Omeka: Mālō Sieli. Ua ou fiafia lava ina ua ou vaai iā te oe i le Faamanatuga o le maliu o Iesu i le vaiaso ua teʻa. * O le ā sou manatu i le sauniga?

Sieli: Sa ou fiafia i le sauniga, ae ou te taʻu saʻo atu lava ou te leʻi malamalama atoatoa i mea na talanoaina ai. Ou te iloa e faatāua e le toʻatele le aso fanau o Iesu i le Kerisimasi, nai lo o le faamanatuina o lona maliu. Pe e mafai ona e toe faamatala mai pe aiseā e tāua tele ai ona faamanatu le maliu o Iesu?

Omeka: E saʻo oe, o le toʻatele o tagata e latou te faamanatu le Kerisimasi. Ae i Molimau a Ieova, o le aso e sili ona tāua e tatau ona tatou faamanatuina, o le maliu o Iesu. Pe a lava lou taimi, ou te fiafia e faamatala atu māfuaaga e tāua ai ona tatou faia faapea.

Sieli: O lea e lava le taimi.

Omeka: Muamua, e faamanatu e Molimau a Ieova le maliu o Iesu, ona o le mea lenā sa ia poloaʻia ona soo e fai. Seʻi o ta iloilo le mea na tupu i le pō a o leʻi maliu Iesu. Pe e masani ona e faalogo e faatatau i se talisuaga faapitoa sa ia faia ma ona soo faamaoni?

Sieli: O le uiga o lau tala o le Talisuaga Mulimuli?

Omeka: Ioe. E taʻua foʻi o le Talisuaga Afiafi a le Alii. I lenā talisuaga, na avatu ai e Iesu ni faatonuga manino i ona soo. Pe e te fia fofogaina mai le Luka 22:19 faamolemole?

Sieli: OK. “Ua ia tago foʻi i le areto, ua fai le faafetai, ua vaevae ma avatu iā i latou, ma faapea atu: ʻO le faatusa lenei o loʻu tino ou te avatu mo outou. Ia faia pea lenei mea e fai ma faamanatuga iā te aʻu.’”

Omeka: Faafetai. Seʻi mātau le faatonuga a Iesu i le faaiʻuga o lenā fuaiupu: “Ia faia pea lenei mea e fai ma faamanatuga iā te aʻu.” A o leʻi faatonuina ona soo ia manatua o ia, sa taʻua ma le manino e Iesu le mea e tatau ona latou manatua e faatatau iā te ia. Na fetalai o ia o le a foaʻiina atu lona ola mo ona soo. Na taʻua e Iesu lenei manatu e talitutusa ma upu o loo i le Mataio 20:28: “E leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.” Pe a faapuupuu, o le pogai lenā e faapotopoto ai Molimau a Ieova i tausaga uma e faamanatu le maliu o Iesu, ina ia manatua le taulaga togiola na ia saunia. O lona maliu e mafai ai e tagata usiusitaʻi uma ona maua le ola.

Sieli: Ou te faalogo lava i tagata e fai mai na maliu Iesu ina ia tatou maua ai le ola. Ae ou te lē malamalama pe e faapefea ona tupu lenā mea.

 Omeka: E lē na o oe e iai lenā manatu. O le taulaga togiola a Iesu o se mataupu e loloto tele. Ae o se tasi foʻi o upu moni e sili ona tāua i le Afioga a le Atua. E ā, o lava a lou taimi?

Sieli: O lea e iai ni nai minute.

Omeka: Faatoʻā uma lava ona ou faitau i le mataupu e faatatau i le togiola, ma o le a ou taumafai e faamatala faafaigofie atu.

Sieli: OK.

Omeka: Ina ia malamalama i le togiola, e ao ona ta malamalama muamua i le tulaga na faapogaia e Atamu ma Eva, ina ua la agasala i le faatoʻaga i Etena. Ina ia ta malamalama i le finauga na aofia ai, seʻi o ta faitau i le Roma 6:23. Seʻi e fofoga mai le mau lenā faamolemole?

Sieli: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.”

Omeka: Faafetai. Seʻi o ta iloilo nei upu. Muamua, mātau le amataga o le fuaiupu: “O le totogi o le agasala o le oti lea.” E faigofie le tulafono na faataatia e le Atua i le amataga o le tagata—o le totogi po o le faasalaga o le agasala, o le oti. E moni e leai se tasi na agasala i le amataga. Na faia Atamu ma Eva e lelei atoatoa, ma o le a fananau uma mai a la fanau e lelei atoatoa. O lea, e leai la se māfuaaga e oti ai se tasi. Sa maua e Atamu ma Eva ma a la fanau uma le faamanuiaga o le ola fiafia e faavavau. Peitaʻi, ua tatou iloa e lē o le mea lenā na tupu, a ea?

Sieli: Ioe, sa ʻaina e Atamu ma Eva le fua o le laau na faasā.

Omeka: Saʻo lelei, ma ina ua filifili Atamu ma Eva e lē usiusitaʻi i le Atua, sa agasala i laʻua. O lea, sa o la filifili e avea ma tagata e lē lelei atoatoa ma agasala. E iai ni iʻuga mataʻutia o lenā filifiliga, e lē gata iā Atamu ma Eva, ae faapea foʻi i a la fanau uma lava.

Sieli: O le ā le uiga o lau tala?

Omeka: Atonu e mafai ona ou fai se tala faataʻitaʻi. Pe e te fiafia e tao falaoa ma isi mea faapena?

Sieli: Ioe! O le isi mea lenā ou te fiafia tele e fai.

Omeka: Seʻi faapea la e iai sau apa tao falaoa fou lava. Peitaʻi, a o e leʻi faaaogāina, na paʻū i lalo ma omo ai. O le ā nei la le mea o le a tupu i so o se falaoa lava o le a tao i lenā apa?

Sieli: E mautinoa o le a iai foʻi ni omo i na falaoa.

Omeka: Ioe. I se tulaga talitutusa, ina ua filifili Atamu ma Eva e lē usiusitaʻi i le Atua, sa iai ni omoomo po o so laʻua ila, e ala i le avea ma ē ua agasala ma lē lelei atoatoa. Talu ai na avea i laʻua ma ē ua agasala a o leʻi maua se la fanau, o lea, o le a fananau mai foʻi a la fanau uma lava, e agasala ma lē lelei atoatoa. I le Tusi Paia, e faasino atu le upu “agasala” e lē gata i se gaoioiga, a o le tulaga foʻi ua tuufaasolo mai iā i tatou. O le iʻuga, e ui lava e tatou te leʻi faia se mea sesē, ma e tatou te leʻi fananau mai, ae ina ua agasala Atamu ma Eva, ua la taʻusalaina i tatou faapea a la fanau ma a tatou fanau, i se olaga e lē lelei atoatoa ma agasala e iʻu i le oti. E pei ona taʻua i le Roma 6:23, o le totogi o le agasala o le oti.

Sieli: E lē fetaui la lenā mea. Aiseā e mafatia ai fua e faavavau tagata ona o le agasala a Atamu ma Eva?

Omeka: E saʻo oe, e lē fetaui. Ae e iai se isi mea e sili atu na faia e le Atua. O le tonu o lana faamasinoga, na ia filifili ai ia feoti Atamu ma Eva mo a la agasala. Peitaʻi, e iai le faamoemoe mo i tatou o a laʻua fanau. Ua faia e le Atua se auala e tatou te saʻoloto ai mai i lenei tulaga faigatā. O lenā auala, o le taulaga togiola lea a Iesu. Seʻi toe tagaʻi foʻi i le Roma 6:23. Ina ua uma ona taʻua “o le totogi o le agasala o le oti lea,” ona faapea mai lea: “A o le meaalofa a le Atua o le ola e faavavau  lea, e ala iā Keriso Iesu lo tatou Alii.” O lea, o le maliu o Iesu ua mafai ai ona tatou saʻoloto mai i le agasala ma le oti. *

Omeka: E iai se isi faaupuga i lenei mau ou te fia faauaʻi i ai oe.

Sieli: O le ā lenā faaupuga?

Omeka: Seʻi mātau le mau: “A o le meaalofa a le Atua o le ola e faavavau lea, e ala iā Keriso Iesu lo tatou Alii.” Afai o Iesu na mafatia ma maliu e foaʻi mai lona ola e sui aʻi i tatou, aiseā la ua faapea mai ai le mau “o le meaalofa a le Atua,” ae lē faapea mai “o le meaalofa a Iesu”? *

Sieli: Taʻilo, ou te lē iloa.

Omeka: O le Atua na faia Atamu ma Eva, ma ina ua la lē usiusitaʻi i le faatoʻaga i Etena, sa laʻua agasala faasaga iā te ia. E mautinoa na matuā tigā le finagalo o le Atua ina ua la fouvale iā te ia. Peitaʻi, sa vave ona saunia e le Atua se vaifofō. * Sa ia auina mai i le lalolagi se tasi o ana foafoaga agaga, ina ia ola o se tagata lelei atoatoa, ma mulimuli ane foaʻiina mai lona ola e fai ma taulaga togiola. O lea, o le sauniuniga atoa o le togiola, o le meaalofa a le Atua. E iai foʻi se isi itu e faapea atu ai o le meaalofa a le Atua. Pe sa e taumānatu po o ā ni faalogona o le Atua ina ua fasiotia Iesu?

Sieli: Leai.

Omeka: O lea ou te vaai atu o loo taatitia solo mai meataalo. Ou te iloa e iai sau fanau, a ea?

Sieli: Ioe, e toʻalua. O le tama ma le teine.

Omeka: Ona o oe o se matua, seʻi nofo ma mafaufau i faalogona o le Tamā o Iesu i le lagi, o Ieova le Atua, i le aso na maliu ai Iesu. O ā ni ona faalogona ina ua silasila mai i le lagi a o puʻeina, tauemua, tatuʻi ma tapō lona Alo pele? O ā ni faalogona o le Tamā a o silasila mai, ua tutuʻi vae ma lima o lona Alo i luga o le laau e faapuapuagatia ai, ma maliu tigā ai?

Sieli: E mautinoa sa matuā mafatia ma tigā lona finagalo. Ou te leʻi mafaufau lava i lenā mea.

Omeka: Ioe, e lē mafai ona tatou taʻua po o ā tonu lava faalogona o le Atua i lenā aso. Ae ua tatou iloa e iai faalogona o le Atua, ma ua tatou iloa le māfuaaga na ia lē taofia ai na mea uma na tutupu. E manaia le auala o loo faamatala mai ai i le Ioane 3:16, o se mau ua iloa e le toʻatele. E mafai ona e faitau mai le mau faamolemole?

Sieli: Fai mai: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”

Omeka: Faafetai. Seʻi toe tagaʻi foʻi i le amataga o le fuaiupu. Fai mai: “O le alofa tele o le Atua i le lalolagi.” O le māfuaaga autū lenā, o le alofa. O le alofa na uunaʻia ai le Atua e auina mai lona Alo i le lalolagi ina ia maliu mo i tatou. O le taulaga togiola o le faailoaga silisili lea o le alofa. O le mea lenā e faapotopoto Molimau a Ieova ina ia manatua, i tausaga taʻitasi i le faamanatuina o le maliu o Iesu. E ā, po ua fesoasoani lenei talanoaga iā te oe?

Sieli: Ioe. Faafetai lava mo le faaavanoa mai o lou taimi e ta te talanoa ai i lenei mataupu.