Itre hna qaja fe hi la hnene la itre xa hlue i Iehova ka tha faipoipo. Atre hnyawa hi angatr ka hape, aja i Iehova tro la itre hlue i Nyidrëti a faipoipo “göi Joxu hmekuje hi,” kola hape, troa faipoipo hmekuje hi memine la ketre Keresiano. (1 Korinito 7:39) Haawe, pine nemene kö matre itre xa Keresiano a qaja la itre ithanata caha?

Maine jë kola mekune hnene la itre Keresiano ka ithanata tune lai ka hape, tru catre kö la etrune la itre trejine föe hune la itre trejine trahmany ka pë föen. Celë hi ewekë lai hna öhne ngöne la itre nöje ka nyimutre. Ka tune e Corée, kösë maine ala 100 lao trejine trahmanyi me föe ka tha faipoipo kö, 57 lao trejine föe nge 43 pe hi lao trejine trahmany. Ketre, ame e Colombie, maine ala 100 lao trejine trahmanyi me föe ka tha faipoipo, tre 66 lao trejine föe nge 34 pe hi lao trejine trahmany.

Ame ngöne la itre xa nöj, hnene la itre keme me thin ka tha hmi kö hna ajane troa nyithupene la nekö i angatr jajiny, la angeic a faipoipo. Nge ame la itre xa trejine trahmanyi ka tha faipoipo, tre pëkö manie i angatre troa nyithupene föe. Ame la thangan, kola hnehengazone hnene la itre trejine föe me hape, ‘Tro jë kö huni elany la a hane faipoipo memine la ketre Keresiano?’. *—Wange ju la ithuemacany.

Maine mekuna i epuni fe hi lai, loi e xecie koi epuni ka hape, trotrohnine hnyawa hi Iehova la pengöi epun, nge atre hnyawa hi Nyidrë la aliene la hni epun.—2 Aqane lapa ite Joxu 6:29, 30.

Ngo, ame e hnine la Tusi Hmitrötr Iehova a amekötine laka, tro hmekuje hi a faipoipo göi Joxu. Pine nemen? Pine laka, atre hnyawa hi Nyidrë la nyine loi koi  së, nge xele kö Nyidrë tro sa akötr. Xele kö Nyidrëti matre tro sa sipu kuci mekun, wanga troa akötrë së. Ame ngöne la hneijine i Nehemia, nyimutre la itretre Iudra ka faipoipo me itre föe ka tha nyihlue i Iehova kö. Celë hi matre amexeje jë Nehemia lo tulu ka ngazo i Solomona. “Hna hnimi nyidrë hnei Akötresi nyidrë, nge hnei Akötresie hna acili joxu nyidrë hui angetre Isaraela asë ; ngo ame pe hnei itre föe trenyiwa hna amenu nyidrë.” (Nehemia 13:23-26, MN) Atre hi Iehova ka hape, nyine loi koi së la itre wathebo i Nyidrë, celë hi matre amekötine jë Nyidrë kowe la itre Keresiano, tro angatr a faipoipo göi Joxu hmekuje hi. (Salamo 19:7-10; Isaia 48:17, 18) Easa olene koi Iehova la hnei Nyidrëti hna hamëne la eamo celë cememine la ihnim, eamo nyine tro sa mejiune kow. Ame la easa drengethenge Iehova, Atre Mus koi së, easë hi lai a kapa laka, meköti Nyidrë troa qaja koi së la nyine tro sa kuca.—Ite Edomë 1:5.

Eje hi laka, xele epuni e troa “isile menune keu” epun, ene la troa faipoipo memine la ketre trahmanyi ka tha hmi kö. Tro angeice lai a ajolë epuni troa nyihlue i Iehova hnyawa. (2 Korinito 6:14) Ka pë ethanyine la eamo i Iehova, matre nyimutre la itre Keresiano enehila ka ajane troa drengethenge Nyidrë. Ngo hetre itre xane kö ka sipu kuci mekun.

Hnei Maggy, * ketre trejine föe qaa Australie hna nyiqaane iatre memine la ketre trahmanyi tha sine hmi së kö. (Wange ju la ithuemacany.) Öni angeic: “Patre hë ni ngöne la itre icasikeu, ke pi tro pala hi ni a ce tro me angeic. Nanazije hnyawa ha ni ngöne la götrane u.” Hnei Ratana ketre trejine föe hna iatre memine la ketre sine ini angeic ka nyiqaane ini Tusi Hmitrötr. Ngo, nekö trahmanyi hi a inine la Tusi Hmitrötr, göi Ratana . Ame hë e thupen, tha nyihlue i Iehova ha angeic, nge angeice hmaca pena ha a lö kowe la ketre hmi göi troa faipoipo memine lai nekö trahmany.

Ame e Cameroun, hnei Ndenguè hna faipoipo lo kola 19 lao macatre i angeic memine la ketre trahmany, tha sine hmi angeice kö. Qëmekene tro nyidro a faipoipo, hnene la trahmanyi hna qaja amë hë koi angeic ka hape, tro pala hi angeic a nyihlue i Iehova. Ngo, lue wiike hi e thupene la hna faipoipo, nge angeice hë a wathebone la trejine föe troa tro kowe la itre icasikeu. Öni Ndenguè: “Kösë luzi hë ni, nge tru la haceng. Eni hi lai a trotrohnine laka, kolo hmaca pena ha musinëne la meleng hnei ketre atr. Eni pala hi la a ietrane la hnenge hna kuca.”

Nyipici laka, hetre itre Keresiano ka faipoipo memine la itre trahmanyi ka loi thiina, nge tha ka hmi kö. Ngo, maine ka loi ju hë la trahmanyi epun ka tha hmi kö, ngo tune kaa ha la aqane imelekeu i epun me Iehova? Ame hë la epuni a mekune ka hape, tha hnei epuni kö hna drei Iehova, tre, hapeu, madrine pala kö epun? E hune la nöjei ewekë cili, nemene hë la aqane waipengöne Iehova la aqane ujë i epun?—Ite Edomë 1:33.

Ka xecie hnyawa kowe la itre trejine trahmanyi me föe e cailo fen ka drengethenge la eamo i Iehova troa faipoipo “göi Joxu hmekuje hi” laka, pë hmaca ju kö ketre mekune nyine axeciën ka sisitria hune lai. Ka eje e kuhu hni ne la itre trejine trahmanyi me föe cili, troa amadrinëne la hni Iehova, ene la troa faipoipo memine la ketre hlue i Nyidrë. Xecie hnyawa e kuhu hni Michiko, ketre trejine föe qaa Zapo troa drengethenge Iehova, ngacama hna uku angeic hnene la itre sinee i angeic troa faipoipo memine la ketre atr, tha sine hmi angeice kö. Ketre, jole catre koi angeic la kola goeëne la itre sinee i angeic e fapoipo memine la itre xa Keresiano, nge angeic pe hi a lapa pë föen. Öni angeic: “Ame e kuhu hning, pine laka Akötresieti ka madrine Iehova, haawe, tha ka xulu kö la madrine qa ngöne la hna faipoipo, maine tha hna faipoipo pena. Ketre, eje fe e kuhu hning laka, Nyidrëti a hamë së la itre aja ne la hni së. Haawe, maine aja së troa faipoipo, ngo pë pala kö hne së hna öhn, haawe, sisitria pala kö koi së troa pane lapa tune hi la.” (1 Timoteo 1:11) Ame hë e thupen, faipoipo fe hë Michiko memine la ketre trejine trahmanyi ka lolo thiinan, nge tru la madrine i angeic qa ngöne la hnei angeic hna drengethenge la eamo i Iehova.

Hna itreqe fe hnene la itre trejine trahmany troa öhne la itre föe hmeku i angatr göi troa faipoipo. Ka tui Bill, trejine qaa Australie; öni angeic, hetre itre ijine angeic a goeëne la itre xa föe tha sine hmi angeice kö. Ngo, tha hnei angeice kö hna thele troa atrepengöi angatr, wanga “isile menune keu” angeice jë memine la itre föe, tha sine hmi angeice kö. Ame ngöne la itre macatre, hnei angeic hna thele troa atrepengöne la itre xa trejine föe, ngo ame la engazon, angeice hmekuje hi la ka trene mekun. Hnei Bill hna treqen koi 30 lao macatre qëmekene tro angeic a öhne la ketre föe, ka ceitune hi la itre hnei nyidro hna aja kow. Öni angeic: “Tha ietrane kö ni la hnenge hna itreqe. Tru la madrineng,  ke, nyiho a ce cainöje trootro, me ce ini Tusi Hmitrötr, me ce nyihlue i Iehova. Tru la madrineng troa itronyi me ce mele memine la itre sinee ne la föeng, ke, itre ka nyihlue i Iehova asë hi angatr. Lolo la mele i nyiho e hnine la faipoipo, ke nyiho a ce melëne la itre trepene meköti Iehova.”

Nemene la nyine tro epuni a kuca ngöne la ijine epuni a trongëne la eamo i Iehova, me treqene hnyawa troa hetre föi epun ka nyihlue i Iehova? Tro epuni lai a thele la kepine matre tha faipoipo petre kö epun. Maine celë hi lai hnei epuni hna mekun, haawe epuni hi lai a amamane la aja i epuni troa drengethenge la hna amekötine hnei Iehova. Matre, loi e xecie koi epuni laka, celë hi lai ka amadrinëne la hni Iehova. (1 Samuela 15:22; Ite Edomë 27:11) Ketre, catre jë thith koi Iehova, me qaja mekötine koi Nyidrë la aliene hni epun. (Salamo 62:8) Tro lai a acatrene catrëne e nöjei drai la aqane imelekeu i epuni me Iehova, la epuni a cile catre ngöne la itupath, me isi memine la itre aja ka ngazo. Loi e tro epuni a atre hnyawa ka hape, atreine hi Iehova hamëne la hnei epuni hna ajane me ka nyipi ewekë kowe la mele i epun, ke, ka tru epun koi Nyidrë. Tha kolo kö a hape, tro Nyidrëti a hamë föene asë la itre trejin. Ngo, e nyipi ewekë hë troa faipoipo, atre kö Iehova la nyine kuca thatraqai epun.—Salamo 145:16; Mataio 6:32.

Ame hë e thupen, tro epuni a mekune tui Davita, lo kola hape: “Iehova fe, the hmitre kö, sa jë koi ni ; patrë hë la ung ; the juetrëne kö la xajawa i cilie e ini.” (Salamo 143:5-7, MN, 10) The kucakuca kö. Nue ijine pi koi Iehova troa amamane koi epuni la aja i Nyidrë tro epuni a aeatrën. Drei Iehova jë jëne la hna e la Tusi Hmitrötr me hna mekune ajuin. Tro epuni lai a atre hnyawa la aja i Iehova koi epun, memine la aqane xatuane Nyidrëti ekö la itre hlue i Nyidrë. Maine tro epuni a drengethenge Nyidrë, tro ha mama cile hnyawa koi epun la enyipiewekëne la idrengethenge.

Nemene la itre xa nyine tro epuni a kuca matre tro pala hi epuni a madrin, me catre huliwa ngöne la ijine pë pala kö föi epun? Loi e tro epuni a huliwa catre troa acatrene catrëne la aqane imelekeu i epuni me Iehova, nge tro fe a catre hamë tulu ka loi. Loi e tro fe a inine ham, me huliwa catr, me atreine imelekeu me itre atr, me mele nyipici koi Iehova. Ka nyipi ewekë catre la itre thiina celë göi troa hetre madrine e hnine la faipoipo. (Genese 24:16-21; Rutha 1:16, 17; 2:6, 7, 11; Ite Edomë 31:10-27) Thele panëne jë la Baselaia, ene la troa catre huliwa i Akötresie, ngöne la hna cainöj me hnine la ekalesia. Tro la itre ewekë celë a sewe epuni troa xomi mekune menu. Öni Bill e qaja la itre macatre ne tha faipoipo angeic: “Tha öhne kö ni la itre macatre e tro! Hnenge hna xome la itre macatre cili troa pionie me kuca la huliwa i Iehova.”

Ka eje pala hi enehila la hna amekötine troa faipoipo “göi Joxu hmekuje hi.” Ame la easa mekune troa faipoipo memine la ketre Keresiano, tre easë hi lai a atrunyi Iehova, me öhnyi madrin qa ngön. Öni Tusi Hmitrötr: “Manathithi la ate qoue Iehova, me madine atrune la ite wathebo i nyidë. Eje ngöne la uma i angeice la mo me nöjei ewekë ; nge cile huti epine palua la thina ka meköti angeic.” (Salamo 112:1, 3) Haawe, catre pi së trongëne la hna amekötine hnei Akötresie, ene la troa faipoipo “göi Joxu hmekuje hi.”