Akaboni aku Yehova aziŵika kuti agwira nchitu yakupharazga. Kumbi muziŵa kuti asambira so Bayibolo ndi ŵanthu kwawezi pacharu chosi?

Mu 2014, Akaboni aku Yehova akujumpha 8 miliyoni achitiskanga masambiru nga Bayibolo pafufupi 9,500,000 mwezi wewosi muvyaru 240. a Pa charu chapasi pe vyaru 140 vo chiŵerengeru cha ŵanthu chifika cha 9,250,000. Ivi vilongo kuti pe ŵanthu anandi ukongwa wo asambira Bayibolo ndi Akaboni aku Yehova.

Kuti afiski nchitu iyi, chaka chechosi Akaboni aku Yehova asindikiza vinthu vakukwana 1.5 biliyoni mu vineneru 700. Vinthu venivi visazgapu Mabayibolo, mabuku ndipuso magazini. Ivi vitovya kuti ŵanthu asambiri Bayibolo mu chineneru cho angayanja.

Kumbi sambiru la Bayibolo lichitika wuli?

Tisankha nkhani zakupambanapambana ndipu pavuli paki tikambiskana malemba ngo ngakoliyana ndi nkhani zo.Mwakuyeruzgiyapu, Bayibolo limuka mafumbu nge yanga: Kumbi Chiuta ndiyani? Nanga wawoneka wuli? We ndi zina? Kumbi waja pani? Tingaja nayu pa ubwezi? Ŵanthu asuzgika kuti asaniyi kwamuka m’Bayibolo.

Kuti tiwovyi ŵanthu kusaniya kwamuka, tigwiriskiya nchitu kabuku kakuti, Kumbi Bayibolo Lisambizanji Weniukongwa? b Kabuku yaka kakulembeka kuti kawovyi ŵanthu kuziŵa visambizu vakwamba va m’Bayibolo. M’kabuku yaka, musanirika fundu zakukwaskana ndi Chiuta, Yesu Khristu, masuzgu ngo tikumana nangu, chiyuka, rombu ndipuso nkhani zinyaki.

 Kumbi sambiru lenili lichitikiya pani ndipuso nyengu wuli?

Sambiru lingachitikiya pamalu kweniso nyengu yo imwi mungayanja.

Kumbi lito nyengu yitali wuli?

Ŵanthu anandi atanja kusambira kwa ora limoza pamwenga kujumpha sabata yeyosi. Nyengu zinyaki ora likwana cha chifukwa vithemba nyengu yo munthu wenayu. Anyaki asambira kwa maminiti 10 pamwenga 15 sabata yeyosi.

Kumbi munthu wakhumbika kulipira ndalama zilinga?

Sambiru la Bayibolo kweniso mabuku ngo tigwiriskiya nchitu vawezi. Ivi vikoliyana ndi vo Yesu wangukambiya akusambira ŵaki kuti, “Kwawezi mwalonde, kwawezi paskani.”​—Mateyu 10:8.

Kumbi pajumpha myezi yilinga kuti munthu wamalizi?

Mungasankha kulutirizga kusambira mpaka po mwakhumbiya. Kabuku kakuti Kumbi Bayibolo Lisambizanji Weniukongwa? ke ndi mitu 19. Mungasambira mitu yosi pamwenga mungasankhamu ŵaka.

Kumbi ndazamuja Kaboni waku Yehova asani ndayamba kusambira?

Awa. Tiziŵa kuti weyosi we ndi wanangwa wakusankha vo wangagomezga. Kweni kuti munthu wasankhi umampha, wakhumbika kuziŵa uneneska wakutuliya m’Bayibolo.

 Ndingachita wuli kuti ndiziŵi vinandi?

Wonani pa jw.org/tog kuti muziŵi vo Akaboni aku Yehova achita ndipuso vo agomezga.

Ndingapempha wuli sambiru la Bayibolo?

• Mungapempha sambiru pa www.pr418.com/tog.

•  

• Mungakambiskana ndi Akaboni aku Yehova a kufupi ndi ko muja. Mungasaniya so manambala nga “Akaboni aku Yehova” m’mabuku ngo musanirika manambala nga foni.