1, 2. (a) Gini akpiapai Yesu asakihe na mbembedi abakureako? (Oni bi gu sura du ti tonatonaha.) (b) Ginipai si aida ani inihe tipa gu kpiapai nga ga akandoro na ameme?

YESU nafura fu Petero, Andarea, Yakoba na Yoane nga mbembedi abakureako. Ko pe akpiapai fuyo nga ga Kangara Moyambu, paranga ngasu adee bawe na gu nga ga taranda. Ko digisi gako sakapai na yo na sanza sa. Ko naringbisapa gu regbo “Wiri boro” nika sapangbanga ‘arikaaboro dunduko’ ti ni. Gi kpiapai re ima gbeberã gako abawiriki. Rogo yo, Yesu fura tipa abadona aboro ue, aguyo du wa akandoro na aguyo du wa ameme. Na ko nyakasipa gu kura biata nyanyakipa badona nga ‘awirina Bakindo.’—Oni gedi Matayo 25:31-46.

² Ga Yekova aboro aima digo ni kpinyemu ka inopai tipa gi kpiapai re, mbiko Yesu afura tipa gupai nika manga agu aboro du payo rogoho. Ko ayugu gu ndupai kura aboro nika gbia nyenye unga ti ni, na ndu gupai i nika gbarasa aguyo ti ni nyeanye kindi. Gaani raka naruriipa gia ani rogo gu rengo Yesu ayuguhe na kini mangipai kutini. Wa duhe nga gaani raka ngbapai,  si naida ani sana tirani nga: Wai du Yekova aziasi gaani giarogopaiyo nibipa gi kpiapai re? Tipagine rengbe ani ka ya ti ni gu kpiapai re nanyakasapa sunge tungusapai? Ada i nafu sunge tungusapai fuyo? Na tipagine si aida ani du ti ni awere ni ruru rani fu “Bakindo” na agu aboro ko ayambayo nga “awirinami”?

3, 4. (a) Gini abanguapai si aida ani inihe tipa ka gia tirani na gu kpiapai nga ga akandoro na ameme? (b) Rogo 1881, wai du gu magazini nangia Zion’s Watch Tower asakirogo gi kpiapai re?

³ Tipa ani girogo gu kpiapai nga ga akandoro na ameme wenengai, si naida ani ini agu abanguapai biata du rogo gu pangbanga re nga: agu aboro i nafura tipa yo, gu regbo nga ga sapangbanga, na gu ndupai i ayambayo ti ni nga akandoro watadu ameme.

⁴ Rogo gu garã nangia 1881, gu magazini nangia Zion’s Watch Tower aya “Wiri boro” i ayamba ko nga “Bakindo,” ko nga Yesu. Abawiriki Ziazia Kekeapai agirogo gupai Yesu aya “awirinami” nga si nafura tipa agu aboro nika zogarago na Kristo kodihe na rikaaboro dunduko fuo i da ni rengberengbeyo auru kpotosende ane. I aberãha nga i nika kparaka akandoro ti ameme ti regbo ga Kristo Zogarago Tipa Agarã Kutu. Na i aabihe nga agu aboro i nika kparayo ni akandoro nga aguyo naraka kuti gu ga Mbori andiko nga ga nyemuse.

5. Rogo agu agarã naatona rogo 1920, wai du i a ziasi gaani giarogopaiyo?

⁵ Ti tonatona agu agarã nangia 1920, Yekova aundo gako aboro i ziasi gayo giarogopaiyo nibipa gi kpiapai re. Gu Ngbaõbambu Sinziri nangia ga Tanvuo 15, 1923 ape gupai nga “Wiri boro” nga Yesu. Ono tie, si amangisunge na kura averesi ka yugoho nga agu aboro nga awirina Kristo nga agu aboro nika zogarago na ko ngbangbaturũ yo, na si asakipai a tipa akandoro ni agu aboro nika raka auru kpotosende tii gu zogarago nga ga Kristo. Na gini regbo i atona kparaka akandoro ti ni ti ameme? Gu kekeapai re ape gupai nga awirina Kristo nika zogarago na ko ngbangbaturũ yo ti regbo gako Zogarago Tipa Agarã Kutu, sidu, agu aboro du auru kpotosende arengbanga ka undo yo te. Sidu tie, kparaka akandoro ti ameme nika manga mbata fu ga Yesu Zogarago du tipa Kutu agarã tona. Gu kekeapai re adigisihe nga gu ndupai nasa gupai nga i ya ti aboro akandoro nga yo nga mbiko idayo kuti Yesu ni gayo Gbia na mbiko ngera yo tipa gako Kindo ye na weneapai fuyo.

6. Wai i aziasi gaani giarogopaiyo bara ti digido agu agarã natona ti 1990?

⁶ Mbiko gu vovo giarogopaiyo re, ga Yekova aboro aberẽhe nga i nasapangbanga aboro ni akandoro watadu ameme rogo yangada arame nibi gayo karagapai kuti gu pangbanga nga ga Kindo. Ono tie, bara bebere agu agarã natona rogo 1990, gaani giarogopaiyo azia. Kekeapai rogo gu Ngbaõbambu Sinziri nangia ga Tanvuo 15, 1995 ayugu gu wiratise du dagba agu afugo Yesu du rogo Matayo 24:29-31 (oni gedihe) na agu du rogo Matayo 25:31, 32. (Oni gedi.) * Sangbanaha angia gine? Gu kekeapai re aya: “Sapangbanga akandoro na ameme nika manga ku mbatayo.” Ti gini regbo nzunzu? “Si nika manga fuo gu ‘gberãngbi’ peyo paha rogo Matayo 24:29, 30 na ti gu regbo Wiri boro ‘ka ye ni  rogo gako taarimo.’ Fuo gure, ti digido gi gbegberẽ zegino re, Yesu nika maa ba sapangbanga tipa ka sapangbanga aboro.”

7. Gini ziazia giarogopaiyo du ani na ni awere?

⁷ Areme, ani na ziazia giarogo gu kpiapai nga ga akandoro na ameme. Nibipa agu aboro i nafura tipa yo, “Wiri boro” nga Yesu, kinako a nga Bakindo. Agu aboro ko aya tipa yo “awirinami,” i nga mbedimbedi aKristano nika zogarago na ko Ngbangbaturũ yo. (Rom. 8:16, 17) “Akandoro” na “ameme” narukuba aboro ni basasa rogo angbatunga yo dunduko. Agi aboro re ni mbedimbedi yo na ziazia toro te. Na ginipai tigaha du tipa regbo sapangbanga? Gi sapangbanga re nika manga ku mbatayo ti digido bakere gberãngbi. Na gini ndupai i nika sapangbanga aboro ti ni ni akandoro watadu ameme? Pa sapangbanga yo nika ru riipa wai i amanga fu yangara awirina Kristo du ni mbedimbedi yo auru kpotosende ane. Wa digido gi zegino re ambeda kada, na iriwo gu ngbarago du ani na ni nga Yekova aima digo ni ziasi gaani giarogopaiyo yeeyee tipa gu kpiapai re na agu akuraha du rogo Matayo kapita 24 na 25!

8, 9. Tipagine i naringbisi pa akandoro ti ni kuti “ruru boro”?

⁸ Rogo gu kpiapai nga ga akandoro na ameme, Yesu aafuranga yo gbayaga tipa sunge tungusapai te. Tipagine tie rengbe ani ka ya ti ni si nanyakasapa sunge tungusapai?

⁹ Gu bambatapai si ada oni inihe nga, Yesu amangisunge ane na kpiapai. Si tie ziazia nga, ko aafuranga tipa kpara ndikidi akandoro ti ameme te. Wakina gure a, ko aayanga agu aboro nga akandoro ni basasa si aida i rigi awirinako, kini vodi yo, watadu kaa ndu ka biyo bambukiso yo te. Kuba gure, ko aafura tipa gu kpiapai nayugo gu sino du agu aboro i aya tiyo akandoro i amanga awirinako na ni. Ko aringbisi akandoro kuti “ruru boro” bambiko i ini gupai nga Kristo na kina badona nga ga mbedimbedi awirinako kindi auru kpotosende, na akandoro naundo mbedimbedi aKristano rogo gi kere yangara arame re.—Mt. 10:40-42; 25:40, 46; 2 Tim. 3:1-5.

10. Wai rengbe akandoro ka yugo weneringise fu awirina Kristo?

¹⁰ Ue pai nga, oni makia gupai Yesu aafura tipaha. Ko aafura tipa agu apai i aino padu Kristo ti ni na ome kindo beko gbiati pa digido zegino. (Mt. 24:3) Rogo gu gumbapai Yesu amangihe mbata kusayo, ko ayuguhe nga agu apai i ainopa apai ti ni nika koda nyanyakipa pai nga ka tungusa gu wene pangbanga nga ga Kindo “rogo zegino dunduko.” (Mt. 24:14) Mbata fu ko fura tipa akandoro na ameme, ko ape gu kpiapai nga ga ataranda. A wa ani awisigihe rogo gu kekeapai ye mbata fu gere, Yesu agumba gu kpiapai re ka nyakasapa sunge tungusapai fu gako mbedimbedi abawiriki du nga ‘awirinako,’ nga i tungusipai zaaza. Ono tie, si aima du ni kpakaraapai fu gu mbedimbedi aKristano naadu auru kpotosende ane i tungusipai fu “arikaaboro dũ” mbata fu digido zegino da. Gu kpiapai nga ga akandoro na ameme nayugo gupai nga si adu nga mbedimbedi aKristano nika gbia undo agbia. Sidu tie, gu nyanyakipa gene sa dagba agene yo akandoro ayugo weneringise fu awirina Kristo ngbaha nga ka songoda sunge tungusapai. Ginihe gu undo re akodaha? Ya mo si nakoda kina agu ahe nga ga borose na wasa, watadu si nakoda badungu apai?

11. Gini sanahe rengbe ka kura na tipa gine?

¹¹ Areme, gu badungu ga Yesu abawiriki bangeyo ambeda kuti amirioni muambe nga mbedimbedi aKristano te. I agbianga gu ataranda Yesu afuhe fu gako mbedimbedi amoyambu te. (Mt. 25:14-18) Si du sanahe rengbe ka kura nga, ‘Ya mo gu sunge nga ga tungusapai re nabi agu aboro abi adunga ni mbedimbedi yo na ziazia toro ya?’ Ii. Oni bingo bete gu nduapai du gu karagapai re ti ni wo.

12. Ginipai ani awirikaha ti agu afugo Yesu du rogo Matayo 28:19, 20?

¹² Yesu arugu gako abawiriki dunduko i tungusipai. Tingbafuo zinga Yesu be kpio, ko aya fu apefuoko i sa aboro ni abawiriki, na kini yugupai fuyo i kakuti “agu apai dunduko” ko aruguyo kutini. Agu apai ko aruguyo kutini re nakoda sunge tungusapai. (Oni gedi Matayo 28:19, 20.) Sidu tie, si naida ga Yesu abawiriki dunduko tungusipai, singia i na maabangirise ka zogarago na ko watadu i na ni te.—Amo. 10:42.

13. Gu yuguyugupai Yoane abihe nayugo ginihe, na tipagine?

¹³ Gu Kitabu nga Yugoti nayugo gupai nga mbedimbedi aKristano na kura akandoro nika manga sunge tungusapai. Yesu afu yuguyugupai fu gu mokedi nangia Yoane tipa “gu de kumba nikadia ri” nga gu mbedimbedi aKristano du bangeyo nga 144, 000 nika zogarago na Kristo ngbangbaturũ yo, i ni yambu aboro i ye ka dia “ime unga gbua.” (Yugo. 14:1, 3; 22:17) Gu ime re narukuba gupai Yekova nika mangaha ka dia ingapai na kpio ti aboro kusayo ri mburu gu motumo nga ga Kristo. (Mt. 20:28; Yo. 3:16; 1 Yo. 4:9, 10) Gu motumo re nga nyanyakipa papara gu pangbanga ani atungusaha, na mbedimbedi aKristano nangbembatayo ka yugopai fu aboro tipaha i gbia undo behe. (1 Kor. 1:23) Ono rogo gu yuguyugupai re, Yoane abi gu kura aboro naadunga  rogo gu badona nga ga gu dee kumba nika dia ri re ya. I naya fuyo i ya fu aboro, “Mo yé.” I nadia gu yambahe re kugume na kini yambu kura aboro a tigayo i ye ka dia ime unga. Gi ue badona re du na maabangirise ka raka auru kpotosende. Sidu tie, gi yuguyugupai re nayugo gupai nga agu aboro dunduko di gu yambahe kugume nga “mo yé,” si aida i tungusipai fu kura aboro.

14. Giasangba ga “Kristo rugute” nakoda gine?

¹⁴ Agu aboro dunduko du tii ga “Kristo rugute” du wa ka i tungusipai. (Gara. 6:2) Anga Yekova na arugute beko ue te. Ni kpiapai, ko aya fu aYisaraere wẽ: “Rugute dú kina sa fu aboro ringara na fu gu kungba aboro ninasunga ku dagba roni.” (Gate 12:49; Pa Mot. 24:22) AKristano tii ga Moize aNdiko te. Ono ani dunduko du tii ga “Kristo rugute” singia ani nga mbedimbedi aKristano watadu ani nga kura akandoro. Gu rugute re nakoda agu apai dunduko Yesu ayuguhe. Gu banguapai dagba agu apai Yesu ayuguhe nga apefuoko du na nyemuse. (Yo. 13:35; Yak. 2:8) Na gu bangua gene ani ayugo nyemuse ngbaha fu Mbori, Kristo gbiati gaani amurakporo nga tungusa gu wene pangbanga nga ga Kindo.—Yo. 15:10; Amo. 1:8.

15. Tipagine rengbe ani ti ni ka ya ga Yesu zinahe tipa tungusapai fu apefuoko dunduko?

¹⁵ Gupai Yesu agumbaha fu umba badona rengbe kadu a fu bakere badona. Ni kpiapai, Yesu amangi mozunga nga ga Kindo na gako abawiriki 11, ono gu mozunga re adu tipa agu aboro dunduko du bangeyo 144, 000. (Rk. 22:29, 30; Yugo. 5:10; 7:4-8) Wakina gure a, Yesu afu zinahe fu kina bete apefuoko nga aguyo ko ayugu tiko fuyo fuo zingako be kpio nga i tungusipai. (Amo. 10:40-42; 1 Kor. 15:6) Ono gu gako abawiriki dunduko naadu rogo bambata sa kama agarã aima inoho nga gu zinahe re adu fuyo, wa vura duhe nga i agianga ha kina boro ngba Yesu te. (Amo. 8:4; 1 Pet. 1:8) Arame a, Yesu afuranga fu boro kandara sa dagba agu abatungusipa Kindo du bangeyo wa amirioni muambe te. Ono i dunduko idi kuti gupai nga si naida i du na idapase kuti Kristo na ki niyugu gu idapase re rogo sunge tungusapai.—Yak. 2:18.

16-18. Wai rengbe agu aboro du wa akandoro ka undo awirina Kristo, na tipagine si aida i mangihe ti ni wo awere?

¹⁶ Satana nasovura na yangada mbedimbedi awirina Kristo auru kpotosende, na ko namanga bakere ome ka sovura kutiyo mbiko kina “bete rago nye fu ko.” (Yugo. 12:9, 12, 17) Wa vura duhe nga mbedimbedi aKristano na hi kere asada, i nangbembatayo rogo gu bakere tua nga ga tungusapai naamanganga mbata ya. Zanga kapa, Yesu na kina yo, na ko nasongoda yo na gu ome i amangaha.—Mt. 28:20.

¹⁷ Gu dungu aboro du wa akandoro nabihe ni momu ka undo awirina Kristo rogo tungusapai yo narogo kura agene. Ni kpiapai, i nafu marã, na kini undo na meka aBambu Kindo, aBa Kikindigi Adunguratise gbiati abe-basunge, na kini gisangba agu aboro “kangara moyambu” nasia yo i ngbe ku mbatayo.—Mt. 24:45-47; Eb. 13:17.

¹⁸ Fuo regbo ngbutuko, amaraika nika zaa be ti gu kere wege nga ga bakere gberãngbi. Gipai re nika manga ho i ka dikohe ni ti gu yangara awirina Kristo du auru kpotosende. (Yugo. 7:1-3) Mbata fu Aramegido tona, i nika dia mbedimbedi aKristano ku ngbangbaturũ yo. (Mt. 13:41-43) Sidu tie, awere nga wene regbo fu agu aboro naida i sapungbanga yo ni akandoro i undo awirina Kristo ni ruruyo.