Ekkóch lipich mi angang ngeni Kot ra pwal eáni ekkena esin memmeef. Iir ra silei pwe Jiowa a mochen néún kewe aramas repwe pwúpwúlú “lon chok ewe Samol,” weween repwe chék pwúpwúlú ngeni emén Chón Kraist mi enlet. (1 Kor. 7:39, Testament Mi Fö) Iwe, pwata a ina usun meefien ekkóch Chón Kraist?

Ekkena Chón Kraist mi eáni ekkena esin memmeef, neman ra ekieki pwe lón ewe mwichefel a kon chómmóng nengngin are fefin lipich lap seni át are mwán lipich. A ina usun lón chómmóng fénú. Áwewe chék, lón Korea, 57 persent me lein ekkewe Chón Kraist lipich, iir fefin, nge 43 persent, iir mwán. Pwal eú, lón Colombia, 66 persent me lein ekkewe Chón Kraist, iir fefin, nge 34 persent, iir mwán.

Lón ekkóch leeni, ekkewe sam me in esap iir Chón Kraist ra mochen ewe emén epwe pwúlúweni néúr nengngin epwe awora kiisan watteen moni are liffang mi mémmong. Me ekkóch Chón Kraist mwán neman epwe weires ngeniir le awora ena úkúkún liffang. Iwe, ina met epwe alólileni ekkóch Chón Kraist fefin ika repwe tongeni kúnékún pwúlúwer me lón ewe mwichefel. *

Ika ka pwal eáni ekkena esin memmeef lón manawom, kopwe lúkúlúk pwe Jiowa a weweiti nónnómum me a silei óm memmeef.​—2 Kron. 6:29, 30.

Iwe, inaamwo ika ina nge lón ewe Paipel, i a allúkú ngenikich ach sipwe pwúpwúlú lón chék ewe  Samol. Pwata? Pokiten i a silei met mi échitikich me a mochen túmúnúkich. A mochen ach sisap féri kefil mi ngaw epwe efeiengawakich are efisi ach sisap pwapwa. Lón fansoun Nehemia we, chómmóng chón Jus ra pwúpwúlú ngeni ekkewe fefin rese angang ngeni Kot. Ina popun Nehemia a fós usun án Salomon leenien áppirú mi ngaw. An we “Kot a fokun echeni o seikätä pwe epwe kingen Israel. Iei mwo ei, nge ekewe fin ekis ra tongeni emwenalong Salomon lon tipis.” (Ne. 13:23-26) Jiowa a silei pwe an kewe kapasen áchechchem ra múrinné ngenikich, ina popun a ereni Chón Kraist ar repwe pwúpwúlú lón chék ewe Samol. (Kölf. 19:7-10; Ais. 48:17, 18) Sia fókkun kilisou pún a pwáraatá an tongekich ren an awora kapasen éúréúr sia tongeni lúkúlúk wóón. Lupwen sia álleasochisi Jiowa usun ach Sou Nemenem, sia pwáraatá pwe a wor an pwúúng le erenikich met sipwe féri.​—SalF. 1:5.

Pwúngún pwe sanne ka mochen ‘rifengenuk me eman esap lükü Kot,’ weween pwúlúweni emén ese angang ngeni Jiowa. Ena esin aramas a tongeni efisi óm kopwe úkútiw le angang ngeni Kot. (2 Kor. 6:14) Án Kot kewe kapasen éúréúr ra kan túmúnúkich fansoun meinisin, ina minne chómmóng Chón Kraist ikenái ra tipachem ren ar filatá le álleasochisi Jiowa. Iwe nge, ekkóch a sókkóló met ra filatá.

Maggy, * emén fépwúl Chón Kraist lón Australia a poputá kammwet ngeni emén átin lúkún. Iei alon: “Ua etiwaaló chómmóng mwich ren ai upwe chék nónnóm ren. Ai riri ngeni Jiowa a wesewesen ngawóló.” Pwal emén fépwúl seni India itan Ratana a kammwet ngeni emén chienan chón sukul mi poputá le káé ewe Paipel. Iwe nge, mwirin och fansoun, a ffat pwe átena a chék káé Paipel pwe epwe tongeni kammwet ngeni Ratana. Ló, ló, ló, Ratana a úkútiw le angang ngeni Jiowa me a fiti pwal eú lamalam pwe epwe tongeni pwúlúweni ena át.

Pwal emén nengngin itan Ndenguè, seni Cameroon, a 19 ierin atun a pwúlúweni emén ese angang ngeni Jiowa. Me mwen ar repwe apwúpwúlú, átena a pwonei ngeni pwe a tongeni sópweló le fiffiti kókkótun an lamalam. Iwe nge, ruu wiik chék mwirin ar we ránin apwúpwúlú, átena a ereni an esap chúen fiffiti ekkewe mwich. Neminna a apasa: “Ua kan chék tipitipingaw me kekkechiw. Ua mirititi pwe use chúen tongeni nemeni pwisin manawei. Ua niamam iteitan.”

Pwúngún pwe esap meinisin chón lúkún pwúlúwen Chón Kraist iir ra arochongaw me tipeférea. Iwe nge, ikaamwo mi kirekiréch ewe emén ese angang ngeni Jiowa, nge ifa usun óm pwúlúweni epwe kkúú óm riri ngeni Jiowa? Epwe met meefiom ika kopwe lesékúrúti met ka féri me mirititi pwe kese aúselinga án Kot we kapasen éúréúr a ngonuk pwe kopwe pwapwa? Nge ewe mi kon lamot seni meinisin, epwe ifa meefien Jiowa ren óm kefil?​—SalF. 1:33.

Chón Kraist mwán me fefin wóón unusen fénúfan mi álleasochisi án Jiowa we kapasen éúréúr ar repwe pwúpwúlú “lon chok ewe Samol,” ra lúkúlúk pwe iei eú kefil mi múrinné ra féri. Ekkewe mi lipich ra úppós le apwapwaai Jiowa ren ar repwe pwúpwúlú ngeni chék chókkewe mi fel ngeni Jiowa. Emén fin Japan itan Michiko a úppós le álleasochisi Kot inaamwo ika aramasan kewe ra etipetipa an epwe pwúlúweni emén ese tongei Jiowa. Me ewe mettóch a pwal áweiresi, ina an kúna pwe ekkóch me lein chiechian kewe ra pwúpwúlú Chón Kraist mi enlet, nge i a chúen lipich. A apasa: “Ua kan pwisin ereniei pwe pokiten Jiowa i emén ‘Kot mi pwapwa,’ iwe ach pwapwa ese lóngólóng wóón ach pwúpwúlú are sise. Ua pwal lúkú pwe epwe ngenikich mochenin letipach. Iwe, ikaamwo sia mochen pwúpwúlú nge sise kúnékún, a éch ika sipwe lipich ren mwo iei.” (1 Tim. 1:11, NW) Mwirin och fansoun, Michiko a pwúlúweni emén Chón Kraist mwán mi múrinné, me a pwapwa ren an witiwit.

A pwal wor ekkóch Chón Kraist mwán me át ra witiwit ar repwe kúna emén mi fichitiir ar repwe pwúlúweni. Áwewe chék, emén átin Australia itan Bill a pwáraatá pwe fán ekkóch a sani ekkóch fin lúkún. Iwe nge, i a fókkun túmúnúfichi an esap  kon chiechi ngeniir. Pwata? Pún ese mochen epwe poputá eú riri mi tongeni efisi an epwe ‘rifengeni me eman esap lükü Kot.’ Lón ánein manawan, a pwal sani fitemén Chón Kraist, nge iir rese sani. Bill a witiwit 30 ier tori an a kúna emén Chón Kraist iir mi pélúwéchfengen. Iei met Bill a erá: “Use niamam. Ua meefi pwe ua feiéch pwe aua mwin lón angangen afalafal, káéfengen, me aua mwin lón ám fel ngeni Kot. Ua pwapwa le chuuri chiechien pwúlúwei we me chiechi ngeniir pwe iir meinisin ra pwal fel ngeni Jiowa. Aua áeá ekkewe kapasen emmwen lón Paipel le angang wóón ám ririin pwúpwúlú.”

Met ka tongeni féri atun ka isonaalóng lepéún Jiowa óm we osukosuk? Ka tongeni ekieki ewe popun pwata kese pwúpwúlú. Ika ka meefi pwe kese pwúpwúlú pokiten ka mochen álleasochisi án Jiowa we éúréúr pwe kopwe pwúpwúlú “lon chok ewe Samol,” iwe kopwe lúkúlúk pwe minne ka féri a apwapwaai i. (1 Sam. 15:22; SalF. 27:11) Pwal och, sópweló le ikkiótek ngeni Jiowa iteitan me ereni enletin meefiom. (Kölf. 62:8) Atun ka achocho úkúkún óm tufich le ú ngeni sóssót are mocheniaingaw, óm riri ngeni Jiowa epwe péppéchékúleló iteiten rán. Ka tongeni lúkúlúk pwe Jiowa a áfánni minne ka mochen me minne mi lamot ngonuk pokiten i a aúcheanuk. I ese pwonei ngeni emén an epwe awora ngeni pwúlúwan. Iwe nge, ika a enletin lamot ngonuk óm kopwe pwúpwúlú, Jiowa a silefichi ifa usun epwe awora ngonuk minne ka osupwangan.​—Kölf. 145:16; Mat. 6:32.

Fán ekkóch eli meefiom epwe pwal usun meefien Tafit, ewe a apasa: “Ai Samol mi Lapalap, kopwe müttir le pälüeniei, pun üa fokun apilükingau. Kosap aopa mesom seniei.” (Kölf. 143:5-7, 10) Kosap fangetá. Mut ngeni Jiowa och fansoun an epwe pwár ngonuk met a mochen kopwe féri. Aúseling ngeni Jiowa ren óm ákkálleani Paipel me alóllóólu óm ekilonei met ka álleani. Óm féri ena epwe álisuk le silei met Jiowa a mochen kopwe féri me ifa usun a fen álisi néún kewe chón angang lóóm. Óm akkaúseling ngeni epwe alapaaló óm lúkúlúk pwe óm álleasochisi ina ewe alen tipachem.

Pwal met ka tongeni féri atun óm lipich pwe kopwe akkamwéchú óm pwapwa me achocho lón ewe angang mi lamot? Ka tongeni apéchékkúlaló óm riri ngeni Jiowa me achocho pwe kopwe itéch. Ka pwal tongeni káé óm kopwe kisáseú, angang weires, ámecheresi án aramas repwe chiechi ngonuk, me tuppwél ngeni Jiowa. Ekkeei napanap ra lamot ngeni pwapwaan famili. (Ken. 24:16-21; Rut 1:16, 17; 2:6, 7, 11; SalF. 31:10-27) Kútta akkomw án Kot we Mwú ren óm fiffiti ewe angangen afalafal me pwal ekkewe ekkóch angang lón óm mwichefel. Ekkena mettóch ra tongeni túmúnuk óm kosap féri kefil mi ngaw. Iei alon Bill usun ekkewe ier a lipich lón: “Ra mwittir ló! Ua áeá ekkena fansoun lón ai angang ngeni Jiowa usun emén pioneer.”

Án Jiowa we éúréúr ach sipwe pwúpwúlú “lon chok ewe Samol,” a chúen fich lón ach ei fansoun. Om álleasochisi ena emmwen a tongeni álisuk le asamolu Jiowa me kúna pwapwafóchófóch. Ewe Paipel a apasa: “A feiöch ewe aramas mi niuokusiti ewe Samol mi Lapalap, mi pwapwaiti an epwe aleasochisi an kewe allük. Wöü me chomong pisek ra nom lon imwan, nge an pwüng a nonom tori feilfeilachök.” (Kölf. 112:1, 3) Iwe kopwe úppós le álleasochisi án Kot we éúréúr ach sipwe pwúpwúlú “lon chok ewe Samol.”