Nasasabi man iyan kan ibang mga lingkod nin Diyos dapit sa paghanap nin magigin agom. Pero, aram nindang marhay an sadol ni apostol Pablo na mag-agom ‘diyan sana sa Kagurangnan’—sadol na aplikado sa gabos na Kristiyano. (1 Cor. 7:39) Kaya, taano ta nasasabi pa ninda an arog kaiyan?

Iniisip kan mga nagsasabi kaiyan na diit an bilang nin daing agom na brother kisa sa sister. Talagang totoo iyan sa dakul na nasyon. Halimbawa: Sa Korea, sa kada 100 na Saksing daing agom, 57 an sister asin 43 an brother. Irineport man na sa bilang kan mga Saksi sa Colombia, 66 na porsiyento an mga sister asin 34 porsiyento an mga brother.

Sa nagkapirang nasyon, an sarong bagay na nagpapakomplikado pa iyo na puwedeng maghagad nin mahalon na dote an mga magurang na bakong Saksi, kaya nasasakitan na makaagom an mga brother na bakong gayong mayaman. Kaya, tibaad maisip nin sarong sister na mas nagdidikit na an posibilidad na makahanap nin magigin agom ‘diyan sa Kagurangnan.’ Kaya tibaad ihapot niya, “Realistiko daw na isipon na makakahanap pa ako nin angay na magigin agom sa mga kapwa Kristiyano?” *

Kun naisip mo na man iyan, makakapagtiwala ka na aram ni Jehova an sitwasyon mo. Aram nanggad niya kun ano an namamatian mo sa bagay na ini.—2 Cron. 6:29, 30.

Pero, malinaw an pagbuot ni Jehova sa saiyang Tataramon na mag-agom diyan sana sa Kagurangnan. Taano? Huling aram niya kun ano an marahay para sa  saiyang mga lingkod. Apuwera sa habo niyang makulgan an saiyang mga lingkod huli sa paggibo nin bakong madunong na desisyon, gusto man niyang magin maugma sinda. Kan panahon ni Nehemias kan an dakul na Judio nag-aagom nin mga taga ibang nasyon na dai nagsasamba ki Jehova, sinambit ni Nehemias an maraot na halimbawa ni Salomon. Si Salomon ‘namumutan nin saiyang Diyos,’ pero ‘pinapagkasala siya kan mga babaying taga ibang banwaan.’ (Neh. 13:23-26) Kaya para sa ikakarahay kan mga lingkod Niya, pinagbutan kita nin Diyos na mag-agom sana nin tunay na parasamba. (Sal. 19:7-10; Isa. 48:17, 18) Nagpapasalamat an tunay na mga Kristiyano sa pagmakulog nin Diyos asin nagtitiwala sa saiyang paggiya. Kaya sa pagpapasakop ninda sa saiya bilang saindang Tagapamahala, minimidbid ninda siya bilang an Unibersal na Soberano.—Tal. 1:5.

Siguradong habo mo na “makipagsakal na bakong timbang” sa saro na puwede kang irayo sa Diyos. (2 Cor. 6:14) Dakul na Kristiyano ngunyan an nagsunod sa napatunayan nang nakakaprotektar na paggiya nin Diyos asin nahiling ninda na tama an nagin desisyon ninda. Pero dai iyan sinunod kan iba.

Ipinaliwanag ni Maggy, * sarong sister sa Australia, an nangyari kan nakikipag-date siya sa sarong bakong kapagtubod: “Dakul na beses akong dai nakaatender sa pagtiripon ‘ngani sanang makaibanan siya. Biglang luminuya an espirituwalidad ko.” Si Ratana na taga India nagin kailusyon kan saiyang kaklase na nagpapa-Bible study na. Pero, an motibo palan talaga kaini sa pag-adal iyo na tanganing mag-ilusyon ki Ratana. Nag-abot an panahon na binayaan ni Ratana an katotoohan asin nagpakumbertir sa ibang relihiyon tanganing makasal.

An saro pang halimbawa iyo si Ndenguè na taga Cameroon. Nagpakasal siya sa edad na 19. Kan ikakasal pa sana sinda, nangako an nobyo niya na dai siya kaini pagbabawalan sa saiyang relihiyon. Pero duwang semana pakakasal ninda, dai na siya tinugutan kan saiyang agom na mag-atender sa Kristiyanong mga pagtiripon. Sinabi niya: “Nagpaparahibi ako sa kamunduan. Narealisar ko na dai ko na kontrolado an buhay ko. Grabe su pagbasol ko.”

Totoo, bakong gabos na agom na bakong kapagtubod nagigin maisog asin bakong makatanusan. Pero, dawa dai mangyari sa saimo an arog sa nangyari sa iba na nag-agom nin bakong kapagtubod, ano an puwedeng magin epekto kaiyan sa relasyon mo sa saimong mamumuton na Ama sa langit? Ano an mamamatian mo huling aram mong dai mo sinunod an konseho na itinao niya para sa ikakarahay mo? Asin an pinakaimportante, ano an mamamatian niya sa nagin desisyon mo?—Tal. 1:33.

Makakapagpatunay an mga tugang na lalaki asin babayi sa bilog na kinaban na an pag-agom ‘diyan sana sa Kagurangnan’ an pinakamarahay na desisyon. An mga daing agom na determinadong paugmahon an Diyos mapili sana nin magigin agom sa mga parasamba Niya. Kan daraga pa si Michiko, na taga Japan, pinurbaran siyang kumbinsiron kan mga paryente niya na mag-agom nin bakong kapagtubod. Apuwera sa panggigipit na iyan, nahiling man niya na an iba sa mga katuod asin kabisto niya nakaagom na sa laog nin kongregasyon. Sinabi niya: “Pirmi kong sinasabi sa sadiri ko na huling ‘maugmang Diyos’ si Jehova, an kaugmahan ta dai nakadepende kun baga may agom kita o mayo. Naniniwala man ako na itinatao niya an mga minamawot kan satong puso. Kaya kun dai kita makahanap nin magigin agom dawa gusto ta nang mag-agom, an pinakamarahay na gibuhon iyo na dai na nguna mag-agom.” (1 Tim. 1:11, NW) Pag-abot nin panahon, nakaagom si Michiko nin sarong mahusay na brother, asin nagpapasalamat siya na naghalat siya.

May mga brother man na naghalat sagkod na makahanap nin angay na magigin agom. Arog kaiyan an ginibo kan tugang na si Bill na taga Australia. Inako niya na kaidto may nagustuhan man siyang mga babaying bakong Saksi. Pero, sinigurado niyang dai magin sobrang dayupot sa sainda. Taano? Habo niyang makagibo nin sarong bagay na puwedeng magin dahilan na ‘makipagsakal siya na bakong timbang’ sa bakong kapagtubod. Sa pag-agi nin mga taon, may mga nagustuhan siyang mga sister, kaso mayong gusto sa saiya. Naghalat si Bill nin 30 taon sagkod na mabisto niya an sister na kapareho niya an pasuhan. Sinabi ni Bill: “Dai akong pinagbasulan.” Ipinaliwanag niya: “Ugmahon ako ta magkaibanan kami sa ministeryo, sa pag-adal, asin sa pagsamba. Nauugma man ako na mabisto asin makaasosyar an mga katuod kan agom ko huling gabos sinda kapwa parasamba ni Jehova. Hinihinguwa mi man na mapakusog an samong pag-ibanan bilang  mag-agom paagi sa pagsunod sa mga prinsipyo sa Bibliya.”

Ano an mga puwede mong gibuhon mantang ipinapabaya ki Jehova an mga bagay-bagay? An saro na magigibo mo iyo na pag-isipan kun taano ta dai kang agom. Kun sa hiling mo an panginot na dahilan iyo an sadol kan Bibliya na mag-agom ‘diyan sana sa Kagurangnan,’ dapat kang komendaran sa paggalang mo sa pagbuot nin Diyos. Makakasigurado ka na nauugma si Jehova sa determinasyon mong sunudon an saiyang Tataramon. (1 Sam. 15:22; Tal. 27:11) Paagi sa pamibi, puwede mong padagos na ‘isabi sa Diyos an gabos mong kasakitan.’ (Sal. 62:8, An Marahay na Bareta Biblia) Magigin mas makahulugan an saimong mga pamibi kun maigot asin daing pundo kang makikimahirak sa saiya. Magigin makusog an saimong relasyon sa Diyos sa aroaldaw kun marigon mong pinagmamaigutan na labanan an mga panggigipit kan iba asin an sala mong mga pagmawot. Makakasiyerto ka na an Kahuruhalangkawi interesado sa gabos na maimbod na lingkod niya asin mahalaga kang marhay sa saiya. Importante sa saiya kun ano an mga kaipuhan mo asin minamawot mo. Dai siya nanunuga sa siisay man na matao siya nin agom. Pero kun kaipuhan mo talagang mag-agom, aram nin Diyos kun ano an pinakamarahay na paagi tanganing mapaniguan an tama man na pagmawot mo.—Sal. 145:16; Mat. 6:32.

Kun minsan tibaad mamatian mo man an namatian kan salmistang si David, na nagsabi: ‘Simbagon mo ako nin madali, O Jehova, ta pinangluluya an sakuyang espiritu. Dai mo pagtaguon sa sakuya an saimong lalawgon.’ (Sal. 143:5-7, 10) Sa arog kaiyan na mga pagkakataon, tawan mo nin panahon an saimong Ama sa langit na ipahiling sa saimo an gusto niya para sa saimo. Magigibo mo iyan kun matao ka nin panahon na basahon an saiyang Tataramon asin hurop-hurupon an binabasa mo. Maaaraman mo an mga tugon niya asin mahihiling mo kun paano niya tinabangan an mga lingkod niya kaidto. Kun dadangugon mo siya, mas matibay an saimong pagtitiwala na sarong kadunungan an pagsunod sa saiya.

Ano pa an makakatabang sa saimo na magin maugma asin magamit nin madunong an saimong panahon mantang mayo kang agom? Puwede mong gamiton an pagigin daing agom mo sa pagpauswag kan saimong diyosnon na debosyon, marahay na reputasyon, pagigin mapagmansay, matinao, mahigos, saka madaling pakibagayan—mga kuwalidad na mahalagang marhay para sa maugmang buhay may agom. (Gen. 24:16-21; Rut 1:16, 17; 2:6, 7, 11; Tal. 31:10-27) Hanapon nguna an Kahadian paagi sa lubos na pakikikabtang sa paghuhulit asin iba pang aktibidad bilang Kristiyano; magigin proteksiyon mo iyan. Ini an sinabi ni Bill, na nasambitan sa inutan, manungod sa mga taon na gusto na niyang mag-agom: “Marikason sanang uminagi iyan! Ginamit ko an panahon na iyan sa paglilingkod ki Jehova bilang payunir.”

Iyo, realistiko pa an pag-agom ‘diyan sana sa Kagurangnan.’ An pagsunod sa pagbuot na iyan matabang sa saimo na matawan nin onra si Jehova asin magin maugma sagkod lamang. An Bibliya nagsasabi: ‘[Maugma] an tawo na may pagkatakot ki Jehova, asin diyan sa saiyang mga tugon nag-uugma nin labi-labi. Mga rugaring asin mga kayamanan igwa sa saindang harong, asin an saindang katanusan magdadanay sagkod lamang.’ (Sal. 112:1, 3) Kaya magin determinadong sunudon an tugon nin Diyos na mag-agom ‘diyan sana sa Kagurangnan.’