1, 2. (a) Kua ta e ilustrashonnan ku Hesus a konta su amigunan íntimo? (Wak e promé plachi.) (b) Ki preguntanan relashoná ku e ilustrashon di karné i kabritu nos lo bai analisá den e artíkulo akí?

HESUS tabata kòmbersá ku su amigunan íntimo: Pedro, Andres, Santiago i Huan. El a kaba di konta nan tres ilustrashon: di e esklabo fiel i prudente, di e 10 bírgennan i di e talentonan. Pero e tabatin un ilustrashon mas pa konta nan. El a papia di un tempu ora ku “e Yu di hende” lo husga “tur e nashonnan.” Esei lo mester a fasiná e disipelnan! Den e ilustrashon Hesus a enfoká riba dos grupo: unu klasifiká komo karné i e otro komo kabritu. Kaba el a menshoná un di tres grupo masha importante: e “rumannan” di e Rei.—Lesa Mateo 25:31-46.

² E pueblo di Yehova semper tabata masha interesá den e ilustrashon akí, i ku rason, pasobra den dje Hesus a papia di e futuro di hende. El a bisa ku algun lo haña bida eterno pero ku otronan lo ser destruí pa semper. P’esei ta masha importante pa nos sa kiko e ilustrashon ta nifiká i kiko nos tin ku hasi pa haña bida eterno. Pues, den e artíkulo akí nos lo kontestá  e siguiente preguntanan: Kon Yehova a yuda nos komprondé e ilustrashon akí? Dikon nos por bisa ku e ilustrashon ta enfatisá e importansia di e trabou di prediká? Ta ken a haña e mandato pa prediká? I dikon awor ta e momento pa hende ta leal na “e Rei” i na esnan ku e ta yama “mi rumannan”?

3, 4. (a) Kiko nos mester sa pa nos por komprondé e ilustrashon di karné i kabritu? (b) Kon E Toren di Vigilansia a splika e ilustrashon akí na aña 1881?

³ Pa komprondé e ilustrashon di karné i kabritu, nos mester sa (1) ken ta “e Yu di hende,” òf “e Rei,” ken ta e karné- i kabritunan i ken ta e “rumannan” di e Rei? (2) na ki tempu “e Yu di hende” ta separá, òf husga, e karné- i kabritunan? i (3) dikon tin hende ta ser klasifiká komo karné i otronan komo kabritu?

⁴ Na aña 1881, E Toren di Vigilansia a splika ku “e Yu di hende,” ku ta ser yamá tambe “e Rei,” ta Hesus. E promé Studiantenan di Beibel a pensa ku e “rumannan” di Hesus tabata no solamente e personanan ku lo goberná huntu kuné den shelu, sino tambe tur hende ku lo biba riba tera despues ku nan bira perfekto. Nan a kere ku e separashon di karné for di kabritu lo a tuma lugá durante e Reinado di Mil Aña di Kristu i ku hende ku a biba na armonia ku e lei di amor di Dios lo a ser klasifiká komo karné.

5. Ki komprondementu mas kla e pueblo di Dios a haña di e ilustrashon na aña 1923?

⁵ Na kuminsamentu di dékada di 1920, Yehova a yuda su pueblo komprondé e ilustrashon akí un poko mas mihó. E Toren di Vigilansia di 15 di òktober 1923 a konfirmá ku “e Yu di hende” ta Hesus. Pero ken e rumannan di Kristu tabata? E revista a usa vários versíkulo di Beibel pa mustra ku su rumannan tabata solamente e personanan ku lo reina huntu kuné den shelu i ku e karnénan tabata e hendenan ku lo biba riba tera bou di mando di e Reino di Kristu. Tambe e artíkulo a splika na ki tempu lo separá e karnénan for di e kabritunan. E ilustrashon ta bisa ku lo tin hende ta yuda e rumannan di Kristu i otronan ku no ta hasié, pues e separashon—òf huisio—di e personanan ei lo tin ku tuma lugá miéntras ku e rumannan ungí di Hesus ta riba tera ainda, promé ku nan bai shelu pa goberná den e Reinado di Mil Aña. Dikon ta klasifiká algun hende komo karné? Pasobra nan ta rekonosé Hesus komo nan Señor i ta kere ku e Reino lo trese un mihó bida.

6. Den dékada di 1990, kon nos a haña un komprondementu mas kla ainda di e ilustrashon?

⁶ Pa hopi aña, e pueblo di Yehova a kere ku hende tabata ser husgá durante e tempu di fin, i ku e manera ku nan a reakshoná riba e trabou di prediká a determiná si nan ta karné òf kabritu. Pero meimei di dékada di 1990, nos a bin komprondé e ilustrashon mas mihó. Den E Toren di Vigilansia di 15 di òktober 1995 a sali dos artíkulo ku a kompará loke Hesus a bisa na Mateo 24:29-31 (les’é) ku loke el a bisa na Mateo 25:31 i 32. (Les’é.) * Kiko tabata e konklushon? E promé di e dos artíkulonan a bisa ku e huisio di e karné- i kabritunan lo tuma lugá den futuro. Ki tempu presis? “Lo e tuma lugá despues ku ‘e tribulashon’  menshoná na Mateo 24:29, 30 kuminsá i e Yu di hende ‘yega den su gloria.’ . . . E ora ei, na fin di henter e sistema malbado, Hesus lo areglá un korte i lo atministrá i ehekutá huisio.”

7. Kiko nos ta komprondé awe di e ilustrashon di karné i kabritu?

⁷ Awe, nos ta komprondé e ilustrashon di karné i kabritu hopi bon. Ken ta e personahenan den e ilustrashon? “E Yu di hende,” òf “Rei,” ta Hesus. Su “rumannan” ta e kristiannan ungí ku spiritu santu ku lo reina huntu kuné den shelu. (Rom. 8:16, 17) I “e karnénan” i “e kabritunan” ta representá personanan di tur nashon; nan no ta ungí pa spiritu santu. Na ki tempu e huisio lo tuma lugá? E huisio lo ta kasi na final di e tribulashon grandi ku pronto lo kuminsá. Dikon algun persona ta ser klasifiká komo karné i otronan komo kabritu? Esei ta dependé di e manera ku nan a trata e restu di e rumannan ungí di Kristu ku tin riba tera. Nos ta masha kontentu ku, segun ku e fin ta yega serka, Yehova progresivamente a yuda nos komprondé e nifikashon di e ilustrashonnan di Mateo kapítulo 24 i 25!

8, 9. Dikon Hesus a referí na e karnénan komo “e hustunan”?

⁸ Den e ilustrashon di karné i kabritu, Hesus no a menshoná e trabou di prediká direktamente. Pues, dikon nos por bisa ku e ilustrashon ta enfatisá e importansia di e trabou di prediká?

⁹ Na promé lugá, nos mester kòrda ku Hesus tabata usando un ilustrashon pa siña hende un lès. E no tabata papia di karné i kabritu literal. Ni tampoko e no tabata ke men ku kada persona ku ta karné tin ku duna e ungínan kuminda i paña, kuida nan ora nan ta malu òf bishitá nan den prizòn. Mas bien, el a usa e ilustrashon pa deskribí e aktitut ku e karnénan lo mester tin pa ku su rumannan. El a referí na e karnénan komo “e hustunan,” pasobra nan ta rekonosé ku Kristu tin un grupo di ruman ungí ainda riba tera i pasobra nan ta apoyá e ungínan ei fielmente durante e último dianan trabahoso akí.—Mat. 10:40-42; 25:40, 46; 2 Tim. 3:1-5.

10. Kon e karnénan por yuda e rumannan di Kristu?

¹⁰ Na di dos lugá, pensa riba e konteksto di e palabranan di Hesus. Ora Hesus a konta e ilustrashon, e tabata papia tokante e señal di su presensia i di loke lo pasa durante e tempu di fin. (Mat. 24:3) Por ehèmpel, el a indiká ku e señal lo tin un faseta sobresaliente. E di: “E bon notisia akí di e Reino lo ser prediká den henter e tera habitá.” (Mat. 24:14) I djis promé ku el a papia di e karné- i kabritunan, el a konta e ilustrashon di talento. Manera nos a mira den e artíkulo anterior, Hesus a duna e ilustrashon ei pa kòrda su “rumannan,” su disipelnan ungí ku spiritu santu, ku nan mester ta diligente den e trabou di prediká. Pero kon e grupo chikitu di ungí ku lo ta riba tera durante e presensia di Hesus lo por prediká na “tur nashon” promé ku e fin yega? E ilustrashon di karné i kabritu ta mustra ku e ungínan lo haña yudansa di “e karnénan.” Kon? Wèl, un di e mihó maneranan ku e karnénan por yuda e rumannan di Kristu ta di apoyá nan den e trabou di prediká. Pero kiko esei ta enserá? Akaso e karnénan mester djis kontribuí ku plaka pa e obra i tambe animá e ungínan pa hasi e trabou di prediká? Òf ta spera algu mas di nan?

11. Kiko algun hende lo por puntra, i dikon?

¹¹ Awe, tin ocho mion disipel di Hesus, i mayoria di nan no ta ungí. Pues, nan no a haña e talentonan ku Hesus a duna su esklabonan ungí. (Mat. 25:14-18) P’esei tin hende lo por puntra: ‘Esnan ku no ta ungí ku spiritu santu tambe tin ku prediká?’ E kontesta ta sí. Ban wak dikon.

12. Kiko nos ta siña for di e palabranan di Hesus na Mateo 28:19 i 20?

¹² Hesus a bisa tur su disipelnan ku nan mester prediká. Despues ku Hesus a resusitá, el a bisa su siguidónan pa hasi disipel i pa siña nan pa kumpli ku “tur loke” el a manda. Un di e mandamentunan ei tabata e tarea di prediká. (Lesa Mateo 28:19, 20.) Pues, tur disipel di Kristu tin ku prediká, sea ku nan tin e speransa di biba den shelu òf riba tera.—Echo. 10:42.

13. Kiko nos ta siña for di e vishon ku Huan a mira?

¹³ E buki di Revelashon ta indiká ku lo tin otro personanan ta prediká huntu ku e ungínan. Hesus a duna apòstel Huan un vishon di un “brùit” ku ta invitá hende pa bin bebe e awa ku ta duna bida. E brùit ta representá e 144.000 ungínan ku lo reina ku Kristu den shelu. (Rev. 14:1, 3; 22:17) E awa ta representá tur loke Yehova a hasi pa libra hende for di piká i morto mediante e sakrifisio di reskate di Hesus. (Mat. 20:28; Huan 3:16; 1 Huan 4:9, 10) E reskate ta un parti fundamental di e mensahe ku nos ta prediká, i ku entusiasmo e ungínan ta yuda hende komprondé kon nan por benefisiá di dje. (1 Kor. 1:23) Pero den e vishon, Huan a mira otro personanan ku no ta forma parti di e brùit, i nan tambe ta haña e mandato pa bisa hende: “Bini!” E di  dos grupo akí ta kristiannan ku no ta ungí i ku tin e speransa di biba pa semper riba tera. Nan ta obedesé e mandato i ta invitá otro hende pa bin bebe e awa di bida. Pues, e vishon akí ta mustra bon kla ku tur persona ku aseptá e invitashon pa “bini” tin e responsabilidat di prediká e bon notisia na otro hende.

14. Kon nos ta obedesé e “lei di Kristu”?

¹⁴ Tur ku ta obedesé e “lei di Kristu” mester prediká. (Gal. 6:2) Yehova tin e mesun normanan pa tur hende ku ta ador’é; e no ta hasi distinshon. P’esei el a bisa e israelitanan: “E mesun lei ta konta pa tantu e yu di tera komo pa e estranhero ku ta keda biba pa un tempu meimei di boso.” (Éks. 12:49; Lev. 24:22) Kristiannan no ta bou di e Lei di Moises. Pero nos tur, sea ku nos ta ungí òf nò, ta bou di e “lei di Kristu.” E lei ei ta enserá tur loke Hesus a siña hende, i un di su siñansanan mas importante tabata ku su disipelnan mester mustra amor. (Huan 13:35; Sant. 2:8) I pensa un ratu: Kua ta e mihó manera pa mustra ku nos ta stima Dios, stima Kristu i stima nos próhimo? Esei ta dor di prediká e bon notisia di e Reino.—Huan 15:10; Echo. 1:8.

15. Dikon nos por bisa ku e mandato di Hesus pa prediká ta konta pa tur su disipelnan?

¹⁵ Tin biaha, loke Hesus a bisa na un grupo chikitu ta apliká na un grupo mas grandi. Por ehèmpel, Hesus a sera e pakto pa un Reino ku 11 disipel so. Ma en realidat, e 144.000 ta inkluí den e pakto ei. (Luk. 22:29, 30; Rev. 5:10; 7:4-8) Asina tambe, despues ku Hesus a resusitá, ta un kantidat relativamente chikitu di su siguidónan a tend’é duna e mandato pa bai prediká. (Echo. 10:40-42; 1 Kor. 15:6) Pero tur kristian di e promé siglo a obedesé e mandato ei, maske nan personalmente no a yega di tende Hesus papia. (Echo. 8:4; 1 Ped. 1:8) Awe ta meskos. Aunke niun di nos no a tende Hesus bisa ku nos mester prediká, tòg tin ocho mion proklamadó di Reino ta hasi e trabou akí. Dikon nos ta hasié? Pasobra asina nos ta demostrá ku di bèrdat nos tin fe den Hesus.—Sant. 2:18.

16-18. (a) Kon nos por yuda e rumannan di Kristu? (b) Dikon awor ta e momento pa nos apoyá e ungínan?

¹⁶ Satanas ta bringando kontra e rumannan di Kristu ku ainda ta riba tera. I su atakenan ta bira mas i mas fuerte, pasobra e sa “ku a ked’é masha poko tempu.” (Rev. 12:9, 12, 17) Apesar di esei, e ungínan ta sigui dirigí e kampaña di predikashon di mas grandi den historia. I no tin duda ku Hesus ta ku nan i ta guia nan.—Mat. 28:20.

¹⁷ Nos tin e gran privilegio di yuda e rumannan di Kristu no solamente den e trabou di prediká, sino tambe na otro maneranan práktiko. Por ehèmpel, nos ta duna kontribushon finansiero i ta yuda traha Salònnan di Reino, Salònnan di Asamblea i sukursalnan. Tambe nos ta apoyá nan ora nos ta obedesé e ansianonan i otronan nombrá pa “e esklabo fiel i prudente.”—Mat. 24:45-47; Heb. 13:17.

¹⁸ Pronto e rumannan di Kristu ku ainda ta riba tera lo haña nan seyo final. E ora ei e angelnan lo laga e bientunan destruktivo di e tribulashon grandi lòs. (Rev. 7:1-3) Promé ku Armagedon kuminsá, Hesus lo hiba e ungínan shelu. (Mat. 13:41-43) Pues, si nos ke ser klasifiká komo karné ora Hesus bini, awor ta e momento pa nos ta leal i apoyá e rumannan di Kristu.