Kumbachila Nakusombokela “Muli Mwata Kaha,” Chachilemu Noholyapwa Tahi?
“Kangwawanyine mutu wakulisoka nenyi muulo muchikungulwiloko, kaha ami nawa kangweshi nakusaka kukafwa naujike wamiko.”
“Malunga vamwe vakukaye vapwa valikoji, vazangi, kaha nawa vakwechi michima yakuzakama. Kavemanyina kwitava chetu nakoleko, kaha vakwechi michima yamwaza kuhambakana vandumbwetu vamwe.”
Omu mukiko vanahanjikanga vangamba jaKalunga vamwe vavajike. Vatachikiza kanawa ngwavo Yehova asaka vangamba jenyi vambachilenga nakusombokela “muli Mwata kaha,” kulumbununa kumbata chipwe kusomboka kuli muka-Kulishitu wamuchano. (Koli. 1, 7:39) Kahaze mwomwo ika vaka-Kulishitu vamwe veji kuhanjikilanga ngocho?
OVYO VYALINGISA VAMWE VAHUHWASANE
Vandumbwetu vaze veji kuhanjikanga ngocho vashinganyeka ngwavo vandumbwetu vamapwevo vavajike muliuka lyetu vapwa vavavulu chikuma kuhambakana vandumbwetu vamalunga. Eyo, omu mukiko chili mumafuchi amavulu. Achitalenu vyakutalilaho vino vivali: MuKorea, mapwevo vaVinjiho vavajike vapwa jipaseti 57, kaha vamalunga jipaseti 43. MuColombia nawa Vinjiho vavavulu vapwa mapwevo, malunga vapwa vavandende.
Mumafuchi amwe, visemi vaze kavetavako vali nakutomanga jimbongo jamatemo jajivulu, ngocho vandumbwetu vamalunga vakukalikiza kaveshi nakuhasa kumbatako. Shikaho vandumbwetu vamapwevo vaze vakwechi visemi vangana veji kushinganyekanga ngwavo kusombokela “muli Mwata kaha” chapwa chachikalu. Vanahase kulihulisa ngwavo, “Kutala ngunahase chikupu kuwana lunga wamwaza muka-Kulishitu uze nahase kungumbata tahi?” *
CHAPWA CHACHILEMU KUFWELELA YEHOVA
Kachi nge mukwechi vishinganyeka vyangana, kaha ijivenu ngwenu Yehova natachikiza ukalu wenu. Atachikiza omu muli nakwivwa hachihande kana.—Miji. 2, 6:29, 30.
Chipwe ngocho, Yehova ahakako jindongi muMazu enyi jakutulweza ngwenyi twatela kumbata nakusombokela muli Mwata kaha. Mwomwo ika? Mwomwo atachikiza vyuma vyamwaza twasaka etu vangamba jenyi. Yehova asaka kutukinga kuvyuma vize vinahase kutunehela kazulu kupwema, kaha nawa asaka tupwenga vakuwahilila mukuyoya chetu. Mumakumbi aNehemiya omu vaYuleya vavavulu vambachilenga mapwevo vakumafuchi eka vaze kavalemeselenga Yehovako, Nehemiya avalwezele vyuma vyavipi alingile Solomone. Numba tuhu Solomone ‘vamuzangilenga kuli Kalunga,’ “oloze mapwevo jenyi vakumafuchi eka vamulingishile alinge shili.” (Nehe. 13:23-26) Ngocho Kalunga alweza vangamba jenyi makumbi ano valimbatenga kaha navaka-kwitava vamuchano mwomwo asaka vapwenga vakuwahilila. (Samu 19:7-10; Isa. 48:17, 18) Vaka-Kulishitu vamuchano veji kusakwililanga Kalunga hakuvahuhumuna mujila kaneyi, kaha vapendamina hali ikiye avatwaminyine. Kachi nge natuliluula kuli Yehova kupwa Muka-kutuyula, natusolola nge twetavila ngwetu ikiye atamo kutulweza vyuma twatela kulinga mukuyoya.—Vishi. 1:5.
Tunafwelela ngwetu kamweshi nakusaka ‘kulikasa toka’ namutu uze nahase kumihungumwisa museze Kalungako. (Koli. 2, 6:14) Vaka-Kulishitu vavavulu makumbi ano vanononokanga eji jindongi jaKalunga, kaha jinavakingi. Oloze vamwe vanakanenga kwononoka.
KUMBATA NAKUSOMBOKELA MULI MWATA CHACHILEMU NOHOLYAPWA
Ndumbwetu Maggy * wakuAustralia alumbunwine vyuma vyasolokele omu valishikile kulimbata namutu uze ketavako. Ambile ngwenyi: “Kangwayilenga kukukunguluka lwola lwosenako mwomwo ngwasakilenga kupwanga naikiye. Ngwazeyele chikuma kushipilitu.” Ndumbwetu Ratana wakuIndia alizangile nalunga umwe, mukwavo muka-shikola uze aputukile kulinangula Mbimbiliya. Oloze kutwala muze, chasolokele hatoma nge ou lunga aputukile kulinangula Mbimbiliya mangana akunyule ou ndumbwetu amwitave. Chaluvinda ou ndumbwetu asezele muchano nakuya kukwitava cheka hakusaka kusomboka kuli ou lunga.
Chakutalilaho chikwavo shina chandumbwetu Ndenguè wakuCameroon. Apwile namyaka yakusemuka 19 omu asombokele. Shimbu kanda asomboke, lunga lyenyi amulwezele ngwenyi keshi kukamukanyisanga kuya kukukungulukako. Oloze mwahichile vyalumingo vivali kaha kufuma hakulimbata chavo, ou lunga lyenyi amukanyishile kuya kukukunguluka. Ou ndumbwetu ambile ngwenyi: “Ngwevwilenga uli, kaha ngwalililenga chikuma. Ngwamwene ngwami chiyoyelo chami chinalikase. Ngwaliveyelenga chikuma hakumbi hakumbi.”
Tuyokutuyoku nawa, keshi nge malunga vakuzeneka kwitava vosena veji kupwanga vikenya nakukaluhwisa michimako. Numba tuhu kamweshi nakumona ukalu numba umwe hakusomboka kuli mutu uze ketavako, uno usoko wenu naSenu wamwilu uli ngachilihi oholyapwa? Mweji kwivwanga ngachilihi hakwanuka ngwenu mwalikangile kuli Yehova hakuhumbula jindongi jamwaza jize ahakako?—Vishi. 1:33.
Vandumbwetu vamalunga navava vamapwevo mukaye kosena vaze vanambachila nakusombokela “muli Mwata kaha” vanamono ngwavo vyuma valingile vyamwaza chiyovo. Vajike vavavulu vali nakufwila kwivwisa Kalunga kuwaha hakumbata nakusomboka kuli vandumbwetu vamwenemwene muvikungulwilo. Ndumbwetu Michiko wakuJapan vamushinjilile kuli vausoko wenyi asomboke kuli lunga uze ketavako. Kaha nawa amwenenga masepa jenyi vamwe muchikungulwilo navasomboka kuli vandumbwetu, oloze ikiye chiku. Ambile ngwenyi: “Ngwalyambilenga mumuchima wami ngwami hakuwana nge Yehova apwa ‘Kalunga wakuwahilila,’ ngocho mutu nahase kuwahilila numba asomboka chipwe nduma. Ngwenjikiza nawa ngwami Kalunga eji kuhananga vatu jenyi vyuma vyosena vasaka. Ngocho nge lunga wakungumbata wauchi numba tuhu nguli nakufwila kusomboka, nachiwaha kutwama ujike halwola luno.” (Chimo. 1, 1:11) Kutwala muze ndumbwetu Michiko asombokele kuli ndumbwetu wamwenemwene, kaha awahilila hakuwana nge aunjile muchima.
Vandumbwetu vamalunga vamwe nawa vanaundunga michima, kaha vanawane mapwevo vamwenemwene. Chakutalilaho chimwe shina chandumbwetu Bill wakuAustralia. Ambile ngwenyi lwola lumwe azangile mapwevo vaze kavapwile vandumbwetuko. Oloze alihendele kumapwevo kana. Mwomwo ika? Kasakile kulinga chuma chize nachimulingisa ‘alikase toka’ namutu uze ketavako. Hamyaka yayivulu, atondelenga vandumbwetu vamapwevo, oloze vamukanyinenga. Bill avandaminyine hamyaka 30 numba awanyine jino ndumbwetu wamwenemwene ambachile. Bill ambile ngwenyi: “Kangweshi nakuliveyako.” Alumbunwine ngwenyi: “Ngwatokwa chikuma mwomwo tweji kuyanga hamwe mumulimo wamuwande, tweji kulinangwilanga hamwe, nakulemesela hamwe Kalunga. Ngweji kwivwanga kuwaha kuliwana nakulikata namasepa japuwami mwomwo vosena vapwa vakwetu mutwalemesela Yehova. Muulo wetu twakavangiza jindongi jamuMbimbiliya.”
SHIMBU MULI NAKUVANDAMINA YEHOVA
Vyuma muka mwatela kulinga shimbu muli nakuvandamina Yehova amikafwe muwane mutu wakulisoka nenyi muulo? Shinganyekenu ovyo vili nakumihonesa kusomboka chipwe kumbata. Kachi nge munawane ngwenu chuma chili nakumihonesa shina jindongi jamuMbimbiliya jakumbachila nakusombokela “muli Mwata kaha,” kaha muli nakulinga kanawa kukavangiza jindongi kana. Fwelelenu ngwenu Yehova ali nakwivwa kuwaha hakumimona muli nakwononoka Mazu enyi. (Samwe. 1, 15:22; Vishi. 27:11) Twalenuho lika ‘kulweza Kalunga vyuma vyosena vili mumichima yenu’ kuhichila mukulomba. (Samu 62:8) Tachikizenu ngwenu kulomba chenu nachipwanga chakufuma kumuchima, kaha nawa namulombanga lwola lwosena. Usoko wenu naKalunga naukolelako lika hakumbi hakumbi omu muli nakutwalaho lika kuzama mbe chamokomoko naukalu muli nakuhitamo. Fwelelenu ngwenu Kalunga Wakulitulaho Chikuma azanga vangamba jenyi vakushishika vosena, kaha nayenu mwapwa muvavalemu kumeso enyi. Amizakama chikuma, kaha afwila kumihana vyuma mwasaka. Kalunga kashika ngwenyi mwamitondela mutu wakulisoka nenyi muuloko. Chipwe ngocho, kachi nge muli nakusaka chikupu mutu wakulisoka nenyi muulo, Kalunga natachikiza kanawa mwakumisuulwishila.—Samu 145:16; Mateu 6:32.
Lwola lumwe munahase kwivwa nge omu evwile muka-kwimba jisamu Ndavichi uze ambile ngwenyi: “Ove Yehova, ngukumbulule washiwashi. Ngolo jinangukumu. Kanda nauswama nguhone kukumonako.” (Samu 143:5-7, 10) Halwola kanelu, talililenu Senu wamwilu mangana amilweze vyuma vyakwoloka mwatela kulinga. Vyuma navimikafwa shina kuwananga lwola lwakutanga Mazu enyi nakuhunanana havyuma muli nakutanga. Nge namulinga ngocho, kaha namutachikiza kanawa jishimbi jenyi nakumona omu akafwilenga vatu jenyi kushikulu. Echi nachimikafwa mutachikize kuwaha chatwama hakumwononoka.
Vajike veji kuzatanga milimo yamwenemwene muchikungulwilo, kaha vapwa vavalemu kumeso aYehova
Vyuma vyeka muka vinahase kumikafwa mupwenga vakuwahilila nakufukila muujike wenu? Shimbu muli muujike munahase kulinga vyuma vize navimikafwa muhyenga kushipilitu, nakupwa napuho yamwaza, nachisambo, nakuzata nangolo, nakuwaha, namuchima wakuzachila Kalunga. Echi nachimikafwa mukapwe natanga yakuwahilila. (Kupu. 24:16-21; Lute 1:16, 17; 2:6, 7, 11; Vishi. 31:10-27) Tondenu chatete Wangana hakwazananga chikuma mumulimo wakwambulula namumilimo yeka yakushipilitu. Kulinga ngocho nachimikinga. Ndumbwetu Bill uze twavulukanga ahanjikile kutalisa kumyaka yize asakile kumbata ngwenyi: “Myaka kana yapwile nakukuma washi mwomwo ngwazachililenga Yehova mumulimo waupayiniya.”
Enga, noholyapwa jindongi jakumbachila nakusombokela “muli Mwata kaha” japwa jajilemu. Nge namwononoka jindongi kana, kaha namuvumbika Yehova nakusuuluka mukuyoya chenu. Mbimbiliya yamba ngwayo: “Awahilila mutu uze evwa Yehova woma, Uze evwila kuwaha jishimbi jenyi. Muzuvo yenyi muli vikumba naluheto. Kwoloka chenyi nachipwangako haya myaka yosena.” (Samu 112:1, 3) Shikaho fwilenu lika kukavangiza jindongi jaKalunga jakumbachila nakusombokela “muli Mwata kaha.”
