1, 2. (a) Fu sortu agersitori Yesus taki nanga den bun mati fu en? (Luku a prenki na a bigin fu na artikel.) (b) San wi musu sabi fu na agersitori fu den skapu nanga den bokoboko?

YESUS e taki nanga Petrus, Andreas, Yakobus nanga Yohanes di de bun mati fu en. Didyonsro a taki fu den agersitori fu a koni srafu di de fu frutrow, den tin nyunwenke nanga den talenti. Now a e fruteri den wan tra agersitori. A e taki fu wan ten te „a Manpikin fu libisma” o krutu „ala pipel”. A musu fu de wan span agersitori gi den bakaman fu en. Na ini na agersitori Yesus e taki fu tu grupu: Wan grupu skapu èn wan grupu bokoboko. A e taki tu fu wan tra prenspari grupu di a e kari den „brada fu a Kownu”.—Leisi Mateyus 25:31-46.

² Neleki den apostel, na so Yehovah en futuboi na ini a ten disi wani sabi moro tu fu na agersitori disi fu di a abi fu du nanga a libi fu sma. Yesus e sori fu san ede son sma o kisi têgo libi èn fu san ede trawan o dede fu ala ten. Dati meki a prenspari srefisrefi fu kon sabi san na agersitori wani taki èn san wi musu du fu kisi têgo libi. A bun fu aksi wisrefi: Fa Yehovah yepi wi fu kon frustan na agersitori disi? Fa wi sabi taki  na agersitori e sori taki a preikiwroko prenspari? Suma na den sma di kisi a frantwortu fu preiki? Fu san ede now na a ten fu tai hori na „a Kownu” èn na den sma di a e kari den „brada fu mi”?

3, 4. (a) Sortu prenspari sani wi musu sabi fu man frustan na agersitori fu den skapu nanga den bokoboko? (b) Fa Zion’s Watch Tower fruklari na agersitori disi na ini 1881?

³ Fu frustan na agersitori fu den skapu nanga den bokoboko bun, wi musu sabi dri prenspari sani: Wi musu sabi suma na den sma di kari na ini na agersitori, o ten Yesus o krutu sma èn fu san ede Yesus e taki dati sma de leki skapu noso bokoboko.

⁴ Na ini 1881, Zion’s Watch Tower taki dati „a Manpikin fu libisma” di Bijbel e kari „a Kownu” tu, na Yesus. A tijdschrift disi taki dati den „brada” fu a Kownu a no soso den wan di ben o tiri makandra nanga en na ini hemel, ma taki ala sma di ben o libi na grontapu ben o tron brada fu en te den no ben o abi sondu moro. A Watch Tower ben taki dati Krestes ben o prati den skapu nanga den bokoboko na a ten fu a Dusun Yari Tiri fu en. A tijdschrift ben taki tu dati den skapu ben o de den sma di sori a lobi fu Gado.

5. Fa Yehovah yepi en pipel fu kon frustan na agersitori fu den skapu nanga den bokoboko moro krin na ini 1923?

⁵ Na ini 1923, Yehovah yepi en pipel fu kon frustan na agersitori disi moro krin. Wan artikel na ini The Watch Tower fu 15 oktober 1923 ben taki dati „a Manpikin fu libisma” na Yesus. Ma dan a tijdschrift kari wan tu Bijbeltekst fu sori suma na den sma di ben o de Krestes „brada” di o tiri makandra nanga en na ini hemel. A sori tu taki den skapu ben o de den sma di abi a howpu fu libi na grontapu te a Kownukondre fu Krestes o tiri. Na artikel ben taki tu o ten Krestes ben o prati den skapu nanga den bokoboko. A ben sori taki den skapu na den wan di o libi na grontapu te Yesus nanga den brada fu en o tiri. Na ini na agersitori wi e si taki den skapu disi ben o yepi den salfu brada fu a Kownu. Dati meki na artikel ben taki dati Yesus ben o krutu sma te den salfu brada fu en de na grontapu ete, fosi a Dusun Yari Tiri bigin. Na artikel ben taki tu fu san ede Yesus ben o taki dati wan sma na wan skapu. Fu kan de wan skapu, wan sma ben musu si Yesus leki en Masra èn a Kownukondre leki a wan-enkri tiri di o man meki sani kon moro bun na grontapu.

6. Fa wi kon frustan sani moro krin na ini 1995?

⁶ Disi meki taki furu yari langa wi ben e denki taki Gado ben e krutu sma leki skapu noso bokoboko nanga yepi fu a preikiwroko di wi e du na ini den lasti dei. Wi ben denki taki den sma di ben e arki a Kownukondre boskopu, ben de skapu èn den wan di no ben wani arki, ben de bokoboko. Ma na ini 1995, wi kon frustan na agersitori moro krin. Tu artikel na ini A Waktitoren fu 15 oktober 1995 ben e teki Mateyus 24:29-31 (leisi en) gersi nanga Mateyus 25:31, 32. (Leisi en.) Den artikel ben sori taki Yesus, a Manpikin fu libisma, o krutu sma na a ten fu a bigi banawtu te a o „kon nanga en glori”. *

7. San wi kon frustan moro krin now?

 ⁷ Na ini a ten disi, wi e frustan na agersitori fu den skapu nanga den bokoboko krin. Wi sabi suma na den sma di kari na ini a tori disi: Yesus na „a Manpikin fu libisma”, noso a Kownu. Den sma di a e kari den „brada fu mi”, na den salfu man nanga uma di o tiri makandra nanga en na ini hemel (Rom. 8:16, 17). „Den skapu” nanga „den bokoboko” na den sma fu ala kondre. Gado no salfu den sma disi nanga a santa yeye fu en. O ten Yesus o krutu den? A o du dati na a kaba fu a bigi banawtu di de na pasi e kon. Fu san ede Yesus o krutu sma leki skapu noso bokoboko? Dati o abi fu du nanga a fasi fa den o horibaka gi Krestes salfu brada di de na grontapu ete. Now di a kaba fu a grontapu disi de so krosibei, dan wi kan breiti taki Yehovah meki wi frustan na agersitori disi nanga den tra agersitori na ini Mateyus kapitel 24 nanga 25 moro bun.

8, 9. Fu san ede Yesus e si den skapu leki „reti-ati sma”?

⁸ Na ini na agersitori fu den skapu nanga den bokoboko, Yesus no e taki langalanga fu a preikiwroko. Dan fu san ede wi kan taki dati na agersitori e sori taki a preikiwroko prenspari?

⁹ A fosi sani na taki wi musu hori na prakseri taki na wan agersitori Yesus e gi dya. A no e taki dati a o prati trutru skapu nanga bokoboko. A no e taki tu dati ibri sma di a e krutu leki wan skapu musu gi trutru nyanyan nanga krosi na den brada fu en, noso taki den musu go luku den brada disi te den de na strafu-oso noso sorgu den te den siki. Nôno, Krestes e sori taki den skapu na „reti-ati sma” fu di den e si den salfuwan leki brada fu en èn fu di den e horibaka gi den na ini den muilek lasti dei disi.—Mat. 10:40-42; 25:40, 46; 2 Tim. 3:1-5.

10. Fa den skapu kan du bun gi Krestes brada?

¹⁰ Di Yesus fruteri na agersitori fu den skapu nanga den bokoboko, a sori san ben o pasa na ini a ten fu a kaba (Mat. 24:3). A taki fu eksempre: „A bun nyunsu disi fu a Kownukondre o preiki gi sma na heri grontapu” (Mat. 24:14). Leti fosi a taki fu den skapu nanga den bokoboko, a fruteri na agersitori fu den talenti. Soleki fa wi si na ini na artikel fosi a wan disi, dan Yesus fruteri na agersitori disi fu warskow den salfu futuboi fu en, noso den „brada fu en”, taki den musu tan du a preikiwroko fayafaya. Ma a pikin grupu salfuwan di de ete na grontapu abi bun furu wroko fu du: Den musu preiki gi „sma fu ala kondre” fosi a kaba kon! Na agersitori fu den skapu nanga den bokoboko e sori taki den salfu Kresten ben o kisi yepi. Sobun, den sma di Krestes o krutu leki skapu musu du bun gi en brada. Wan fu den moro prenspari fasi fa den kan du disi, na te den e horibaka gi den na ini a preikiwroko. Ma san disi wani taki? A nofo fu gi moni gi a wroko noso fu gi den brada fu Krestes deki-ati fu tan du a preikiwroko?

11. Sortu sani wi kan aksi wisrefi èn fu san ede?

¹¹ Na ini a ten disi yu abi aiti milyun bakaman fu Yesus èn furu fu den no salfu nanga Gado en santa yeye. Den no kisi  den talenti di Yesus gi den salfu futuboi fu en (Mat. 25:14-18). Sobun, wi kan aksi wisrefi: ’A frantwortu fu preiki na gi den sma tu di no salfu nanga santa yeye?’ Iya. Meki wi luku fu san ede wi kan taki disi.

12. San wi e leri fu den sani di Yesus taki na Mateyus 28:19, 20?

¹² Yesus taigi ala den bakaman fu en fu preiki. Baka di Yesus kisi wan opobaka, a taigi den bakaman fu en fu meki sma tron disipel fu en èn fu leri den fu du ’ala san a taigi den fu du’. A preikiwroko na wan fu den sani dati. (Leisi Mateyus 28:19, 20.) Dati meki ala bakaman fu Krestes musu preiki, awinsi den abi a howpu fu tiri na ini hemel noso fu libi na grontapu.—Tori 10:42.

13. San a fisyun di Yohanes si wani taki èn fu san ede wi kan taki disi?

¹³ A Bijbel buku Openbaring e sori taki den sma di ben o du a preikiwroko, na den salfuwan nanga tra sma tu. Yesus meki na apostel Yohanes si wan fisyun fu „a trowmisi”. Dati na den 144.000 sma di o tiri makandra nanga en na ini hemel. Den e kari sma fu „kon dringi fu a watra di e gi libi èn di de fu kisi fu soso” (Openb. 14:1, 3; 22:17). A watra abi fu du nanga Yesus lusu-paiman di o yepi sma fu kisi libi sondro sondu nanga dede (Mat. 20:28; Yoh. 3:16; 1 Yoh. 4:9, 10). A lusu-paiman na wan fu den moro prenspari sani di wi e preiki èn den salfuwan e teki fesi na ini a wroko fu yepi sma fu kon sabi san na a lusu-paiman disi èn sortu wini den kan kisi fu en (1 Kor. 1:23). Ma na ini a fisyun Yohanes e si tra sma tu di no de fu a grupu salfu Kresten. Den srefi e kisi a komando tu fu taki: „Kon!” Na dati den e du. Den e gi trawan a kari fu kon dringi fu a watra di e gi libi. A grupu disi na den sma  di abi a howpu fu libi na grontapu. Sobun, a fisyun disi e sori krin taki ala sma di e teki a kari fu „kon” abi a frantwortu fu preiki gi tra sma.

14. San a wani taki fu gi yesi na „a wèt fu Krestes”?

¹⁴ Ala sma di e gi yesi na „a wèt fu Krestes” musu preiki. (Gal. 6:2) Yehovah wani taki ala sma di e dini en musu gi yesi na den srefi wet. Fu eksempre, a ben taigi den Israelsma: „Ala Israelsma nanga den trakondre sma di e tan na un mindri musu gi yesi na a srefi wèt” (Eks. 12:49; Lef. 24:22). Kresten no abi fu hori a Wet fu Moses. Ma awinsi wi na salfuwan noso tra skapu, wi alamala musu hori „a wèt fu Krestes”. A wet disi na ala sani di Yesus leri wi. A moro prenspari sani di Yesus leri den bakaman fu en na taki den musu sori lobi (Yoh. 13:35; Yak. 2:8). Wan fu den moro prenspari fasi fa wi e sori lobi gi Gado, gi Krestes èn gi tra sma, na taki wi e preiki a bun nyunsu fu a Kownukondre.—Yoh. 15:10; Tori 1:8.

15. Fu san ede wi kan taki dati Yesus taigi ala den bakaman fu en fu preiki?

¹⁵ Son leisi te Yesus taigi wan pikin grupu wan sani, dan a kan abi fu du tu nanga wan moro bigi grupu. Fu eksempre, Yesus meki wan frubontu gi wan Kownukondre nanga soso 11 bakaman fu en. Ma a frubontu dati abi fu du tu nanga ala den 144.000 salfu bakaman fu en (Luk. 22:29, 30; Openb. 5:10; 7:4-8). Na so a de tu taki Yesus taigi soso wan pikin grupu bakaman fu en fu preiki. Dati na den wan di si en baka di a kisi wan opobaka (Tori 10:40-42;1 Kor. 15:6). Ma ala den bakaman fu Yesus na ini a fosi Kresten gemeente ben sabi taki den ben musu preiki tu, aladi den srefi no ben yere Yesus taigi den dati (Tori 8:4; 1 Petr. 1:8). Na ini a ten disi tu, nowan fu den aiti milyun Kownukondre preikiman yere taki Yesus taigi den fu preiki. Ma den alamala sabi taki den musu sori bribi na ini Krestes. Disi den e du te den e du a preikiwroko.—Yak. 2:18.

16-18. Fa wi kan horibaka gi Krestes brada èn fu san ede wi musu du disi now?

¹⁶ Dei fu dei Satan e feti moro tranga nanga den salfu brada fu Krestes di de na grontapu ete èn a sabi taki „en ten syatu” (Openb. 12:9, 12, 17). Aladi den salfu Kresten e kisi furu tesi, toku den e teki fesi na ini a moro bigi preikiwroko di oiti du na grontapu. Wi sabi seiker taki Yesus de nanga den èn taki na en e sori den san den musu du.—Mat. 28:20.

¹⁷ Na wan bigi grani fu du a preikiwroko, fu di na a fasi disi wi e yepi Krestes brada. Wi e yepi den tu te wi e gi moni èn te wi e wroko tranga fu bow Kownukondre zaal, kongreshal nanga bijkantoro. Te wi e gi yesi na den owruman nanga den tra brada di „a koni srafu di de fu frutrow” poti, dan wi e sori taki wi wani yepi den brada fu Krestes.—Mat. 24:45-47; Hebr. 13:17.

¹⁸ Dyonsro den salfu Kresten di de na grontapu ete o kisi wan marki fu a lasti leisi. Baka dati den engel o lusu „den fo winti fu grontapu” èn a bigi banawtu o bigin (Openb. 7:1-3). Fosi Armagedon bigin, Yesus o tyari den salfu Kresten go na hemel (Mat. 13:41-43). Sobun, efu wi wani taki Krestes krutu wi leki skapu te a o kon, dan now na a ten fu horibaka gi den salfu bakaman fu en.