Dirava ena hesiai taudia haida be turana tahua karana dekenai unai bamona lalohadai idia abia danu. To, idia ese aposetolo Paulo ena sisiba, “Lohiabada lalonai sibona” do idia headava idia diba, bona Keristani taudia ibounai ese idia badinaia be namo. (1 Kor. 7:39) To, dahaka dainai unai bamona lalohadai idia abia?

Haida be unai bamona idia hereva badina reana idia laloa singul tadikaka o taihu be momo lasi. Tano momo ai unai ia vara. Mani haheitalai rua oi laloa: Korea ai, Witnes singul taudia 100 amo 57 be taihu bona 43 be tadikaka. Colombia ai ripoti ta ese ia hahedinaraia, Witnes taudia 66 pesen be taihu bona 34 pesen be tadikaka.

Tano haida ai, Witnes lasi tama sina idia ura edia natudia edia dava karaia moni bada idia abia, unai dainai tadikaka haida idia hegeregere lasi headava totona. Unai dainai, reana taihu ta do ia laloa “Lohiabada lalonai” turana ta ia davaria be auka. Bona reana sibona dekenai do ia henanadai: “Keristani taudia huanai turana ta lau davaria diba, a?” *

Bema oi be unai bamona lalohadai oi abia, namona be oi diba Iehova be emu hekwakwanai bona emu hemami ia diba.—2 Siv. 6:29, 30.

To, Iehova ese Baibel ai ia atoa hakaua herevadia  ese ta ia durua Lohiabada lalonai sibona ia headava totona. Dahaka dainai? Badina Iehova ia diba dahaka be namo ena taunimanima totona. Ia ese ena hesiai taudia be abia hidi kererena dainai ia vara hisihisi amo ia gimaia, bona ia ura do idia moale. Nehemia ena negai Iuda taudia be Iehova idia tomadiho henia lasi idau bese taudia idia adavaia neganai, Nehemia ese Solomona ena haheitalai dikana ia herevalaia. Ena be “Dirava ese Solomona ia lalokau henia. . . . To Solomona ese kara dika dekenai ia moru, idau bese hahine taudia dainai.” (Neh. 13:23-26) Hari, Dirava be ena hesiai taudia edia namo ia laloa dainai, idia ia hagania tomadiho momokani taudia sibona do idia adavaia be namo. (Sal. 19:7-10; Isa. 48:17, 18) Keristani taudia momokanidia be Dirava ena lalokau karana dekenai idia moale, bona ena hakaua herevadia dekenai idia tabekau. Idia diba Ia be Guba bona Tanobada edia Lohia Badana dainai ia idia badinaia.—Aon. 1:5.

Ita ura lasi Dirava amo ita idia hakaua siri taudia ida ita “hakapua tamona.” (2 Kor. 6:14) Hari, Keristani taudia momo be Dirava ese nega korikori ai ia henia hakaua herevadia idia badinaia dainai, unai ese idia ia gimaia. Bona idia laloparara unai be aonega karana. To, haida be unai bamona idia karaia lasi.

Australia ai, taihu ta ladana Maggy * be Witnes lasi tauna ta ia hebamo henia matamaia neganai ia vara gauna ia herevalaia. Ia gwau: “Lau ese hebou momo lau reaia badina lau ura ia ida lau noho. Unai ese egu hetura karana Iehova ida ia hadikaia.” India ai taihu ta ladana Ratana be ena klas ai Baibel stadi ia matamaia merona ia ura henia. To, gabeai unai mero ese ia hahedinaraia ia be unai taihu ia ura henia dainai, Baibel ia stadilaia. Unai taihu be unai mero adavaia totona hereva momokani ia rakatania, bona tomadiho ma ta dekenai ia hanaia lao.

Cameroon ai, taihu ladana Ndenguè ena mauri lagani be 19 neganai ia headava. Iena maoheni merona be ia gwauhamata ia do ia koua lasi ena tomadiho ia badinaia totona. To idia headava bona wiki rua murinai, ena adavana ese ia koua Keristani heboudia ia lao lasi totona. Taihu ia gwau: “Unai negai lau tai momo bona lau mamia lau be sibona lau noho. Lau laloparara egu mauri lau biagua namonamo lasi. Lau karaia abia hidi dainai lau lalohisihisi bada.”

Momokani, Witnes lasi headava taudia haida be edia adavana idia kara namo henia bona idia be laloa maoromaoro taudia. Ena be Witnes lasi tauna ta oi adavaia neganai hekwakwanai haida oi davaria lasi, to edena dala ai unai ese emu hetura karana emu guba Tamana ida ia hadikaia diba? Emu hemami be edena bamona bema oi diba emu namo totona Iehova ia henia sisiba oi kamonai lasi? Bona gau badana be oi karaia abia hidi dekenai Dirava ena hemami be edena bamona?—Aon. 1:33.

Tanobada hegegemadai tadikaka taihu idia abia dae “Lohiabada lalonai sibona” headava karana be sisiba hereadaena. Singul tadikaka o taihu be Dirava ena lalona hamoalea totona, edia lalona idia hadaia ia idia tomadiho henia taudia sibona do idia adavaia. Japan ai, taihu ta ladana Michiko be ena varavara ese idia doria Witnes lasi tauna ta do ia adavaia. Taihu be unai hahetoho ia dadaraia bona ia itaia ena turadia haida be kongrigeisen lalonai adavana ta idia davaria. Taihu ia gwau: “Lau be hanaihanai sibona lau hamaoroa, Iehova be ‘moale Diravana’ dainai ena be ita headava o lasi, to Dirava ese ita dekenai moale ia henia diba. Danu lau abia dae ia ese iseda ura gaudia ia henia diba. Unai dainai, ena be headava totona turana ta ita do davaria lasi, to hari nega sisina lalonai singul ita noho be namo.” (1 Tim. 1:11) Gabeai, Michiko be tadikaka namona ta ia adavaia, bona ia moale badina haheauka karana ia hahedinaraia.

Unai hegeregerena, tadikaka haida be idia haheauka badina idia ura adavana namona ta idia davaria. Idia ta be Bill, ia be Australia amo. Ia gwau nega haida ia be witnes lasi kekeni ia ura henia. To, ia ura lasi idia ia tura henia. Dahaka dainai? Badina ia ura lasi “abidadama lasi taudia ida do [ia] hakapua tamona.” Lagani haida lalonai, ia be taihu haida ia ura henia, to idia be ia idia ura henia lasi. Unai dainai, Bill be lagani 30 ia naria murinai taihu namona ta ia adavaia. Bill ia gwau: “Lau be lau lalohisihisi lasi. To lau moale badina ai ruaosi be haroro gaukara ai lao, ai stadi, bona hebou dekenai ai lao. Lau moale egu adavana ena turadia lau hedavari henia  bona idia ai bamoa, badina idia ibounai be Iehova idia tomadiho henia. Emai headava lalonai ai ese Baibel ena hakaua herevadia ai badinaia.”

Iehova ena imana dekenai emu lalohekwarahi gaudia oi rakatania bona oi naria noho lalonai, dahaka oi karaia be namo? Oi karaia diba gauna ta be, oi do headava lasi ena badina oi laloa. Bema unai bamona oi karaia badina oi ura “Lohiabada lalonai sibona” oi headava, vadaeni oi ai tanikiu henia badina unai sisiba hereadaena oi matauraia. Namona be oi diba Iehova ia moale bema mai emu ura ibounai ida ena Hereva oi badinaia. (1 Sam. 15:22; Aon. 27:11) Namona be guriguri amo ‘emu kudouna ena ura gaudia’ be Dirava dekenai oi gwauraia hedinarai noho. (Sal. 62:8) Hanaihanai mai emu ura ibounai ida oi guriguri ese anina namona do ia havaraia. Bema hahetoho oi haheaukalaia, dina ta ta ai emu hetura karana Dirava ida be do ia goada. Laloatao, Ataiai Momokani Diravana be ena hesiai taudia ibounai ia laloa bona iena matana dekenai idia be mai anina bada. Ia ese emu ura ia laloa bada. Ena be ia ese ta totona adavana ta ia abia hidi lasi, to bema oi ura adavana ta oi davaria, Dirava be emu ura ia hagugurua diba dala maorona ia diba.—Sal. 145:16; Mat. 6:32.

Nega haida ita be salamo torea tauna Davida bamona ita mamia, ia gwau: “[Iehova] e, lau dekenai do oi haere haraga, badina be egu lauma ia manoka momokani, mase bamona. Oiemu vairana be lau dekena amo do oi hunia lasi.” (Sal. 143:5-7, 10) Unai bamona negadiai, namona be oi naria emu guba Tamana ese oi dekenai ena ura ia hahedinaraia totona. Unai oi karaia dalana ta be ena Hereva oi duahia bona laloa dobu. Oi ese iena taravatu do oi diba bona idaunegai ena taunimanima ia durua daladia do oi itaia. Ia oi kamonai henia neganai, do oi diba unai be aonega karana.

Dahaka gaudia ma haida oi karaia diba emu singul maurina oi moalelaia bona anina namona ia havaraia totona? Oi do singul noho lalonai, namona be Dirava ena hereva oi lalopararalaia, harihari karana oi hahedinaraia, oi gaukara goadagoada, oi moale, Dirava tomadiho henia karadia oi habadaia, bona ladana namona oi abia—unai ese famili maurina ia hanamoa. (Gen. 24:16-21; Ruta 1:16, 17; 2:6, 7, 11; Aon. 31:10-27) Ful-taim haroro gaukara bona Keristani gaukaradia ma haida oi karaia ese ia hahedinaraia oi be Basileia oi atoa guna; unai ese oi ia gimaia diba. Matamanai ita herevalaia tadikaka Bill be guna ia do headava lasi negana ia laloa, bona ia gwau: “Unai nega be ia hanaia haraga! Unai lagani lalonai lau be Iehova hesiai henia totona lau painia.”

Oibe, “Lohiabada lalonai sibona” headava be mai anina bada. Unai oi badinaia neganai, oi do ia durua Iehova oi hanamoa bona oi moale noho totona. Baibel ia gwau: “Lohiabada dekenai ia gari tauna be namo. Lohiabada ena taravatu ia moalelaia noho tauna danu be namo. Iena famili taudia, be do mai edia moni bona kohu momo, bona iena kara maoromaoro, be do ia noho ela bona hanaihanai.” (Sal. 112:1, 3) Unai dainai, namona be emu lalona oi hadaia Dirava ena taravatu hereadaena oi badinaia bona “Lohiabada lalonai sibona” oi headava totona.