Ontan so ibabaga na arum ya lingkor na Dios nipaakar ed pananap na asawa. Balet amta ra so bilin nen apostol Pablo ya miasawa “dia labat ed Katawan”—ganggan itan ya kaukolan ya unoren na amin a Kristiano. (1 Cor. 7:39) Anto sirin so rason no akin ya ontan nin siansiay ibabaga na arum?

Iisipen na saray mangibabaga na ontan ya mas dakel so single ya sister nen saray single ya brother. Talagan ontan so situasyon diad dakel a bansa. Singa bilang, diad Korea, 57 porsiento so single ya sister, tan 43 porsiento so single ya brother. Diad Colombia, 66 porsiento so sister tan 34 porsiento so brother.

Diad arum a bansa, saray atateng ya aliwan Tasi et nayarin onkerew na baleg ya dasel odino kuarta. Ag-itan nasarag ya iter na arum ya brother. Bilang resulta, isipen na saray sister ya melag so tsansa dan makalmoy kapareha “dia labat ed Katawan.” Kanian nayarin nitepet da, “Kasin realistiko ni piasawa ed kaparan Kristiano?” *

No bilang ontan met so iisipen mo, makaseguro kan natatalosan nen Jehova so situasyon mo. On, amta toy naliliknam.—2 Awa. 6:29, 30.

Balet, igaganggan itayo nen Jehova ya miasawa “dia labat ed Katawan.” Akin? Lapud amta to no antoy maong parad saray lingkor to. Labay ton magmaliw tayon maliket tan agto labay ya nasakitan  tayo lapud makapuy ya desisyon. Nen panaon nen Nehemias, dakel ya Judio so angasawa na dayon bibii ya agmandadayew ed si Jehova. Kanian impanonot nen Nehemias ed sikara so mauges ya alimbawa nen Solomon. Anggaman si Solomon et ‘inaro na Dios, sikatoy nankasalanan lapud saray sangkailin bibii’ ya nagmaliw ya asawa to. (Neh. 13:23-26) On, igaganggan na Dios iray lingkor to natan ya miasawa labat ed kapara dan Kristiano ta amta ton parad pankaabigan tayo itan. (Sal. 19:7-10; Isa. 48:17, 18) Misalsalamat itayo ya iikdan itayo nen Jehova na maaro tan napanmatalkan ya simbawa. No sikatoy unoren tayo bilang Manuley, bibidbiren tayon sikato so Soberano ed Uniberso.—Uli. 1:5.

Seguradon agmo labay so ‘mikasakey’ ed toon iyarawi to ka ed Dios. (2 Cor. 6:14) Dakel ya Kristiano natan so tinmulok ed maaron panangigiya na Dios tan apaneknekan dan makabat so nagmaliw ya desisyon da. Balet wala ra met so ag-inmunor.

Si Maggy, * ya sister ed Australia, et akiinaroan ed agmananisia. Oniay imbaga to: “Dakel so agko inatendian ya aral pian labat nakaibak. Talagan kinmapuy so espiritualidad ko.” Ontan met so agawad si Ratana ya tagad India. Sikatoy akiinaroan ed kaklase to ya manaaral ni labat na Biblia. Balet pinmaway lanlamang so tuan motibo na kaklase to, ya manaaral labat pian makapiinaroan ed sikato. Tinaynan nen Ratana so katuaan tan nansalat na relihyon pian nikasal ira.

Say sakey nin alimbawa et si Ndenguè ya tagad Cameroon. Akiasawa nen 19 años to. Impormisa na nobyo to ya agto sebelan ed relihyon to. Balet duay simba kayari bansal da, sinebelan to lan miaral. Imbaga nen Ndenguè: “Agaylay ermen ko tan lanang ak ya onaakis. Kokontrolen to lay bilay ko. Talagan pagbabawian koy ginawak.”

Tua, wala ray agmananisian asawa ya maong met tan makatunongan. Balet anggano agka sebelan na asawam ed panagdayew mod si Jehova, antoy epekto na desisyon mo ed relasyon mod Amam ed tawen? Antoy naliknam ya ginagalam ya agdengelen so bilin to ya parad pankaabigan mo? Tan say importante ed amin, anto kasi nalilikna to ed ginawam?—Uli. 1:33.

Apaneknekan na agagid interon mundo ya say piasawa “dia labat ed Katawan” so sankaabigan ya gawaen. Saray single ya determinadon mamaliket ed puso na Dios et miasawa dia labat ed kapara dan manlilingkor ed sikato. Si Michiko ya tagad Japan et kokombinsien na saray kakanayon to ya miasawad aliwan Tasi. Sakey ni, saray kakaaro to et akalmo lay kapareha diad kongregasyon, sikato balet et anggapo ni. Imbaga to: “Lanang kon ipapanonot ed sarilik ya si Jehova et ‘maliket a Dios,’ kanian say liket et ag-akadepende ed piasawa odino andi. Manisia ak met ya iter toy pilalek na puso tayo. Kanian no agtayo makalmoy kapareha anggano labay tayoy miasawa, sankaabigan so pansiansian single legan tayon manaalagar.” (1 Tim. 1:11) Kalabas na panaon, akapiasawa si Michiko ed maomaong ya brother, tan maliket lapud sikatoy nanalagar.

Wala ra met so brother ya nanalagar pian makalmoy kapareha ya dugarugad sikara. Say sakey ya alimbawa et si Bill ya tagad Australia. Inamin to ya wala ray agustoan ton aliwan Tasi. Balet agton balot inyapit so liknaan tod sikara. Akin? Agto labay ya nawalaay relasyon ya manresultad ‘pikasakey’ ed agmananisia. Wala ra met so agustoan ton sister, balet agda labay. Nanalagar si Bill na 30 taon antis ya akalmoy sister ya parad sikato. Imbaga to: “Anggapoy pagbabawian ko. Bendisyon ed siak so saniban pampupulong, panaaral, tan pandadayew mi. Malikeliket ak ya nakabat tan nakaiba iray kakaaro nen asawak ta amin da et mandadayew ed si Jehova. Iyaaplika mid relasyon mi iray prinsipyo na Biblia.”

Antoy gawaen mo legan mon aalagaren so ebat nen Jehova? Say sakey ya nagawaan mo et nonot mo no akin ya single ka ni. No say manunan rason et lapud uunoren mo so ganggan na Biblia ya miasawa “dia labat ed Katawan,” nakomendaan ka. Seguradon napapaliket moy Jehova lapud determinado kan unoren so Salita to. (1 Sam. 15:22; Uli. 27:11) Itultuloy mon ibalikas ed si Jehova no antoy walad pusom. (Sal. 62:8) Onelet lan onelet so relasyon mod sikato no mansiansia kan matoor anggano wala ray desdes tan lalabanan moy mauges iran pilalek. Makapanmatalek ka ya interesado so Sankatagyan ed amin ya matoor a lingkor to tan mabmabli rad sikato. Amta to ray pankaukolan tan pilalek mo. Tua, agto isisipan ya ikdan to na kapareha so balang sakey. Balet no talagan kaukolan mo so kapareha ed bilay, amta na Dios so sankaabigan ya paraan pian napenek so dugan pilalek mo.—Sal. 145:16; Mat. 6:32.

No maminsan ompan say liknaan mo et singa met ed si David nen imbaga ton: “Denglen mo ak a tampol, O Jehova, say espirituk onkakapuy. Agmo isanib so lupam ed siak.” (Sal. 143:5-7, 10) No ontan so naliliknam, ikdan moy Aman Jehova na panaon pian ipanengneng tod sika no antoy linawa to parad sika. Nagawaan mo itan diad pangiyeskedyul moy panaon parad pambasay Salita to tan pandalepdep ed satan. Naamtaan mo no anto ray ganggan to tan nanengneng mo no panon ton tinulongan iray lingkor to nensaman. Diad idengel mod sikato, mas ombiskeg so talek mo ya sankaabigan so pangunor ed sikato.

Anto ni nagawaan mo pian maliket tan mabunga iray taon ya single ka? Gawam so anggaay nayarian mo pian ombiskeg so relasyon mod si Jehova tan pian nawalaan kay maong ya reputasyon. Aral moy magmaliw ya maiter, makuli, mainomay ya pibagayan, tan matoor. Kaukolan irayan kualidad pian maliket so relasyon na sanasawa. (Gen. 24:16-21; Rut 1:16, 17; 2:6, 7, 11; Uli. 31:10-27) Iyunam so Panarian diad sigpot ya pibiang ed panagpulong tan arum nin Kristianon aktibidad; proteksion itan ed sika. Si Bill, ya abitla nen niman et oniay imbaga to nipaakar ed saray taon ya sikatoy single: “Agangganon linmabas iratan! Inusar ko ‘tan ya panaon pian makapanlingkor ed si Jehova bilang payunir.”

On, realistiko nin siansia so piasawa “dia labat ed Katawan.” No unoren mo itan ya ganggan, igagalang moy Jehova tan magmaliw kan maliket. Ibabaga na Biblia: “Mapalar [“Maliket,” NW] so too ya antakot to si Jehova, a maliket a tuloy ed saray ganggan to. Say kayarian tan kayamanan manayam ira ed abung to; tan say inkatunong to manando lawas.” (Sal. 112:1, 3) Kanian komon et determinado kan unoren so ganggan na Dios ya miasawa “dia labat ed Katawan.”