Heta kristiáno soltéro ha soltéra opensa avei koʼã ermánaicha. Péro entéronte oikuaa porã Jehová oipotaha ñamenda ‘peteĩ ojeroviávare ñande Ruvicháre’. Upéva heʼise ñamenda vaʼerãha peteĩ testígo de Jehová ojevautisámavare (1 Cor. 7:39). Upéicharõ jepe, oĩ opensáva koʼã ermánaicha. ¿Mbaʼérepa?

Oĩ opensáva péicha ohechágui hetaveha ermána soltéra ha mbovyve ermáno soltéro. Por ehémplo, Coréape káda 100 Testígo soltéro apytégui, 57 voi haʼe ermána. Ha Colómbiape avei káda 100 Testígo apytépe, oĩ 66 ermána voi.

Heta paíspe ojesegi pe kostúmbre oexihíva pe nóviope omeʼẽ pláta térã rregálo pe nóvia tuvakuérape ikatu hag̃uáicha omenda hese. Sapyʼánte umi túva ndahaʼéiva Testígo ojerure heta pláta térã rregálo hepy hepýva pe nóviope. Ha heta ermáno soltéro ningo ndaikatúi ojogua umichagua rregálo. Upévare heta ermána oikóva koʼãichagua tetãme opensa ndaikatumoʼãiha voínte omenda peteĩ Testígore. *

Oiméramo sapyʼánte repensa umi ermána opensaháicha, nemanduʼákena Jehová oikuaaha ne situasión ha nentendeha (2 Crón. 6:29, 30).

Upéicharõ jepe, Jehová heʼi ñamenda vaʼerãha peteĩ oservívare chupe. ¿Mbaʼérepa? Haʼe oikuaágui mbaʼépa iporãve ñandéve g̃uarã ha ñandeprotehese. Ñandejára ndoipotái jadesidi vai ha upéi japyta jasufri, upéva rangue oipota jaiko vyʼápe. Nehemías tiémpope, heta hudío omenda vaʼekue  umi kuña ndoservírivare Jehovápe. Upévare haʼe omomanduʼa pe puévlope mbaʼépa oiko raʼe rréi Salomón rehe. Heʼi chupekuéra Ñandejára oguerohory hague Salomónpe ha oiporavo chupe rreirã. Péro upéi haʼe ou omenda umi ndoservírivare Jehovápe, ha hembirekokuéra ogueraha vai chupe. Upéicha rupi, amo ipahápe Salomón opeka Ñandejára kóntrape (Neh. 13:23-26). Jehová ningo ñanderayhúguinte heʼi ñandéve ñamenda vaʼerãha peteĩ oservívare chupe añoite (Sal. 19:7-10; Is. 48:17, 18). Entéro kristiáno jaagradeseterei chupe oñangareko haguére ñanderehe mborayhúpe ha omeʼẽ haguére ñandéve umi konsého neporãva. Jaikuaa avei Jehová orekoha derécho heʼívo ñandéve mbaʼépa jajapo vaʼerã ha mbaʼépa ndovaléi jajapo (Prov. 1:5).

Reñemoĩramo “peteĩ júgo guýpe” peteĩ ojeroviaʼỹva ndive térã peteĩ persóna ndohayhúivare Jehovápe, ikatu hína nemomombyry Jehovágui ha upéi ndereservivéima chupe. Ha ni mbaʼevéicharõ ndereipotamoʼãi oiko upéva nderehe (2 Cor. 6:14). Jaikuaaháicha, heta kristiáno ñane tiempopegua odesidi porã ha iñeʼẽrendu Ñandejárape. Péro ñambyasýramo jepe, oĩ avei umi naiñeʼẽrendúiva chupe.

Peteĩ ermána Australiagua hérava Maggy, * omombeʼu mbaʼépa oiko hese oñemoĩrõ guare de nóvia peteĩ kariaʼy ndahaʼéivandi Testígo. Haʼe heʼi: “Pyʼỹinte afalta umi rreunionhápe ikatu hag̃uáicha ahasa tiémpo che nóviondi. Ha upéva tuicha omokangy che jerovia”. Ótra kuñataĩ Indiagua hérava Ratana oñemoĩ avei de nóvia peteĩ ikompañéro de koléhiondi. Upéi pe kariaʼy oñepyrũ guaʼu ostudia la Biblia oñemoĩ porã hag̃ua hendivénte. Péro ohasávo pe tiémpo, ko kuñataĩ oheja Jehovápe ha okambia irrelihión omenda hag̃ua pe kariaʼýre.

Peteĩ ermána Camerungua hérava Ndenguè, orekórõ guare 19 áño omenda peteĩ ndahaʼéivare Testígo. Oĩro guare hikuái de nóvio, pe kariaʼy opromete pe ermánape opermititaha chupe osegi irrelihiónpe, péro dos semána omenda haguépente oproivíma chugui oho rreunionhápe. Ko ermána omombeʼu: “Añeñandu ningo cheañoite ha pyʼỹinte cherasẽ. Ahechakuaa ndaikatuveimaha ajapo heta mbaʼe yma guaréicha ha añeñandu kulpávle pe oikóvare cherehe”.

Añetehápe ningo oĩ ermána omenda vaʼekue peteĩ persóna ndahaʼéivare Testígo, péro ivuéno ha imbaʼerechakuaánte avei hendive. Upéicharõ jepe, ¿repensámapa mbaʼéichapa repytáta Jehová renondépe rejapóramo upéicha? ¿Mbaʼéichapa reñeñandúta nderesegíri haguére pe konsého Jehová omeʼẽva ndéve ne venefisiorã? Ha opa mbaʼe ári, ¿mbaʼéichapa oñeñandúta Jehová upe redesidívare? (Prov. 1:33.)

Hetaiterei ermáno ha ermána iñeʼẽrendu Jehovápe ha oheka Testígonte omenda hag̃ua. Koʼã kristiáno oĩ konvensído upéva iporãveha, ha oñehaʼã voi osegi Ñandejára konsého ombopyʼarory hag̃ua chupe. Por ehémplo, peteĩ ermána Japongua hérava Michiko, odesidi iñeʼẽrendutaha Jehovápe, péro ihentekuéra omboliga chupe omenda hag̃ua peteĩ ndahaʼéivare Testígo. Hiʼarive haʼe ohecha umi iñamíga ha iñamigokuéra omendapamaha ohóvo, péro haʼe katu osegínte soltéra, ha upéva heta vése ijetuʼu chupe. Ko ermána heʼi: “Siémpre chemanduʼa natekotevẽiha ñamenda javyʼa hag̃ua. Jaservíramo ‘Ñandejára ovyʼávape’ katuete javyʼáta avei. Aikuaa porã Jehová omeʼẽha ñandéve umi mbaʼe jaipotáva. Upéicharõ, oiméramo ndajatopái peteĩ oservíva Jehovápe ñamenda hag̃ua, Jehová ñanepytyvõtante avei javyʼa hag̃ua” (1 Tim. 1:11). Tiémpo rire, Michiko omenda peteĩ ermánore, ha nombyasýi ohaʼarõ haguére.

Heta kristiáno ohaʼarõ avei ikatu hag̃uáicha omenda peteĩ persóna oipytyvõtavare chupe oservi porãve hag̃ua Jehovápe. Por ehémplo, peteĩ ermáno Australiagua hérava Bill, orrekonose heta vése ogusta hague chupe umi kuña ndahaʼéiva Testígo. Péro heʼi avei ni noñamigái hague hesekuéra ani hag̃ua oñemoĩ “peteĩ júgo  guýpe” peteĩ ndoservírivare Jehovápe. Ohasávo pe tiémpo, ojuhu mimi avei umi ermána ogustáva chupe, péro umi ermánama noñeinteresái hese. Ohaʼarõ rire 30 áño, Bill ojuhu peteĩ ermána ohayhúva chupe ha orekóva avei la mísma méta, ha omenda hikuái. Haʼe heʼi: “Nañarrepentíri adesidi haguére ahaʼarõ. Koʼág̃a avyʼaiterei ikatu haguére aservi Jehovápe che rembiayhu ndive, ropredika ha rostudia oñondive. Avei igústo chéve akomparti che rembireko amigokuérandi, pórke haʼekuéra oservi avei Jehovápe. Ore matrimónio katu imbarete porã rosegi rupi umi konsého oĩva la Bíbliape”.

Epensamíntena mbaʼeichaitépa oiméne Jehová ovyʼa ohechávo resegiseha umi konsého haʼe omeʼẽva ha upévare neremendaiha gueteri (1 Sam. 15:22; Prov. 27:11). Avei ikatu reñemboʼe meme ha emombeʼu Jehovápe mbaʼéichapa reñeñandu (Sal. 62:8). Katuete reñemoag̃uivéta Jehováre koʼẽ koʼẽre, reñehaʼãramo rembohovái umi tentasión ha umi mbaʼe vai rejaposéva. Haʼe ningo oñeinteresaiterei nderehe ha avei umi mbaʼe reikotevẽvare. Ha noprometéiramo jepe omeʼẽtaha ndéve ne ména térã ne rembirekorã, oiméramo upéva la reikotevẽva, katuete oikuaáta mbaʼéichapa nepytyvõta (Sal. 145:16; Mat. 6:32).

Ikatu sapyʼánte reñeñandu David oñeñandu haguéicha. Haʼe ningo peteĩ jey oñembyasyeterei ha ojerure Jehovápe toipytyvõmi chupe pyaʼemínte, pórke oñandu ndogueropuʼakaveimaha (Sal. 143:5-7, 10). Rejecháramo koichagua situasiónpe, ani reñedesanima. Esegínte ehaʼarõ, ha Jehová katuete ohendúta ne ñemboʼe. Elee la Biblia ha ejepyʼamongeta upe releévare. Péicha reikuaáta mbaʼépa Jehová ohaʼarõ ndehegui ha mbaʼéichapa haʼe oipytyvõ isiervokuéra yma guarépe. Upéva nemombaretéta resegi hag̃ua rejerovia hese ha neñeʼẽrendu hag̃ua chupe.

¿Mbaʼépa ikatu avei rejapo? Reñehaʼã vaʼerã reñemoag̃uive Jehováre ha eñatende umi mbaʼe rejapóva ha erévare ani hag̃ua avave oñeʼẽ vai nderehe. Ikatu avei reñehaʼã rejogueraha porã hag̃ua opavavéndi, nembaʼeporã, rembaʼapo meme ha akóinte neñeʼẽrendu Jehovápe. Koʼã mbaʼe ningo nepytyvõta avei revyʼa hag̃ua ág̃a remenda vove (Gén. 24:16-21; Rut 1:16, 17; 2:6, 7, 11; Prov. 31:10-27). Esẽ memékena epredika ha esegi embaʼapo kongregasiónpe. Upéva nepytyvõta ani hag̃ua redesidi vai. Bill heʼi pyaʼeterei ohasa hague pe tiémpo isoltérorõ guare, pórke oservi kuri oikóvo de prekursór.

Jahechaháicha, opavave soltéro ha soltéra ikatu hína okumpli Jehová omandáva ha omenda ‘peteĩ ojeroviávare ñande Ruvicháre’. Jadesidíramo upéicha, ñamombaʼeguasúta Jehovápe ha javyʼavéta. La Biblia heʼi pe persóna iñeʼẽrendúva ipyʼaite guive oikotaha vyʼápe opa ára g̃uarã (Sal. 112:1, 3). Upévare, aníkena nderesarái Jehová oipotaha remenda ‘peteĩ ojeroviávare ñande Ruvicháre’ añoite.