Ŵakutumicila ŵane ŵa Mlungu aŵecetepo maloŵe mpela gelega pakusosasosa mundu jwakuti alombane najo. Nambope jemanjaji akusamanyilila cenene yaŵaŵecete Paulo yakusosekwa Aklistu wosope kuyikuya yakuti alombeleje kapena alombedweje “mwa Ambuje.” (1 Akoli. 7:39, NW.) Sano, ligongo cici jemanjaji akusaŵeceta yeleyi?

Ŵandu ŵakusaŵeceta yeleyi akusayiwona kuti alongo apali ŵajinji kulekangana ni abale. M’yilambo yejinji yeleyi yili yisyene. Mwambone, ku Korea, pa Mboni 100 syanganisiŵa paulombela, pana alongo 57, abale 43. Ku Colombia, pa Mboni 100 silisyose pana alongo 66, abale 34.

M’yilambo yine, cakusawusya cili cakuti alongo ŵakwete acinangolo ŵangakulupilila, acinangolowo akusasaka mbiya syejinji sya malowolo, ni yeleyi yikusalepelekasya abale ŵanganakola yindu yejinji kuti alombele. Paganicisya yeleyi, mlongo mpaka ayiwone kuti upile wakuti alombedwe “mwa Ambuje” mpaka uwe wakusawusya. M’yoyo, jwalakwe mpaka aliwusye kuti, “Ana yili yakomboleka kupata jwakulombana najo jwakuŵajilwa pasikati pa Aklistu?” *

Naga akwete nganisyo mpela syelesyo, akulupilile kuti Yehofa akumanyilila cenene yeleyo. Jwalakwe akusamanyilila cenene mwakupikanila mumtima mwawo pangani jeleji.—2 Mbiri 6:29, 30.

Nambope, Yehofa kupitila m’Maloŵe gakwe apelece lilamusi lyakuti tulombeleje kapena tulombedweje  mwa Ambuje. Ligongo cici? Ligongo lyakuti jwalakwe akusamanyilila yindu yambone yampaka yakamucisye ŵandu ŵakwe. Jwalakwe akusasaka kwacenjela ŵandu ŵakwe ku yakuyicisya yakwika ligongo lyakutenda yindu mwangali lunda, nambosoni akusasaka kuti ŵandu ŵakwewo aŵeje ŵakusangalala. M’moŵa ga Nehemiya, Ayuda ŵajinji ŵalombanaga ni ŵandu ŵacikusa ŵangamlambila Yehofa. M’yoyo, pakusaka kwakamucisya jemanjajo, Nehemiya ŵakamulicisye masengo cisyasyo cakusakala ca Solomoni. Atamose kuti ‘Mlungu ŵamnonyelaga’ Solomoni, ‘nambo acakongwe ŵacikusa ŵamlemwecekasisye.’ (Neh. 13:23-26) Pakusaka kuti yindu yajendeleje cenene ŵakutumicila ŵakwe, Mlungu atupele lilamusi lyakuti tulombaneje ni ŵakulambila ŵasyesyene. (Sal. 19:7-10; Yes. 48:17, 18) Aklistu ŵasyesyene akusayamicila cinonyelo ca Mlungu, soni akusakuya malamusi gakwe. Naga akutenda yeleyo, akusalosya kuti akusampikanila Jwakulamula Jwamaciligose.—Miy. 1:5.

Mwangakayicila wawojo ngakusaka ‘kamulana ni ŵandu ŵangakulupilila’ ŵampaka asokonasye unasi wawo ni Mlungu. (2 Akoli. 6:14) Aklistu ŵajinji moŵa agano akupikanila lilamusi lya Mlungu lyakutucenjelali, soni akumanyilila kuti asagwile litala lyambone mnope. Nambope, ŵane nganasagula cenene.

Mlongo jwine jwa ku Australia lina lyakwe Maggy, * akusala yayamtendecele ali atandite uganja ni mundu jwangakulupilila. Jwalakwe ŵatite, “Ndaŵi syejinji nganinjawulaga ku misongano pakusaka kunguluka najo. Usimu wangu watulwice mnope.” Mlongo jwinesoni jwa ku India, lina lyakwe Ratana, jwatandite kunonyelana mnope ni mnyamata jwa m’kalasi mwakwe juŵatandite kulijiganya Baibulo. Nambope, mkupita kwandaŵi mnyamatajo ŵatandite kulosya kuti cakulinga cakwe pakulijiganya Baibulo caliji cakuti atande uganja ni Ratana. Pambesi pakwe, Ratana ŵalesile usyesyene ni ŵajinjile dini jine kuti alombedwe ni mnyamatajo.

Cisyasyo cine cili ca mlongo jwine jwa ku Cameroon, lina lyakwe Ndenguè. Jwalakwe ŵalombedwe ali akwete yaka 19. Mkanalombane, mnyamata juŵamlombilejo ŵasalaga kuti ngasamlekasya kwawula ku dini jakwe. Nambo pali pagambile kumala yijuma yiŵili cilombanile, mnyamata jula ŵatandite kumlekasya Ndenguè kwawula ku misongano ja Ciklistu. Jwalakwe ŵatite, “Lipoo lyangamulaga, soni nalilaga. Nayimanyi kuti yindu nganiyiŵa cenene pa umi wangu. Natandite kulijimba magambo.”

Yili yakuwona kuti ngaŵa kuti ŵangakulupilila wosope akusaŵa ŵangalwe. Atamose kuti ŵane ngakusasimana ni yakusawusya ligongo lyakulombana ni mundu jwangakulupilila, nambope ŵaŵatesile yeleyi akusosekwa kuliwusya kuti, ‘Ana yeleyi yikwayiye catuli unasi wangu ni Atati ŵakwinani? Ana ngupikana wuli pakumanyilila kuti nganimbikanila lilamusi lyaŵapelece Mlungu ni cakulinga cakuti yindu yinjendeleje cenene?’ Kupunda yosope, akusosekwa kuliwusya kuti, ‘Ana Mlungu akupikana wuli ni yanasagwileyi?’—Miy. 1:33.

Abale ni alongo kusyungulila pacilambo cosope mpaka ajiticisye kuti kulombela kapena kulombedwa “mwa Ambuje” kuli kwambone mnope. Aklistu ŵanganaŵa paulombela, ali ŵakusimicisya kumsangalasya Mlungu mwakusagula ŵakulombana nawo ŵakuŵajilwa pasikati pa ŵakulambila acimjawo. Michiko jwa ku Japan, mkanalombedwe ŵacinasi ŵakwe ŵamkanganicisyaga kuti alombedwe ni mundu jwangakulupilila. Konjecesya pelepa, jwalakwe yampwetekaga mnope pakwawona acimjakwe ali mkupata ŵakulombana nawo mumpingo wa Ciklistu. Jwalakwe ŵatite, “Nalisalilaga kuti pakuŵa Yehofa ali ‘Mlungu jwakusangalala,’ m’wejisoni mpaka tuŵe ŵakusangalala mwangajigalila kuti tuli paulombela kapena iyayi. Ngusakulupililasoni kuti Mlungu akusatupa yakusaka ya mitima jetu. M’yoyo, naga ngatukumpata jwakulombana najo atamose kuti tukusaka kulombedwa, mpaka tugambe kutama kaje mwatuŵelelemo.” (1 Tim. 1:11) Mkupita kwandaŵi, Michiko ŵalombedwe ni m’bale jwambone, soni ali jwakusangalala ligongo nganawutucila kulombedwa.

Abale ŵanesoni ŵangawutucila kulombela mpaka ali ampatile jwamkongwe jwakuŵajilwa. Jumo mwa abale ŵeleŵa ali Bill jwa ku Australia. Jwalakwe ŵajiticisye kuti ndaŵi sine ŵasakaga acakongwe ŵacikusa. Nambope jwalakwe ŵaŵambalaga kusyoŵekana mnope ni jemanjajo. Ligongo cici ŵatendaga yeleyo? Jwalakwe nganasakaga kutenda yindu yayikamtendekasisye ‘kamulana’ ni ŵandu ŵangakulupilila. Kwa yaka yejinji, jwalakwe ŵanonyelaga alongo ŵane,  nambo nganampata jwakuŵajilwa kulombana najo. Bill ŵatemi yaka 30 mkanampate mlongo jwakuŵajilwa kulombana najo. Jwalakwe ŵatite, “Ngangusaligamba. Ngusaliwona kuti Mlungu ŵambele majali, ligongo ngusajinjila mu undumetume yimpepe ni ŵamkwangu, kulijiganya pampepe, soni kulambila pampepe. Ngusasangalala kunguluka ni acimjawo ŵa ŵamkwangu ligongo nombenawo ali ŵakulambila ŵa Yehofa. Tukusakamulicisya masengo maloŵe ga m’Baibulo mu ulombela wetu.”

Ana akusosekwa kutendaga cici pajilesile nganiji m’miyala mwa Yehofa? Cindu cimo cili kuganicisya yayikwatendekasya kuti akaŵa paulombela mpaka ndaŵi ajino. Naga nganaŵa paulombela ligongo lyakuya yajikusasala Baibulo yakuti alombele kapena alombedwe “mwa Ambuje,” tukwayamicila mnope ligongo lyakucimbicisya lilamusi lya Mlungu lyeleli. Tukwasimicisya kuti Yehofa akusangalala ligongo wawojo akupikanila Maloŵe gakwe. (1 Sam. 15:22; Miy. 27:11) Ajendelecele ‘kumkusulila ya mumtima mwawo’ Mlungu kupitila mwipopelo. (Sal. 62:8) Lipopelo lyawo mpaka liŵe lyakamucisya naga akusam’ŵenda Mlungu ni mtima wosope soni mwangalecesya. Unasi wawo ni Mlungu ucilimba naga akwendelecela kuŵa ŵakulupicika atamose pakusimana ni yakulingwa. Akaliŵalila kuti Yehofa akusasamala jwakutumicila jwakwe jwalijose jwakulupicika, soni kuti akusiŵawona wawojo kuti ali ŵapenani. Jwalakwe akusiŵapa yakusosecela pa umi wawo, soni akusakwanilisya yakusaka yawo. Nambo jwalakwe ŵangapatila ŵandu ŵakulombana nawo. Nambope, naga akusaka jwakulombana najo, Mlungu akusamanyilila litala lyambone lyakwanilicisya yakulinga yawo.—Sal. 145:16; Mat. 6:32.

Ndaŵi sine mpaka apikane muŵapikanile jwamalumbo Daudi juŵaŵecete kuti, “Anjanje mwacitema wawo Yehofa. Macili gangu gamalile. Akasisila ngope jawo.” (Sal. 143:5-7, 10) Pandaŵi mpela jeleji, akusosekwa kwapa lipesa Atati ŵawo ŵakwinani kuti ŵalosye wawojo yakusaka kwatendela. Mpaka atende yeleyi pakuŵalanga Maloŵe gakwe ni kuyiganicisya mwakusokoka yaŵalasileyo. Naga akutenda yeleyo cacimanyilila malamusi gakwe, soni cacilola mwaŵatendelaga Mlungu pakwakamucisya ŵandu ŵakwe ŵakala. Kumpikanila jwalakwe kucakamucisya kumkulupilila mnope.

Ana cinesoni cici campaka cakamucisye kuŵa ŵakusangalala pandaŵi janganaŵa paulombela? Mpaka akamulicisye masengo ndaŵi jeleji pakutenda yakwakamucisya kuti aŵe ŵakomangala mwausimu, kuŵa ŵakoloŵa makono, ŵamtawu, ŵakungulucika, ŵakulipeleka kwa Mlungu, soni ndamo sine syambone. Yeleyi yicakamucisya kola liŵasa lyakusangalala. (Gen. 24:16-21; Rute 1:16, 17; 2:6, 7, 11; Miy. 31:10-27) Asosesoseje candanda Ucimwene mwakamula nawo masengo gakulalicila mwamtawu, soni kutendaga masengo gane ga m’likuga, kutenda yeleyi kucacenjela. Bill, jwatumsasile pandanda jula, ŵaŵecete pakwamba ya yaŵatendega pandaŵi jaŵaliji mkanalombele. Jwalakwe ŵatite, “Yakayo yamasile mwacitema. Nakamulicisyaga masengo ndaŵijo pakutumicila Yehofa mpela mpayiniya.”

Kusala yisyene, lilamusi lyakuti tulombeleje kapena tulombedweje “mwa Ambuje” likamulape masengo. Kupikanila lilamusili mpaka kwakamucisye kuti amcimbicisyeje Yehofa soni kupata cisangalalo cangamala. Baibulo jikusasala kuti, “Jwakusangalala ali mundu jwakusamjogopa Yehofa, jwakusasangalala ni malamusi gakwe. Yindu yapenani soni cipanje yili m’nyumba jakwe, soni cilungamo cakwe ngasicimala mpaka kalakala.” (Sal. 112:1, 3) M’yoyo, aŵe ŵakusimicisya kuya lilamusi lya Mlungu lyakuti tulombeleje kapena tulombedweje “mwa Ambuje.”