1, 2. (a) Ano nga mga ilustrasyon an iginsumat ni Jesus ha iya duok nga kasangkayan? (Kitaa an retrato hini nga pahina.) (b) Ano an kinahanglan naton hibaroan may kalabotan ha ilustrasyon mahitungod han mga karnero ngan mga kanding?

NAKIKIG-ISTORYA hi Jesus ha iya duok nga kasangkayan nga hira Pedro, Andres, Santiago, ngan Juan. Iginsumat pa la niya ha ira an mga ilustrasyon mahitungod han matinumanon ngan maaramon nga uripon, han napulo nga birhen, ngan han mga talanton. Gintapos niya an iya istorya pinaagi hin usa pa nga parabola diin nag-unabi hiya hin panahon nga an “Anak han tawo” maghuhukom ha “ngatanan nga nasud.” Sigurado nga nakapainteres ito ha iya mga disipulo! Hito nga ilustrasyon nagpokus hi Jesus ha duha nga grupo—ha mga karnero ngan ha mga kanding. Ngan ginpabug-atan niya an ikatulo ngan importante nga grupo nga iya gintawag nga “kabugtoan” han “Hadi.”—Basaha an Mateo 25:31-46.

² An katawohan ni Jehova maiha na nga interesado hito nga ilustrasyon tungod kay gin-unabi ni Jesus dida hito kon ano an dadangatan han mga tawo. Iya iginsumat kon kay ano nga an pipira magkakaada kinabuhi nga waray kataposan samtang an iba mabubungkag. An aton pagkaada hin kinabuhi nga waray kataposan nadepende ha aton  pagsabot ha mga kamatuoran nga igintutdo ni Jesus ngan paggios uyon hito. Salit hini nga artikulo, babatunon naton an masunod nga mga pakiana: Paonan-o kita ginbubuligan ni Jehova nga masabtan ini nga ilustrasyon? Kay ano nga makakasiring kita nga ginpapabug-atan han ilustrasyon an pagkaimportante han pagsangyaw? Hin-o an ginsugo nga magsangyaw? Ngan kay ano nga yana na an panahon nga magin maunungon kita ha “Hadi” ngan ha iya “kabugtoan”?

3, 4. (a) Ano an kinahanglan naton hibaroan basi masabtan naton an ilustrasyon? (b) Han 1881, paonan-o iginsaysay han Zion’s Watch Tower ini nga parabola?

³ Basi magkaada kita husto nga pagsabot ha ilustrasyon mahitungod han mga karnero ngan mga kanding, kinahanglan naton hibaroan (1) an ginrirepresentaran han mga gin-unabi, (2) an panahon han paghukom, ngan (3) an basihan ha paghukom ha usa sugad nga karnero o kanding.

⁴ Han 1881, an Zion’s Watch Tower nagsiring nga “an Anak han tawo,” o “an Hadi,” amo hi Jesus. Ngan iginsaysay hito nga an “kabugtoan” han Hadi nagtutudlok ha mga magmamando kaupod han Kristo pati han ngatanan nga tawo nga mabubuhi ha tuna katapos hira maipahiuli ha kahingpitan. Nagsiring liwat ito nga an pagbulag-bulag ha mga karnero ngan mga kanding mahitatabo durante han Usa ka Yukot ka Tuig nga Pagmando han Kristo, ngan an mga tawo nga nagsubad han gugma han Dios ha ngatanan nira nga ginbubuhat huhukman sugad nga karnero.

5. Ha dekada han 1920, paonan-o kita nagkaada mas matin-aw nga pagsabot ha ilustrasyon?

⁵ Temprano han dekada han 1920, ginbuligan ni Jehova an iya katawohan nga magkaada mas matin-aw nga pagsabot hini nga ilustrasyon. An Oktubre 15, 1923 nga The Watch Tower nagsiring nga an “Anak han tawo” amo hi Jesus. Pero, nagpresenta ito hin Kasuratanhon nga mga basihan nga nagpapakita nga an ginrirepresentaran han kabugtoan han Kristo amo la adton magmamando kaupod niya ha langit, ngan nagsiring ito nga an mga karnero amo adton may paglaom nga mabuhi ha tuna ilarom han pagmando han Kristo ngan han iya kabugtoan. Kumusta man an panahon han pagbulag-bulag ha mga karnero ngan mga kanding? San-o ito mahitatabo? An artikulo nagsiring nga an kabugtoan han Kristo makakaupod niya ha langit durante han Usa ka Yukot ka Tuig nga Pagmando, salit diri hira mahimo mabuligan o mapabay-an hadton may tunan-on nga paglaom. Kon sugad, an pagbulag-bulag ha mga karnero ngan mga kanding mahitatabo antes han Usa ka Yukot ka Tuig nga Pagmando. Ngan may kalabotan ha basihan ha paghukom ha usa sugad nga karnero, an artikulo nagsiring nga an usa nga tawo huhukman sugad nga karnero tungod han iya pagkarawat kan Jesus sugad nga iya Ginoo ngan han iya pagtoo nga an Ginhadian magpapahinabo hin mas maopay nga kahimtang ha kalibotan.

6. Han 1995, paonan-o nagkaada pagbag-o ha aton pagsabot ha parabola?

⁶ Tungod hiton ginbag-o nga pagsabot, ginhunahuna han katawohan ni Jehova nga an mga tawo ginhuhukman pinaagi ha pagsangyaw nga buruhaton durante hinin panahon han kataposan. Kon karawaton nira an aton mensahe, karnero hira, pero kon diri, kanding hira. Kondi han 1995, nagkaada pagbag-o ha aton pagsabot ha parabola. Iginpakita han duha nga artikulo ha Oktubre 15, 1995, nga gowa han An Barantayan an kaparihoan han mga ginsiring ni Jesus ha Mateo 24:29-31 (basaha) ngan Mateo 25:31, 32. (Basaha.) * Ano an konklusyon hito? An siyahan hinin duha nga artikulo nagsiring: “An paghukom ha mga karnero ngan ha mga kanding ha tidaraon pa.” San-o ito mahitatabo? “Mahitatabo ito katapos  han ‘kagol-anan’ [‘kasakitan,’ NW] nga gin-unabi ha Mateo 24:29, 30 ngan an Anak han tawo ‘inabot ha iya himaya.’ . . . Niyan, nga an bug-os maraot nga sistema aada ha kataposan, hi Jesus magpapahamutang han hukmanan ngan magpapahayag ngan magpapadapat han paghukom.”

7. Ano an aton matin-aw nga pagsabot yana ha parabola?

⁷ Yana, may matin-aw na kita nga pagsabot ha parabola mahitungod han mga karnero ngan mga kanding. May kalabotan ha ginrirepresentaran han mga gin-unabi ha parabola, hi Jesus amo an “Anak han tawo,” an Hadi. Adton gin-unabi sugad nga “kabugtoan” han Hadi amo an kalalakin-an ngan kababayin-an nga dinihogan pinaagi han espiritu nga magmamando kaupod han Kristo ha langit. (Roma 8:16, 17) “An mga karnero” ngan “an mga kanding” nagrirepresentar ha mga indibiduwal ha ngatanan nga nasud. Diri hira mga dinihogan. San-o man an panahon han paghukom ha ira? Mahitatabo ito ha ikatarapos han daku nga kasakitan nga hirani na umabot. Ngan ano an basihan ha paghukom ha mga tawo sugad nga karnero o kanding? Nakadepende ito ha paagi han ira pagtratar ha nanhibilin nga dinihogan nga kabugtoan han Kristo ha tuna. Tungod kay hirani na hinduro an kataposan hini nga sistema, mapasalamaton gud kita nga padayon nga ginbubuligan kita ni Jehova nga masabtan ini ngan an iba pa nga ilustrasyon ha Mateo kapitulo 24 ngan 25!

8, 9. Kay ano nga gintawag ni Jesus nga “matadong” an mga karnero?

⁸ Ha ilustrasyon mahitungod han mga karnero ngan mga kanding, waray direkta nga unabiha ni Jesus an pagsangyaw nga buruhaton. Kon sugad, kay ano nga makakasiring kita nga ginpapabug-atan hito an pagkaimportante han pagsangyaw?

⁹ Siyahan, tigamni nga hi Jesus nagtututdo pinaagi hin ilustrasyon. Matin-aw nga diri hiya naghihisgot han pagbulag-bulag han literal nga mga karnero ngan mga kanding. Ha pariho nga paagi, diri niya iginpapasabot nga an tagsa nga indibiduwal nga huhukman sugad nga karnero kinahanglan literal nga magpakaon, maghatag hin bado, magmangno, o bumisita ha iya kabugtoan ha prisohan. Lugod, iginhuhulagway niya an disposisyon nga kinahanglan ipakita han simboliko nga mga karnero ha iya kabugtoan. Gintawag niya an mga karnero nga “matadong” tungod kay ginkikilala nira nga an Kristo may-ada grupo han dinihogan nga kabugtoan nga aanhi pa ha tuna, ngan maunungon nga ginsusuportaran nira ito durante hinin peligroso nga kataposan nga mga adlaw.—Mat. 10:40-42; 25:40, 46; 2 Tim. 3:1-5.

10. Paonan-o maipapakita han mga karnero an ira pagkabuotan ha kabugtoan han Kristo?

¹⁰ Ikaduha, tagda an konteksto han ginsiring ni Jesus. Naghihisgot hiya han tigaman han iya presensya ngan han kataposan hini nga sistema. (Mat. 24:3) Ha tinikangan han iya paghisgot, gin-unabi niya nga may-ada makatirigamnan nga bahin an tigaman—an maopay nga sumat han Ginhadian “isasangyaw ha bug-os nga inuukyan nga tuna.” (Mat. 24:14) Ngan antes niya isumat an parabola mahitungod han mga karnero ngan mga kanding, iya igin-istorya an ilustrasyon mahitungod han mga talanton. Sugad han ginhisgotan ha nauna nga artikulo, iginsumat ni Jesus ito nga ilustrasyon basi pabug-atan ha iya dinihogan nga mga disipulo, an iya “kabugtoan,” nga kinahanglan nira magin madasigon ha pagsangyaw. Pero inin gutiay na la nga nanhibilin nga dinihogan dinhi ha tuna durante han presensya ni Jesus may daku gud nga buruhaton—an pagsangyaw ha “ngatanan nga nasud” antes umabot an kataposan. An ilustrasyon mahitungod han mga karnero ngan mga kanding nagpapakita nga may-ada mabulig ha mga dinihogan. Salit, usa han nangunguna nga paagi nga maipapakita hadton huhukman sugad nga mga karnero an ira pagkabuotan ha kabugtoan han Kristo amo an pagsuporta ha pagsangyaw nga buruhaton. Kondi, ano an  nahiuupod hito nga pagsuporta? Nag-uupod la ba ito ha paghatag hin materyal nga bulig ngan pagdasig ha mga dinihogan nga magsangyaw?

11. Ano nga pakiana an nabangon, ngan kay ano?

¹¹ Yana, kadam-an gud han walo ka milyon nga disipulo ni Jesus diri mga dinihogan. Waray hira tagi ni Jesus han mga talanton nga iya iginhatag ha iya dinihogan nga kabugtoan. (Mat. 25:14-18) Salit nabangon ini nga pakiana: ‘Aplikado gud ba ha diri mga dinihogan an sugo nga magsangyaw?’ Oo. Hisgotan naton kon kay ano.

12. Ano an aton hibabaroan ha ginsiring ni Jesus ha Mateo 28:19, 20?

¹² Ginsugo ni Jesus an ngatanan niya nga disipulo nga magsangyaw. Han ginbanhaw hi Jesus, ginsidngan niya an iya mga sumurunod nga maghimo hin mga disipulo ngan tutdoan ito ha pagtuman han “ngatanan” nga iya iginsugo. Upod hito an sugo nga magsangyaw. (Basaha an Mateo 28:19, 20.) Salit, an ngatanan nga disipulo han Kristo sadang magsangyaw, langitnon man o tunan-on an ira paglaom.—Buh. 10:42.

13. Ano an aton hibabaroan ha bisyon ni Juan?

¹³ Iginpapakita han libro han Pahayag nga an pagsangyaw hihimoon han mga dinihogan ngan han iba pa. Ha usa nga bisyon, iginpakita ni Jesus kan apostol Juan an mahitungod han “karaslon nga babaye”—an 144,000 nga dinihogan nga magmamando kaupod han Kristo ha langit—nga nag-aaghat ha mga tawo nga ‘kumuha han tubig han kinabuhi nga waray bayad.’ (Pah. 14:1, 3; 22:17) Iton simboliko nga tubig nagrirepresentar han tagana ni Jehova ha pagtalwas ha katawohan tikang ha sala ngan kamatayon pinaagi han halad-lukat han Kristo. (Mat. 20:28; Juan 3:16; 1 Juan 4:9, 10) An lukat importante gud nga bahin han mensahe nga aton iginsasangyaw, ngan an mga dinihogan nangunguna ha pagbulig ha mga tawo nga mahibaro ngan magpahimulos tikang hito. (1 Cor. 1:23) Pero ha bisyon, may nakita hi Juan nga iba pa nga diri kaapi ha simboliko nga “karaslon nga babaye.” Ginsugo liwat hira nga magsiring, “Kadi!”  Ginsusugot nira ito ngan gin-iimbitar an iba nga kumuha han tubig han kinabuhi. Inin ikaduha nga grupo amo adton may paglaom nga mabuhi ha tuna. Salit, matin-aw nga iginpapakita hini nga bisyon nga an ngatanan nga nakarawat han imbitasyon nga ‘kumadi’ may-ada responsabilidad nga magsangyaw.

14. Ano an nahiuupod ha pagsunod ha “balaud han Kristo”?

¹⁴ An ngatanan nga nasugot ha “balaud han Kristo” kinahanglan magsangyaw. (Gal. 6:2) Uusa la an suruklan ni Jehova. Pananglitan, ginsidngan niya an mga Israelita: “Uusa la nga balaud ha iya nga natawo ha kalugaringon, ngan ha dumuruong nga mag-ukoy upod ha iyo.” (Eks. 12:49; Leb. 24:22) An mga Kristiano diri na sakop han Mosaiko nga Balaud. Pero kita ngatanan, dinihogan man o diri, sakop han “balaud han Kristo.” Ito nga balaud nag-uupod han ngatanan nga igintutdo ni Jesus. Usa han nangunguna nga katutdoan ni Jesus amo an pagkaimportante han pagpakita hin gugma. (Juan 13:35; San. 2:8) Ngan usa han pinakamaopay nga paagi ha pagpakita hin gugma ha Dios, ha Kristo, ngan ha aton igkasi-tawo amo an pagsangyaw han maopay nga sumat han Ginhadian.—Juan 15:10; Buh. 1:8.

15. Kay ano nga masisiring nga an sugo ni Jesus naaplikar ha ngatanan niya nga sumurunod?

¹⁵ An ginsiring ni Jesus ha gutiay nga grupo usahay aplikado liwat ha durodaku nga grupo. Pananglitan, hi Jesus naghimo hin kasabotan para ha usa nga ginhadian ha iya 11 la nga disipulo, pero ito nga kasabotan naaplikar ha ngatanan nga membro han 144,000. (Luc. 22:29, 30; Pah. 5:10; 7:4-8) Ha pariho nga paagi, pipira la han iya mga sumurunod—adton nakaistorya niya han ginbanhaw hiya—an iya ginsugo nga magsangyaw. (Buh. 10:40-42; 1 Cor. 15:6) Pero an ngatanan niya nga matinumanon nga disipulo ha siyahan nga siglo maaram nga naaplikar ha ira an sugo, bisan kon waray nira ito personal nga mabatii tikang kan Jesus. (Buh. 8:4; 1 Ped. 1:8) Yana, waray liwat bisan usa han walo ka milyon nga aktibo nga magwarali han Ginhadian an personal nga nakabati kan Jesus nga nagsusugo hito. Pero maaram kita ngatanan nga kinahanglan naton tumoo ha Kristo ngan ipahayag ito nga pagtoo pinaagi ha pagsangyaw.—San. 2:18.

16-18. Paonan-o masusuportaran hadton posible magin mga karnero an kabugtoan han Kristo, ngan kay ano nga yana nira ito sadang buhaton?

¹⁶ Nakikig-away gud hi Satanas ha nanhibilin nga dinihogan nga kabugtoan han Kristo ha tuna, ngan nagtitikaduro pa gud ito kay maaram hiya nga “halipot na la an iya panahon.” (Pah. 12:9, 12, 17) Bisan pa han duro nga pag-atake ni Satanas, an mga dinihogan padayon nga nangunguna ha pagsangyaw nga buruhaton ngan mas damu nga tawo yana kay ha kakan-o pa man an nasasangyawan han maopay nga sumat. Waray ruhaduha nga kaupod nira hi Jesus ngan gin-gigiyahan niya hira.—Mat. 28:20.

¹⁷ Para ha nagtitikadamu nga posible magin mga karnero, usa nga pribilehiyo an pagsuporta ha kabugtoan han Kristo diri la ha pagsangyaw kondi pati ha iba pa nga praktikal nga paagi. Pananglitan, nagdudonar hira hin kwarta ngan nabulig ha pagtukod hin mga Kingdom Hall, Assembly Hall, ngan pasilidad hin sanga nga opisina. Maunungon liwat hira nga nasunod ha kabugtoan nga ginpili han “matinumanon ngan maaramon nga uripon” basi manguna ha ira.—Mat. 24:45-47; Heb. 13:17.

¹⁸ Diri mag-iiha, bubuhian han mga anghel an nakakabungkag nga mga hangin han daku nga kasakitan. Mahitatabo ito katapos makarawat han nanhibilin nga kabugtoan han Kristo ha tuna an ultimo nga pagselyo. (Pah. 7:1-3) Antes magtikang an Armagedon, an mga dinihogan dadad-on ha langit. (Mat. 13:41-43) Salit kon karuyag naton hukman sugad nga mga karnero pag-abot ni Jesus, yana na an panahon nga maunungon nga suportaran naton an iya kabugtoan.