1, 2. (a) Atoli wa la Jésus atene na akota kamarade ti lo? (Bâ foto so ayeke na tongo nda ti article ni.) (b) Nyen la a lingbi e hinga na ndo ti toli ti angasangbaga na angasa?

JÉSUS ayeke sara lani tënë na Pierre, André, Jacques nga na Jean so ayeke akota kamarade ti lo. Lo londo ti tene na ala toli ti ngbâa be-ta-zo so ayeke sara ye na ndara, toli ti amasia bale-oko nga na toli ti atalent. Jésus ahunzi lisoro ti lo na tenengo na ala mbeni toli ni nde. Lo sara tënë ti mbeni ngoi so “Molenge ti zo” ayeke fâ ande ngbanga ti “amara kue”. Toli ni anzere lani mingi na adisciple ti lo. Na yâ ti toli ni, Jésus agboto lê na ndo ti agroupe use ti azo, mbeni lo haka ala na angasangbaga nga mbeni lo haka ala na angasa. Lo gboto nga lê na ndo ti mbeni ota groupe ni so lo tene ayeke ti “aita” ti “gbia ni”.—Diko Matthieu 25:31-46.

² Toli so anzere mingi na awakua ti Jéhovah na a yeke na lege ni ndali ti so atënë so Jésus atene na yâ ni andu fini ti azo. Lo fa ngbanga ti nyen ambeni zo ayeke wara fini ti lakue lakue nga ambeni ayeke wara kuâ teti lakue lakue. Ti tene e wara fini ti lakue lakue, a lingbi e mä yâ ti atâ tënë so Jésus afa na yâ ti toli ni nga e sara ye alingbi na ni. A yeke ndali ni la a lingbi e hunda tere  ti e: Tongana nyen la yeke yeke Jéhovah amû maboko na e ti mä yâ ti toli so nzoni mingi? Ngbanga ti nyen e lingbi ti tene so toli so agboto lê na ndo ti kua ti fango tënë? Azo wa la a mû na ala kua ti fango tënë? Ngbanga ti nyen la a yeke fadeso ngoi ti tene e ngbâa be-ta-zo na “gbia ni” nga na ala so lo tene ala yeke “aita” ti lo?

3, 4. (a) Ti mä yâ ti toli ti angasangbaga na angasa, a lingbi e hinga akota ye wa? (b) Na ngu 1881, tongana nyen la a fa nda ti toli so na yâ ti Tour ti Ba Ndo?

³ Ti tene e mä yâ ti toli ti angasangbaga na angasa nzoni, a lingbi e hinga akota ye ota so ayeke na yâ ni: azo ti yâ ti toli ni, ngoi ti fango ngbanga, nga ndani so a lingbi ti tene so mbeni zo ayeke ngasangbaga wala ngasa.

⁴ Na ngu 1881, a fa na yâ ti Tour ti Ba Ndo so “Molenge ti zo”, wala “gbia ni”, ayeke Jésus. Na yâ ni a fa nga so “aita” ti Gbia ni ayeke azo so ayeke komande ande legeoko na Jésus na yayu nga na azo kue so ayeke wara fini ande na ndo ti sese na ngoi so ala yeke ga nzoni-kue. Na yâ ti Tour ti Ba Ndo ni a tene so a yeke kangbi popo ti azo na ngoi ti Komandema ti Ngu Saki Oko ti Christ nga azo so asara ye na ndoye na yâ ti ye kue tongana ti Nzapa, a yeke bâ ala tongana angasangbaga.

5. Na ngu 1923, awakua ti Nzapa amä yâ ti toli ti angasangbaga na angasa tongana nyen?

⁵ A si na mbeni ngoi, Jéhovah amû maboko na awakua ti lo ti mä yâ ti toli so nzoni. Na yâ ti Tour ti Ba Ndo ti lango 15 ti octobre, ngu 1923, a fa a tene “Molenge ti zo” ni ayeke Jésus. Me, na yâ ti Tour ti Ba Ndo ni a sara kua na aversê ti Bible ti fa so aita ti Christ ni aye ti sara gi tënë ti ala so ayeke komande legeoko na Jésus na yayu, na a tene so ambeni ngasangbaga ayeke ala so ayeke wara fini na ndo ti sese na gbe ti Royaume ti Christ. Ka ti ngoi so a yeke kangbi popo ti angasangbaga na angasa? Na yâ ti Tour ti Ba Ndo ni a tene so aita ti Christ ayeke komande ande legeoko na lo na yayu na ngoi ti Komandema ti Ngu Saki Oko. Ni la, ala so ayeke wara fini na ndo ti sese alingbi pëpe ti mû maboko na ala wala ti ke ti bâ lege ti ala. Tongaso, a yeke kangbi popo ti angasangbaga na angasa kozo si Komandema ti Ngu Saki Oko ato nda ni. Ka ti ndani so a tene so mbeni zo ayeke tongana ngasangbaga? Na yâ ti Tour ti Ba Ndo ni a tene so a yeke bâ ambeni zo tongana angasangbaga ndali ti so ala yeda so Jésus ayeke Seigneur ti ala nga ala yeda so Royaume ti Nzapa la ayeke ga ande na anzoni ye mingi.

6. Na ngu 1995, tongana nyen la a kiri a changé fason so e mä na yâ ti toli ti angasangbaga na angasa?

⁶ So a changé lani fason so e mä na yâ ti toli so, awakua ti Jéhovah apensé so sarango ye ti azo na mbage ti tënë ti Royaume so a fa na ala na yâ ti ngoi so aye ti ngoi so ayeke gue ti hunzi la ayeke fa wala ala yeke angasangbaga wala angasa. Ye oko, na ngu 1995, a changé fason so e mä na yâ ti toli so. Na yâ ti a-article use ti Tour ti Ba Ndo ti lango 15 ti octobre, ngu 1995, a fa aye so akpa tere na yâ ti atënë ti Jésus so ayeke na Matthieu 24:29-31 (diko ni) nga na Matthieu 25:31, 32. (Diko ni.) * Tënë wa la a tene na nda ni? Na yâ ti article ni, a tene: “Fango ngbanga na ndo ti angasangbaga na angasa ayeke ti ngoi so ayeke ga.” A yeke lawa? “A yeke duti ande na peko ti so ‘kota ye ti vundu’ so a sara tënë ni na Matthieu 24:29, 30 ato nda ni nga Molenge ti zo ‘aga na yâ ti gloire ti lo’ . . . Na lâ ni kâ, na ngoi  so a yeke futi sioni dunia ti Satan, fade Jésus ayeke fâ ngbanga nga lo yeke sara ye alingbi na ngbanga ni.”

7. Tongana nyen la e mä yâ ti toli ti angasangbaga na angasa fadeso polele?

⁷ Laso, e mä yâ ti toli ti angasangbaga na angasa polele. Azo so a sara tënë ti ala na yâ ti toli ni ayeke azo wa? “Molenge ti zo”, wala Gbia ni, ayeke Jésus. “Aita” ti Gbia ni ayeke akoli na awali so a soro ala ti komande ande legeoko na Christ na yayu (aRom. 8:16, 17). “Angasangbaga” na “angasa” ayeke azo ti amara kue. A soro ala na lege ti yingo vulu pëpe. Ka ngoi ti fango ngbanga ni ayeke lawa? A yeke fâ ande ngbanga ni nduru na hunzingo ti kota ye ti vundu so ayeke ga. Ndani so a lingbi ti tene so ambeni zo ayeke angasangbaga wala angasa ayeke nyen? Fason so ala sara ye na tanga ti aita ti Christ so a soro ala ti gue na yayu so angbâ na sese la ayeke fa ni. So a ga nduru ti futi dunia so awe, e kiri singila mingi so yeke yeke Jéhovah amû maboko na e ti mä yâ ti toli so nga na ambeni so ayeke na Matthieu chapitre 24 nga na 25.

8, 9. Ngbanga ti nyen la Jésus atene so angasangbaga ayeke “[a]zo ti mbilimbili”?

⁸ Na yâ ti toli ti angasangbaga na angasa, Jésus asara tënë ti kua ti fango tënë droit tongaso pëpe. Ka ngbanga ti nyen e tene so toli so afa so kua ti fango tënë ayeke kota kua mingi?

⁹ Kozoni, a yeke nzoni e hinga so Jésus ayeke fa ye na lege ti mbeni toli. Lo yeke sara pëpe tënë ti kangbingo popo ti avrai ngasangbaga na avrai ngasa. Legeoko nga, lo ye ti tene pëpe so a lingbi azo kue so a yeke bâ ande ala tongana angasangbaga amû vrai kobe nga na bongo na aita ti lo, wala a lingbi azo ni abâ lege ti ala na ngoi so tere ti ala ason wala ala gue abâ ala na da ti kanga. Me, lo yeke sara tënë ti sarango ye ti azo so ayeke tongana angasangbaga na mbage ti aita ti lo. Lo tene so angasangbaga ni ayeke “[a]zo ti mbilimbili” ndali ti so ala hinga so ambeni ita ti lo so a soro ala ti gue na yayu angbâ na sese, nga angasangbaga ni angbâ ti mû maboko na ala na alango ti nda ni so ayeke ngangu mingi.—Mat. 10:40-42; 25:40, 46; 2 Tim. 3:1-5.

10. Tongana nyen la angasangbaga afa so ala sara ye na nzoni bê na mbage ti aita ti Christ?

¹⁰ Use ni, zia e bâ aye so angoro tënë ti Jésus so. Lo yeke sara tënë ti fä ti ngoi so lo yeke si nga lo yeke duti dä nga na ti ngoi so aye ti ngoi so ayeke gue ti hunzi (Mat. 24:3). Na yâ ti diskur ti Jésus lo tene kozo awe, lo tene: “A yeke fa ande nzoni tënë ti royaume so na ndo ti sese kue so azo ayeke dä.” (Mat. 24:14). Nga, ngoi kete kozo ti tene lo sara tënë ti toli ti angasangbaga na angasa, lo tene toli ti atalent. Tongana ti so e bâ na yâ ti article so ahon, Jésus atene toli ti atalent ti fa na adisciple ti lo so a soro ala ti gue na yayu, “aita” ti lo, so a lingbi ala fa tënë na ngangu ti ala kue. Ye oko, kete wungo ti aChrétien so a soro ala ti gue na yayu so angbâ na sese na ngoi so Jésus asi ayeke na mbeni kota kua ti sarango ni: fango tënë na “amara kue” kozoni si nda ni aga. Toli ti angasangbaga na angasa afa so a yeke mû maboko na aChrétien so a soro ala ti gue na yayu. Tongaso, mbeni kota ye so azo so a bâ ala tongana angasangbaga asara ti fa so ala sara ye na nzoni bê na mbage ti aita ti Christ ayeke so ala yeke mû maboko na ala na yâ ti kua ti fango tënë. Aye wa la ala yeke sara ti mû maboko na aita ti Christ? Ala yeke mû gi nginza ndali ti kua ti fango tënë nga ala yeke wa aita ti Christ ti ngbâ ti sara kua ni, wala ala yeke sara nga ambeni ye nde?

11. Hundango ndo wa la abâ gigi? Ngbanga ti nyen?

¹¹ Laso, wungo ti adisciple ti Jésus asi nduru na million miombe, na a soro mingi ti ala pëpe ti gue na yayu. Jésus amû na ala atalent pëpe. Lo mû ni na aChrétien so a soro ala ti gue na yayu (Mat. 25:14-18). Tongaso, hundango ndo so abâ gigi ayeke so: ‘Kua ti fango tënë abâ biani azo so a soro ala pëpe ti gue na yayu?’ Zia e bâ ambeni raison so afa so kua ni abâ ala.

12. Atënë ti Jésus so ayeke na Matthieu 28:19, 20 afa nyen na e?

¹² Jésus ahunda na adisciple ti lo kue ti fa tënë. Na peko ti so a zingo Jésus na kuâ, lo tene na adisciple ti lo ti sara si azo aga adisciple nga ala fa na azo ni ti bata “aye kue” so lo mû yanga na ala ti sara. Kua ti fango tënë ayeke na yâ ti aye so lo mû yanga na ala ti sara. (Diko Matthieu 28:19, 20.) Tongaso, a lingbi adisciple ti Christ kue afa tënë, atâa ala yeke na beku ti komande na yayu wala ti wara fini na sese.—Kus. 10:42.

13. Suma so Jean abâ afa nyen? Ngbanga ti nyen?

¹³ Mbeti ti Apocalypse afa so aChrétien so a soro ala ti gue na yayu nga na tanga ti aChrétien kue la ayeke fa tënë. Na yâ ti mbeni suma so Jésus afa na bazengele Jean, Jean abâ “wali so amû koli fini fini”, wala aChrétien 144000 so a soro ala ti komande ande legeoko na Christ na yayu, ayeke tisa azo ti ‘nyon ngu so amû fini na zo senge senge’. (Apoc. 14:1, 3; 22:17). Ngu so a sara tënë ni na yâ ti suma ni aye ti sara tënë ti aye so Jéhovah aleke na lege ti ngere so Christ afuta ti zi na azo na gbe ti siokpari nga na kuâ (Mat. 20:28; Jean 3:16; 1 Jean 4:9, 10). Ngere so Christ afuta ti zi na azo ayeke mbeni kota ye so ayeke na yâ ti tënë so e yeke fa. Nga, aChrétien so a soro ala ti gue na yayu ayeke mû li ni na yâ ti kua ni ti mû maboko na azo ti hinga ye na ndo ti ngere so nga ti wara ye ti nzoni na lege ni (1 aCor.  1:23). Me na yâ ti suma ni, Jean abâ ambeni zo so a soro ala pëpe ti gue na yayu me so ayeke na beku ti wara fini na ndo ti sese. A tene na ala nga ti tene na azo: “Ga!” Ala sara ye alingbi na tënë so a tene na ala nga ala ngbâ ti tisa azo ti ga ti nyon ngu so amû fini na zo. Tongaso, suma so afa polele so a lingbi azo kue so ayeda na tisango ndo so atene “ga” afa tënë na ambeni zo.

14. Ti sara ye alingbi na “ndia ti Christ” andu nyen?

¹⁴ A lingbi azo kue so ayeke na gbe ti “ndia ti Christ” afa tënë. (aGal. 6:2) Jéhovah amû na azo kue gi oko ndia. Na tapande, lo tene na azo ti Israël, lo tene: “Ndia ayeke gi oko teti zo so a dü lo na sese ti Israël na teti wande so aduti na popo ti i.” (Ex. 12:49; Lév. 24:22). A-Chrétien ayeke pëpe na gbe ti Ndia ti Moïse. Me atâa a soro e ti gue na yayu wala pëpe, e kue e yeke na gbe ti “ndia ti Christ.” Aye kue so Jésus afa ayeke na yâ ti ndia ni. Mbeni kota ye so Jésus afa na adisciple ti lo ayeke so a lingbi ala ndoye Jéhovah, Jésus nga na azo (Jean 13:35; Jacq. 2:8). Mbeni nzoni lege so e lingbi ti sara na ni ayeke ti fa na azo nzoni tënë ti Royaume.—Jean 15:10; Kus. 1:8.

15. Ngbanga ti nyen e lingbi ti tene so yanga so Jésus amû abâ adisciple ti lo kue?

¹⁵ Tënë so Jésus atene na mbeni kete wungo ti adisciple ti lo a lingbi ti bâ gbâ ti azo. Na tapande, Jésus ate mbele ndali ti mbeni Royaume gi na adisciple ti lo 11, me mbele ni abâ aChrétien kue so a soro ala ti gue na yayu (Luc 22:29, 30; Apoc. 5:10; 7:4-8). Legeoko nga, Jésus amû yanga gi na mbeni kete wungo ti adisciple ti lo, ala so lo fa tere ti lo na ala na peko ti so a zingo lo na kuâ, ti fa tënë (Kus. 10:40-42; 1 aCor. 15:6). Me adisciple ti lo kue so ayeke be-ta-zo na ngoi ti akozo Chrétien ahinga so tënë ti Jésus so abâ ala, atâa so ala wani amä Jésus na tenengo tënë ni pëpe (Kus. 8:4; 1 Pi. 1:8). Legeoko nga laso, Jésus wani asara tënë pëpe na awafango tënë million miombe so ayeke fa tënë. Me ala kue ahinga so a lingbi ala mä na bê na Christ nga ala fa ni na lege so ala yeke fa tënë.—Jacq. 2:18.

16-18. Tongana nyen la azo so ayeke tongana angasangbaga alingbi ti mû maboko na aita ti Christ? Ngbanga ti nyen la a yeke fadeso ngoi ti tene ala sara ni?

¹⁶ Satan ayeke tiri bira na tanga ti aita ti Christ so a soro ala ti gue na yayu so angbâ na sese, nga so lo hinga so “lo yeke na ngoi mingi pëpe” lo yeke kiri ti tiri na ala ngangu (Apoc. 12:9, 12, 17). Atâa so a lingbi aChrétien so a soro ala ti gue na yayu agbu ngangu na yâ ti angangu tara so, ala ngbâ ti mû li ni na yâ ti kota kua ti fango tënë. Kite ayeke pëpe so Jésus ayeke mû maboko na ala na yâ ti aye so ala yeke sara.—Mat. 28:20.

¹⁷ Azo so ayeke tongana angasangbaga so wungo ti ala angbâ ti gue na li ni ayeke na pasa ti mû maboko na aita ti Christ na lege so ala yeke fa tënë nga ala yeke sara ambeni ye nde. Na tapande, ala yeke mû a-offrande nga ala yeke mû maboko ti leke aDa ti Royaume, aDa ti Assemblée nga na afiliale. Ala yeke mä nga yanga ti azo so “ngbâa be-ta-zo so ayeke sara ye na ndara” asoro ala ti mû li ni.—Mat. 24:45-47; aHéb. 13:17.

¹⁸ Na yâ ti ngoi kete, a yeke kpo nzoroko biani biani na ndo ti lê ti tanga ti aChrétien so a soro ala ti gue na yayu so angbâ na sese. Na peko ni, a-ange ayeke zi maboko ti ala na tere ti “apupu osio ti sese” nga kota ye ti vundu ayeke to nda ni (Apoc. 7:1-3). Kozo ti tene Harmaguédon ato nda ni, Jésus ayeke mû ande aChrétien so a soro ala ti gue na yayu (Mat. 13:41-43). Tongaso, a yeke fadeso ngoi ti tene azo so aye ti tene a bâ ala ande tongana angasangbaga angbâ ti mû maboko na aita ti Christ.