1, 2. (a) Ni by’okureeberaho ki ebi Yesu yaagambiire banywani be ab’ahamara? (Reeba ekishushani aha kutandika.) (b) Niki eki twine kumanya aha ky’okureeberaho ky’entaama n’embuzi?

YESU akaba naagaaniira n’abanywani be ab’ahamara, Petero, Anderea, Yakobo, na Yohaana. Bakaba baaheza kumuhurira arikushoboorora eky’okureeberaho ky’omwambari omwesigwa kandi ow’obwengye, eky’abaishiki ikumi, n’eky’etalanta. Yesu akahendera okugaaniira kwe n’eky’okureeberaho ekindi. Akashoboorora aha bwire obu “Omwana w’omuntu” aricwera “amahanga goona” orubanja. Eky’okureeberaho eki ka kiine kuba kyashemeize abeegi be! Omu ky’okureeberaho eki, akata omutima aha bantu b’emiringo ebiri, abari nk’entaama n’abari nk’embuzi. Kandi akagamba n’ahari abo abu yaayetsire beene Ishe Omugabe.—Shoma Matayo 25:31-46.

² Abaheereza ba Yehova boona batwire nibashemezibwa eky’okureeberaho kya Yesu eki, ahakuba nikikwata aha bantu boona. Naayoreka ahabw’enki abamwe baraatungye amagara agatahwaho n’ahabw’enki abandi baraacwekyerezibwe. Twine kumanya amakuru g’enfumu egi, n’eki twine kukora kubaasa kutunga amagara agatahwaho. Tushemereire kwebuuza  ebibuuzo nk’ebi: Yehova atuhwereire ata mporampora kwetegyereza gye eky’okureeberaho eki? Ahabw’enki turikubaasa kugira ngu eky’okureeberaho eki nikikwata munonga aha murimo gw’okubuurira? Ni baahi abarikuragiirwa kubuurira? Kandi ahabw’enki hati nibwo bwire bw’okushagika Omugabe n’abo boona abu arikweta “beene Tata”?

3, 4. (a) Ni bintu ki ebikuru ebi twine kumanya kubaasa kwetegyereza gye eky’okureeberaho ky’entaama n’embuzi? (b) Omuri 1881, Watch Tower ekashoboorora eta eky’okureeberaho eki?

³ Kubaasa kwetegyereza gye eky’okureeberaho eky’entaama n’embuzi, twine kumanya ebintu bishatu ebi: abarikugambwaho, obwire bw’okucwa orubanja, n’enshonga erikureetera omuntu kuba entaama nari embuzi.

⁴ Omuri 1881, Watch Tower ekooreka ngu “Omwana w’omuntu,” kandi orikwetwa “Omugabe,” ni Yesu. Enyima, abeegi ba Baibuli bakaba nibeetegyereza ngu “beene Ishe Kristo nibatwariramu abaraategyekye nawe na boona abarikwija kutuura omu nsi bari abahikiriire. Bakaba nibateekateeka ngu okushoroora entaama omu mbuzi nikwija kubaho omu Myaka Rukumi Kristo yaaba naategyeka. Bakaba nibaikiriza ngu abantu nibaija kubarwa nk’entaama ahabw’okugyendera aha Kiragiro kya Ruhanga ekya rukundo.

5. Omu myaka ya 1920, enyetegyereza yaitu ekahindurwamu eta?

⁵ Aha kutandika kw’emyaka ya 1920, Yehova akahwera abantu be kwetegyereza eky’okureeberaho eki. Watch Tower eya Okitoba 15, 1923, ekahamya ngu “Omwana w’omuntu” ni Yesu. Kwonka, ekagira ngu beene Ishe Kristo n’abo abaraategyeke nawe omu iguru bonka, kandi ngu entaama n’abo abaine amatsiko g’okutuura omu nsi barikutegyekwa Obukama bwa Kristo. Kandi shi obwire bw’okushoroora entaama omu mbuzi? Ekagira ngu beene Ishe Kristo bakaabaire nibategyekyera omu iguru omu Myaka Rukumi, ekirikumanyisa ngu tibakubaasize kuhwerwa nari kutahwerwa abaine amatsiko g’okutuura omu nsi. N’ahabw’ekyo, okushoroora entaama omu mbuzi kukaba nikwija kubaho Obutegyeki obw’Emyaka Rukumi butakatandikire kutegyeka. Watch Tower egyo ekagira ngu enshonga erikubaasa kureetera omuntu kubarwa nk’entaama, n’okumanya Yesu nka Mukama kandi akeesiga Obukama ngu nibuza kureetaho embeera nungi.

6. Omu myaka ya 1990, enyetegyereza yaitu ekongyera kushemezibwamu eta?

⁶ Ahabw’enyetegyereza egyo, abaheereza ba Yehova bakaba nibateekateeka ngu omuntu naabaasa kubarwa nk’entaama nari embuzi omu biro by’emperu byona, kurugiirira aha ku yaayakiira amakuru g’Obukama. Kwonka, ahagati y’emyaka ya 1990, enyetegyereza yaitu ekahindurwamu. Ebicweka bibiri ebyabaire biri omu Watchtower eya Okitoba 15, 1995, bikooreka okushushana kw’ebigambo bya Yesu ebiri omu Matayo 24:29-31 (kishome) n’ebiri omu Matayo 25:31, 32. (Kishome.) * Ebicweka ebyo bikahendera bita? Eky’okubanza kikagira kiti: “Okushoroora entaama omu mbuzi nikwija kubaho omu biro by’omumaisho.” Ryari bwenyine? Kikagira ngu “nikwija kubaho okubonabona okurikugambwaho omuri Matayo 24:29, 30 kwatandika n’obu Omwana w’omuntu ariizira omu kitiinisa. . . . Bwanyima, ensi egi embi ku eraahweho, Yesu  naija kutaho eicwero ry’emanja reero acwe emanja.”

7. Ni nyetegyereza ki ehindwirwemu ei twine hati?

⁷ Obunaku obu, twine enyetegyereza ehindwirwemu ey’eky’okureeberaho ky’entaama n’embuzi. Aha bikwatiraine n’abarikugambwaho omu nfumu, Yesu niwe ‘Mwana w’omuntu,’ nari Omugabe. Abo abarikugambwaho nka “beene Tata” n’abashukirweho amajuta abashaija n’abakazi, abarikuza kutegyeka na Kristo omu iguru. (Rom. 8:16, 17) “Entaama” hamwe “n’embuzi,” n’abantu kuruga omu mahanga goona. Aba tibashukirweho omwoyo gurikwera. Kandi shi obwire bw’okucwa orubanja? Okucwa orubanja nikwija kubaho okubonabona kwingi okuri haihi kubaho kwaba nikuza kuhendera. Kandi shi enshonga eraareetere abantu kushoroorwa nk’entama nari embuzi? Nibaija kucwerwa orubanja kurugiirira aha ku baraabe batwariize beene Ishe Kristo abashukirweho amajuta abakiri omu nsi. Obu emperu y’obusingye obu eri haihi munonga, ka twine okushemererwa ngu Yehova agumire naatuhwera mporampora kwetegyereza eby’okureeberaho ebiri omu Matayo eshuura 24 na 25!

8, 9. Ahabw’enki abari nk’entaama nibeetwa “abahikiriire”?

⁸ Omu ky’okureeberaho ky’entaama n’embuzi, Yesu taragambire butunu aha kubuurira. Mbwenu shi, ahabw’enki turikubaasa kugira ngu nikyoreka obukuru bw’okubuurira?

⁹ Enshonga y’okubanza, yetegyereze ngu Yesu akaba naayegyesa arikukoresa enfumu. Buzima, akaba atarikugamba aha kushoroora entama n’embuzi ezaabuzima. Nikyo kimwe, akaba atarikugira ngu buri muntu oraashoroorwe nk’entaama nari embuzi aine kugaburira, kujweka, kureeberera, nari kutaayaayira beene Ishe omu kihome. Kureka, arikukoresa eky’okureeberaho naayoreka emiteekateekyere ei abo abari nk’entaama baine ahari beene Ishe. Abari nk’entaama naabeeta “abahikiriire” ahakuba nibamanya ngu Kristo aine beene Ishe abashukirweho amajuta abakiri omu nsi, kandi nibabashagika omu biro by’emperu ebi eby’akabi kaingi.—Mat. 10:40-42; 25:40, 46; 2 Tim. 3:1-5.

10. Nitubaasa kugirira tuta embabazi beene Ishe Kristo?

¹⁰ Enshonga ya kabiri, yetegyereze ebyahandiikirwe ebindi ebyetooroire ebigambo bya Yesu. Akaba naagamba aha kamanyiso k’okubaho kwe n’emperu y’obusingye obu. (Mat. 24:3) Yesu omu kutandika kw’okugaaniira kwe, akooreka ngu akamanyiso kakaba nikaija kutwariramu okubuurira amakuru marungi “omu nsi zoona.” (Mat. 24:14) Kandi atakagambire aha ky’okureeberaho ky’entaama n’embuzi, akabanza kugamba aha ky’etalanta. Nk’oku tureebire omu kicweka ekihweire, Yesu akaha eky’okureeberaho ekyo kuhamiza abeegi be abashukirweho amajuta nari beene Ishe, ngu baine kubuurira n’obweziriki. Kwonka, abashukirweho amajuta abakiri omu nsi omu bunaku bw’okubaho kwe, ni bakye, kandi obwo omurimo gw’okubuurira “omu mahanga goona” ni muhango. Eky’okureeberaho ky’entaama nikyoreka ngu abashukirweho amajuta bakaba nibaija kuhwerwa. N’ahabw’ekyo, gumwe aha miringo mikuru ey’okworeka ngu abari nk’entaama nibagirira beene Ishe Kristo embabazi, n’okubashagika omu murimo gw’okubuurira. Mbwenu shi niki ekirikutwarirwa omu kubashagika? Tugire ngu nikitwariramu okubaha ebintu n’okubahuumuriza, nari hariho ekikuru ekirikwetengyesa?

11. Nihabaasa kubaho kibuuzo ki, kandi n’ahabw’enki?

¹¹ Obunaku obu, baingi aha bukaikuru nka munaana abeegi ba Yesu, tibashukirweho omwoyo gurikwera. Tibahairwe talanta ezi Yesu yaahaire abambari be abashukirweho amajuta. (Mat. 25:14-18) N’ahabw’ekyo ekibuuzo kiri ngu, ‘Ekiragiro ky’okubuurira buzima nikikwata ahari abo abatashukirweho omwoyo gurikwera?’ Teekateeka aha nshonga zimwe ahabw’enki eky’okugarukamu kiri ngu eego.

12. Ebigambo bya Yesu ebiri omu Matayo 28:19, 20 nitubyegaho ki?

¹² Yesu akaragiira abeegi be boona kubuurira. Bwanyima y’okuzooka, akagambira abakuratsi be kuhindura abantu abeegi, n’okubeegyesa “byona” ebi yaabaire abaragiire. Kimwe aha bi yaabaragiire, harimu obujunaanizibwa bw’okubuurira. (Shoma Matayo 28:19, 20.) N’ahabw’ekyo, abeegi ba Kristo boona baine kubuurira, yaaba baine amatsiko g’okuza omu iguru nari kutuura omu nsi.—Byak. 10:42.

13. Nitwega ki omu kworekwa kwa Yohaana, kandi n’ahabw’enki?

¹³ Ekitabo kya Okushuuruurwa nikyoreka ngu omurimo gw’okubuurira gukaba nigwija kukorwa abashukirweho amajuta n’abandi. Yesu akahwera entumwa Yohaana kureeba ‘omugore,’ nibo 144,000 abashukirweho amajuta abarikwija kutegyeka na Kristo omu iguru, barikweta abantu kutwarira “busha amaizi g’amagara.” (Kush. 14:1, 3; 22:17) Amaizi ag’akamanyiso nigajwekyera ebi Yehova arikuha abantu kubakiza ekibi n’okufa kurabira omu kitambo kya Kristo. (Mat. 20:28; Yoh. 3:16; 1 Yoh. 4:9, 10) Ekitambo niyo ntima y’amakuru agu turikubuurira, kandi abashukirweho amajuta nibo barikwebembera omu kuhwera abantu kwega aha kitambo n’okukigasirwamu. (1 Kor. 1:23) Kwonka omu kworekwa, Yohaana akareeba abandi abatari bamwe aha mugore. Nabo nibagambirwa kugira ngu, “Ija!” Nibooroba  kandi beeta n’abandi kunywa amaizi g’amagara. Abandi abarikugambwaho n’abaine amatsiko g’okutuura omu nsi. N’ahabw’ekyo, okworekwa okwo nikuhamya gye ngu boona abarikwikiriza ‘kwija,’ baine obujunaanizibwa bw’okubuurira abandi.

14. Niki ekirikutwarirwa omu kworobera “ekiragiro kya Kristo”?

¹⁴ Boona abarikworobera “ekiragiro kya Kristo” baine kubuurira. (Gal. 6:2) Yehova naayenda ngu boona abarikumworobera bakuratire ebiragiro ebirikushushana. Nk’eky’okureeberaho, akagambira Abaisraeli ati: “Enzaarwa n’omuyaihanga obatwiremu baryategyekwa ekiragiro kimwe.” (Kur. 12:49; Lev. 24:22) Abakristaayo tibarikukuratira Ebiragiro bya Musa. Kwonka twena, yaaba tushukirweho amajuta nari ngaaha, nitworobera “ekiragiro kya Kristo.” Ekiragiro ekyo nikitwariramu byona ebi Yesu yaayegyeise. Bimwe aha bi yaayegyeise abakuratsi be n’okworekana rukundo. (Yoh. 13:35; Yak. 2:8) Omuringo mukuru ogu turikworekamu ngu nitukunda Ruhanga, Kristo, n’abataahi n’okubuurira amakuru marungi g’Obukama.—Yoh. 15:10; Byak. 1:8.

15. Ahabw’enki turikubaasa kugira ngu ekiragiro kya Yesu nikikwata aha bakuratsi be boona?

¹⁵ Ebigambo ebi Yesu yaagambiire abantu bakye nibibaasa kukwata n’aha bantu baingi. Nk’eky’okureeberaho, Yesu akakora endagaano y’Obukama n’abeegi be 11 bonka, kwonka endagaano egyo buzima neekwata aha 144,000 boona. (Luk. 22:29, 30; Kush. 5:10; 7:4-8) Nikyo kimwe, bakye aha bakuratsi be, abu yaayeyorekire bwanyima y’okuzooka nibo yaaragiire kubuurira. (Byak. 10:40-42; 1 Kor. 15:6) Kwonka abeegi be boona omu kyasha ky’okubanza bakaikiriza ngu ekiragiro ekyo nikibakwataho, n’obu baraabe batarahuriire Yesu naabaragiira. (Byak. 8:4; 1 Pet. 1:8) N’obunaku obu, aha bukaikuru nka munaana abarikubuurira aha Bukama, tihaine ou Yesu yaagambireho nawe. Kwonka boona nibamanya ngu baine obujunaanizibwa bw’okwikiririza omuri Kristo, kandi bakooreka okwikiriza kwabo barikukwejumba omu murimo gw’okubuurira.—Yak. 2:18.

16-18. Abaine amatsiko g’okubarwa nk’entaama nibabaasa kushagika bata beene Ishe Kristo, kandi ahabw’enki baine kukikora hati?

¹⁶ Sitaane naarwanisa beene Ishe Kristo abashukirweho amajuta abakiri omu nsi, kandi okutaahirira kwe naija kukwongyeramu amaani ahakuba naamanya ngu hatsigaireyo “omwanya mukye.” (Kush. 12:9, 12, 17) N’obu haraabe hariho okugyezibwa kw’amaani, abashukirweho amajuta nibeebembera omurimo gw’okubuurira ogurikukirayo omu byafaayo. Hatariho kubanganisa, Yesu ari nabo, naabaha obuhabuzi.—Mat. 28:20.

¹⁷ Abaine amatsiko g’okubarwa nk’entaama abarikweyongyera kukanya, nibagutwara nk’omugisha kushagika beene Ishe Kristo omu murimo gw’okubuurira n’omu miringo endiijo. Nk’eky’okureeberaho, nibahayo sente z’okuhwera omu kwombeka Ebyombeko by’Obukama, Ebyombeko by’Enteerane Empango, na ofiisi z’amataagi, kandi omu bwesigwa niboorobera abo abatoorainwe ‘omwambari omwesigwa kandi ow’obwengye’ kutwebembera.—Mat. 24:45-47; Heb. 13:17.

¹⁸ Juba baamaraika nibaija kurekura emiyaga y’okucwekyereza ey’okubonabona kwingi. Eki nikiija kubaho bwanyima ya beene Ishe Kristo abakiri omu nsi kutunga akamanyiso ak’ahamuheru. (Kush. 7:1-3) Haramagedoni etakatandikire, abashukirweho amajuta abaraabe bakiri omu nsi nibaija kutwarwa omu iguru. (Mat. 13:41-43) N’ahabw’ekyo, hati nibwo bwire obw’abo abaine amatsiko g’okubarwa nk’entaama kushagika beene Ishe Kristo omu bwesigwa.