Suzan: Aw yu de du, Bɛti? A bin gladi fɔ si yu las wik pan di program we wi bin gɛt fɔ mɛmba Jizɔs Krays in day wan. * Aw yu bin si di program?

Bɛti: A bin ɛnjɔy di program, bɔt mek a tɛl yu tru, a nɔ bin ɔndastand ɔltin we dɛn tɔk. A no se bɔku pipul dɛn kin sɛlibret di tɛm we Jizɔs bɔn, we na Krismas pas aw dɛn de mɛmba in day wan Ista tɛm. Duya ɛksplen to mi, Wetin mek i impɔtant fɔ mɛmba Jizɔs in day?

Suzan: Na tru se bɔku pipul dɛn kin sɛlibret Krismas ɛn Ista. Bɔt Jiova Witnɛs dɛn fil se di de we impɔtant pas ɔl we dɛn fɔ mɛmba, na di de we Jizɔs day. If yu gɛt smɔl tɛm, a go gladi fɔ sho yu wetin mek Jizɔs in day impɔtant ɛn di rizin we mek wi kin mɛmba am.

Bɛti: No prɔblɛm, a gɛt smɔl tɛm.

Suzan: Di men rizin we mek Jiova Witnɛs dɛn de mɛmba Jizɔs in day na bikɔs Jizɔs bin dɔn tɛl in disaypul dɛn fɔ du dat. Lɛ wi tɔk bɔt wetin bin apin di nɛt bifo Jizɔs day. Yu bin mɛmba di spɛshal it we i bin it wit in fetful disaypul dɛn?

Bɛti: Yu min di Las Sɔpa?

Suzan: Yɛs, dɛn kin kɔl am bak di Ivintɛm It fɔ Mɛmba di Masta. We dɛn bin de it, Jizɔs tɛl in disaypul dɛn klia wan wetin dɛn fɔ du. Duya, yu go lɛk fɔ rid wetin i bin se na Lyuk 22:19?

Bɛti: OK, i se: “Dɔn, i tek wan bred, i pre pan am, dɔn i brok am ɛn gi am to dɛn ɛn tɛl dɛn se: ‘Dis min mi bɔdi we a gɛt fɔ gi fɔ una. Una go de du dis fɔ mɛmba mi.’”

Suzan: Tɛnki. Yu notis wetin Jizɔs tɔk na di las pat na di vas. I se: “Una go de du dis fɔ mɛmba mi.” Jɔs bifo Jizɔs tɛl in disaypul dɛn fɔ mɛmba am, i bin tɔk klia wan wetin dɛn fɔ mɛmba bɔt am. I tɔk se i go gi in layf fɔ ɔl di wan dɛn we de fala am. Jizɔs bin tɔk di sem tin na Matyu 20:28. Da vas de tɔk se: “Mɔtalman Pikin nɔ kam fɔ lɛ dɛn wok fɔ am, bɔt i kam fɔ wok fɔ pipul dɛn ɛn fɔ gi in layf fɔ sev bɔku pipul dɛn.” Na dis mek Jiova Witnɛs dɛn de gɛda ɛvri ia fɔ mɛmba Jizɔs in day, dat na di sakrifays we i bin sakrifays in layf fɔ pe fɔ wi sin. In day go mek ɔlman we de du wetin Gɔd want gɛt layf sote go.

Bɛti: A dɔn yɛri we pipul dɛn kin se Jizɔs day so dat wi go gɛt layf. Bɔt fɔ tɔk tru, a nɔ ɛva ɔndastand aw dat pɔsibul.

Suzan: Nɔto yu wangren, Bɛti. Dis tɔpik bɔt di day we Jizɔs day fɔ pe fɔ wi sin, na wan we  nɔ izi fɔ ɔndastand. Bɔt na wan pan di tru tin dɛn we wi fɔ no bɔt insay Gɔd in Wɔd. Ɛniwe, yu stil gɛt smɔl tɛm?

Bɛti: Yɛs, a stil gɛt smɔl tɛm.

Suzan: Fayn. A bin jɔs dɔn rid bɔt di day we Jizɔs bin day fɔ wi, so a go tray fɔ ɛksplen am simpul wan fɔ yu.

Bɛti: OK.

Suzan: Fɔ lɛ wi ɔndastand di sakrifays we Jizɔs mek, wi fɔ tray fɔ no fɔs wetin bin apin we Adam ɛn Iv sin na di gadin we bin de na Idɛn. Fɔ lɛ wi go ɔndastand wetin dis dɔn briŋ kam pan wi, lɛ wi rid Lɛta Fɔ Rom 6:23. Duya yu go lɛk fɔ rid dis vas?

Bɛti: OK. I se: “Sin in pe na day, bɔt di gift we Gɔd de gi na layf we go de sote go, ɛn na Krays Jizɔs we na wi Masta go mek dat bi.”

Suzan: Tɛnki ya. Lɛ wi tɔk smɔl bɔt wetin dis vas se. Fɔs, luk aw di vas bigin, i se: “Sin in pe na day.” Dis na simpul lɔ we Gɔd bin gi mɔtalman frɔm di biginin; i se di pe we pɔsin go gɛt fɔ sin na day. We Gɔd bin mek mɔtalman, dɛn nɔ bin de sin. Gɔd bin mek Adam ɛn Iv pafɛkt wan, ɛn ɔl dɛn pikin dɛn we dɛn bin fɔ bɔn, fɔ dɔn bi pafɛkt pikin dɛn. So rizin nɔ bin de fɔ lɛ ɛnibɔdi day. Adam ɛn Iv ɛn ɔl dɛn pikin dɛn bin gɛt di chans fɔ de sote go na dis wɔl wit gladi at. Bɔt as wi no, dɛn nɔ bin du wetin Gɔd tɛl dɛn, nɔto so?

Bɛti: Yɛs, na so. Adam ɛn Iv bin it di frut we Gɔd bin tɛl dɛn nɔ fɔ it.

Suzan: Wetin yu se na tru. We Adam ɛn Iv nɔ du wetin Gɔd want, dɛn sin. So dɛn chuz fɔ bi pipul dɛn we nɔ pafɛkt, dat na pipul dɛn we de sin. Wetin Adam ɛn Iv du briŋ siriɔs prɔblɛm to dɛn ɛn ɔl dɛn pikin dɛn.

Bɛti: Wetin yu min?

Suzan: Wɛl, lɛ a yuz wan ɛgzampul fɔ sho yu wetin a min. Mek a aks yu, yu kin bek, nɔto so?

Bɛti: Yɛs! Na wan pan di tin dɛn we a lɛk fɔ du.

Suzan: Lɛ wi se yu gɛt wan fayn nyu pan fɔ bek bred. Bifo yu gɛt di chans fɔ yuz am, i fɔdɔm na grɔn ɛn dɛnt bad bad wan. Naw tɛl mi, wetin go apin to ɛni bred we yu bek na da pan de? Yu nɔ tink se di bred dɛnsɛf go dɛnt?

Bɛti: Yɛs, na so i go bi.

Suzan: Semweso, we Adam ɛn Iv disayd nɔ fɔ du wetin Gɔd want, dɛn bin “dɛnt” ɔ gɛt bɔt, bikɔs dɛn nɔ bin pafɛkt igɛn ɛn dɛn bin de sin. Ɛn bikɔs dɛn bigin sin bifo dɛn bɔn pikin dɛn, ɔl dɛn pikin dɛn gɛt di sem “dɛnt.” Dɛn bɔn dɛn ɔl insay sin. Insay di Baybul, di wɔd “sin” nɔ jɔs min fɔ du bad tin, i min bak di kayn layf we Adam ɛn Iv put wi pan. Pan ɔl we mi ɛn yu nɔ du ɛnitin bad, ɛn nɔ bin ivin bɔn yet, we Adam ɛn Iv sin, dɛn mek ɔl dɛn pikin dɛn nɔ pafɛkt ɛn dis de mek dɛn de sin ɛn day. Jɔs lɛk aw wi bin rid na Lɛta Fɔ Rom 6:23, sin in pe na day.

Bɛti: Dis tin we apin nɔ fayn atɔl. Wetin mek mɔtalman fɔ sɔfa sote go fɔ di sin we Adam ɛn Iv sin?

Suzan: Na tru, nɔto so i fɔ bi. Bikɔs Gɔd de du wetin rayt ɔltɛm, i disayd se Adam ɛn Iv fɔ day fɔ dɛn sin, bɔt Gɔd mek we fɔ sev dɛn pikin dɛn. Gɔd mek we fɔ pul wi pan sin ɛn day. Na dis mek Jizɔs kam na dis wɔl fɔ sakrifays in layf. Lɛ wi luk bak wetin Lɛta Fɔ Rom 6:23 tɔk. Afta i tɔk se “sin in pe na day,” di vas se: “Bɔt di gift we Gɔd de gi na layf we go de sote go, ɛn na Krays Jizɔs we na wi Masta go mek dat bi.” So na di day we Jizɔs day na in mek wi ebul fɔ kɔmɔt pan sin ɛn day. *

Suzan: Ɔda tin de na dis vas we a go lɛk fɔ lɛ yu pe atɛnshɔn to.

Bɛti: Wetin so?

Suzan: Yu notis wetin di vas se, i se: “Di gift we Gɔd de gi na layf we go de sote go, ɛn na Krays Jizɔs we na wi Masta go mek dat bi.” Naw, if Jizɔs na di wan we sɔfa ɛn day fɔ wi, wetin mek di vas tɔk se di sakrifays na “di gift we Gɔd de gi”? Wetin mek i nɔ se “di gift we Jizɔs gi”? *

Bɛti: Umm. A nɔ no.

Suzan: Wɛl, na Gɔd mek Adam ɛn Iv, ɛn we dɛn nɔ bin du wetin i want na di gadin we bin de na Idɛn, dɛn sin agens Gɔd. Gɔd go dɔn rili fil am we in fɔs tu pikin dɛn we i mek tɔn dɛn bak pan am. Bɔt Jiova mek we fɔ sɔlv di prɔblɛm wantɛm wantɛm. * I gri fɔ mek wan pan in spirit pikin dɛn kam na dis wɔl, liv in layf as pafɛkt mɔtalman, ɛn sakrifays in pafɛkt layf fɔ pul wi pan sin ɛn day. So wi go se Jizɔs in sakrifays na gift we Gɔd gi wi. Ɔda we de we de sho se Jizɔs in sakrifays na gift we Gɔd dɔn gi wi. Yu dɔn ɛva tink bɔt aw Gɔd bin fil we dɛn kil Jizɔs?

Bɛti: Nɔ, a nɔ ɛva tink bɔt dat.

Suzan: A si sɔm tɔys dɛn frɔnt yu os. Yu mɔs gɛt pikin dɛn.

Bɛti: Yɛs, a gɛt tu. Wan bɔy pikin ɛn wan gyal pikin.

Suzan: Lɛk ɛni mama ɔ papa, tink bɔt aw Jizɔs in Papa we na Jiova go dɔn fil di de we Jizɔs day. Amin, aw i go dɔn fil we i de wach frɔm ɛvin we dɛn de arɛst, provok, ɛn bit in Pikin we i lɛk? Aw i bin fil we dɛn de nel in Pikin pan tik ɛn lɛf am de fɔ sɔfa ɛn day slo wan?

Bɛti: I go mɔs dɔn fil bad. A nɔ bin dɔn ɛva tink bɔt dat!

Suzan: Na tru, wi nɔ go ɛva ebul fɔ sho aw Gɔd bin fil da de de. Bɔt wi no se in na pɔsin we de fil, ɛn wi no bak wetin mek i alaw ɔl dat fɔ apin. Di Baybul ɛksplen am fayn fayn wan to wi insay wan skripchɔ we bɔku pipul dɛn sabi, dat na Jɔn 3:16. Yu go lɛk fɔ rid am?

Bɛti: Yɛs. I se: “Gɔd so lɛk di wɔl dat i gi in wangren Pikin, so dat ɛnibɔdi we sho se i biliv pan am nɔ go day, bɔt i go gɛt layf we go de sote go.”

Suzan: Tɛnki. Lɛ wi luk di fɔs pat na di vas bak. I se: “Gɔd so lɛk di wɔl.” So di men rizin na lɔv. Na lɔv mek Gɔd sɛn in Pikin fɔ kam na dis wɔl ɛn day fɔ wi. Fɔ tru, Jizɔs in sakrifays na di bɛst we we Gɔd dɔn sho se i lɛk wi. Ɛn na dis kin mek Jiova Witnɛs dɛn gɛda ɛvri ia fɔ mɛmba Jizɔs in day. Dis smɔl tɔk dɔn ɛp yu, nɔto so?

Bɛti: Yɛs, i dɔn ɛp mi. Tɛnki fɔ we yu tek yu tɛm fɔ ɛksplen dis to mi.