UZOẸME UKE NA | KỌ O TE WERE OWHẸ RE A WUHRẸ EBAIBOL NA KUGBE OWHẸ

Ọruẹrẹfihotọ Uwuhrẹ Ebaibol Rọkẹ Ahwo Kpobi

KPORO

A riẹ Isẹri Jihova inọ a rẹ ta usiuwoma evaọ ẹgbede. Kọ whọ riẹ nọ ma re wuhrẹ Ebaibol na kugbe ahwo evaọ akpọ na soso?

Evaọ ukpe 2014, Isẹri Jihova nọ i bu vi ima eree (8,000,000) evaọ erẹwho nọ i bu te egba ivẹ gbe udhuvẹ (240) a wuhrẹ Ebaibol na kugbe ahwo nọ a joma bu te ima izii gbeidu egba isoi (9,500,000) evaọ kamara kamara. * Whọ tẹ rọ unu ahwo nana wawo ahwo nọ a rrọ erẹwho jọ, wọhọ erẹwho udhuhrẹ (140) jọ nọ ma riẹ, ahwo nọ ma bi wuhrẹ Ebaibol na kugbe a bu vi ai.

Re Isẹri Jihova a sai wuhrẹ ahwo nana kpobi Ebaibol na, a bi printi Ebaibol, kere ebe, emagazini gbe ebe efa nọ i bu te enwenọ ima-odu ọvo gbe ubro evaọ evẹrẹ nọ i bu te egba ihrẹ (700) kukpe kukpe. Ebe nana nọ a bi printi na i bi fiobọhọ kẹ ahwo wuhrẹ Ebaibol na evaọ ẹvẹrẹ nọ ọ were rai.

“Isukulu e jẹ hae nwane were omẹ tere he, rekọ a rẹ ruẹ unu gbiku epanọ uwuhrẹ Ebaibol nana o were omẹ te he. Yọ eware nọ me wuhrẹ e sasa omẹ oma kẹhẹ!”—Katlego, evaọ obọ South Africa.

“Uwuhrẹ na u fiobọhọ kẹ omẹ ruẹ iyo enọ mẹ kpobi gbe iyo enọ efa buobu.”—Bertha, evaọ obọ Mexico.

Uwou mẹ a jẹ hae jọ wuhrẹ Ebaibol na kugbe omẹ evaọ oke nọ u kiehọ omẹ oma. Kọ oware jọ u re gbe woma vi ere?—Eziquiel, evaọ obọ Brazil.

“Ẹsejọ ma rẹ rehọ iminiti 15 hayo 30 ro wuhrẹ, yọ ẹsejọ ma re wuhrẹ kri vrẹ ere. Okenọ mẹ gwọlọ kpobi a rẹ raha kugbe omẹ.”—Viniana, evaọ obọ Australia.

“Ọvọvẹ a je ro ru uwuhrẹ na kugbe omẹ, u gbunu kẹhẹ!”—Aimé, evaọ obọ Benin.

“Osẹri Jihova nọ o je wuhrẹ Ebaibol na kugbe omẹ na o wo odiri gaga, yọ ọ jọ wowou. Ma te zihe ruọ egbẹnyusu ekpekpe.”—Karen, evaọ obọ Northern Ireland.

“Ahwo buobu nọ a re wuhrẹ Ebaibol na a re zihe ruọ Isẹri Jihova ha.”—Denton, evaọ obọ England.

IYO ENỌ NỌ AHWO A RẸ NỌ KẸSE KẸSE KPAHE ỌRUẸRẸFIHOTỌ UWUHRẸ EBAIBOL MAI

Ẹvẹ wha re ru uwuhrẹ Ebaibol na?

Ma rẹ salọ izoẹme sa-sa, ma ve se eria Ebaibol nọ i kie kpahe izoẹme yena. Wọhọ oriruo, Ebaibol na ọ kẹ iyo enọ wọhọ: Ono họ Ọghẹnẹ? Oghẹrẹ vẹ ọ rrọ? Kọ o wo odẹ? Bovẹ ọ be rria? Kọ ma sai si kẹle iẹe? Ẹbẹbẹ nọ ahwo buobu a wo họ, epanọ a sae rọ ruẹ eria Ebaibol na e kẹ iyo enọ yena.

Re ma sai fiobọhọ kẹ ahwo ruẹ iyo enọ yena, ma re wuhrẹ obe na Eme Ebaibol na O Gine Wuhrẹ? * kugbe ahwo, onọ u wo ewẹ-obe egba ivẹ gbe udhe gbe ene (224). Ẹjiroro nọ a ro kere obe nana họ, re u fiobọhọ kẹ ahwo riẹ kpahe igogo iwuhrẹ Ebaibol sa-sa. Izoẹme jọ nọ e rrọ eva riẹ e ta kpahe Ọghẹnẹ, Jesu Kristi, oware nọ ahwo-akpọ a be rọ ruẹ uye, ẹkparomatha na, olẹ, gbe izoẹme efa buobu.

Oke gbe oria vẹ a sai jo ru uwuhrẹ na?

A rẹ sai ru uwuhrẹ na evaọ oke gbe oria nọ u kiehọ owhẹ oma.

Ẹvẹ a re ru uwuhrẹ na theri te?

Ahwo buobu a rẹ rọwo nọ a rehọ auwa soso wuhrẹ Ebaibol na kugbe ai koka koka. Rekọ ma re kputu họ oke uwuhrẹ na ha. Oke nọ whọ kẹ omai te ma re ru uwuhrẹ na theri te. Iminiti 10 hayo 15 ọvo ahwo jọ a rẹ rọwo nọ a ro wuhrẹ kugbe ai koka koka.

Bro igho a rẹ hwa fihọ uwuhrẹ na?

Ọvọvẹ, whọ rẹ hwa ugho fihọ uwuhrẹ na gbe obe nọ ma ti ro wuhrẹ owhẹ na ha. Onana o rọwokugbe ọkpọvio nọ Jesu ọ kẹ ilele riẹ inọ: “Ọvọvẹ a kẹ owhai, wha kẹ ọvọvẹ.”—Matiu 10:8.

Bro ikpe ohwo o re wuhrẹ kri te?

Oke nọ u je owhẹ kpobi who re wuhrẹ kri te. Obe na Eme Ebaibol na O Gine Wuhrẹ? u wo izoẹme 19. Oghẹrẹ nọ whọ gwọlọ nọ a wuhrẹ owhẹ vẹrẹ te, a re ro wuhrẹ izoẹme nana.

Kọ o gbahọ nọ me re zihe ruọ Osẹri Jihova?

Ijo. Ma riẹ nọ ohwo kpobi o wo udu nọ ọ rẹ rọ salọ oware nọ ọ gwọlọ rọwo. Rekọ nọ ohwo o te gine wo otoriẹ Ebaibol na, ọ rẹ jiroro na kẹ omariẹ sọ o re zihe ruọ Osẹri Jihova hayo ọ rẹ jọ họ.

Diẹse mẹ sae jọ ruẹ evuẹ efa kpahe Isẹri Jihova?

Whọ rẹ jọ oria evuẹ itanẹte jw.org mai na ruẹ evuẹ buobu kpahe iruẹru Isẹri Jihova gbe eware nọ a rọwo.

Ẹvẹ mẹ sae rọ yare uwuhrẹ Ebaibol?

Kere eme fihọ efọmo vi se omai evaọ oria evuẹ itanẹte mai, www.pr418.com/iso
Ta kẹ Osẹri Jihova kpobi nọ ọ be rria kẹle owhẹ.

^ edhe-ẹme 4 Ma re wuhrẹ Ebaibol na kugbe omọvo hayo ẹko ahwo.

^ edhe-ẹme 9 Onọ Isẹri Jihova a kere. Unu nọ a printi no evaọ obe nana i bu vi ima egba ivẹ gbe ọgba (230,000,000) no, evaọ evẹrẹ egba ivẹ gbe udhosa (260).

OBUFIHỌ RỌKẸ IVIUWOU

“Nọ aye mẹ o mu Ebaibol na họ ewuhrẹ, me te muẹrohọ nọ uruemu riẹ u bi nwene gaga. Ma te mu evawere họ ewo evaọ uviuwou mai. Fikinọ mẹ gwọlọ riẹ eware nọ o bi wuhrẹ nọ o be lẹliẹ uruemu riẹ nwene na, me te mu Ebaibol họ ewuhrẹ re. Eware nọ me wuhrẹ i te fiobọhọ kẹ omẹ zihe ruọ emamọ ohwo. Ebaibol na nọ ma je wuhrẹ na u ru omai si kẹle ohwohwo evaọ uviuwou na.”—Eziquiel.

“Nọ me mu Ebaibol na họ ewuhrẹ no, me te siobọno imu-egaga erehọ, idieda-thomawa, mẹ tẹ jẹ be daoma kpọ ofu mẹ. Enẹna uwou mẹ o rrọ fuafo jẹ rrọ kpatiẹ. Eva ahwo uviuwou mẹ e be were omẹ ẹsikpobi, yọ mẹ be daoma ru eware nọ e rẹ were ai ẹsikpobi. Enẹna mẹ be mai wo evawere.”—Karen.

“Ahwo jọ a jẹ hae rọ eme fa omẹ ovao fikinọ me bi wuhrẹ Ebaibol na. Rekọ o were ọzae mẹ inọ me wuhrẹ Ebaibol na, ọ ta kẹ omẹ nọ: ‘Mẹ be daezọ ẹme ahwo ho. Oghẹrẹ nọ uruemu ra u nwene fihọ enẹna họ oware nọ o mae were omẹ. Ruabọhọ uwuhrẹ na.’ Uviuwou mai o kpatiẹ te enẹ vẹre he!”—Viniana.

Enana E Sae jẹ Were Owhẹ

ENỌ NỌ EBAIBOL Ọ KẸ IYO RAI

https://cms-imgp.jw-cdn.org/img/p/2015243/univ/art/2015243_univ_sqr_xl.jpg

Isẹri Jihova

Ọruẹrẹfihotọ Uwuhrẹ Ebaibol Rọkẹ Ahwo Kpobi