1, 2. (a) Cua ta e ilustracionnan cu Hesus a conta su amigonan? (Wak e prome plachi.) (b) Ki preguntanan relaciona cu e ilustracion di carne y cabrito nos lo bay analisa den e articulo aki?

HESUS tabata combersa cu su amigonan: Pedro, Andres, Santiago y Juan. El a caba di conta nan tres ilustracion: di e esclavo fiel y prudente, di e dies birgennan y di e talentonan. Pero e tabatin un ilustracion mas pa conta nan. El a papia di un tempo ora cu “e Yiu di hende” lo husga “tur e nacionnan.” Esey lo mester a fascina e discipelnan. Den e ilustracion Hesus a enfoca riba dos grupo: uno clasifica como carne y e otro como cabrito. Despues el a menciona un di tres grupo hopi importante: e “rumannan” di “e Rey.”—Lesa Mateo 25:31-46.

² E pueblo di Jehova semper tabata masha interesa den e ilustracion aki, y cu rason, pasobra den dje Hesus a papia di e futuro di hende. El a bisa cu algun lo haya bida eterno pero cu otronan lo ser destrui pa semper. Pesey ta hopi importante pa nos sa kico e ilustracion ta nifica y kico nos tin cu haci pa haya bida eterno. Pues, den e articulo aki nos lo contesta e siguiente  preguntanan: Con Jehova a yuda nos compronde e ilustracion aki? Dicon nos por bisa cu e ilustracion ta enfatisa e importancia di e trabou di predica? Ta ken a haya e mandato pa predica? Y dicon awor ta e momento pa hende ta leal na “e Rey” y na esnan cu e ta yama “mi rumannan”?

3, 4. (a) Kico nos mester sa pa nos por compronde e ilustracion di carne y cabrito? (b) Con Zion’s Watch Tower a splica e ilustracion aki na aña 1881?

³ Pa compronde e ilustracion di carne y cabrito, nos mester sa (1) ken ta “e Yiu di hende”, of “e Rey”, ken ta e carne- y cabritonan y ken ta e “rumannan” di e Rey? (2) na ki tempo “e Yiu di hende” ta separa, of husga, e carne- y cabritonan? y (3) dicon tin hende ta ser clasifica como carne y otronan como cabrito?

⁴ Na aña 1881, e revista Zion’s Watch Tower a splica cu “e Yiu di hende”, cu ta ser yama tambe “e Rey”, ta Hesus. E prome Studiantenan di Bijbel a pensa cu e “rumannan” di Hesus tabata no solamente e personanan cu lo goberna hunto cu ne den cielo, sino tambe tur hende cu lo biba riba Tera despues cu nan bira perfecto. Nan a kere cu e separacion di carne for di cabrito lo a tuma luga durante e Reinado di Mil Aña di Cristo y cu hende cu a biba na harmonia cu e ley di amor di Dios lo a ser clasifica como carne.

5. Ki comprondemento mas cla e pueblo di Dios a haya di e ilustracion na aña 1923?

⁵ Na cuminsamento di decada di 1920, Jehova a yuda su pueblo compronde e ilustracion aki un poco mas mihor. E revista The Watch Tower di 15 di october 1923 a confirma cu “e Yiu di hende” ta Hesus. Pero ken e rumannan di Cristo tabata? E revista a uza varios versiculo di Bijbel pa mustra cu su rumannan tabata solamente e personanan cu lo reina hunto cu ne den cielo y cu e carnenan tabata e hendenan cu lo biba riba Tera bou di mando di e Reino di Cristo. Tambe e articulo a splica na ki tempo lo separa e carnenan for di e cabritonan. E ilustracion ta bisa cu lo tin hende ta yuda e rumannan di Cristo y otronan cu no ta haci esey, pues e separacion—of huicio—di e personanan ey lo tin cu tuma luga mientras cu e rumannan ungi di Hesus ta riba Tera ainda, prome cu nan bay cielo pa goberna den e Reinado di Mil Aña. Dicon ta clasifica algun hende como carne? Pasobra nan ta reconoce Hesus como nan Señor y ta kere cu e Reino lo trece un mihor bida.

6. Den decada di 1990, con nos a haya un comprondemento mas cla ainda di e ilustracion?

⁶ Pa hopi aña, e pueblo di Jehova a kere cu hende tabata ser husga durante e tempo di fin, y cu e manera cu nan a reacciona riba e trabou di predica a determina si nan ta carne of cabrito. Pero meymey di decada di 1990, nos a bin compronde e ilustracion mas mihor. Den E Toren di Vigilancia di 15 di october 1995 a sali dos articulo cu a compara loke Hesus a bisa na Mateo 24:29 pa 31 (les’e) cu loke el a bisa na Mateo 25:31 y 32 (les’e). * Kico tabata e conclusion? E prome di e dos articulonan a bisa cu e huicio di e carne- y cabritonan lo tuma luga den futuro. Ki tempo precies? “Lo e tuma luga despues cu ‘e tribulacion’ menciona na Mateo 24:29 y 30 cuminsa y  e Yiu di hende ‘yega den su gloria.’ ... E ora ey, na fin di henter e sistema malbado, Hesus lo husga, lo dicta sentencia y ehecut’e.”

7. Kico nos ta compronde awe di e ilustracion di carne y cabrito?

⁷ Awe, nos ta compronde e ilustracion di carne y cabrito hopi bon. Ken ta e personahenan den e ilustracion? “E Yiu di hende”, of “Rey”, ta Hesus. Su “rumannan” ta e cristiannan ungi cu spirito santo cu lo reina hunto cu ne den cielo. (Rom. 8:16, 17) Y “e carnenan” y “e cabritonan” ta representa personanan di tur nacion; nan no ta ungi cu spirito santo. Na ki tempo e huicio lo tuma luga? E huicio lo ta casi na final di e tribulacion grandi cu pronto lo cuminsa. Dicon algun persona ta ser clasifica como carne y otronan como cabrito? Esey ta depende di e manera cu nan a trata e resto di e rumannan ungi di Cristo cu tin riba Tera. Nos ta hopi contento cu, segun cu e fin ta yega cerca, Jehova gradualmente a yuda nos compronde e nificacion di e ilustracionnan di Mateo capitulo 24 y 25.

8, 9. Dicon Hesus a referi na e carnenan como “e hustonan”?

⁸ Den e ilustracion di carne y cabrito, Hesus no a menciona e trabou di predica directamente. Pues, dicon nos por bisa cu e ilustracion ta enfatisa e importancia di e trabou di predica?

⁹ Na prome luga, nos mester corda cu Hesus tabata uzando un ilustracion pa siña hende un les. E no tabata papia di carne y cabrito literal. Ni tampoco e no tabata kiermen cu cada persona cu ta carne tin cu duna e unginan cuminda y paña, cuida nan ora nan ta malo of bishita nan den prizon. Mas bien, el a uza e ilustracion pa describi e actitud cu e carnenan lo mester tin pa cu su rumannan. El a referi na e carnenan como “e hustonan”, pasobra nan ta reconoce cu Cristo tin un grupo di ruman ungi ainda riba Tera y pasobra nan ta apoya e unginan ey fielmente durante e ultimo dianan trabahoso aki.—Mat. 10:40-42; 25:40, 46; 2 Tim. 3:1-5.

10. Con e carnenan por yuda e rumannan di Cristo?

¹⁰ Na di dos luga, pensa riba e contexto di e palabranan di Hesus. Ora Hesus a conta e ilustracion, e tabata papia tocante e señal di su presencia y di loke lo pasa durante e tempo di fin. (Mat. 24:3) Por ehempel, el a indica cu e señal lo tin un faceta sobresaliente. El a bisa: “E bon noticia aki di e Reino lo ser predica den henter e Tera habita.” (Mat. 24:14) Y un poco prome cu el a papia di e carne- y cabritonan, el a conta e ilustracion di talento. Manera nos a mira den e articulo anterior, Hesus a duna e ilustracion ey pa corda su “rumannan”, su discipelnan ungi cu spirito santo, cu nan mester ta diligente den e trabou di predica. Pero con e grupo chikito di ungi cu lo ta riba Tera durante e presencia di Hesus lo por predica na “tur nacion” prome cu e fin yega? E ilustracion di carne y cabrito ta mustra cu e unginan lo haya yudansa di “e carne[nan].” Con? Wel, un di e mihor maneranan cu e carnenan por yuda e rumannan di Cristo ta di apoya nan den e trabou di predica. Pero kico esey ta encera? Acaso e carnenan mester djis contribui cu placa pa e obra y tambe anima e unginan pa haci e trabou di predica? Of ta spera algo mas di nan?

11. Kico algun hende lo por puntra, y dicon?

¹¹ Awe, tin ocho miyon discipel di Hesus, y mayoria di nan no ta ungi. Pues, nan no a haya e talentonan cu Hesus a duna su esclavonan ungi. (Mat. 25:14-18) Pesey tin hende lo por puntra: Esnan cu no ta ungi cu spirito santo tambe tin cu predica? E contesta ta si. Ban wak dicon.

12. Kico nos ta siña for di e palabranan di Hesus na Mateo 28:19 y 20?

¹² Hesus a bisa tur su discipelnan cu nan mester predica. Despues cu Hesus a resucita, el a bisa su siguidornan pa haci discipel y pa siña nan pa cumpli cu “tur loke” el a manda. Un di e mandamentonan ey tabata e trabou di predica. (Lesa Mateo 28:19, 20.) Pues, tur discipel di Cristo tin cu predica, sea cu nan tin e speransa di biba den cielo of riba Tera.—Echo. 10:42.

13. Kico nos ta siña for di e vision cu Juan a mira?

¹³ E buki di Revelacion ta indica cu lo tin otro personanan ta predica hunto cu e unginan. Hesus a duna apostel Juan un vision di un “bruid” cu ta invita hende pa bin bebe e awa cu ta duna bida. E bruid ta representa e 144.000 unginan cu lo reina cu Cristo den cielo. (Rev. 14:1, 3; 22:17) E awa ta representa tur loke Jehova a haci pa libra hende for di pica y morto mediante e sacrificio di rescate di Hesus. (Mat. 20:28; Juan 3:16; 1 Juan 4:9, 10) E rescate ta un parti fundamental di e mensahe cu nos ta predica, y cu entusiasmo e unginan ta yuda hende compronde con nan por beneficia di dje. (1 Cor. 1:23) Pero den e vision, Juan a mira otro personanan cu no ta forma parti di e bruid, y nan tambe ta haya e mandato pa bisa hende: “Bin!” E di dos grupo aki ta cristiannan cu no ta ungi y cu  tin e speransa di biba pa semper riba Tera. Nan ta obedece e mandato y ta invita otro hende pa bin bebe e awa di bida. Pues, e vision aki ta mustra bon cla cu tur persona cu acepta e invitacion pa “bin” tin e responsabilidad di predica e bon noticia na otro hende.

14. Con nos ta obedece e “ley di Cristo”?

¹⁴ Tur cu ta obedece e “ley di Cristo” mester predica. (Gal. 6:2) Jehova tin e mesun normanan pa tur hende cu ta ador’e; e no ta haci distincion. Pesey el a bisa e Israelitanan: “E mesun ley ta conta pa tanto e yiu di tera como pa e stranhero cu ta keda biba pa un tempo meymey di boso.” (Exo. 12:49; Lev. 24:22) Cristiannan no ta bou di e Ley di Moises. Pero nos tur, sea cu nos ta ungi of no, ta bou di e “ley di Cristo.” E ley ey ta encera tur loke Hesus a siña hende, y un di su siñansanan mas importante tabata cu su discipelnan mester mustra amor. (Juan 13:35; Sant. 2:8) Y pensa un rato: Cua ta e mihor manera pa mustra cu nos ta stima Dios, stima Cristo y stima nos prohimo? Esey ta door di predica e bon noticia di e Reino.—Juan 15:10; Echo. 1:8.

15. Dicon nos por bisa cu e mandato di Hesus pa predica ta conta pa tur su discipelnan?

¹⁵ Tin biaha, loke Hesus a bisa na un grupo chikito ta aplica na un grupo mas grandi. Por ehempel, Hesus a cera e pacto pa un Reino cu 11 discipel so. Pero en realidad, e 144.000 ta inclui den e pacto ey. (Luc. 22:29, 30; Rev. 5:10; 7:4-8) Asina tambe, despues cu Hesus a resucita, ta un cantidad relativamente chikito di su siguidornan a tend’e duna e mandato pa bay predica. (Echo. 10:40-42; 1 Cor. 15:6) Pero tur cristian di e prome siglo a obedece e mandato ey, aunke nan personalmente no a yega di tende Hesus papia. (Echo. 8:4; 1 Ped. 1:8) Awe ta mescos. Aunke niun di nos no a tende Hesus bisa cu nos mester predica, toch tin ocho miyon proclamador di Reino ta haci e trabou aki. Dicon nos ta haci esaki? Pasobra asina nos ta demostra cu di berdad nos tin fe den Hesus.—Sant. 2:18.

16-18. (a) Con nos por yuda e rumannan di Cristo? (b) Dicon awor ta e momento pa nos apoya e unginan?

¹⁶ Satanas ta bringando contra e rumannan di Cristo cu ainda ta riba Tera. Y su atakenan ta bira mas y mas fuerte, pasobra e sa “cu a ked’e masha poco tempo.” (Rev. 12:9, 12, 17) A pesar di esey, e unginan ta sigui dirigi e campaña di predicacion di mas grandi den historia. Y no tin duda cu Hesus ta cu nan y ta guia nan.—Mat. 28:20.

¹⁷ Nos tin e gran privilegio di yuda e rumannan di Cristo no solamente den e trabou di predica, sino tambe na otro maneranan practico. Por ehempel, nos ta duna contribucion financiero y ta yuda traha Salonnan di Reino, Salonnan di Asamblea y sucursalnan. Tambe nos ta apoya nan ora nos ta obedece e ancianonan y otronan nombra pa “e esclavo fiel y prudente.”—Mat. 24:45-47; Heb. 13:17.

¹⁸ Pronto e rumannan di Cristo cu ainda ta riba Tera lo haya nan seyo final. E ora ey e angelnan lo laga e bientonan destructivo di e tribulacion grandi los. (Rev. 7:1-3) Prome cu Armagedon cuminsa, Hesus lo hiba e unginan cielo. (Mat. 13:41-43) Pues, si nos kier ser clasifica como carne ora Hesus bin, awor ta e momento pa nos ta leal y apoya e rumannan di Cristo.