlʉty 10:42).

13. ¿Ti xytyukniˈˈijxëm extëm jyënaˈanyë Diˈibʉ Jatanʉp?

¹³ Myëmajtsk, mä Diˈibʉ Jatanʉp xytyukˈijxëm ko kyaj yëˈëyë kyäjpxwäˈkxäˈändë pënaty nëjkxandëp tsäjpotm. Apostëlë Juan ojts tˈixy ko ja “Borreeguˈungë nyëdoˈoxy” twoyë jäˈäy ets tˈuuktët “ja nëë diˈibë yajkypy ja jikyˈäjtën”. Ja “Borreeguˈungë nyëdoˈoxy”, yëˈë yˈandijpyë 144,000 diˈib anaˈamandëp mëdë Jesus jam tsäjpotm (Diˈibʉ Jatanʉp 14:1, 3; 22:17). Ja nëë, yëˈë yˈandijpy ja wintsëˈkën diˈibë Jesus yäjk, diˈib yaˈˈawäˈätspëtsëmaambyë jäˈäy mä poky etsë oˈkën (Matewʉ 20:28; Fwank 3:16; 1 Fwank 4:9, 10). Pënaty nëjkxandëp tsäjpotm, yëˈë jäˈäy tyukniˈˈijxëdëp wiˈix mbäät ttukˈoyˈattë ko Jesus të xyjuuybyëtsëˈëmëm (1 Korintʉ 1:23). Perë apostëlë Juan nan ojts yajtukˈixy ja tuk grupë jäˈäy diˈib jukyˈatandëp yä Naxwiiny, diˈib nanduˈun yajtukˈanaˈamdëp parë twowdëdë jäˈäy ets tˈuuktë ja nëë diˈib yajkypyë jukyˈäjtën. ¿Wiˈix twowdë? Ko kyäjpxwäˈkxtë. Tyäˈädë yëˈë xytyukˈijxëm ko tsojkëp kyäjpxwäˈkxtët niˈamukë diˈib yˈaxäjëdëp ja oybyë ayuk.

14. ¿Ti mbäät nduˈunëm parë nmëmëdoˈojëm “ja Kristë yˈanaˈamën”?

¹⁴ Myëdëgëëk, niˈamukë pënaty myëmëdoodëp “ja Kristë yˈanaˈamën”, tsojkëp kyäjpxwäˈkxtët (Galasyʉ 6:2). Jyobaa tsyejpy ets niˈamukë diˈib mëduunëp, tmëmëdowdët ja anaˈamën diˈib të dyajnaxkëdaˈaky. Extëm tëëyëp, Jyobaa yäjkë yˈanaˈamën diˈib myëmëdowdëp duˈun ja israelitëty etsë jabyoˈkxyjyaˈayëty (Éxodo 12:49; Levítico  24:22). Tyam, kyaj yëˈë nekymyëmëdoˈowëm ja anaˈamën diˈib ja israelitëty yajmooytyë. Per tsojkëp nmëmëdoˈojëm “ja Kristë yˈanaˈamën”, oy njukyˈatäˈänëm tsäjpotm o yä Naxwiiny. Ets tuˈugë anaˈamën diˈibë Jesus ojts dyajnaxkëdaˈaky, yëˈë nyaˈijxëmë tsojkën (Fwank 13:35; Santya̱ˈa̱gʉ 2:8). Jëjpˈam ets ntsojkëmë Jyobaa, Jesus etsë jäˈäyëty. Ets tuk pëky wiˈix mbäät nyajnigëxëˈkëmë tyäˈädë tsojkën, ja ko jäˈäy ndukmëtmaytyakëm ja Diosë yˈAnaˈam Kyutujkën (Fwank 15:10; Apostʉlʉty 1:8).

15. ¿Wiˈix nnijäˈäwëm ko Jesus tsyejpy ets niˈamukë kyäjpxwäˈkxtët pënaty panëjkxëdëp?

¹⁵ Myëmäjtaxk, tijatyë Jesus tyukˈanaˈam ttundët ja niwaanëbë yˈëxpëjkpë, nan yëˈë nety yˈandijpy ets nimay duˈun ttundët. Extëm nˈokpëjtakëm, Jesus jeˈeyë mëët tkajpxyˈajty nimäjktuˈugë yˈëxpëjkpë parë mëët yˈanäˈämäˈäny jam tsäjpotm, per jaa wyinëˈattë 144,000 (Lukʉs 22:29, 30; Diˈibʉ Jatanʉp 5:10; 7:4-8). Ets ko jyukypyejky, jeˈeyë niwaanë tˈanmääy ja yˈëxpëjkpë ets nëjkx kyäjpxwäˈkxtë (Apostʉlʉty 10:40-42; 1 Korintʉ 15:6). Per niˈamukë ojts kyäjpxwäˈkxtë pënaty pyanëjkxtë Jesus mä primer siiglë (Apostʉlʉty 8:4; 1 Peedrʉ 1:8). Pääty ëtsäjtëm nan tsojkëp ngäjpxwäˈkxëm, oyë nety jam ngayajpatëm ko duˈunë Jesus jyënany. Tyam, jaa wyinˈaty tuktujk miyongë Jyobaa tyestiigëty diˈib käjpxwäˈkxtëp ets duˈun dyaˈixëdë ko myëbëjktëbë Jesus (Santya̱ˈa̱gʉ 2:18).

16-18. 1) ¿Wixaty mbäät nbudëjkëm pënaty nëjkxandëp tsäjpotm? 2) ¿Tiko mbäät tyam nbudëjkëm pënaty nëjkxandëp tsäjpotm?

¹⁶ Satanás niˈigyë tyam tnibëdëˈëky pënaty akwëˈëmdëp yä Naxwiiny diˈib nëjkxandëp tsäjpotm. Ets nan nyijäˈäwëp ko jawaanë tiempë yˈakwëˈëmxëty (Diˈibʉ Jatanʉp 12:9, 12, 17). Pënaty nëjkxandëp tsäjpotm duˈunyëm tnigëbäjkˈatäˈändë tyäˈädë tuunk mä ngäjpxwäˈkxëm ets kyaj mbäädë Satanás dyajtuˈuˈaduky. Pes ninäˈänëm duˈunë jäˈäy kyayajtuknijawë ja oybyë ayuk extëm tyam. Tyäˈädë yëˈë xytyukˈijxëm ko Jesus yëˈë diˈib tyuˈumoopy ets pyudëjkëp pënaty nëjkxandëp tsäjpotm (Matewʉ 28:20).

¹⁷ Mëjwiin kajaa nmëjjäˈäwëm ko mbäät nbudëjkëm ja myëguˈuktëjkë Jesus mä yajkäjpxwaˈkxyë oybyë ayuk. ¿Wixaty mbäät nˈakpudëjkëm? Ko nyäjkëmë meeny sentääbë ets nduˈunëm mä yajkojˈyë Betel o Tëjk mä nˈëxpëjkëm. Nan mbäät nbudëjkëm ko nmëmëdoˈojëmë mëjjäˈäytyëjk o nmëguˈukˈäjtëm diˈib të tyuunkmoˈoyëdë ja tuumbë “diˈibë kuwijy es tyiimpy ti wyintsën tsyejpy” (Matewʉ 24:45-47; Ebreeʉsʉty 13:17).

¹⁸ Tim tsojk yajtsääytyaˈayäˈändë pënaty nëjkxandëp tsäjpotm. Ta net tsyondäˈägäˈäny ja mëk ayoˈon (Diˈibʉ Jatanʉp 7:1-3). Ets mä kyatsondaˈakynyëmë Armajedon, ta Jesus yajnëjkxäˈänëdë tsäjpotm (Matewʉ 13:41-43). Pääty, pën ntsojkëm etsë Jesus xyajnäjxëm extëmë borreegë, tsojkëp tyam nbudëjkëm pënaty nëjkxandëp tsäjpotm.