Vinjiho jaYehova vavatachikijila hamujimbu veji kwambululanga. Uno mwatachikiza nawa ngwenu tweji kulinangulanga Mbimbiliya navatu vosena tahi?

Mumwaka wa 2014, Vinjiho kafwe 8,000,000 mumafuchi akuheta ku 240 vanalinangulanga Mbimbiliya navatu vakuzomboka 9,500,000 kakweji hikakweji. * Kuvula chavatu vanakulinangula Mbimbiliya nayetu chinazomboka hakuvula chavatu vamumafuchi amwe akuheta ku 140.

Hakusaka kutwalaho mulimo kanou, Vinjiho jaYehova veji kupulitanga jiMbimbiliya kafwe mbiliyoni yimwe nachimbwa, nakupulita nawa mikanda, najimangazini, navinoma vyeka vyakuzachisa hakunangula vatu mwaka himwaka mumalimi 700. Kupulita mikanda yayivulu mumalimi kanawa chili nakukafwa vatu valinangule Mbimbiliya mumalimi navasaka vavene.

Chilongesa chaMbimbiliya tweji kuchilinganga ngachilihi?

Tweji kulinangulanga vihande vyakulisezaseza vyamuMbimbiliya nakukekesa jivesi jamuMbimbiliya jahanjika hachihande kana. Chakutalilaho,Mbimbiliya yakumbulula vihula vyakufwana nge evi: Uno Kalunga ikiye iya? Uno Kalunga apwa ngachilihi? Kutala atwama nalijina tahi? Uno atwama kulihi? Kutala tunahase kupandama kuli Kalunga tahi? Vamwe veji kuchiwananga kupwa chachikalu kuwana muvakumbulwila vihula kanevi muMbimbiliya.

Hakusaka kukafwa vatu vawane muvakumbulwila vihula kana, tweji kuzachisanga mukanda wamafwo 224 vavuluka ngwavo Uno Chikupu Mbimbiliya Yanangula Vyuma Muka? * Mukanda kanou vausoneka mangana ukafwe vatu vatachikize kunangula chamaputukilo chamuMbimbiliya. Mukanda kana wahanjika hachihande chakuvuluka Kalunga, naYesu Kulishitu, navyo vatu veji kuyanjilanga, nahakusanguka, nakulomba navihande vyeka.

 Lwola nakuchihela muka vatela kulinangwila Mbimbiliya?

Munahase kulinangula Mbimbiliya halwola nachihela namusaka enu vavene.

Uno kulinangula Mbimbiliya cheji kumbatanga maola angahi?

Vatu vavavulu veji kuwanangako ola yimwe chipwe jiola jajivulu muchalumingo hichalumingo mangana valinangulenga Mbimbiliya. Oloze kusuhwa chalwola lwakulinangula Mbimbiliya chapendamina hali mutu ivene uze ali nakulinangula. Tweji kwitavila kulinangula namutu kweseka nalwola mwasaka yivene. Vatu vamwe veji kusakanga kulinangula muminyutu 10 chipwe muminyutu 15 chalumingo hichalumingo.

Uno mutu atela kufweta chingahi hakusaka kulinangula Mbimbiliya?

Tweji kulinangulanga navatu, nakuvahana mikanda hawana wakanyombo. Tweji kulinga ngocho kweseka namuze Yesu alwezele tumbaji twenyi ngwenyi: “Mwatambwile chawana, hanenunga nawa chawana.”—Mateu 10:8.

Uno kulinangula kana cheji kumbatanga tukweji vangahi?

Munahase kutwalaho lika kulinangula kweseka noho namusakila enu vavene. Mukanda waUno Chikupu Mbimbiliya Yanangula Vyuma Muka? watwama natupetulu 19. Munahase kusakula kutangamo tupetulu vamwe chipwe kukumisa tupetulu vosena kweseka nomu namusakila enu vavene.

Uno mutu mwasaka kulinangula Mbimbiliya kuvanga alumuke nakupwa Chinjiho chaYehova nyi?

Nduma. Twatachikiza ngwetu mutu himutu akwechi lisesa lyakulisakwila yivene vyuma atela kufwelelela. Vatu vaze vanalinangula chinyingi chamuMbimbiliya veji kwesekanga kulisakwila vavene vyuma vyakwoloka.

 Kulihi ngunase kuwana mijimbu yayivulu?

Keyala yetu yajw.org yikwechi mijimbu yakwoloka yayivulu yahanjika havyuma vafwelela namilimo veji kuzatanga Vinjiho jaYehova.

Nangulomba ngachilihi chilongesa chaMbimbiliya?

• Munahase kulomba chilongesa chaMbimbiliya kuzachisa Internet hakeyala yetu yawww.pr418.com.

•  

• Hakusaka muwane Vinjiho jaYehova vaze vali hakamwihi nayenu, munahase kutala hamukana wajinambala jajishinga jamungalila yenu.