Abaheereza ba Ruhanga abamwe bagambire ebigambo ebyo baaba nibasherura ou baraabe nawe omu bushwere. Kwonka, nibaba nibamanya obuhabuzi obu entumwa Paulo yaahaire, obu Abakristaayo boona baine kugyenderaho oburikworeka ngu baine kushwera nari kushwerwa “omuri Mukama” honka. (1 Kor. 7:39) Mbwenu shi ahabw’enki nibagamba ebigambo ebi?

Abo abarikugamba batyo nibabaasa kuteekateeka ngu ahabw’omubaro gw’ab’eishe-emwe kutingana na banyaanyazi-itwe, nikibagumira kutunga abu barikwenda. Eki nikwo kiri omu mahanga maingi. Teekateeka aha by’okureeberaho bibiri ebi: Omuri Korea, aha Bajurizi ba Yehova 100 abatakagiire mu bushwere, 57 ni banyaanyazi-itwe kandi 43 n’ab’eishe-emwe. Omuri Colombia nikyorekwa ngu Abajurizi ba Yehova 66 ahari igana ni banyaanyazi-itwe, kandi 34 n’ab’eishe-emwe.

Omu bicweka ebimwe, abazaire abatari mu mazima nibabaasa kushaba ebintu by’enjugano bingi, kigumire ab’eishe-emwe abaine entaasya nkye kushwera. Eki nikibaasa kureteera munyaanyazi-itwe kuteekateeka ngu emigisha y’okushwerwa “omuri Mukama” ni mikye. Naabaasa kwebuuza ati: “N’eky’oburyo kuteekateeka ngu nimbaasa kutunga ou ndaabe nawe omu bushwere omu Bakristaayo bagyenzi bangye?” *

Ku oraabe oraagizireho emiteekateekyere nk’egyo, manya ngu Yehova naamanya embeera yaawe. Buzima, naamanya oku orikwehurira omu nshonga egi.—2 Bus. 6:29, 30.

 Kandi Yehova atuhaire Ekigambo kye ekirikutuhabura kushwerwa omuri Mukama honka. Ahabw’enki? Ahabw’okuba naamanya ekirungi aha abantu be. Naayenda kurinda abantu be kwetantara kucwamu kubi bakahikwaho akabi, kandi naayenda ngu bagire n’okushemererwa. Omu bunaku bwa Nehemia, Abayudaaya baingi bakaba nibashwera kandi nibashwerwa abanyamahanga abaabaire batarikuramya Yehova, Nehemia akagamba aha ky’okureeberaho kibi kya Sulemaani. N’obu Sulemaani ‘Ruhanga we yaabaire amukunzire, kwonka nawe abanyamahangakazi bakamusiisisa.’ (Neh. 13:23-26) Ruhanga naaragiira abaheereza be kushwera nari kushwerwa ab’eishe-emwe bagyenzi baabo ahabw’oburungi bwabo. (Zab. 19: 7-10; Isa. 48:17, 18) Abakristaayo ab’amazima nibasiima rukundo ya Ruhanga ahabw’okubafaho n’okubahabura. Ku barikumworobera nk’Omutegyeki waabo, nibooreka ngu niwe ahikire kutegyeka.—Enf. 1:5.

Buzima nooyetantara ‘kutakwatanisibwa’ n’omuntu orikubaasa kukwiha ahari Ruhanga. (2 Kor. 6:14) Obunaku obu, Abakristaayo baingi boorobeire ekiragiro kya Ruhanga ekimazire obwire buraingwa kirikukora kandi bareebire ngu bakozire eky’obwengye. Kwonka abandi bacwiremu ekirikutaana n’ekyo.

Maggy, * Munyaanyazi-itwe kuruga Australia, naashoboorora ekyamuhikireho obu yaatandika kuriima omuntu owaabaire atari mu mazima ati: “Nkaba ninyosha enteerane emirundi mingi kubaasa kuba nawe. Nkagaruka enyima omu by’omwoyo.” Ratana kuruga India akarigira omwe aha boojo abu yaabaire naashoma nabo, omwojo yaatandika kwega Baibuli. Kwonka, bwanyima kikeeyoreka gye ngu ekigyendererwa ky’omwojo ogwo kikaba kiri okuriima Ratana. Ratana akahendera arugire omu mazima yaaza omu diini endiijo ahabw’okwenda kushwerwa.

Ondiijo ni Ndenguè kuruga Cameroon. Akaba aine emyaka 19 obu yaashwerwa. Iba akamuraganisa ngu naija kumwikiriza kuguma omu diini ye. Bwanyima ya saabiiti ibiri baherize kugaitwa, omushaija we akamuzibira kwija omu nteerane z’Ekikristaayo. Naagira ati: “Nkaba nyine eihamba kandi ndikurira butoosha. Nketegyereza ngu tinkibaasa kwetegyeka. Nkaba nyefuuza munonga.”

N’eky’amazima, ti buri muntu otari mu mazima oshweraine n’ogarimu ngu naaba ari enshaarizi nari arikuremera aha nshonga. Kwonka, n’obu waakuba otahikirweho buremeezi nk’obwo waashwerwa otari mu mazima, eki nikikwata kita aha mukago gwawe na Sho ow’omu iguru? Noobaasa kwehurira ota waamanya ngu torikukuratira obuhabuzi obu arikukuha kukugasira? Okukira munonga, naabaasa kwehurira ata ahabw’okucwamu kwawe?—Enf. 1:33.

Ab’eishe-emwe na banyaanyazi-itwe omu nsi yoona nibamanya gye ngu okushwera n’okushwerwa “omuri Mukama” honka n’ekiragiro kirungi. Abo abatakataahire omu bushwere nibamariirira kushemeza Ruhanga barikusherura ow’okushwera nari kushwerwa ori omu mazima. Michiko kuruga Japan akaba ari wenka kandi abanyabuzaare be bakaba nibamugyemesereza kushwerwa otari mu mazima. Kwongyera aha kugyemeserezibwa okwo, akaba areeba bamwe ahari banywani be barikushwerwa omu kibiina. Naagira ati: “Nkaguma ninteekateeka ngu Yehova ni Ruhanga w’okushemererwa, kandi ngu okushemererwa kwaitu tikurikurugiirira aha kushwerwa nari kutashwerwa. Kandi niinyikiriza ngu naatuha ebirungi ebi turikwetenga. N’ahabw’ekyo, twaba tutatungire ow’okuba nawe omu bushwere n’obu turaabe nitwenda kushwerwa, ni kirungi kutegyereza.” (1 Tim. 1:11) Michiko akarugaho yaashwerwa ow’eishe-emwe oine emicwe mirungi kandi hati aine okushemererwa ahabw’okutegyereza.

Ab’eishe-emwe abamwe babaasize kutegyereza kubaasa kutunga ab’okutaaha nabo omu bushwere abu barikwenda. Bill kuruga Australia n’omwe ahari abo. Naagira ngu obumwe akaba arigira abaishiki aheeru y’ekibiina. Kwonka akaba ayegyendesereza munonga kutagira omukago nabo. Ahabw’enki? Akaba atarikwenda kukwatanisibwa n’abatari Bakristaayo. Kumara emyaka mingi, akaba naarigira  banyaanyazi-itwe bakye kwonka bo batarikumukunda. Bill akategyereza kumara emyaka 30 kutunga munyaanyazi-itwe ou arikwikirizana nawe. Bill naagira ati: “Tindikwefuuza.” Naashoboorora ati: “Nkatunga omugisha ahabw’okuba nitugyenda hamwe omu kubuurira, nitwega hamwe kandi turamya hamwe. Nyine okushemerera kuba hamwe na banywani b’omukazi wangye ahabw’okuba nituheereza hamwe Yehova. Nitugyendera aha misingye ya Baibuli kuhamya obushwere bwaitu.”

Noobaasa kukora ki waayesiga obuhabuzi bwa Yehova reero okategyereza kuhitsya obu oraatungye omuntu orikuheereza Yehova? Kimwe eki oine kuteekateekaho n’enshonga ahabw’eki otakataahire omu bushwere. Ku oraabe otakashwirwe ahabw’okworobera ekiragiro eky’okushwerwa “omuri Mukama” honka, noosiimwa ahabw’okukuratira ekiragiro eki. Kimanye ngu Yehova naasiima okumariirira kwawe kworobera Ekigambo kye. (1 Sam. 15:22; Enf. 27:11) Noobaasa kugumizamu noogambira Ruhanga byona kurabira omu kushaba. (Zab. 62:8) Okushaba kwawe nikubaasa kuba okw’omuhendo waamutakira butoosha oyihire aha mutima. Omukago gwawe na Ruhanga nigwija kuguma nigweyongyera kuhama buri izooba n’obu oraabe noogyemeserezibwa. Kimanye ngu ow’Obushoboorozi Bwona naafayo aha baheereza be abeesigwa boona, kandi n’ab’omuhendo omu maisho ge. Naafayo munonga aha byetengo byawe. Tarikuraganisa muntu weena kumuha ow’okushwera nari kushwerwa. Kwonka, ku oraabe nooyenda kushwerwa, Ruhanga naamanya omuringo murungi ogw’okutungamu eki orikwenda.—Zab. 145:16; Mat. 6:32.

Obumwe noobaasa kwehurira nk’omuhandiki wa Zaaburi Daudi, owaagizire ati: “Rahuka kungarukamu ai MUKAMA; omwoyo gwangye nigugwa enshazi; Otaanyima amaisho.” (Zab. 143:5-7, 10) Omu bwire nk’obwo, ikiriza Sho ow’omu iguru kukworeka ekigyendererwa kye ahabwawe. Eki noobaasa kukikora orikushoma Ekigambo kye kandi okateekateeka munonga aha bi orikushoma. Noija kwetegyereza ebiragiro bye kandi oreebe oku yaahwereire abaheereza be aba ira. Waamuhurikiza noija kuba waayongyera kugira obwesigye bw’okumworobera.

Niki ekindi ekirikubaasa kukureetera kushemererwa n’okuba ow’omugasho waaba okiri wenka? Noobaasa kukoresa obwire bwawe okiri wenka kugira okwetegyereza, okuba efura, okukora n’amaani, okworeka oburungi bwawe, okuhamira ahari Ruhanga, n’okugira eiziina rirungi, emitwarize mikuru erikureeta okushemererwa omu bushwere. (Kut. 24:16-21; Rus. 1:16, 17; 2:6, 7, 11; Enf. 31:10-27) Yebeembeze okusherura Obukama orikwejumbira kimwe omu murimo gw’okubuurira n’emirimo endiijo ey’Ekikristaayo, kandi waakora otyo nikiija kuba eky’oburinzi ahariiwe. Bill, owaaba yaagambirweho, naagaamba aha bwire obu yaabaire atakashwaire ati: “Obwire obwo bukarahuka kuhwa! Obwire obwo nkabukoresa kuheereza Yehova nka payoniya.”

Buzima okushwerwa “omuri Mukama” honka nikikikora. Okworobera obuhabuzi obu nikibaasa kukuhwera kuha Yehova ekitiinisa n’okutunga okumarwa okw’obutwire. Baibuli neegira eti: “Aine omugisha omuntu orikutiina MUKAMA, akashemerererwa munonga ebiragiro bye. Eitungo n’obutungi biryaba omu nju ye; kandi okuhikiirira kwe kuryaba okw’ebiro n’ebiro.” (Zab. 112:1, 3) N’ahabw’ekyo, teeraho munonga kworobera ekiragiro kushwerwa “omuri Mukama” honka.