Tü paainjüinjatkat süpüla pikirajüin na wawalayuu tooloyuukana
«Tü pütchi tekirajapüʼükat anain pia paala [...], anakaja piʼitaale jooluʼu shia napüleerua na anoujashiikana eekai neʼnnaajünüin sünain aaʼinraa waneepia tü aluwataanakat anain naya.» (2 TIM. 2:2)
1. (1) ¿Kasa natüjaaka aaʼu na aʼyataashiikana nümüin Jeʼwaa? (2) ¿Jamüsü choʼujaaka watüjüinjanain süpüleerua aʼyatawaa nümüin Maleiwa? (3) ¿Kasa ekirajaanajatka sünain ekirajaayakat tüü?
NATÜJAA AAʼU na aʼyataashiikana nümüin Jeʼwaa anain sukuwaʼipa wanee aʼyatawaa nutuma wanee wayuu nütüjüle süpüleerua tü naaʼinrajatkat. Niyamülüin Abraham na nüʼünüükana süka natüjüin atkawaa na nümaajanakana, müshijeseʼe nülejüin Lot wanaa sümaa nütaʼünüin (Gén. 14:14-16, TNM). Wanaa sümaa nuluwataapuʼuin David saaʼu Israel, eejana na wayuu atüjakana maʼin eeʼirajaa nümüin Jeʼwaa (1 Crón. 25:7). ¿Jamüsü choʼujaaka watüjüinjanain süpüleerua aʼyatawaa nümüin Maleiwa? Shia süka waʼünüüin Satanaa müshiʼiya na wayuu nuluwataakana aaʼu (Éf. 6:11-13). Otta müsia süpüla wekirajüinjatüin wayuu nüchiki Jeʼwaa (Heb. 13:15,16). Choʼujaasü maʼin watüjüinjanain süpüla anainjatüin wakuwaʼipa maʼaka naaʼin na wayuu aʼyataapuʼukana nümüin Maleiwa. Müsüjeseʼe niʼitaain Jeʼwaa najapuluʼu na laülaashiikana süpüla nekirajüinjanain na wawalayuu tooloyuukana (2 Tim. 2:2). Sünain ekirajaayakat tüü, wekirajaajeerü anain tü naainjakat waneeinnua laülaashii süpüla nekirajüinjanain na wawalayuu tooloyuukana.
PÜKAALIINJA NIA SÜPÜLA MIYOʼUIN NAALII JEʼWAA NÜPÜLA
2. ¿Kasa naainjüinjatka wanee laülaashi süpüla nikirajüinjachin wanee anoujashi? ¿Jamüsü choʼujaaka naainjain tia?
2 Nüshatüinjatü wanee laülaashi tü naainjakat wanee apünajüi. Jamüshijaʼa nüpünajüinjachire wanee wayuu, nijitüin kaaʼulachaʼa palajana süpüla anainjatüin tü nüpünajüinkat; akaataajaʼa nutuma chi laülaashi ekirajüinjachikai wanee anoujashi, naashajeʼerüinjatü palajana nümüin tü sümakat tü Wiwüliakat. Tia, süpülajatü nütüjaain aaʼu jamüin choʼujaaka naaʼinrüin tü aʼyatawaa ekirajünakalü apüla nia (1 Tim. 4:6).
3. (1) ¿Kasa naainjüinjatka wanee laülaashi süpüla nikirajüin wanee wawala sünain tü pütchi sümakat Marcos 12:29, 30? (2) ¿Kasa eeka süpüla keeʼireein naaʼin wanee wawala puchuntüle nüpüleerua nümüin Jeʼwaa?
3 Laülaashire pia, pütüjaainjatü aaʼu kasain jülüjüin naaʼin chia wawalakai süchiki tü niʼyataainkat nümüin Jeʼwaa. Süpüla pütüjaain saaʼu tia, paashajeʼera nümüin tü pütchi sümakat Marcos 12:29, 30 (paashajeʼera). Süchikijee tia, püsakireein nia sünain kasain naainjain süpüla nikeraajüin tü nümakat nümüin Jeʼwaa wanaa sümaa naapüin naaʼin nümüin. Püsakirapa nia sünain tia, yooteechi nia pümaa süchiki tü keeʼireekat naaʼin süpüla niʼyataainjachin nümüin Jeʼwaa süka süpüshuaʼa naaʼin. Wanee kasa eeka süpüla paainjain puʼuraajapa nümaa chi wawalakai, shia puchuntüin nümüin Jeʼwaa naapaiwa nümüin chi wawalakai chi naaʼinkai süpüla keraain nutuma tü aʼyatawaa eʼitaaneetkat najapuluʼu mapa. Eesüjaʼa süpüla keeʼireejeerüin naaʼin aʼyatawaa napüleerua na wawalayuukana naapüle tia.
4. (1) ¿Kasa eeka süpüla nüküjüin wanee laülaashi nümüin wanee wawala süpüla nükaaliinjain nia sünain aʼyatawaa nümüin Maleiwa? (2) ¿Kasa nikirajaka apüla wanee laülaashi wanee wawala?
4 Pikirajüinjachire wanee wawala, püküjeein nümüin nachiki waneeinnua wayuu anakana akuwaʼipa noʼuluʼu Maleiwa. Paainjüle tia, niyaawateerü aaʼu jamüin choʼujaaka nükaaliinjain na waneeinnua, jüüjüüin nia sünain aainjaa wanee kasa jee nnojoluin pülayaain naaʼin (1 Rey. 19:19-21, Neh. 7:2; 13:13; Aluw. 18:24-26). Naainjüle tia chia wawalakai, kooʼomüinjeerü nunoula maʼaka saaʼin tü apünajuushi miyoʼukat sutuma shijitünüin kaaʼulachaʼa shikiiruʼu. Tia, sükaaliinjeechi chi wawalakai süpüla nüsaʼwatamaatüin wanee aʼyatawaa nümüin Maleiwa. «Tekirajüinjachire wanee wawala, takaaliinjain nia palajana süpüla niyaawatüinjatüin saaʼu tü sümakat tü Wiwüliakat, shiasaʼa niyaawatapa saaʼu tia, nüneeküin tü naainjüinjatkat wanaapünaa sümaa tü sümakat», müshi wanee laülaashi chejeʼewai Francia. Naashin chi laülaashikai, naashajeʼerawalin waneeirua wetsiikulo nümüin süpüla nütüjaain saaʼu tü kasa anakat saashin tü Wiwüliakat (Sal. 119:18). ¿Kasa maa naainjüinjatka wanee laülaashi süpüla nikirajüin wanee wawala süpüla miyoʼuin naalii Jeʼwaa nüpüla?
PÜKÜJA NÜMÜIN TÜ NAAINJÜINJATKAT OTTA JAMÜIN CHOʼUJAAKA SHIA
5. (1) ¿Jamüsü choʼujaaka nüsakinnüin wanee wawala süchiki tü niʼyataweekalü anain nümüin Maleiwa? (2) ¿Jamüshii nekirajüinjanaka na laülaashiikana na wawalayuukana tepichijaiwaʼaya naya? (Paashajeʼera tü nootakat.)
5 Püsakira nia süchiirua tü niʼyataweekalü anain nümüin Maleiwa. «Nnojotsü tatüjaain aaʼu», nümüle pümüin, pükaaliinjeein nia süpüla nüsaʼwatüin wanee aʼyatawaa nümüin Maleiwa. Püküjeein nümüin tü paainjakat paala süpüla püsaʼwatüinjatüin wanee aʼyatawaa nümüin Maleiwa jee püküjeein nümüin talatüin maʼin paaʼin wanaa sümaa saapünüin pümüin tia aʼyatawaakat. Nnojotsü shiain wanee kasa isaka püchiki süpüla paainjain. Naashin wanee wawala, choʼujaasü maʼin saaʼinnüin tia. Chia wawalakai laülaashi nia sümaa pürekutsoolin chaa África. Naashin niakai, asakinnüshinka tepichiiwaʼaya nia nutuma wanee laülaashi kasain niʼyataweein anain nümüin Maleiwa. Tia, sükaaliinjain nia süpüla niyaawatüin saaʼu jamüin choʼujaaka niʼyataainjachin nümüin Maleiwa. Naashin waneeinnua laülaashii, ekirajünüinjana na wawalayuukana tepichijaiwaʼaya naya. Eesüjaʼa süpüla saapünüin namüin waneeirua aʼyatawaa suluʼu tü outkajaaleekat wanaapünaa sümaa nouyase. ¿Jamüshii nekirajüinjanaka na laülaashiikana na wawalayuukana tepichijaiwaʼaya naya? Süka shieerüin kachiiruain naaʼin aʼyatawaa nümüin Jeʼwaa (paashajeʼera Salmo 71:5, 17). *
Süchikijee pikirajüin wanee wawala sünain tü naaʼinrajatkat, püküja nümüin jamüin choʼujaaka naainjain tia jee müsia «anasü maʼin tü paainjakat», püma nümüin (Paashajeʼera pütchi 5 sünainmüin 8)
6. ¿Kasa naainjaka Jesuu süpüla nikirajüinjanain na aluwataaushiikana?
6 Süpüla keeʼireeinjatüin naaʼin wanee wawala niʼyataain nümüin Maleiwa, püküjeein nümüin tü naainjüinjatkat süpüla nüsaʼwatüin wanee aʼyatawaa nümüin Maleiwa jee müsia jamüin choʼujaaka naainjain tia. Tia, shia tü naainjakat Jesuu wanaa sümaa nikirajüin na nümaajanakana. Süpülapünaa nüjütüin na aluwataaushiikana sünain aküjaa pütchi, nüküjüin namüin jamüin choʼujaaka naainjain tia. Anuu nünüiki Jesuu namüin: «Laülaashi taya nütüma chi Tashikai Maleiwa saaʼu wayuu süpüshua yaa mmaluʼu ooʼulaka saaʼu tü kasakalüirua süpüshua chakat iipünaa. Je sükajee tia, juʼuna jumaala sainküin mmakat süpüshua süpüla jüküjainjatüin tachiki sümüin wayuu [...]. Jikirajeena naya süpüla nayainjanain na tekirajüinkana» (Mat. 28:18, 19). Laülaashire pia, ¿kasa paainjüinjatka süpüla püshatüin sukuwaʼipa nikirajia Jesuu?
7, 8. (1) ¿Kasa naainjüinjatka na laülaashiikana süpüla nashatüin sukuwaʼipa nikirajia Jesuu? (2) ¿Jamüsü püküjüinjatka nümüin wanee wawala anain maʼin tü naainjakat sünain wanee kasa? (3) ¿Kasa maa akaaliinjeenaka na laülaashiikana süpüla nekirajüin na wawalayuukana? (Paashajeʼera tü pütchikat « Süpüshi tü kasa anakat süpüla pikirajüin aka na wawalayuu tooloyuukana».)
7 Süpülapünaa puluwataain wanee wawala sünain aaʼinraa wanee kasa, püküjeein nümüin jamüin choʼujaaka naainjain tia saashin tü Wiwüliakat. Mayaa, pikirajeechi nia sünain aainjaa wanee kasa sümaka tü Wiwüliakat. Puluwataainjachire wanee wawala sünain wuleinjatüin nutuma soʼuluʼu tü Piichi Outkajaaleekat, paashajeʼereein palajana nümüin tü sümakat Tito 2:10. Süchikijee tia, püküja nümüin sünain kapülaleejeerüin sümüin wayuu tü Nünüikikat Maleiwa müleka naainjüle tia. Eesüjaʼa süpüla püküjüin nümüin jameerüin aneetka nakuwaʼipa na wawalayuu laülaayuukana sutuma naainjain tia. Paashajaale nümaa süchiki tia, kapüleerü naaʼin nakuwaʼipa na waneeinnua otta aneerü naaʼin sünain aainjaa tia. Shiasaʼa niʼrapa anain tü kasa naainjakat napüleerua na nuwalayuukana, aneerü naaʼin sutuma niʼyataain napüleerua.
8 «Anashaatasü maʼin tü paainjakat», müinjachi pia nümüin chi wawalakai naainjapa tü pümakat nümüin. Choʼujaasü paainjain tia süpüla pükaaliinjain nia sünain asaʼwataa waneeirua aʼyatawaa nümüin Maleiwa. Püküjüle nümüin wanee wawala jamüin anaka maʼin tü naainjakat, müsü aka saaʼin piʼyotule wüin saaʼu maata süpüla jolooloinjatüin shia (anasü paashajeʼerüle Mateo 3:17).
WANEE KASA KAPÜLEEKA AAʼUJEE SHIA
9. (1) Suluʼu tü mma eere jouluin maʼin na washinnuukana, ¿kasa kapüleeka namüin na laülaashiikana? (2) ¿Jamüsü machipünaaka naaʼin waneeinnua jimaʼalii naʼyataain nümüin Maleiwa?
9 Suluʼu tü mma eere jouluin maʼin na washinnuukana, kapüleesü namüin na laülaashiikana nakaaliinjain na wawalayuukana 20 ouyase sünainmüin 40 ouyase süpüla nasaʼwatüin aʼyatawaa nümüin Jeʼwaa. Asakinnüshii waneeinnua laülaashii jamüin kapüleeka namüin tia, suluʼujeejana naya 20 mma. Naashin nayakana, shia süka nnojoliin nekirajatüjüliin nachonnii na wawalayuukana süpüla jülüjüin naaʼin aʼyatawaa nümüin Jeʼwaa. Shiasaʼa eere na jimaʼalii keeʼireekana aaʼin aʼyatawaa nümüin Maleiwa, nemeʼejüin naaʼin na kachoinkana naya süpüla nekerotüin suluʼu eʼikülee miyoʼu washirüinjanaka atuma naya. Makalaka machipünaain naaʼin naya jimaʼaliikana aʼyatawaa nümüin Maleiwa (Mat. 10:24, 25).
10, 11. (1) ¿Kasa naainjüinjatka wanee laülaashi süpüla nikirajüin wanee wawala nnojoika aaʼin shiiʼiree aʼyatawaa nümüin Maleiwa? (2) ¿Jara tü wetsiikulo naashajeʼerüinjatkat wanee laülaashi süpüla saapaanüinjatüin amaa nünüiki? ¿Jamüsü choʼujaaka naainjain tia? (Paashajeʼera tü nootakat.)
10 Nnojorüle naaʼin wanee wawala shiiʼiree aʼyatawaa nümüin Maleiwa, kapüleesü süpüla nükaaliinjünüin. Nnojo piyüülajüin wanee wawala müle nukuwaʼipa, ayata pükaaliinjain nia süpüla kooʼomüinjatüin niʼyataain nümüin Maleiwa. Jamüsüjaʼa shokotule niʼrüin wanee wayuu nümaatain, nuloʼirüin shiʼipaʼaya suulia shokotuin miyoʼupa shia. Akaataajaʼa wanee wawala pükaaliinjainjachi nia shiʼipaʼaya süpüla keeʼireeinjatüin naaʼin aʼyatawaa napüleerua na wawalayuukana. ¿Kasa paainjüinjatka süpüla puuntüin tia?
11 Aleewainjachi pia nümaa chi wawalakai. «Choʼujaashi maʼin pia namüin na wawalayuukana», püma nümüin. Yootopa pia nümaa, püküja nümüin tü sümakat tü Wiwüliakat süpüla jülüjüin naaʼin tü naainjüinjatkat saaʼujee naapüitpain naaʼin nümüin Jeʼwaa (Ecl. 5:4; Is. 6:8; Mat. 6:24, 33, TNM; Luc. 9:57-62; 1 Cor. 15:58; 2 Cor. 5:15; 13:5). Süpüla naapaain chi wawalakai sümaa pünüiki, acheküsü müin pünüiki nümüin mayaa: «¿Kasa püküjaka nümüin Jeʼwaa wanaa sümaa paapüin paaʼin nümüin? ¿Jamüsü naaʼin Jeʼwaa wanaa sümaa woutiisain pia?» (Prov. 27:11). «¿Jamüsü naaʼin Satanaa sutuma woutiisain pia?» (1 Ped. 5:8.) Paashajeʼerüle nümüin waneeirua wetsiikulo makat aka tia, atütülaajeerü naaʼin süpüla aʼyatawaa nümüin Maleiwa (paashajeʼera Hebreokana 4:12, TNM). *
JÜÜJÜÜ PIA SÜNAIN AAʼINRAA TÜ ALUWATAANAKALÜ ANAIN PIA
12, 13. (1) ¿Kasa naainjaka Eliseo wanaa sümaa nuunejaanüin nutuma Elías? (2) ¿Kasa niʼraka Eliseo nutuma Jeʼwaa saaʼujee waneepiain nia nümaa Elías?
12 Piakai jimaʼaikai, choʼujaashi maʼin pia namüin na wawalayuukana. ¿Kasa paainjüinjatka süpüla anainjatüin pukuwaʼipa sünain aʼyatawaa nümüin Jeʼwaa? Süpüla watüjaain saaʼu tia, wekirajaa sünain tü naainjakat Eliseo, wanee wayuu aʼyataapuʼukai nümüin Maleiwa.
13 Eetaairü maʼaka 3.000 juya süchikijee nuunejaanüin Eliseo nutuma Elías süpüla nükaaliinjain nia sünain aʼyatawaa. Jimaʼaishi Eliseo wanaa sümaa tia. Nnojoishi nia aʼalijiraain nuulia Elías jee waneepiashi nia nümaa. Anasü naaʼin sünain aʼyatawaa, jaʼitairü mapüleein tü aluwataanakalü anain nia (2 Rey. 3:11). Ekirajünüshi Eliseo nutuma Elías soʼu aipirua juya. «Kettaatashi taya sünain pükaaliinjain taya yaapünaa», müshi Elías nümüin Eliseo sajaʼttajatpa tü niʼyataainkat namüin na israeliitakana. «Nnojoleechi tapütüin pia», müshi Eliseo apünüintua nümüin Elías. Eesü wanee kasa niʼraka nutuma Jeʼwaa saaʼujee waneepiain nia nümaa Elías. Niʼrüin Elías watta watta nümüin iipünaamüin sutuma wanee wawai wanaa sümaa nümaain nia Maleiwa (2 Rey. 2:1-12).
14. (1) ¿Kasa naainjüinjatka na jimaʼaliikana süpüla nashatüinjatüin nukuwaʼipa Eliseo? (2) ¿Jamüshii jüüjüüinjanaka na jimaʼaliikana sünain aaʼinraa tü aluwataanakalü anain naya?
14 ¿Kasa paainjüinjatka süpüla püshatüin nukuwaʼipa Eliseo? Paainjamaata tü aʼyatawaa eʼitaanakat pajapuluʼu, jaʼitairü müin mapüleechonkai saaʼin pümüin. Chi laülaashi ekirajakai pia, paʼaleewain nia. Püküja nümüin sünain kojutüin pümüin tü naainjakat püpüleerua otta püma nümüin nikirajai pia sooʼomüin. Jüüjüüinjachi pia sünain aaʼinraa tü nuluwataakalü anain pia. Paainjüle tia, nayaawateerü aaʼu na laülaashiikana keeʼireein naaʼin Jeʼwaa saapünüin pümüin aʼyatawaa suluʼu tü outkajaaleekat (Sal. 101:6; paashajeʼera 2 Timoteo 2:2).
KOJUTA PÜMÜIN NA LAÜLAASHIIKANA
15, 16. (1) ¿Kasa niiʼiyataka aka Eliseo kojutüin nümüin Elías? (Piirakaa sümüin tü ayaakua suluʼukat süpana 14.) (2) ¿Jamüshi kojutüka Eliseo namüin na nünüikimaajanakana Maleiwa?
15 Kojutüinjana pümüin na laülaashiikana maʼaka kojutüin Elías nümüin Eliseo. Nüleʼejapa Elías nümaa Eliseo süchikijee anaʼlawaa namüin waneeinnua nünüikimaajana Maleiwa chaa Jericó, chakuwaishii joo naya eemüin tü süchikat Jordán. Shiasaʼa nantapa chayaa, nütsüületüin Elías tü nüsheʼinkat jee niʼyaatakaʼa tü süchikat süka, naainjapa tia, akumajaasü wanee wopu pasanainpünaa sünain tü süchikat. Nalatakalaka pasanainpünaa sünain. Shiasaʼa suʼunnaa nalatüin tü süchikat, jülüjüsü maʼin naaʼin Eliseo tü kasa nikirajakalü anain nia Elías. Süchikijee watta watta nümüin Elías iipünaamüin, oʼunüshi Eliseo nüchikuaʼa eemüin tü süchikat Jordán. Nuchuntakalaka nümüin Jeʼwaa otta niʼyaatakalaka tü süchikat süka tü nüsheʼinkat Elías. Wanaa sümaa naainjain tia, akumajaasü süchikuaʼa wanee wopu pasanainpünaa sünain tü süchikat (2 Rey. 2:8-14).
16 Mayaapejeʼe niaichipain Eliseo aneekünüin süpüla nünüikimaainjachin nia Maleiwa, ayatüsia naainjain tü nikirajakalü anain nia Elías. Kojutüshi Elías nümüin Eliseo, müshijeseʼe naainjain tü nikirajakalü anain nia. Sutumajee tia, kojutüshi nia namüin na nünüikimaajanakana Maleiwa (2 Rey. 2:15). Aʼyataashi Eliseo nümüin Jeʼwaa soʼu 60 juya jee wainma tü kasa pülasü naainjakat nutuma. ¿Kasa shikirajaka anain tia na jimaʼaliikana?
17. (1) ¿Kasa naainjüinjatka na jimaʼaliikana süpüla nashatüin nukuwaʼipa Eliseo? (2) ¿Kasa eeka süpüla naainjain na jimaʼaliikana natüjapeena maʼin?
17 Kooʼomüinre tü aʼyatawaa eʼitaanakat pajapuluʼu suluʼu tü outkajaaleekat, nnojo puʼwanajaain sukuwaʼipa tü ekirajünakalü anain pia. Puʼwanajaainjatü sukuwaʼipa tü piʼyataainkat müleka choʼujaale shia namüin na wawalayuukana jee shiale süka puluwataanüin sutuma nupueulose Maleiwa. Nnojo puʼwanajaain sukuwaʼipa wanee aʼyatawaa, jaʼitasü suchuntaain shia paaʼin. Jamüshijaʼa Eliseo, ayatüsia naainjain tü naainjapuʼukat Elías. Mayaa, niiʼiyatüin nujutü nümüin chi ekirajakai nia, müshijeseʼe kojutüin nia namüin na nünüikimaajanakana Maleiwa. Shiainjatia paaʼinraka tia. Ayatüinjatü paainjain tü sümakat tü Wiwüliakat maʼakaapuʼu nekirajaiwaʼaya pia na laülaashiikana. Müle shia putuma, piiʼiyatüin kojutüin naya pümüin. Jee müshiʼiya na wawalayuukana, kojuteechi pia namüin (paashajeʼera 1 Corinto 4:17). Pütüjapa maʼin, eesü süpüla puʼwanajaain sukuwaʼipa wanee kasa aneetka atuma nakuwaʼipa na wawalayuukana süpüla naainjain tü sümakat nupueulose Maleiwa. Nükaaliinjeechiaʼaya pia Jeʼwaa maʼaka nükaaliinjain Eliseo. Eesüjaʼa süpüla wainmaleejeerüin kasa paainjaka noulia na ekirajakana paala pia (Juan 14:12).
18. ¿Jamüsü choʼujaaka nekirajünüin na wawalayuu tooloyuukana maaʼutpünaa?
18 Tü sümakat tü piamasükat ekirajaaya, süpülajatü sütütüleʼerüin naaʼin na laülaashiikana sünain akatalaa kaʼi süpüla nekirajüin na wawalayuu tooloyuukana. Wachuntüin nümüin Jeʼwaa süpüla keeʼireeinjatüin naaʼin na tooloyuukana naaʼinmajüin na wawalayuukana. Müle shia natuma na laülaashiikana, nakooʼomüinjeerü nanoula na wawalayuukana sainküin mmaka süpüshuaʼa. Jee müsia nakaaliinjeena waneʼewai wakua süpüla waneepiainjanain waya nümaa Maleiwa suʼunnaa tü kasa eejeetkat mapeena.
^ par. 5 Laülaale naaʼin wanee jimaʼai, jüüjüüle nia sünain akaaliinjaa na wawalayuukana sümaa nnojoluin pülayaain naaʼin, eeshii süpüla naashajaajiraain na laülaashiikana süpüla naneeküinjachin nia süpüla niʼyataain neʼipajee, jaʼitairü nnojoluin 20 nuuyase (1 Tim. 3:8-10, 12; paashajeʼera Aapiria Wayuu ojuʼitaka juulioʼu 1, 1989, süpana 29).
^ par. 11 Paashajaapa nümaa chia wawalakai, püküja nümüin tü sümakat Aapiria Wayuu ojuʼitaka aaʼuriiroʼu 15, 2012, süpana 14 sünainmüin 16, pütchi 8 sünainmüin 13, jee müsia tü sümakat tü karalouktakat Ayata alin jüpüla Maleiwa, ekirajaaya 16, pütchi 1 sünainmüin 3.
