Ndungata imwe cia Jehova cianoiga maũndũ ta macio ũhoro-inĩ wĩgiĩ kuona mũndũ wa kũhikania nake. O na kũrĩ ũguo, nĩ ciũĩ wega ũtaaro wa mũtũmwo Paulo wĩgiĩ kũhikania o “thĩinĩ wa Mwathani”—ũrĩa wagĩrĩirũo gũtongoria Akristiano othe. (1 Kor. 7:39) Nĩ kĩĩ gĩgĩtũmaga moige maũndũ ta macio?

Arĩa moigaga maũndũ ta macio no makorũo na mawoni atĩ aarĩ a Ithe witũ arĩa matarĩ ahiku nĩ aingĩ gũkĩra ariũ a Ithe witũ arĩa matahikanĩtie. Na ũguo nĩguo kũrĩ thĩinĩ wa mabũrũri maingĩ. Ta wĩcirie ũhoro wa ngerekano ici igĩrĩ: Thĩinĩ wa Korea, harĩ Aira a Jehova 100 arĩa matahikanĩtie, 57 nĩ aarĩ a Ithe witũ na 43 nĩ ariũ a Ithe witũ. Nakuo Colombia, gĩcunjĩ kĩa 66 harĩ igana kĩa Aira a Jehova nĩ aarĩ a Ithe witũ, nakĩo gĩcunjĩ kĩa 34 nĩ ariũ a Ithe witũ.

Mabũrũri-inĩ mamwe, aciari matarĩ Akristiano mahota gwĩtia rũracio rũnene, ũndũ ũcio ũgatũma ariũ a Ithe witũ arĩa matarĩ na indo nyingĩ maritũhĩrũo nĩ kũhikania. Gwĩciria ũhoro wa moritũ ta macio no gũtũme mwarĩ wa Ithe witũ one ta gũtarĩ hĩndĩ akona mũndũ wa kũhikĩra “thĩinĩ wa Mwathani.” *

Angĩkorũo wanakorũo na meciria ta macio, korũo na ma atĩ Jehova nĩ amenyaga maũndũ marĩa ũgeragĩra.—2 Maũ. 6:29, 30.

O na kũrĩ ũguo, Jehova aheanĩte ũtongoria mũndũ ahike kana ahikanie o thĩinĩ wa Mwathani, tondũ nĩoĩ maũndũ marĩa mangĩguna ndungata ciake. Nĩ endaga kũgitĩra ndungata ciake kuuma kũrĩ mathĩna marĩa moimanaga na gũtua matua matarĩ ma ũũgĩ, na ningĩ nĩ endaga ikorũo na gĩkeno. Matukũ-inĩ  ma Nehemia rĩrĩa Ayahudi aingĩ maahikagia atumia mataarĩ athathaiya a Jehova, Nehemia nĩ aamaririkanirie ũhoro wa kĩonereria kĩũru gĩa Suleimani. O na gũtuĩka Suleimani “aarĩ mwende mũno nĩ Ngai wake, . . . o nake aahĩtithirio nĩ atumia ake a ndũrĩrĩ.” (Neh. 13:23-26) Ũguo Jehova nĩ oĩ atĩ motaaro make nĩ ma gũtũguna na nĩkĩo atwĩrĩte tũhikanagie o thĩinĩ wa Mwathani. (Thab. 19:7-10; Isa. 48:17, 18) Nĩ tũkenaga mũno nĩ ũrĩa Ngai atũrũmbũyagia na nĩ twendaga kũrũmĩrĩra ũtongoria wake. Tweka ũguo, tuonanagia nĩ tũramenya atĩ nĩwe Mwathani Mũnene wa Igũrũ na Thĩ.—Thim. 1:5.

Ma nĩ atĩ, no wende gwĩthema ‘kuohanio icoki rĩmwe’ na mũndũ ũngĩtũma ũhutatĩre Jehova. (2 Kor. 6:14) Akristiano aingĩ ũmũthĩ nĩ mathĩkĩire ũtaaro ũcio mwega wa Jehova na makoona atĩ nĩ magunĩkĩte mũno. No amwe nĩ maagĩte kũrũmĩrĩra ũtaaro ũcio.

Maggy, * kuuma Australia, nĩ aatarĩirie ũrĩa gwathire rĩrĩa aambĩrĩirie ndũgũ na mũndũ ũtarĩ Mũkristiano. Oigire ũũ: “Nĩ maita maingĩ mũno ndaatĩraga mĩcemanio nĩgetha tũkorũo nake. Maũndũ makwa ma kĩĩroho magĩthũka mũno.” Ratana kuuma India nĩ aambĩrĩirie ndũgũ na mwanake maathomaga nake ũrĩa waambĩrĩirie kwĩruta Bibilia. Ĩndĩ, thutha-inĩ nĩ kuonekire atĩ muoroto wake warĩ gũtuma ndũgũ na mwarĩ wa Ithe witũ ũcio. Macũngĩrĩro-inĩ Ratana agĩtiga ũhoro wa ma na agĩthiĩ ndini-inĩ ĩngĩ nĩguo mahikanie.

Ngerekano ĩngĩ nĩ ya Ndenguè kuuma Cameroon. Aahikire arĩ na mĩaka 19. Mwanake ũrĩa maarĩ ndũgũ nake aamwĩrĩte atĩ ndakamũgiria gũthiĩ na mbere na maũndũ ma ndini yake. Ĩndĩ ciumia igĩrĩ thutha wa ũhiki wao, akĩmũgiria gũthiaga mĩcemanio ya kĩũngano. Oigire ũũ: “Ndaiguire ihooru mũno na ngĩrĩra. Ngĩmenya atĩ ndirĩ na wĩyathi ũtũũro-inĩ wakwa. Nĩ ndeeririre mũno.”

Ma nĩ atĩ, ti athuri na atumia othe matarĩ Akristiano mangĩkorũo marĩ oru. Ĩndĩ o na angĩkorũo ndũkũgirio gũthiĩ na mbere na maũndũ ma kĩĩroho-rĩ, kũhikĩra mũndũ ũtarĩ Mũkristiano kũngĩhutia atĩa ũrata waku na Jehova? Ũrĩiguaga atĩa waririkana atĩ ndwarũmĩrĩire ũtaaro wa gũkũguna ũrĩa Jehova akoragwo aheanĩte? Makĩria ma ũguo-rĩ, Jehova angĩigua atĩa nĩ ũndũ wa itua rĩaku?—Thim. 1:33.

Aarĩ na ariũ a Ithe witũ kũndũ guothe thĩinĩ wa thĩ no marute ũira atĩ kũhika kana kũhikania o “thĩinĩ wa Mwathani” nĩrĩo itua rĩrĩa rĩega biũ. Arĩa mataingĩrĩte kĩhiko-inĩ nĩ matuĩte itua rĩa gũkenia Jehova na njĩra ya gũkorũo mehaarĩirie gũcaria mũndũ ũrĩa wagĩrĩire wa kũhikania nake thĩinĩ wa kĩũngano gĩa Gĩkristiano. Andũ a famĩlĩ ya Michiko kuuma Japan nĩ maageretie kũmũiguithia ahikio nĩ mũndũ ũtarĩ Mũira wa Jehova. O akĩhiũrania na hatĩka icio, nĩ onire arata ake amwe makĩona andũ a kũhikania nao thĩinĩ wa kĩũngano. Oigire ũũ: “Ndeyũmagĩrĩria ngeĩra atĩ tondũ Jehova nĩ Ngai ‘wĩ gĩkeno,’ gĩkeno gitũ gĩtiĩhocetie harĩ mũndũ gũkorũo ahikĩte kana atahikĩte. Ningĩ njĩtĩkĩtie atĩ Jehova nĩ atũhingagĩria merirĩria ma ngoro citũ. Kwoguo angĩkorũo nĩ tũrenda kũingĩra thĩinĩ wa kĩhiko na tũtirona mũndũ wa kũhikania nake nĩ kaba gũikara ũguo kwa ihinda rĩrĩ.” (1 Tim. 1:11, New World Translation) Michiko nĩ aacokire akĩhikĩra mũrũ wa Ithe witũ ũmwe mwega mũno, na nĩ aakenaga tondũ nĩ eetereire.

O nao ariũ a Ithe witũ amwe nĩ monanĩtie wetereri magĩcaria mũndũ ũrĩa wagĩrĩire wa kũhikania nake. Bill kuuma Australia nĩ ũmwe wao. Nĩ oigaga atĩ rĩmwe na rĩmwe nĩ aaiguaga akĩgucĩrĩrio nĩ airĩtu matarĩ Aira a Jehova. O na kũrĩ ũguo, nĩ eethemaga biũ kũgĩa na ũrata wa hakuhĩ nao. Eekaga ũguo nĩkĩ? Nĩ tondũ ndeendaga kuoya ikinya rĩa mbere rĩa ‘kuohanio icoki rĩmwe na mũndũ ũtetĩkĩtie.’ Kwa ihinda rĩa mĩaka mĩingĩ Bill nĩ aagucagĩrĩrio nĩ aarĩ a Ithe witũ amwe, ĩndĩ o magakorũo matiramwenda. Bill eetereire mĩaka 30 agĩkoona mũndũ ũrĩa ũmwagĩrĩire wa kũhikania nake. Oigaga ũũ: “Ndiĩriraga o na hanini. Nyonaga kĩrĩ kĩrathimo kĩnene tondũ tũthiaga na mũtumia wakwa kũhunjia, tũkeruta hamwe, na tũgathathaiya hamwe. Nĩ ngenaga rĩrĩa tũracemania na tũkanyitanĩra na arata a mũtumia wakwa, tondũ othe nĩ Aira a Jehova. Tũthiaga o tũkĩagĩragia kĩhiko gitũ na njĩra ya kũhũthĩra mootaro ma Bibilia.”

Wagĩrĩirũo gwĩka atĩa o ũgĩetagĩrĩra Jehova agũteithie kuona mũndũ wa kũhikania nake? Ũndũ ũmwe nĩ gwĩciria kĩrĩa gĩtũmĩte ũkorũo ũtaingĩrĩte thĩinĩ wa kĩhiko. Angĩkorũo kũrũmĩrĩra ũtaaro wa Bibilia wa kũhikania o “thĩinĩ wa Mwathani,” nĩkĩo gĩtũmi kĩnene kĩrĩa kĩgirĩtie ũingĩre kĩhiko-inĩ, nĩ wĩkĩte wega mũno nĩ ũndũ wa gũtĩa ũtaaro ũcio wa Jehova. Korũo na ma atĩ Jehova nĩ akenagio mũno nĩ itua rĩaku irũmu rĩa gwathĩkĩra Kiugo gĩake. (1 Sam. 15:22; Thim. 27:11) Thiĩ na mbere ‘gũitũrũrĩra Jehova ngoro yaku’ thĩinĩ wa mahoya. (Thab. 62:8) O ũrĩa ũgũthiĩ na mbere kũmũthaitha ũtegũtigithĩria, noguo ũrata wanyu nake ũrĩthiaga ũkĩgĩaga na hinya. Ningĩ ũkuruhanu waku na Ngai ũrĩgĩaga na hinya o mũthenya o ũrĩa ũrerutanĩria kũrũmia wĩkindĩru waku, o na ũkĩhiũranagia na magerio na merirĩria maku ma mwĩrĩ. Korũo na ma atĩ Mũũmbi witũ nĩ arũmbũyagia ndungata ciake ciothe iria njĩhokeku na atĩ ũrĩ wa bata mũno maitho-inĩ make. Nĩwe ũrũmbũyagia mabataro na merirĩria maku. O na gũtuĩka gũtirĩ mũndũ Jehova eragĩra atĩ nĩ arĩmũhe mũthuri kana mũtumia-rĩ, angĩkorũo kũna nĩ ũrenda mũndũ wa kũhikania nake, nĩ oĩ njĩra ĩrĩa njega biũ ya kũhingia merirĩria maku marĩa magĩrĩire.—Thab. 145:16; Mat. 6:32.

Rĩmwe no ũigue o ta ũrĩa Daudi, mwandĩki wa Thaburi, aaiguire. Oigire ũũ: ‘Jehova, hiũha kũnyamũkĩria! roho wakwa nĩũrahoerera: tiga kũũhitha ũthiũ waku.’ (Thab. 143:5-7, 10) Ihinda-inĩ ta rĩu nĩ wega kũhe Jehova mweke akuonie ũrĩa arenda wĩke. No wĩke ũguo na njĩra ya kũhũthĩra mahinda gũthoma Kiugo gĩake na gwĩcũrania maũndũ marĩa ũrathoma. Nĩ ũkũmenya maathani make na wone ũrĩa aateithirie ndungata ciake mahinda-inĩ ma tene. Kũmũthikĩrĩria nĩ gũgũgũteithia gũkorũo na ma biũ atĩ kũmwathĩkĩra nĩguo ũndũ ũrĩa wa ũũgĩ.

Nĩ maũndũ marĩkũ mangĩ mangĩtũma mĩaka ĩrĩa ũgũkorũo ũtaingĩrĩte thĩinĩ wa kĩhiko ĩkorũo na gĩkeno na irathimo? No ũhũthĩre ihinda rĩu gũkũria ngumo cia kĩĩroho ta ũtaũku, ũtaana, kĩyo, wega, wĩrutĩri Ngai, na wĩthondekere rĩĩtwa rĩega. Ngumo icio nĩ cia bata mũno harĩ gũthondeka famĩlĩ ĩrĩ na gĩkeno. (Kĩam. 24:16-21; Ruth 1:16, 17; 2:6, 7, 11; Thim. 31:10-27) Caria Ũthamaki wa Ngai mbere na njĩra ya gũkorũo na itemi inene wĩra-inĩ wa kũhunjia na mawĩra-inĩ mangĩ ma kĩĩroho. Gwĩka ũguo nĩ kũrĩkũgitagĩra. Akĩaria ũhoro wa mĩaka ĩrĩa eendaga kũhikania, Bill ũrĩa ũkũgwetetwo hau kabere oigire ũũ: “Yahĩtũkire ta kũbucia kwa riitho! Ndahũthĩrire mĩaka ĩyo ũtungata-inĩ wa ũpainia.”

Hatarĩ nganja, ũtaaro wa kũhika kana kũhikania o “thĩinĩ wa Mwathani” ti mũhĩtũke nĩ mahinda. Gwathĩkĩra ũtongoria ũcio no gũkũhotithie gũtĩa Jehova na gũtũme ũkorũo na gĩkeno gĩa gũtũũra. Bibilia yugaga ũũ: “Gũkena nĩ mũndũ ũrĩa mwĩtigĩri Jehova, ũrĩa wĩkenagĩra o mũno nĩ ũndũ wa maathani make. Gwake gũikaraga kwĩ na ũrugarĩ o na ũtonga, naguo ũthingu wake ũtũũraga wĩ mũrũmu o kinya tene.” (Thab. 112:1, 3) Nĩ ũndũ ũcio, thiĩ na mbere kũrũmia itua rĩaku rĩa gwathĩkĩra watho wa Jehova wa kũhika kana kũhikania o “thĩinĩ wa Mwathani.”