Batumoni ba Yehova bayukene bininge pa mwanda wa kusapula mu kitango kya bantu. Ino le uyukile amba twendejanga ne mpangiko ya kifundwa kya Bible ntanda yonso?

Mu 2014, kubwipi kwa Batumoni 8000000 mu matanda 240 baendeje bifundwa bya Bible kubwipi kwa 9500000 ne kupita kweji ne kweji. * Na bubine, buvule bwa bantu befunda netu Bible i bupite buvule bwa bantu ba mu matanda kintu kya 140!

Pa kusaka kuvuija uno mwingilo wa bufundiji, Batumoni ba Yehova balupulanga kintu kya mudiyala umo ne kipindi wa Mabible, mabuku, mapepala ne mabuku makwabo akwasha kwifunda Bible mwaka ne mwaka—mu kintu kya ndimi 700! Buno bukomo bulongwa bwa kulupula mabuku bwampikwa bobudingakene nabo, bukwashanga bantu befunde Bible mu ludimi lobasaka.

Lelo kifundwa kya Bible i kika?

Tutoñanga mitwe ya myanda mishileshile isambila pa Bible ne kubandaula Bisonekwa bikwatañene na mine mitwe ya myanda’ya. Kimfwa, Bible ulondolola ku bino bipangujo, pamo bwa bino: Lelo Leza i ani? Lelo udi namani? Lelo udi na dijina? Le udi kwepi? Le tubwanya kumufwena? Kikomo pano i kuyuka pene pa kusokola malondololo mu Bible.

Pa kusaka kukwasha bantu batane malondololo, twingidijanga dibuku dya mapaje 224 ditwa bu Lelo I Bika Bine Bifundija Bible? * Dino dibuku dyalupwilwe’tu mwanda wa kukwasha bantu bemvwanije bufundiji bwa kyalwilo bwa mu Bible. Mudi mashapita esambila padi Leza, Yesu Kidishitu, masusu a bantu, lusangukilo, milombelo ne mitwe ya myanda bikwabo mivule.

 Le i kitatyi’ka ne i kwepi kukalongelwa kifundwa?

Kifundwa kibwanya kulongwa pa kitatyi ne kifuko kyosaka.

Le kifundwa kiloñanga mansá anga?

Bantu bavule betūdilanga’ko nsá umo ku yenga ne yenga mwanda wa kwifunda Bible. Inoko bula bwa kifundwa bukokeja kushinta. Tukebukwatañanya na mpangiko yobe. Bamo befundanga’tu mu minite 10 nansha 15 ku yenga ne yenga.

Lelo kifutyilwanga lupeto lunga?

Kifundwa ne bya kwifunda nabyo i bya ku bitupu. Kino kikwatañene na bulombodi bwa Yesu bwaāpele balondi bandi amba: “Mubatambula ku bitupu, nenu pānai ku bitupu.”—Mateo 10:8.

Lelo kifundwa kikafula kitatyi’ka?

Bula bwa kitatyi kikefundwa bukakwatañana na mosakila. Mu dibuku Lelo I Bika Bine Bifundija Bible? mudi mashapita 19. Ukokeja kwifunda’ko mashapita osaka nansha onso mungya mowakasakila.

Lelo mfwaninwe kwikala Kamoni wa Yehova?

Aa. Twitabije na kalemo konso amba muntu ne muntu udi na bwanapabo bwa kutonga byasaka kukulupila. Inoko bantu bafundijibwa buyuki bwa kyalwilo bwa mu Bible, babwanya kukwata butyibi buyampe.

 Lelo i kwepi kombwanya kuyukila’ko bivule?

Diteba dya Entelenete dya jw.org didi na myanda ya bine isambila pa nkulupilo ne mingilo ya Batumoni ba Yehova.

Le i muswelo’ka onkokeja kulomba kifundwa kya Bible?

• Lomba kifundwa pa Entelenete pa www.pr418.com.

•  

• Wisambe na Batumoni ba Yehova ba mu kyenu kibundi.