Huaquin soltero huauquipanicunapashmi shinallata yashca. Paicunaca alimi yachan, Jehová Diosca paita sirvijcunataca ‘Jesuspi crijcunahuanlla’ cazarachun munashcata. Shinaca bautizarishca huarmihuanlla o jarihuanllami cazarana can (1 Cor. 7:39). Shinaca ¿imamandata huaquingunaca chai consejota na cazungapaj munan?

Huaquingunaca yanmi, Jehovata sirvij solterocunapurapica huarmicunami ashtahuan yali tian nishpa. Ashtaca llactacunapica chaica ciertomi can. Corea llactapica, 100 soltero Testigocunamandaca 57ca huarmicuna, 43ca jaricunami can. Colombia llactapica, 100 soltero Testigocunamandaca 66ca huarmicuna, 34ca jaricunami can.

Huaquin llactacunapica, cazaragrijushpaca novioca ashtaca culquita o valishca cosascunata noviapa taitamamaman cuna costumbremi tian. Shinapash, ashtaca soltero huauquicunaca minishtirishca cosascunahuanlla causashpami chai costumbretaca na cati ushan. Chaimandami, shuj panigupa taitamama na Testigo cashpaca chai costumbreta pactachichun munan. Shina cashcamandami, ashtaca panicunapaca ‘Jesuspi crijcunahuanlla’ cazaraichi nishpa mandashcata pactachinaca shinlli ricurin. *

Ima horapash shina sintirishca cashpaca, Jehová Dios quiquin imashina sintirijta yachashpa, intindijtami yarina cangui (2 Crón. 6:29, 30).

Jehová Diosca ñucanchicunapa ima ali cashcata yachashpami, ‘Jesuspi crijcunahuanlla’ cazarachun  mandan. Paica ñucanchicuna cushilla causachunmi munan. Llaquicunapi urmachunga na munanllu. Nehemiaspa punllacunapica, ashtaca judiocunaca Jehovata na sirvij huarmicunahuanmi cazararca. Chaimandami, Nehemiasca chai judiocunata ayudangapaj munashpa rey Salomón ima pasashcata yarichingapaj cashna nirca: Jehová Dios Salomonda juyajpipash, ‘shuj llactamanda huarmicunami paitaca juchata rurachirca’ nishpa (Neh. 13:23-26). Jehová Diosca ali causachun munashpami, paita sirvijpuralla cazarachun mandan (Sal. 19:7-10; Is. 48:17, 18). ¿Nachu Jehová ñucanchita juyaimanda consejajpica ninanda agradicinchi? Cazushpami Jehová Dioslla ñucanchipa ima ali cashcata, ima nali cashcata nina derechota charishcata ricuchinchi (Prov. 1:5).

“Na crijcunahuanga, na yugurinshna tandanajunachu canguichi” nishpaca, Jehovata na sirvijcunahuan na cazaranatami nijun. Cai mandashcata na cazushpaca Jehovamanda caruyanguimi (2 Cor. 6:14). Yaripai, Jehovapa consejocunaca ñucanchipallata alimi can. Chaimandami ashtaca huauquipanicunaca Jehovapa consejota cazushpa cazarashca. Cutin shujcunaca na cazushcachu. Na cazuimandaca ¿imata pasashca?

Australia llactamanda Maggy shuti paniguca, na Testigo jovenhuan puri callarishcamanda parlashpami cashna nirca: “Paihuan canamandallami huaquin tandanajuicunaman na rin carcani. Shinami Jehovamanda caruyai callarircani” nishpa. * India llactamanda Alisha shuti paniguca, colegiopi shuj cumbahuanmi puri callarirca. Chai jovenga Alishahuan purinamandallami Bibliata yachajui callarirca. Jipamanga chai jovenhuan cazarangapami, Alishaca Jehovata saquishpa shuj religionman tigrarca.

Camerún llactamanda Pauline shuti paniguca, 19 huatacunata charishpami na Testigo jarihuan cazararca. Nara cazarashpaca, chai jarica Testigo catichunga na jarcashachu nircami. Shinapash, cazarashcamanda ishcai semana jipallami tandanajuiman ñana richun saquirca. Paulineca ninmi: Ñucalla sintirishpami huacashpalla yalin carcani. Ñuca causaipi ña imatapash na rurai ushashpami ninanda nali sintirin carcani” nishpa.

Huaquinbica cashnachari pensaringui: “Huaquingunaca na Testigocunahuan cazarashpapash alimi causan” nishpa. Huaquinbica ciertomi ali causai ushashca. Shinapash, na Testigohuan cazarajpica ¿nacha Jehovamanda caruyachinga? Jehovapa consejota na cazushcata yarishpaca ¿imashinashi sintiringui? Quiquin na cazujpica ¿imashinashi Jehová Diosca sintiringa? (Prov. 1:33.)

Mundo enteropi huauquipanicunaca, ‘Jesuspi crijcunahuanlla’ cazarachun mandashcata pactachina ali cashcatami yachan. Chaimandami, ashtaca soltero huauquipanicunaca Jehovata cushichingapaj munashpa Testigo cusata, huarmita mascan. Japón llactamanda Keiko shuti panigu imata rurashcata ricushun. Paipa familiaca Jehovata na sirvij jarihuan cazarachunmi munarca. Ashtahuanbash chai tiempopica, paipa huaquin amigacunaca Testigocunahuanmi cazaranajurca. Cutin Keiko paniguca solterami quedajurca. ¿Imatata chai paniguca rurarca? Paica ninmi: “Cutin cutinmi yarin carcani, cushilla causangapaca cazaranallaca na minishtirinllu. ‘Cushichij Jehovata’ sirvinami ashtahuanbachaca minishtirin” nishpa (1 Tim. 1:11, NM). Shinallata ninmi: “Jehová Diosca ñucanchicuna imata minishtijujta caraj Dios cashcataca alimi yachani. Chaimandami cazarangapaj munajushpapash, Jehovata sirvijpurapi nara tarishpaca soltero o soltera catina ali can” nishpa. Cunanbica Keiko paniguca shuj ali huauquihuanmi cazarashca can. Jehovapa consejota cazushcamandaca ninandami cushijun.

Shuj huauquipanicunapash Jehovata sirvij cusata o huarmita taringacamanmi shuyashca. Australiamanda Bill shuti huauquica ninmi, huaquinbica na Testigo huarmicunata alicachinmi carcani. Shinapash, “na crijcunahuanga, na yugurinshna tandanajunachu canguichi” nishca consejota yaipi charishpami, paicunahuan ama yapata yalingapaj cuidadota charin carcani nishpa. Huatacuna yalijpica, chai huauquica shuj shuj panigucunatami ricui callarirca. Shinapash chai panigucunaca  paitaca na nircami. Chai huauquica 30 huatacuna jipami paihuan igual metacunata charij paniguhuan cazararca. ¿Imashinata cunanbica sintirin? Paica ninmi: “Cazarangapaj ashtaca huatacunata shuyashcamandaca na arripintirinichu. Ñuca huarmihuan Bibliamanda yachajunata, shujcunaman villachinata, igual Jehovata sirvinataca ninandami gushtani. Ashtahuanbash, ñuca huarmipa rijsicunapash Jehovata sirvinajushcamandaca ñucapa amigocunami can. Imapash problema ricurijpica, ishcandillatami Bibliapi mandashcata pactachinata yanchi” nishpa.

‘Jesuspi crijcunahuanlla’ cazarana mandashcata cazuimanda nara cazarashpaca Testigo cusata, huarmita taringacamanga ¿imatata rurai ushangui? Jehovata cazushcamanda paita cushichijushcatami yarina cangui (1 Sam. 15:22; Prov. 27:11). Ashtahuanbash, Jehovata mañashpa quiquin imashina sintirishcata nipangui (Sal. 62:8). Cai mundopa nali yuyaicuna, munaicuna na mishachun saquishpaca Jehovahuanmi ashtahuan ali cangui. Shinallata, Jehová Diosca quiquin ima minishtishcata, imashina sintirishcataca alimi yachan. Paipaca ninan valishcami cangui. Chaitaca na cunganachu cangui. Shinapash, cazaranatapacha munajushpaca ¿imatata rurana cangui? Jehová Diosca pimanbash shuj cusata o huarmita cushapachami nishpaca na ninllu. Shinapash, quiquin cushilla cachun imashina ayudanataca paica alimi yachan (Sal. 145:16; Mat. 6:32).

Huaquinbica rey David shinachari sintiringui. Paica nircami: “Mandaj Dioslla, ñuca mañajujta ucha tigrachihuayari. Ñuca espirituca, ñamari huañugrijunshna tucujun. Ama cambaj ñavita shujman churapaichu” nishpa (Sal. 143:5-7, 10). Shina sintirijushpaca, pacienciahuanmi Jehová Dios ayudachun shuyana cangui. Shinallata Bibliata liishpa, liishcapi aligutami pensarina cangui. Shinami, punda tiempopi sirvijcunata Jehová imashina cuidashcata, Jehová Dios quiquin imata rurachun munashcatapash intindingui. Ashtahuanbash Jehovapi confiashpa, cazushpa catichunmi ayudanga.

Cushilla cachunga ¿imata ashtahuan ayudanga? Jehovata ashtahuan rijsingapaj, tucuicunapa ñaupajpi ali cangapami esforzarina cangui. Shinallata tucuicunahuan ali llevarishpa, picuna imata minishtijujpipash ayudashpa, shinllita trabajashpami catina cangui. Shina rurashpami cazarashpaca cushilla causangui (Gén. 24:16-21; Rut 1:16, 17; 2:6, 7, 11; Prov. 31:10-27). Jehovapa Reinota pundapi churashpa cati. Chaipaca villachishpa, congregacionbi ayudashpami ocupada cana cangui. Shinami ali decisiongunata agllashpa Jehovahuan ali cangui. Bill shuti huauquita yaripashun. Paica soltero cashca tiempota yarishpaca ninmi: “Precursor shina sirvijuimandaca huatacunaca jaicatami yalirca” nishpa.

Imashinami ricunchi, ‘Jesuspi crijcunahuanlla’ cazaraichi nishpa mandashcataca pactachi usharinmi. Cai mandashcata pactachishpaca Jehovatapash jatunyachishpami cushilla causangui. Bibliapica ninmi: “Mandaj Diosta manllaj runaca, ninandami cushijun. Dios mandashcacunahuanmi, ninandapacha cushijun. Paipaj huasipica, juyailla ashtaca charishcacunami tian. Imatapash cashcatapacha pai rurashcapash, causaita causaicamanmi” can nishpa (Sal. 112:1, 3). Shinaca, ‘Jesuspi crijcunahuanlla’ cazaraichi nishpa mandashcata pactachinataca na cunganachu cangui.