1, 2. (a) Karasaras dah kan me Sises ketin padahkihong kompoakepah keren ko? (Menlau kilang tepin kilel.) (b) Dahme kitail anahne ese duwen karasaras en sihpw oh kuht ko?

 SISES mahmahsaniong kompoakepah keren kan, Piter, Andru, Seims, oh Sohn duwen mehkot me uhdahn kaselel. Mwurin eh ketin padahkihong irail duwen karasaras en ladu lelepek oh loalokongo, serepein meipwon ehk ko, oh papah silimeno, e ketin padahkihong kompoakepah ko duwen pil ehu karasaras. Nan karasaraso e mahsanih duwen ahnsou ehu me “Nein-Aramas” pahn ketin kadeikada “tohn sampah koaruhsie.” E mahsanih me “Nein-Aramas” pahn irepeseng aramas akan ni pwihn riau, me e ketin karasahkihong sihpw oh kuht kei. Oh e ketin kawehwehda duwen kesiluh en pwihn me kesempwal, me iei irail kan me wia rien Nanmwarkio.​—Wadek Madiu 25:31-46.

² Duwehte wahnpoaron ko, sapwellimen Siohwa ladu kan nan atail ahnsou kin pil men esehla karasaras wet pwehki e pidada mour en aramas akan. Sises mahsanih me ekei pahn alehdi mour soutuk ahpw ekei pahn kasohrala. Ihme kahrehda e uhdahn kesempwal kitail en esehla ia wehwehn karasaraso oh  dahme kitail anahne wia pwehn alehdi mour soutuk. Eri nan iren onop wet, kitail pahn sapengala peidek pwukat: Ia duwen Siohwa eh ketin sewese kitail en wehwehki karasaras wet? Ia duwen atail ese me karasaraso kin kasalehda kesempwalpen doadoahk en kalohk? Ihs me anahne kalohk? Oh dahme kahrehda ahnsou wet e kesempwal aramas akan en loalopwoatohng “Nanmwarkio” oh rie kan?

3, 4. (a) Dahme kitail anahne ese pwehn wehwehki karasaras wet? (b) Nan pahr 1881, ia duwen Kahn Iroir eh kawehwehda karasaras wet?

³ Pwehn wehwehki ia wehwehn karasaras en sihpw oh kuht ko, kitail anahne ese ihs me “Nein-Aramas,” de “Nanmwarkio,” ihs me sihpw oh kuht ko, oh ihs irail kan me wia rien Nanmwarkio? Iahd me “Nein-Aramas” pahn irepeseng, de kadeikada sihpw oh kuht kan? oh dahme kahrehda ekei adaneki sihpw oh ekei kuht?

⁴ Nan pahr 1881, Kahn Iroir (lokaiahn wai) koasoia me “Nein-Aramas,” de “Nanmwarkio,” iei Sises. Oh e kawehwehda me irail kan me wia rien Nanmwarkio kaidehn irailte me pahn iang Sises ketin kakaun nanleng ahpw pil aramas koaros me pahn momour nin sampah ahnsou me re unsekla. Kahn Iroiro koasoia me aramas akan pahn tohrohrpeseng erein Kaundahn Krais Pahr Kido, oh irail kan me kin alasang sapwellimen Koht limpoak ni soahng koaros me re wia pahn adaneki sihpw kan.

5. Nan pahr 1923, ia duwen sapwellimen Koht aramas akan ar wehwehki karasaraso?

⁵ Mwuhr, Siohwa ketin sewese sapwellime aramas akan ren kalaudehla arail wehwehki karasaras wet. Nan pahr 1923, Kahn Iroir (lokaiahn wai) en October 15, koasoia me “Nein-Aramas” iei Sises. Ahpw e uhd doadoahngki iren Paipel kan pwehn kawehwehda me irail kan me wia rien Krais nan karasaraso kin dokedoke irail kante me pahn iang Sises ketin kakaun, oh irail koaros pahn mi nanleng erein Kaundahn Krais Pahr Kido. E pil koasoia me sihpw ko iei irail kan me pahn mour nin sampah pahn kaundahn Sises oh rie kan. Oh pwehki karasaraso koasoia me sihpw pwukat kin sewese irail kan me wia rien Nanmwarkio, katohrohr de kadeik wet pahn anahne wiawi ni ahnsou me rien Sises me keidi pwukat mihmihte nin sampah, mwohn Kaundahn Krais Pahr Kido tepida. Iren onopo pil koasoia me sihpw ko iei irail kan me kin kamehlele Sises oh kamehlele me Wehin Koht pahn wahdo mour ehu me mwahusang ahnsowo.

6. Nan pahr 1995, ia duwen mwomwen atail wehwehki karasaraso eh wekila?

⁶ Sounpar tohto kitail kin medewe me doadoahk en kalohko pahn kadeikada aramas akan erein imwin rahn akan. Ma re pwungki dahme kitail kin padahngki, irail sihpw kei, oh ma re sohte pwungki, irail kuht kei. Ahpw nan pahr 1995, mwomwen atail wehwehki karasaras wet wekila. Kahn Iroir kapahrekihpene Madiu 24:29-31 (wadek) oh Madiu 25:31, 32 (wadek), oh kawehwehda me Sises pahn ketin kadeikada aramas akan erein kahn kamakam kowahlapo ni ahnsou me Nein-Aramas “pahn ket nan sapwellime mwoalen kadeik lingan.” *

7. Ia wehwehn karasaraso?

⁷ Rahnwet, kitail wehwehkihla mwahu karasaras en sihpw oh kuht ko. Kitail ese me “Nein-Aramas,” de “Nanmwarkio,” iei Sises. Irail kan me wia rien Nanmwarkio iei  irail kan me keikihdi sapwellimen Koht manaman oh pahn iang Sises ketin kakaun nanleng. (Rom 8:16, 17) “Sihpw kan” oh “kuht kan” iei aramas akan sang wehi koaros. Re pahn pakadeikda kerenlahng imwin kahn kamakam kowahlapo me pahn kereniong tepida. Oh kitail ese me Sises pahn ketin kadeikada aramas akan sang ni mwomwen arail wiewia ong me keidi kan me mihmihte nin sampah. Kitail uhdahn kalahnganki me erein sounpar kan me dower powe, Siohwa kin ketin sewese kitail en wehwehkihla karasaras wet oh karasaras teikan nan Madiu irelaud 24 oh 25!

8, 9. Dahme kahrehda Sises ketin kahdaneki irail me rasehng sihpw kan aramas “pwung” kei?

⁸ Sises sohte ketin doadoahngki lepin lokaia kan “kalohk” de “doadoahk en kalohk” nan karasaras en sihpw oh kuht ko. Eri ia duwen atail ese me karasaraso kin padahkihong kitail me doadoahk en kalohk uhdahn kesempwal?

⁹ Pwehn diarada pasapengpen met, keieu kitail anahne taman me Sises ketin padahkihong kitail mehn kasukuhl ehu sang ni eh ketin doadoahngki karasaras ehu. E sohte ketin mahmahsanih duwen uhdahn sihpw oh kuht. Eri ni ahlohte, e sohte ketin mahsanih me aramas koaros me pahn pakadeikda nin duwen sihpw kei anahne kamwenge me keidi kan oh kihong arail likou, apwalih irail ahnsou me re soumwahu, de mwemweitla rehrail nan imweteng. Sises ketin kahdaneki irail me rasehng sihpw kan aramas “pwung” kei pwehki irail kin kilangwohng me keidi kan nin duwen rien Krais. Re pil kin loalopwoatohng me keidi pwukat erein imwin rahn apwal pwukat.​—Mad. 10:40-42; 25:40, 46; 2 Tim. 3:1-5.

10. Ia duwen sihpw kan ar kak sewese rien Krais kan?

¹⁰ Ni Sises eh ketikihda karasaras en sihpw oh kuht ko, e wie mahmahsanih duwen dahme pahn wiawi ni imwin rahn akan. (Mad. 24:3) Karasepe, e mahsanih: “Rongamwahu en Wehin Koht pahn lohkseli wasa koaros nin sampah.” (Mad. 24:14) Oh mwuri, mwohnte eh mahsanih duwen sihpw oh kuht ko, e ketikihda karasaras en papah silimeno. Sises ketikihda karasaras wet pwehn padahkihong me keidi kan me re anahne doadoahk laud nan doadoahk en kalohk. Ahpw irail me malaulaute me luwehdi nin sampah, oh mie doadoahk tohto me anahne wiawi! Sises ketin padahkihong me keidi kan ren kalohk ong “aramas koaros nin sampah” mwohn imwio pahn leledo. Nin duwen me kitail sukuhlkier nan karasaras en sihpw oh kuht ko, “sihpw kan” sewese rien Sises kan. Oh ehu me keieu mwahu me re kak wia iei en sewese rien Sises kan nan doadoahk en kalohk. Ahpw ia duwe, e itar en ihte toukihda sawas en mwohni ong doadoahko de kangoange rien Krais kan en wia doadoahk en kalohk?

11. Peidek dahieu me ele ekei pahn idek, oh dahme kahrehda?

¹¹ Rahnwet, mie sapwellimen Sises tohnpadahk meh welirar oh pali laud en irail sohte keikihdi sapwellimen Koht manaman. Re sohte alehdi talent me Sises ketikihong sapwellime me keidi kan. (Mad. 25:14-18) Ele ekei pahn idek, ‘Ma Sises sohte ketikihong neirail talent, irail uhdahn anahne kalohk?’ Ei. Kitail tehk dahme kahrehda.

12. Dahme kitail sukuhlkihsang sapwellimen Sises mahsen kan nan Madiu 28:19, 20?

¹² Sises ketin kehkehlikihong sapwellime tohnpadahk kan koaros ren kalohk.  Mwurin Sises eh ketin iasada, e mahsanihong sapwellime tohnpadahk kan en katohnpadahk oh padahkihong aramas akan “mehkoaros” me e ketin kehkehlikihong irail. Eri aramas akan me wiahla tohnpadahk kei pil anahne peikiong sapwellimen Sises kehkehlik en kalohk. (Wadek Madiu 28:19, 20.) E sansal me kitail koaros anahne kalohk, mehnda ma kitail ahneki koapworopwor en mour nanleng de nin sampah.​—Wiewia 10:42.

13. Dahme kitail sukuhlkihsang kaudiahl me Sohn kilangadao?

¹³ Pwuhken Kaudiahl kasalehda me irail me keidi kan oh pil meteikan me pahn wia doadoahk en kalohk. Sises ketikihong wahnpoaron Sohn kaudiahl ehu duwen “lih kamwohdo” me luke aramas akan en kohdo oh ale pilen komour. Lih kamwohdo kin wehwehki me keidi 144,000 ko me pahn iang Sises ketin kakaun nanleng. (Kaud. 14:1, 3; 22:17) Pihlo kin wehwehki sapwellimen Sises meirong me pahn sewese aramas akan en ahneki mour ehu me sohte mie dihp oh mehla. (Mad. 20:28; Sohn 3:16; 1 Sohn 4:9, 10) Me keidi kan kin ngoangki padahkihong aramas akan duwen meirongo oh ia duwen arail kak paiekihda. (1 Kor. 1:23) Ahpw kaudiahlo pil kasalehda duwen ehu pwihn tohrohr me sohte keikihdi sapwellimen Koht manaman ahpw me ahneki koapworopwor en mour nin sampah. Irail pil ale kehkehlik en ndaiong aramas akan: “Kohdo!” Oh re kin peikiong kehkehlik wet sang ni arail kin padahkihong meteikan duwen rongamwahwo. Eri kaudiahl wet kasalehda me irail koaros me alehda rongamwahwo anahne kalohk ong meteikan.

14. Ia duwen atail kin peikiong “kosonned en Krais”?

¹⁴ Koaros me kin peikiong “kosonned en  Krais” anahne kalohk. (Kal. 6:2) Siohwa kin ketin kasik me koaros me kin kaudok ong ih en peikiong kosonned kohte. Mahso, e ketin kasik me mehn Israel kan oh pil mehn liki kan me kousoan rehrail en peikiong sapwellime kosonned kan. (Eks. 12:49; Lip. 24:22) Mehlel, rahnwet kitail sohte anahne peikiong kosonned kan me kohwong mehn Israel ko. Ahpw kitail koaros, mehnda ma kitail keidi de soh, kitail anahne peikiong “kosonned en Krais.” Ehu nanpwungen soahng kan me keieu kesempwal me Sises ketin padahkihong kitail iei en kasalehda limpoak. (Sohn 13:35; Seims 2:8) Kitail anahne poakohng Siohwa, Sises, oh aramas akan. Oh ahl me keieu mwahu kitail en kasalehda soangen limpoak wet iei sang ni atail kin padahkihong aramas akan duwen rongamwahu en Wehio.​—Sohn 15:10; Wiewia 1:8.

15. Dahme kahrehda kitail kak nda me Sises ketin kehkehlikihong sapwellime tohnpadahk kan koaros en kalohk?

¹⁵ Dahme Sises mahsanihong ekei sapwellime tohnpadahk kan ekei pak kak dokedoke tohnpadahk tohto. Karasepe, Sises ketin wiahda inou ehu rehn sapwellime tohnpadahk ehk emen kohte oh ketin inoukihong irail me re pahn iang ih ketin kakaun nan sapwellime Wehi. Ahpw, dahme e ketin inoukihong irail kin uhdahn dokedoke meh 144,000 ko koaros. (Luk 22:29, 30; Kaud. 20:4; 7:4-8) Oh mwurin Sises eh ketin iasada, ekeite sapwellime tohnpadahk ko me rong sapwellime kehkehlik en kalohk. (Wiewia 10:40-42; 1 Kor. 15:6) Ahpw sapwellimen Sises tohnpadahk kan koaros ni mwehin wahnpoaron ko kin peikiong kehkehlik wet. (Wiewia 8:4; 1 Pit. 1:8) Pil rahnwet, kitail ese me kitail anahne kalohk, mendahki kitail sohte rong kapitien Sises eh mahsanihong kitail en wia doadoahk wet. Ni mehlel, kitail lella meh welirar me kin wiewia doadoahk en kalohk wet. Kitail ese me sang atail kin wie kalokalohk, kitail kin kasalehda me kitail uhdahn pwoson Sises.​—Seims 2:18.

16-18. Ia duwen atail kak ni loalopwoat sewese rien Krais kan? Dahme kahrehda kitail anahne wia met ahnsou wet?

¹⁶ Sehdan wie mahmahweniong rien Krais me keidi kan me luwehdi nin sampah, oh e ese me eh “ahnsou mwotomwotalahr.” (Kaud. 12:9, 12, 17) Ahpw mendahki uhwong kan sang Sehdan, me keidi kan kin pousehlahte tiengla mwowe nan doadoahk en kalohk, oh aramas me wie rongorong rongamwahwo wie tohtohla sang mahs. E sansal me Sises kin ketin ieiang oh kaukaweid me keidi kan.​—Mad. 28:20.

¹⁷ Kitail kin pehm me e wia pwais kaselel ehu en sewese rien Krais kan sang ni atail kalohk. Kitail pil kin sawas sang atail kin toukihda sawaspen mwohni, oh doadoahk laud en kauwada Wasahn Kaudok kan, Wasahn Mihting Tohrohr kan, oh ohpis en Sounkadehdehn Siohwa kan. Ahnsou me kitail kin ni loalopwoat peikiong elder kan oh brother teikan me “ladu lelepek oh loalokongo” idihada, kitail kin kasalehda me kitail men sewese rien Krais kan.​—Mad. 24:45-47, NW; Ipru 13:17.

¹⁸ Ahnsou keren, kaimwiseklahn kileldi en me keidi kan ong irail kan me luhluhwe pahn wiawi. Mwuri tohnleng ko pahn kadarala “ahng pahieun sampah,” oh kahn kamakam kowahlapo pahn tepida. (Kaud. 7:1-3) Mwohn Armakedon eh pahn tepida, Sises pahn ketikihdahla me keidi kan nanleng. (Mad. 13:41-43) Eri ma kitail men pakadeikda nin duwen sihpw kei ni ketidohn Sises, met iei ahnsou me kitail anahne loalopwoat ong rien Krais me keidi kan.