Kura ga Mbori amoyambu aima pepai wa gure nibipa gbia badiarogatise. Wa vura duhe wo, agu arugute Pauro afuhe nga rogotise du “kina rogo Gbia yo” nga gu rugute si aida aKristano dunduko mangisunge na ni. (1 Kor. 7:39) Tipagine tie, i agumba gi ngbatunga afugo re ti ni?

Agu aboro nagumba agi apai re nabihe nga ngenga agu awirina nga akumba rengbe ka manga rogotise te. Rogo dungu aringara, gere nga gupai namanga. Oni bingo agi akpiapai du ue re: Korea yo, ka agu awirina ata manganga rogotise ya du wa 100, aguyo nga adee nadu 57 na akumba ki du nga 43. Tingidapai Colombia yo aya 66 rii kama nga ga agu aDezire Yekova du yo nga adee na akumba gbua nga 34.

Rogo gu kura aringara, kpakarapai nga, agu awirina adunga avunguyo ni aidipase ya nageda marã tipa yo ni bakerehe, na si kini saha ni kpakarapai fu agu awirina adunga na gene beyo ya tipa i rogoyo. Ho gu wirina nga dee aberã ni kurii gipai re, ni nabihe nga si taata ka manga rogatise “rogo Gbia yo” te. Ni ima rengba ka sana tini nga, “Ya mo rẽarẽ ka berã nga mi agbia kumba dagba aKristano?” *

Ka si du nga mo aima berã ngbatungapai wa gure, mo du na kido nga Yekova ima ino gupai du tipa ro. Nirengo, ko ima ino wai gupai re afuda ro.—2 Peka 6:29, 30.

Wa vura duhe wo, Yekova ima fu arugute rogo Fugoko tipa wai ka manga rogotise kina rogo  Gbia yo. Tipagine? Bambiko ko ima ino gupai du ni wenehe tipa gako aboro. Yekova naida ka banda gako amoyambu be gu gbegberẽpai rengbe ka ye be manga iraira diaberã, na ko naida i du na ngbarago. Ho dungu aYudo aaroga agu adee ni naairisongo Yekova ya ti regbo Nemaya, ko afura tipa gu gbegberẽ kpiapai nangia ga Soromo. Wa si avura du nga ga Soromo Mbori “akpi nyemu ko gbe, . . . kungba ade anangi ko ko ki ingi pai.” (Nem. 13:23-26) Mbori naida gako amoyambu mangi rogotise na kina agu aboro nga ndikidi airisiko na gipai re tipa ka undo yo. (Tam. 19:7-10; Yes. 48:17, 18) Ndikidi aKristano na bakere tambuahe tipa wai Mbori angerafuo yo na i nakido kuti gako arugute. Ho i ara ni nigoyo fuko ni gayo Bazogo, i nabiko ni Bakindo Zegino dunduko.—Snz. 1:5.

Nirengo, mo aidanga ka “kpamia” tiro na gu boro rengbe ka turuso ro ti Mbori te. (2 Kor. 6:14) Dungu aKristano areme ima giasangba Mbori na ki bihe nga si ni patatamana ka mangapai kuti gako arugute. Ono gu kura aboro aima manga iraira diaberã.

Maggy, * nga wirina Australia yo ape gupai namangi ho ri azi bakure ni na gu boro naangianga idipase ya: “Mi akpa adunguratise bara dunguhe mbiko mi aaida kadu na ko. Mi ki zere rogo toro yo.” Ratana du India yo azi bakure na kumbagude ri adu na ko sukuru yo natona ka wirika Ziazia Kekeapai. Ono tie, fuo bete regbo, ko ayugu gupai nga ko aaida ri ni dee. Ri ambu rengo na ki rimi ku rogo kura pambori kia tipa ka manga rogotise na ko.

Kura kpiapai nabipa Ndenguè du Cameroon yo. Garãri adu 19 ho ri adi kumba ni. Gari badiarogatise akido ri nga ri nikaa manga gari pambori amanga. Ono tingbafuo aposo ue fuo gayo rogatise, kumbari aka na ri ti ndu kuba adunguratise yo. Ri aya: “Mi abi tire nga mi nisare na kini kpari. Mi abi gupai nga mi aadunga berewe na pagbia kurii gimi raka te. Na mi anaabira tire dedede.”

Rengo ngaha nga, anga agu abadiarogatise dunduko angianga aidipase ya du ni gbegberẽ aboro te. Wa vura duhe wo, ka si vura du nga gamo badiarogatise amanganga ro gbegberẽ te, wai rengbe gipai re kadu na gbegberẽ sangbanaha kurii gamo pagume na gu Bamo du ngbangbaturũ yo? Gini bipai rengbe mo kadu na ni ka ino gupai nga mo adeganga turo kuti agu arugute Yekova afuhe tipa gamo wenepai te? Na gu nyakipaha gbe nga, ko nika bi gu diaberã mo amangihe wai?—Snz. 1:33.

Awirina rogo zegino dunduko rengbe ka pe gupai nga manga rogatise “kina rogo Gbia yo” nga gu wenepai si aida boro mangihe. Agu awirina ata manganga rogatise ya ima diaberã ka sa ngbarago ku kpoto Yekova yo, ni mangayo rogatise kina dagba airisiko. Michiko du Japan yo, agumeri asosodi ri ri di boro-ngbi. Kurii gupai nga ri asovura kuti gayo sosodapai re, ri abi gupai nga gu kura anakureari nagbia gayo abadiarogatise kina rogo dungurati. Ri ape gupai nga: “Mi aya fu tire wa du Yekova nga ‘betedi Mbori,’ gani ngbarago arunga riipa manga rogotise watadu zanga mangaha te. Mi idi kuti gupai a nga ko nafu guhe furani ngbadurani aidaha. Ka si vura du nga ani arengbanga ka gbia badiarogatise awere te, gupai ngba nga ani hipai tipa wiri bete regbo ni abakuparanga.” (1 Tim. 1:11) Ni yangaraha, ri adi kumba, na ri na ngbarago nga ri aima hipai.

Kura awirina nga akumba aima sungo tipa wiri bete regbo wa ka i gbia wene badiarogatise. Bill du Australia yo nga ngbatunga agu awirina re. Ko ape gupai nga gu kura aregbo aniidu kinaho ko anaabi agu adee adu nga rogo dungurati ya na nyemu yo. Wa si avura du wo, ko aaidanga ka zio bakure na yo te. Tipagine? Ko aaidanga ka dia gu bambata diandue nga ka ‘kpamia tiko’ na zangaidipase te. Ono vuru bete agarã yo, ko abi kura awirina ko aaida ka manga rogotise na yo ono ka  i agianga tiyo ya. Bill amangi rogotise ho garãko adu ni nga 30 fuo gbiako gu dee narẽ na ko. Ko aya: “Mi abira nga tire te. Mi nabi tire nga mi ima gbia amaku mbiko ani nandu ku gene tungusapai yo sa, ani namanga gaani wisigopai sa, na kini irisimbori kina sa. Mi na ngbarago ka gbia anakureari bambiko i dunduko nga airisi Yekova. Ani nambakada gaani rogotise na Ziazia Kekeapai.”

Ginipai rengbe mo ka mangaha ho mo nambu apai ni ku be Yekova? Bambatapai si aida mo berẽkuriihe nga ndu ginipai du mo ata manganga rogotise ti ni ya. Ka mo bihe nga gu banguapai re naruriipa agu arugute nga ga Ziazia Kekeapai du tipa manga rogatise “kina rogo Gbia yo,” si naida i tambua ro tipa manga mo pai kutini. Mo du na kido nga Yekova na ngbarago tipa gu diaberã mangi moho ka mangapai kuti Fugoko. (1 Sam. 15:22; Snz. 27:11) Mo ima rengba ka ‘úka kpotoro yo’ fu Mbori rogo kparakpee yo. (Tam. 62:8) Gamo kparakpee rengbe kadu na wene rogoyo ti ni ka si du nga mo nakpara fuko kakaka zanga pirigo. Gamo pagume na Mbori nikaa nyaka na aʹuru dunduko wa mo nika ru ngutete si ki vura du vurũ nga kpotoro gbiati kura aboro nasosoda ro. Mo du na kido nga Mbori naberãpa gako amoyambu dunduko du ni ruruyo na paro ni nyanyakihe bangiriko. Ko naberãpa gamo azingo na agu apai mo akpinyemuhe. Ko akidongo pa badiarogatise fu boro te. Wa vura duhe wo, ka si du nga mo naida na badiarogatise nzunzu, ko ima ino gu bawene gene rengbe ko ka mbisa gu gamo nyemupai re ngbaha.—Tam. 145:16; Mt. 6:32.

Gu kura aregbo kinaho rengbe mo ka bi tiro wa gu bake apapara Atambuahe nangia Davide naya: “Ako Yekova, mo ípisi tiro ka karaga pai fere! Torore nanyasa! Ka mo nióko nga kpakpuro ti re ya.” (Tam. 143:5-7, 10) Ti ngbatunga agu aregbo re, mo mbu regbo fu gu Bamo du ngbangbaturũ yo ko yugu gupai ko aidaha tipa ro. Mo rengbe ka manga gipai re ni dia mo regbo ka geda Fugoko na kini berẽkurii gupai mo agedaha. Mo nika ino wai du gako arugute na ki bi wai ko amangipai tipa gako aboro bakuru kusayo. Ka mo degeturo fuko, si nika zambuasi gu kido du mo na ni kuti gako tatamana ka giasangbako.

Gini kurapai berewe rengbe ka saro mo du na ngbarago vuru agu agarã du mo ni saro? Mo rengba ka mangasunge na gu regbo du mo ni saro re ka sonosa agu asino du wa ruru bipai rogo toro yo, gamahe, du ngangara, ngbarago, kakuti sinombori, gbiati wene rimo, si nga gu nyanyakipa asino nasa ramukporo si du na ngbarago. (Bam. P. 24:16-21; Ruta 1:16, 17; 2:6, 7, 11; Snz. 31:10-27) Mo gbata gako Kindo mbata ni tungusa mo pai dedede na gu kura asunge nga ga aKristano, si nika du ni bandahe foro. Bill ani nifura tipa ko mbata aya tipa agu aregbo ko aida ka manga rogatise wẽ: “Si asusi ni kina boro ipo! Mi amangisunge na gu regbo re ni bazakigene.”

Nirengo, manga rogatise “kina rogo Gbia yo” gu rẽarẽ kindi. Mangapai kuti gu rugute re ima rengba ka undo ro mo fu iriso fu Yekova na ki gbia nyenye ngbarago. Ziazia Kekeapai naya: “Boro maku nga gu ni nagunde ti Yekova, ngba sangbako angba ti ni gbe! Wenepia du kpuni yo na ũkumuko; gani rurupai nye anye kindi.” (Tam. 112:1, 3) Sidu, mo diberã ka nye kuti gu rugute nga ga manga rogatise “kina rogo Gbia yo” re.