Bapopweshi ba Yehoba bamo bakeba wa kusongolwako nabo bamba byambo bipasha na bino. Bino bayuka kuba’mba, bena Kilishitu bonse bafwainwa kukokela mukambizho waambile Paulo wa kusongolwatu, “kanatu monka mwi Nkambo.” (1 Ko. 7:39) Pano mambo ka o bambila bino byambo?

Aba bonse bamba bino byambo balanguluka’mba banyenga bavula kukila balongo bafwainwa bakusongolwako. Abino, byobyo kiji ne mu byalo byavula. Mu kyalo kya Korea, pa Bakamonyi 100 babula mu masongola, pekala banyenga 57 ne balongo 43. Sawakya wa ku Colombia wamwesha kuba’mba pa Bakamonyi 100 pekala banyenga 66 ne balongo 34.

Mu byalo bikwabo, kilengela ke kya kuba’mba bansemi babula bapopweshi ba Lesa bapingula mali a masongola avula bingi. Kino kilengela balongo babula mali avula kukankalwa kusongola. Kulanguluka pa uno mukiika kwakonsha kulengela nyenga kutendeka kulanguluka’mba kyakatazha bingi kutaana wa kusongolwako “monka mwi Nkambo.” Onkao mambo, nyenga wakonsha kwiipuzha’mba, “Nanchi kine nkakonsha kutaana mwina Kilishitu wamfwainwa wa kusongolwako nyi?” *

Umvwe kya kuba mulanguluka bino, yukai kuba’mba Yehoba wayuka byo mu bena kupitamo. Kabiji wayukishatu bulongo byo mumvwa ku muchima.—2 Moba 6:29, 30.

Nangwa byonkabyo, Yehoba mu Mambo anji wakambizha  kuba’mba mwafwainwa kusongolwatu kanatu monka mwi Nkambo. Mambo ka? Mambo wayuka byawamina bantu banji. Kechi uzhikijilatu bakalume banji ku bintu bifuma mu kuba bintu byatama ne, bino ukeba ne kuba’mba bekalenga na lusekelo. Mu moba ajingako Nehemiya, Bayudea bavula basongwelenga banabakazhi babulanga kupopwela Yehoba. Nehemiya wibavulwilemo bintu byatama byamwekejile Solomone. Nangwa kya kuba Solomone “bamutemenwe kwi Lesa wanji, . . . bino banabakazhi ba mu byalo bingi bamulengejile kulenga mambo.” (Ne. 13:23-26) Pa kuba’mba bapopweshi banji bamwenemo byawama, Lesa wibakambizha kusongolwatu ku bakwabo bapopweshi bakine. (Sala. 19:7-10; Isa. 48:17, 18) Bena Kilishitu bakine bamusanchila bingi Lesa pa byo ebata muchima kabiji bakokela byo ebabula. Byo bamukokela byo aji Kalama, bamwesha’mba ye Nkambo Walengele Bintu Byonse.—Maana 1:5.

Mwafwainwa mukebesha bingi kuchinuzhuka kubula ‘kwikasa kikonkoji’ kimo na muntu wakonsha kwimufumya kwi Lesa. (2 Ko. 6:14) Bena Kilishitu bavula mu ano moba bakokela uno mukambizho wafuma kwi Lesa bazhikijilwa kabiji bataana kuba’mba bafukwilepo kintu kyawama. Bino bamo bafukulapo kubula kukokela uno mukambizho.

Ba Maggy, * banyenga bekala ku Australia baambile kibamwekejile byo batendekele kwifwalama na muntu wabulanga kupopwela Lesa, amba: “Nashalanga ku kupwila, pa kubatu’mba tumonañanenga. Bulunda bwami ne Lesa bwapwile.” Ba Ratana banyenga ba ku India batendekele kwifwalama na ye bafundanga nanji ku sukulu watendekeletu kufunda Baibolo. Nangwa byonkabyo, pakupitapo moba wamwesheshe kuba’mba kyo akebelenga ke kwifwalamatu nabo. Kyafuminemo, uno nyenga washile bukine ne kutendeka kuya mu bupopweshi bungi na mambotu a kukeba kusongolwa.

Kikwabo ke kyamwekejile Ndenguè wa ku Cameroon. Wasongwelwe byo ajinga na myaka 19. Sambe wanji wamulayile kuba’mba ukatendeka kupwila. Bino byo papichile milungu ibiji panyuma ya masongola abo, mwatawanji watendekele kumukanya kuya ku kupwila kwa bwina Kilishitu. Uno nyenga waambile’mba: “Naikalangatu bunke bwami na kujila. Popo nayukile kuba’mba naonauna bwikalo bwami. Nelangulushanga bingi pa kintu kyo naubile.”

Kya kine kuba’mba kechi bonse babula kupopwela Lesa bakanama kabiji babula kulangulukilako ne. Bino, nangwa kya kuba kechi mwapitapo mu bintu byatama na mambo a kusongolwa ku muntu wabula kwitabila ne, pano bulunda bwenu na Shenu wa mwiulu wimutemwa bingi buji byepi? Mumvwa byepi byo mwayuka kuba’mba kechi mwaumvwijile lujimuno lwa kwa Lesa ne? Ne kyakilapo kunema ke kya kuba’mba, Lesa umvwa byepi pa byo mwafukwilepo?—Maana 1:33.

Balongo ne banyenga kuzhokoloka ntanda yonse bataana kishinka kya kuba’mba kusongolwatu “monka mwi nkambo,” ke jifunde jawama bingi kulondela. Bonse bakeba kusongolwa basangajika Lesa inge basala wafwainwa kusongolwako mu bapopweshi banji. Michiko ke nyenga muzhike wikala ku Japan, balongo banji bakebelenga kuba’mba asongolwe ku muntu wabulanga kupopwela Lesa. Kumona balunda nanji ne bakwabotu batainenga bakusongolwako mu kipwilo kwamukwashishe kushinda luno lukatazho. Waambile’mba: “Nayukile kuba’mba Yehoba ke ‘Lesa wa lusekelo’ kabiji lusekelo lwetu kechi lwaimenatu pa kusongolwa nangwa kubula kusongolwa ne. Kabiji nayuka ne kuba’mba witupa bikeba michima yetu. Onkao mambo, inge kechi twataana wa kusongolwako ne, nangwa kya kuba twakebesha kusongolwa, kyawama kutwajijila kwikala bazhike.” (1 Timo. 1:11) Pa kupitapo kimye, Michiko wasongwelwe ku mulongo walumbuluka, kabiji uji bingi na lusekelo na mambo a kuba’mba watwajijile na kupembelela.

Balongo bamo nabo batwajijila na kupembelela kufikatu ne kimye kyo bataana nyenga wafwainwa wa kusongola. Mulongo Bill wa ku Australia ke umo pa bano. Waambile’mba, kimye kimo nakomokanga bingi banabakazhi babujile ba mu kipwilo. Nangwa byonkabyo, wachinuzhukanga kwipwiluluka nabo. Mambo ka? Mambo kechi wakebelenga ‘kwikasa kikonkoji kimo na bantu babula kwitabila ne.’ Bino mu myaka ya kunyuma watemenwepo banyenga bamo, bino butemwe kechi bwatwajijilanga ne. Bill wapembejile pa myaka 30 pa kuba’mba atane nyenga wafwainwa ye akebelenga. Bill waambile’mba: “Kechi nelangulushapo ne, kabiji ñumvwa kuba’mba natokwa bingi mambo tuyila pamo mu mwingilo, kufunjila pamo ne kupopwela  Lesa pamo. Kabiji natemwa bingi kwisamba na balunda bamukazhami mambo bonse ke bakwetu bapopweshi ba Yehoba. Tukosesha masongola etu kupichila mu kulondela mufunde a mu Baibolo.”

Mwafwainwa kuba byepi umvwe mubena kutalatu kwi Yehoba? Kintu kyo mwafwainwa kuba ke kulanguluka pa ene mambo o mwabujila kusongolwa. Umvwe mulanguluka’mba kulondela mukambizho wa mu Baibolo wa kusongolwatu “kanatu monka mwi Nkambo” ko kwalengela, twimusanchila bingi mambo mwanemeka uno mukambizho wa Lesa. Shiinwai kuba’mba Yehoba umvwa bingi bulongo pa byo mubena kukokela byaamba Mambo anji. (1 Sam. 15:22; Maana 27:11) Mwafwainwa kutwajijila ‘kumubuula Lesa biji ku muchima wenu’ mu milombelo. (Sala. 62:8) Milombelo yenu yakonsha kuwama bingi umvwe mwatwajijila kumusashijila kya kine kabiji kwa kubula kwikileka. Bulunda bwenu ne Lesa bukakoselangako pa juba pa juba umvwe mwatwajijila kuchinchika meseko o mubena kupitamo. Kabiji shiinwai kuba’mba Mwine Wakila wata bingi muchima bapopweshi banji bakishinka kabiji mwanema bingi kwi aye. Wata bingi muchima ku bintu byo mwakajilwa ne byo mukebesha. Bino kechi walaya kuba’mba ukemupa muntu wa kusongolwako ne. Nangwa byonkabyo, umvwe mubena kukeba kusongola nangwa kusongolwa, Lesa wayuka jishinda jawama ja kwimukwashishamo kwikala na byo mubena kukeba.—Sala. 145:16; Mat. 6:32.

Kimo kimye mwakonsha kumvwa byonka byaumvwine nyimbi wa masalamo aye Davida, waambile’mba: “Anweba Yehoba, nkumbulai bukiji; bulume bwami bwapwa. Kange mumfye kilungi kyenu ne.” (Sala. 143:5-7, 10) Mu bimye bya uno mutundu, painga Shenu wa mwiulu kimye kya kuba kyaswa muchima wanji pe anweba. Mwakonsha kuba bino kupichila mu kutanga Mambo anji ne kulanguluka languluka pa byo mubena kutanga. Mukayuka mikambizho yanji ne kumona byo aubijile bantu banji ba kala. Kumumvwina kukemulengela kumona buneme bwa kumukokela.

Ñanyi kintu kikwabo kyakonsha kwimulengela kwikala na lusekelo ne kwingila bulongo byo mukiji bunke? Mwafwainwa kwingijishanga kimye kyo mukiji bunke bwenu kwikelamo na milangwe, bumpanyi, kwingila na ngovu, buwame, moyo wa kwakamwa Lesa, ne byubilo byawama bilengela kwikala na lusekelo mu kisemi. (Nte. 24:16-21; Luta 1:16, 17; 2:6, 7, 11; Maana 31:10-27) Kebainga patanshi Bufumu kupichila mu kwingila na ngovu mu mwingilo wa kusapwila ne mu mingilotu ikwabo ya bwina Kilishitu. Kuba bino kukemuzhikijila. Bill ye twajikwambapo, waambile pa myaka yo akebelanga wa kusongola amba: “Yaendelenga bingi bukiji. Naingijishenga kino kimye mu mwingilo wa Yehoba byo najinga painiya.”

Kya kine, mukambizho wa kusongolwatu “kanatu monka mwi Nkambo” ne luno ukingila. Kukokela uno mukambizho kwakonsha kwimukwasha kunemeka Yehoba kabiji mukamwenamo byawama. Baibolo waamba’mba: “Ye mwine wa lusekelo awa wakamwa Yehoba, yenka usangalela mu mikambizho yanji. Bya buneme ne bunonshi biji mu nzubo yanji, ne bololoke bwanji bukatwajijila myaka ne myaka.” (Sala. 112:1, 3) Onkao mambo, twajijilai kulondela mukambizho wa Lesa wa kusongolwatu, “kanatu monka mwi Nkambo.”