1, 2. (a) Ncikozyanyo nzi ncaabaambila Jesu balongwe bakwe? (Amubone cifwanikiso icili kumatalikilo aacibalo.) (b) Ncinzi ncotweelede kuzyiba kujatikizya cikozyanyo cambelele ampongo?

JESU wali kubandika abalongwe bakwe ba Petro, Andreya, Jakobo, alimwi a Johane. Wali kubaambila cikozyanyo camuzike uusyomeka alimwi uucenjede, cabanakalindu bali ikkumi, alimwi acamatalenta. Jesu wamanizya mubandi wakwe kwiinda mukwaamba cikozyanyo acimbi. Waamba kujatikizya ciindi “Mwanaamuntu” nayoobeteka “masi oonse.” Eelo kaka kulangilwa kuti cikozyanyo eeci cakabakkomanisya kapati basikwiiya bakwe! Mucikozyanyo eeci, Jesu waamba nkamu zyobilo, nkamu yambelele alimwi ayampongo. Mpoonya waamba nkamu iimbi yatatu njaayubununa kuti banabokwabo “Mwami.”—Amubale Matayo 25:31-46.

² Kuzwa kaindi, bantu ba Jehova cali kubakkomanisya cikozyanyo eeci akaambo kakuti mulincico Jesu waamba kujatikizya ziyakucitikila bantu. Uyubununa kaambo bamwi ncobayootambwida buumi butamani alimwi akaambo bamwi ncobayoonyonyoonwa. Buumi bwesu buyeeme akumvwisya kasimpe nkaakali kuyiisya  Jesu alimwi akucita kweelana anzyaakali kwaamba. Mbwaanga buumi bwesu bulijatikizyidwe, tweelede kulibuzya kuti: Mbuti Jehova mbwaatugwasya buce-buce kumvwisya cikozyanyo eeci? Nkaambo nzi ncotukonzya kwaamba kuti cikozyanyo eeci citondezya mbouyandika kapati mulimo wakukambauka? Mbaani ibapedwe mulimo wakukambauka? Alimwi nkaambo nzi lino ncocili ciindi cakusyomeka ku “Mwami” alimwi akuli baabo mbaita kuti “bakwesu”?

3, 4. (a) Nzintu nzi ziyandika kapati nzyotweelede kuzyiba kutegwa tucimvwisye cikozyanyo cambelele ampongo? (b) Mu 1881, ino magazini ya Zion’s Watch Tower yakacipandulula buti cikozyanyo eeci?

³ Kutegwa tucimvwisye munzila iiluzi cikozyanyo cambelele ampongo, tweelede kuzyiba zintu zyotatwe ziyandika kapati izili mucibalo eeci: kuzyiba baabo ibaambidwe, ciindi lubeta noluyoocitika, alimwi akaambo ikapa kuti bantu baambwe kuba mbelele naa mpongo.

⁴ Mu 1881, magazini ya Zion’s Watch Tower yakaamba kuti Jesu ngonguwe “Mwanaamuntu” alimwi iwiitwa kuti “Mwami.” Basikwiiya Bbaibbele bakusaanguna bakali kuyeeya kuti ibbala lyakuti “bakwesu” lyakali kwaamba baabo ibakali kuyakulela a Kristo alimwi abantu boonse ibakali kuyakukkala anyika muparadaiso. Bakali kuyeeya kuti mbelele ampongo zyakali kuyakwaandaanizyigwa mu Bulelo bwa Myaka Iili Cuulu ibwa Kristo. Alimwi bakali kusyoma kuti bantu bakali kuyakwaambwa kuti nimbelele akaambo kakutobela mulawo wa Leza waluyando.

5. Mumyaka yamuma 1920, ino kwakaba kucinca kuli buti mukumvwisya cikozyanyo eeci?

⁵ Kumatalikilo aamyaka yamuma 1920, Jehova wakabagwasya bantu bakwe kucinca mbobakali kucimvwisya cikozyanyo eeci. Ngazi Yamulindizi yamu Chingisi ya October 15, 1923, yakaamba kuti “Mwanaamuntu” ngu Jesu. Nokuba boobo, yakabelesya twaambo twamu Magwalo itwakapa kuzyiba kuti banabokwabo Kristo mbabaabo buyo ibakali kuyakulela anguwe kujulu, alimwi yakaamba kuti mbelele mbabaabo ibakajisi bulangizi bwakupona anyika ansi aabweendelezi bwa Bwami bwa Kristo. Mbuti kujatikizya ciindi cakwaandaanya mbelele ampongo? Cibalo cakaamba kuti aciindi eeco banabokwabo Kristo banoolela anguwe kujulu mu Bulelo bwa Myaka Iili Cuulu, aboobo taakwe mbobanga bagwasyigwa naa kulekelezyegwa abantu anyika. Aboobo, kwaandaanya mbelele ampongo kweelede kuyoocitika kabutanatalika Bulelo bwa Myaka Iili Cuulu. Kujatikizya kaambo ikayoopa kuti bantu baambwe kuba mbelele, cibalo cakaamba kuti bantu bakali kuyakwaambwa kuti nimbelele akaambo kakuzyiba kuti Jesu Mwami wabo alimwi akaambo kakulangila kuti Bwami buyooleta zintu zibotu.

6. Mumyaka yamuma 1990, ino kwakaba kucinca kuli buti alimwi mukumvwisya cikozyanyo eeci?

⁶ Akaambo kakucinca mukumvwisya ooku, bantu ba Jehova bakali kuyeeya kuti bantu balabetekwa kuba mbelele naa mpongo muciindi coonse camamanino aabweende bwazintu kweelana ambobautambula mulumbe wa Bwami. Nokuba boobo, muma 1990, kwakaba kucinca mukumvwisya kwesu. Zibalo zyobilo mumagazini ya Ngazi Yamulindizi yamu Chingisi ya October 15, 1995, zyakaamba kukozyanya kuliko akati kamajwi a Jesu aajanika mulugwalo lwa Matayo 24:29-31 (amubale) alimwi amulugwalo lwa Matayo 25:31, 32. (Amubale.) * Ncinzi cakaambwa? Cibalo cakusaanguna cakaamba kuti: “Kubetekwa kuba mbelele naa mpongo kucili kumbele.” Pele lili? Cakaamba kuti: “Kuyakucitika  aakwiinda ‘mapenzi’ aambidwe mulugwalo lwa Matayo 24:29, 30 alimwi aciindi nayooboola Mwanaamuntu ‘mubulemu bupati.’ . . . Mpoonya, mukumanizya bweende bwazintu bubyaabi, Jesu uyoobeteka bantu.”

7. Mbupanduluzi nzi bulimvwisya kapati mbotujisi lino?

⁷ Mazuba aano, tulijisi bupanduluzi bulimvwisya kapati kujatikizya cikozyanyo cambelele ampongo. Kujatikizya kuzyiba baabo baambidwe, Jesu ngo “Mwanaamuntu,” Mwami. Aabo ibaitwa kuti “bakwesu” mbaalumi abamakaintu bananike, ibayoolela a Kristo kujulu. (Rom. 8:16, 17) “Mbelele” alimwi “ampongo,” ziiminina bantu ibazwa muzisi zyoonse. Aaba tabananikidwe amuuya uusalala pe. Mbuti kujatikizya ciindi lubeta noluyoocitika? Lubeta oolu luyoocitika aakulondelela mamanino aamapenzi mapati aalangilwa kumbele lino-lino. Mbuti kujatikizya kaambo bantu ncobayoobetekelwa kuba mbelele naa mpongo? Kuyooba kweelana ambobababona banabokwabo Kristo bananike ibacisyeede anyika. Mbwaanga mamanino aabweende bwazintu oobu aswena afwaafwi, tulikkomene kaka kubona kuti Jehova wazumanana buce-buce kutumunikila kujatikizya cikozyanyo eeci alimwi azikozyanyo zimwi zikozyenyi aceeci izili mucaandaano 24 alimwi a 25 mubbuku lya Matayo!

8, 9. Nkaambo nzi bantu ibali mbuli mbelele ncobaambwa kuti mbantu “baluleme”?

⁸ Mucikozyanyo cambelele ampongo, Jesu taambi cacigaminina kujatikizya mulimo wakukambauka. Pele nkaambo nzi ncotukonzya kwaamba kuti cikozyanyo eeci citondezya mbouyandika mulimo wakukambauka?

⁹ Cakusaanguna, amubone kuti Jesu ulayiisya kwiinda mukubelesya cikozyanyo. Masimpe, taambi kujatikizya kwaandaanya mbelele ampongo zini pe. Alimwi taambi kuti kutegwa muntu abetekwe kuba mbelele weelede kubapa cakulya, kubasamika, naa kubaswaya banabokwabo nobali muntolongo munzila ini pe. Muciindi caboobo, munzila yacikozyanyo utondezya muuya ibantu ibali mbuli mbelele ngobatondezya kubanabokwabo Jesu. Bantu ibali mbuli mbelele ubaamba kuti bantu “baluleme” akaambo kakuti balizyi kuti Kristo ulijisi kabunga kabanabokwabo bananike ibacili anyika, alimwi bantu ibali mbuli mbelele balabagwasya cakusyomeka bananike mumazuba aaya aamamanino aakatazya.—Mt. 10:40-42; 25:40, 46; 2Tim. 3:1-5.

10. Mbuti bantu ibali mbuli mbelele mbobakonzya kutondezya kuti balabafwida luse banabokwabo Kristo?

¹⁰ Cabili, amulange-lange makani aazingulukide majwi aa Jesu. Waamba kujatikizya citondezyo cakubako kwakwe alimwi acamamanino aabweende bwazintu. (Mt. 24:3) Kumatalikilo aamubandi wakwe, Jesu wakatondezya cintu cimwi icakali kuyooba citondezyo—‘kukambaukwa kwamakani mabotu aa Bwami.’ (Mt. 24:14) Katanaamba makani aajatikizya mbelele ampongo, wakaamba cikozyanyo camatalenta. Mbubwenya mbokwakabandikwa mucibalo cainda, Jesu wakaamba cikozyanyo eeci kutondezya basikwiiya bakwe bananike, mbaita kuti “bakwesu,” kuti bakeelede kuba basungu mumulimo wakukambauka. Nokuba boobo, bananike basyoonto bacisyeede anyika bajisi mulimo mupati kapati muciindi eeci cakubako kwa Jesu—mulimo wakukambauka “nyika yoonse” mamanino kaatanasika. Cikozyanyo cambelele ampongo citondezya kuti bananike bakali kuyoogwasyigwa. Aboobo, nzila imwi iiyandika kapati ibantu ibali mbuli mbelele njobatondezya kubafwida luse banabokwabo Kristo nkwiinda mukubagwasyilizya mumulimo wakukambauka. Pele ncinzi cijatikizyidwe mukubagwasya? Sena cibikkilizya buyo kubagwasya munzila yakumubili alimwi akubaumbulizya, naa kuli azimbi ziyandika?

11. Mubuzyo nzi uukonzya kubuzyigwa, alimwi nkaambo nzi?

¹¹ Mazuba aano bantu banji akati kabasikwiiya ba Jesu ibali 8 miliyoni tabali bananike pe. Taakwe nobakatambula matalenta Jesu ngaakapa bazike bakwe bananike. (Mt. 25:14-18) Lino mubuzyo uukonzya kubuzyigwa ngwakuti: ‘Sena abalo ibatali bananike balijatikizyidwe mumulimo wakukambauka?’ Amubone twaambo tumwi itutondezya kuti inzya balijatikizyidwe.

12. Ncinzi ncotwiiya kumajwi a Jesu aalembedwe mulugwalo lwa Matayo 28:19, 20?

¹² Jesu wakalailila basikwiiya bakwe boonse kuti kabakambauka. Naakabusyigwa, Jesu wakaambila basikumutobela kuyiisya bantu kuti babe basikwiiya, kubayiisya “zintu zyoonse” nzyaakabalailila. Akati kazintu nzyaakabalailila kuli mulimo wakukambauka. (Amubale Matayo 28:19, 20.) Aboobo, basikwiiya ba Kristo boonse beelede kukambauka, tacikwe makani naa bajisi bulangizi bwakulela kujulu naa bwakupona anyika.—Mil. 10:42.

13. Ino cilengaano ncaakabona Johane citondezya nzi, alimwi nkaambo nzi?

¹³ Bbuku lya Ciyubunuzyo litondezya kuti mulimo wakukambauka wakali kuyoocitwa abananike alimwi abamwi. Jesu wakatondezya mwaapostolo Johane cilengaano ‘canabwiinga,’ nkokuti bananike iba 144,000 ibayakulela antoomwe a Kristo kujulu, bananike aaba bakali kutamba bantu kuti ‘banywe maanzi aabuumi kakunyina kubbadela.’ (Ciy. 14:1, 3; 22:17) Maanzi aaya aamucikozyanyo aiminina bubambe bwa Jehova bwakuponya bantu kuzwa kucibi alimwi alufwu kwiinda mucituuzyo cacinunuzyo ca Kristo. (Mt. 20:28; Joh. 3:16; 1Joh. 4:9, 10) Cinunuzyo mpaayeeme mulumbe ngotukambauka, alimwi bananike mbabasololela mukuyiisya bantu kujatikizya cinunuzyo alimwi ampindu iijanika mulincico. (1Kor. 1:23) Pele mucilengaano,  Johane wabona bantu bambi, ibatali munkamu yanabwiinga. Mpoonya aaba bantu abalo baambilwa kuti baambe kuti: “Boola!” Balalibombya mukuti abalo baambila bamwi kuti banywe maanzi aabuumi. Nkamu eeyi yabili njabantu ibajisi bulangizi bwakupona anyika. Aboobo, cilengaano eeci citondezya ncobeni kuti boonse ibazumina kutambwa kwakuti “boola” balijisi mukuli wakukambauka.

14. Ncinzi cijatikizyidwe mukumvwida “mulawo wa Kristo”?

¹⁴ Boonse aabo beendelezyegwa ‘amulawo wa Kristo’ beelede kukambauka. (Gal. 6:2) Jehova tajisi zyeelelo ziindene pe. Mucikozyanyo, wakaambila bana Israyeli kuti: “Kweelede kuba mulawo omwe buyo kumuna Israyeli akumweenzu uukkala akati kanu.” (Kul. 12:49; Lev. 24:22) Banakristo tabeendelezyegwi a Mulawo wa Musa. Aboobo, tacikwe makani naa tuli bananike naa pe, toonse tweendelezyegwa ‘amulawo wa Kristo.’ Mulawo ooyu ubikkilizya zintu zyoonse nzyaakayiisya Jesu. Ciinda zyoonse akati kazintu Jesu nzyaakali kuyiisya ncakuti basikumutobela beelede kutondezya luyando. (Joh. 13:35; Jak. 2:8) Nzila yiinda kubota njotutondezya luyando kuli Leza, kuli Jesu alimwi akuli basimukoboma nkukambauka makani mabotu aa Bwami.—Joh. 15:10; Mil. 1:8.

15. Nkaambo nzi ncotukonzya kwaamba kuti malailile a Jesu alabajatikizya basikumutobela boonse?

¹⁵ Majwi aa Jesu ngaakaambila bantu basyoonto alakonzya kubeleka akubantu banji. Mucikozyanyo, Jesu wakabamba cizuminano ca Bwami abasikwiiya bakwe ibali buyo 11, pele cizuminano eeci cilabajatikizya iba 144,000 boonse. (Lk. 22:29, 30; Ciy. 5:10; 7:4-8) Mbubwenya buyo, Jesu wakaambila buyo basikumutobela basyoonto—nkwaakalibonya ciindi naakabuka—kuti bakeelede kukambauka. (Mil. 10:40-42; 1Kor. 15:6) Pele basikwiiya bakwe boonse ibamumwaanda wamyaka wakusaanguna ibakali kusyomeka bakazyiba kuti malailile aaya akali kubeleka akulimbabo, nokuba kuti tiibakamumvwa Jesu kaamba ntongola matwi. (Mil. 8:4; 1Pet. 1:8) Mbubwenya buyo amazuba aano, taakwe basikumwaya ba Bwami akati kabasikumwaya ibali 8 miliyoni ibakamumvwa Jesu kaambaula ntongola matwi. Pele boonse balizyi kuti balijisi mukuli wakutondezya lusyomo lwabo muli Kristo kwiinda mukutola lubazu mumulimo wakukambauka.—Jak. 2:18.

16-18. Mbuti bantu ibayanda kuyoobetekwa kuba mbelele mbobakonzya kugwasya banabokwabo Kristo, alimwi nkaambo nzi ncobeelede kucita boobo lino?

¹⁶ Saatani ulwana banabokwabo Kristo bananike ibacisyeede anyika, alimwi unoyaabwiindila kubalwana mbwaanga “kaindi kaniini” nkajisi kayaabumana. (Ciy. 12:9, 12, 17) Nokuba kuti bainda mumasunko mapati kapati, bananike bazumanana kutola ambele mulimo wakukambauka, mulimo mupati kapati uutanabwenwe anyika. Cakutadooneka, Jesu ulaambabo, ulabasololela mumulimo wabo.—Mt. 28:20.

¹⁷ Mweelwe mupati wambelele ucibona kuba coolwe kugwasya banabokwabo Kristo kutali buyo mumulimo wakukambauka pele alimwi akubagwasya munzila zimbi. Mucikozyanyo, balasanga lubono lwabo alimwi akugwasya mukuyaka Maanda aa Bwami, Maanda Aakucitila Miswaangano Mipati, alimwi amitabi, alimwi cakusyomeka, balabamvwida aabo ibasalwa ‘amuzike uusyomeka alimwi uucenjede’ kuti basololele.—Mt. 24:45-47; Heb. 13:17.

¹⁸ Lino-lino bangelo bayakuulekezya muuwo walunyonyooko wamapenzi mapati. Eeci ciyoocitika baakumaninina kugantwa banabokwabo Kristo bananike ibacisyeede anyika. (Ciy. 7:1-3) Kaitanatalika nkondo ya Amagedoni, bananike boonse banooli baunka kale kujulu. (Mt. 13:41-43) Aboobo, bantu ibayanda kuyoobetekwa kuba mbelele, ecino nceciindi cakugwasya banabokwabo Kristo cakusyomeka.