1. (a) Hewisa wangila nono mbanua Lowalangi famahaʼö andrö? (b) Hadia nifatunö iadaʼa?

 NO ARA laʼila ono mbanua Yehowa wa famahaʼö lala enaʼö tola mofozu. Duma-dumania, ifaʼanö niha si no toʼölö Aberahamo ba wangorifi Loti, ba aʼozu. (I Moze 14:14-14) Sanunö ba ginötö Dawido no toʼölö ba wanunö khö Yehowa. (I Ngaʼötö 25:7) Talawa Gafökha ba ulidanö tana khönia ba ginötö andre. (Efeso 6:11-13) Taʼodödögö göi ba wanuno Yehowa na taʼombakhaʼö döinia. (Heberaiʼo 13:15, 16) Enaʼö tola mofozu ita simane enoni Lowalangi meföna, moguna tefahaʼö ita. Ifoʼömö ndra satua sokubaloi Yehowa ba wamahaʼö talifusö tanö böʼö ba gangowuloa. (II Timoteo 2:2) So zi no mofozu nifahaʼö ndra satua sokubaloi ba wondrorogö angowuloa. Hewisa wamalua yaʼia?

2. Fatua lö ibeʼe wamahaʼö sibohou, hadia zinangea ifalua satua sokubaloi? Ba hadia mbörö?

² Ba migu silalö, no tafatunö wa satua sokubaloi hulö  simane sohalöwö ba danö. Fatua lö itanö zinanö, ihenaigö ibeʼe wangatabö zinanö. Simanö göi ndra satua sokubaloi, fatua lö labeʼe wamahaʼö sibohou khö nifahaʼö, moguna labeʼe khöra ayati Zura Niʼamoniʼö sanolo yaʼira ba wamalua hadia zi no aboto ba dödöra.​—I Timoteo 4:6.

3. (a) Hewisa wehede Yesu ba Mareko 12:29, 30 tola moguna na fahuhuo ita ba nifahaʼö? (b) Hana wa fangandrö ndra satua sokubaloi tola tobali famarou dödö nifahaʼö?

³ Moguna laʼila ira satua sokubaloi hezo irugi waʼaboto ba dödö nifahaʼö andrö. Börö daʼö, sofu khönia hewisa wa tola tefalalini gera-erania me no aefa tebayagö idanö. Fanofu simane daʼö zanolo yaʼugö ba wahuhuosa khönia enaʼö öʼila nösi dödönia ba wamalua somasi Yehowa. (Baso Mareko 12:29, 30.) Tola mangandrö ami enaʼö ibeʼe khönia geheha Yehowa sanolo yaʼia ba wanema famahaʼö. Na irongo wangandrömö andrö, tola manö terou dödönia ba wamalua halöwö sabölö ebua!

4. (a) Tötöi duma-duma ba Zura Niʼamoniʼö si tola manolo nifahaʼö. (b) Hadia gohitö dödö ndra satua sokubaloi wa lafahaʼö dalifusö tanö böʼö?

⁴ Ba ginötö öbeʼe wamahaʼö, moguna ötutunö khönia hadia zi no irai alua ba Zura Niʼamoniʼö si tola manolo yaʼia enaʼö omasi ia itolo niha, tola tafaduhusi tödö, ba so wangide-ngideʼö. (I Razo 19:19-21; Nehemia 7:2; 13:13; Halöwö Zinenge 18:24-26) Moguna sibai gamuata simane daʼö ba nifahaʼö, hulö wangatabö zinanö. Daʼa zi tola mondrouʼö famatinia. Imane Jean-Claude satua sokubaloi ba Prancis, wa ifahaʼö dalifusö tanö böʼö enaʼö laʼila lahalö gangetula si teʼodane-dane ba Zura Niʼamoniʼö na so zalua. Imane wangumaʼö, ”Si toʼölönia ubeʼe ginötögu khönia ba wamatunö sambua ayati ba Zura Niʼamoniʼö enaʼö tola tebokai wangera-ngerania ba zalua ”zahöli-höli dödö” ba Daromali Lowalangi. (Zinunö 119:18) Hadia nasa nifalua ba wamarou tödö nifahaʼö?

5. (a) Hana wa moguna mufadunö-dunö gohitö dödö ba wamati khö nifahaʼö? (b) Hana wa moguna lafahaʼö zi bohou ebua ira satua sokubaloi? (Faigi zi no musura ba gahe zura.)

⁵ Sofu khö nifahaʼö hadia gohitö dödönia ba wamati. Na lö hadöi, tolo ia ba wotatugöi hadia zi tola ikhamö. Omusoiʼö dödöu baginötö öfatunö khönia hadia gohitö dödöu meföna ba hewisa waʼomuso dödöu me no ökhamö. Lö abua wamalua daʼa tobali so mbua. Imane Victor, satua sokubaloi ba perintis ba Afrika, ”Me ono matua ndraʼo, isofu khögu satua sokubaloi hadia gohitö dödögu ba wamati. Ubörötaigö uhaogö woʼangeraigö halöwögu ba wamalua somasi Lowalangi.” Imane satua sokubaloi si no toʼölö, moguna sibai mufahaʼö zibohou ebua enaʼö teʼosambuaʼö wangera-ngerara irege na no ebua ira dania lö mangoloi dödöra.—Baso Zinunö 71:5, 17. *

6. Hadia lala si sökhi niʼogunaʼö Yesu ba wamahaʼö niha?

 ⁶ Ba wamarou tödö nifahaʼö enaʼö omasi ia möi enoni, ambö na ha öfatunö hadia zinangea ifalua. Tobali fatunö göi hadia mbörö wa moguna. Yesu, samahaʼö si sökhi, ifatenge ndra nifahaʼönia ba wanuriaigö. Hizaʼi siʼoföna, ifatunö hadia mbörö wa lafalua halöwö daʼö. Imane wangumaʼö, ”Fefu waʼabölö andrö ba zorugo ba ba gulidanö, ba no mubeʼe khögu. Miʼaeʼe, mibaliʼö nifahaʼö fefu soi.” (Mataiʼo 28:18, 19) Hewisa woloʼöu famaedo nibeʼe Yesu?

7, 8. (a) Hewisa zatua sokubaloi woloʼö duma-duma nibeʼe Yesu ba wamahaʼö? (b) Hana wamoguna taʼandrö saohagölö khö nifahaʼö? (c) Hadia zinangea lafalua ira satua sokubaloi ba wameʼe famahaʼö? (Faigi ba duho ”Lala Wamomaha Ira Talifusö”.)

⁷ Ba ginötö öbeʼe halöwö dalifusöda ba gangowuloa fatunö khönia si teʼodane-dane ba Zura Niʼamoniʼö hana wamoguna ifalua ia. Na öfalua zimane daʼö, no öfahaʼö ia wamalua goi-goi Zura Niʼamoniʼö tenga ha foloʼö amakhoita. Duma-dumania, na so samösa dalifusö nifataro ba wangehaogö lala ba Nahia Gorahua Mbanua Lowalangi. Fatunö khönia nösi zura Dito 2:10. Ombakhaʼö khönia wa halöwönia andrö sambua lala enaʼö adöni dödö niha ba duria somuso dödö. Andrö khönia enaʼö iʼangeraigö hadia guna halöwönia andrö ba niha satua ba gangowuloa. Huhuo simane daʼö, zi tola manolo yaʼia woʼangeraigö soguna khö ndra talifusöda, moroi ba woloʼö ngawalö gamakhoita. Omuso dödönia na iʼila wa moguna khö ndra talifusö halöwö nifaluania andrö.

⁸ Böi olifu ndraʼugö wangandrö saohagölö khö nifahaʼö ba farou dödönia me no ifalua niwaʼöu khönia. Hana wa moguna daʼö? Simane idanö tola atabö zinanö ibeʼe, simanö göi na öʼandrö saohagölö khönia tola tedou ia ba wamati.—Fatimbaisi Mataiʼo 3:17.

9. (a) Hana wa abua khö ndra satua sokubaloi wameʼe famahaʼö ba mbanua segebua? (b) Hana wa si bohou ebua lö laʼofönaiʼö wangai halöwö Yehowa ba waʼaurira?

⁹ Abua khö ndra satua sokubaloi ba mbanua segebua wamarou tödö zi bohou ebua si 20 mazui si 30 fakhe ba wamalua halöwö ba gangowuloa. La tutunö ira satua sokubaloi si no  toʼölö moroi ba zi 20 soi, hana wa ato ndra talifusöda si lö omasi mamalua halöwö daʼö. Lamane wangumaʼö, börö zatua me lö latanögö ba dödö ndraonora iʼoroi wa ide-ide gohitö dödö ba wamati. He na omasi ndraono andrö ladouʼö halöwöra ba wamati, tobali satua lafarou dödö ndraonora ba wangalui kefe mazui ba wolohi sekola salawa! Lua-luania lö laʼofönaiʼö wamalua halöwö Yehowa ba waʼaurira.—Mataiʼo 10:24.

10, 11. (a) Hewisa wo daʼi-daʼi ndra satua sokubaloi ba wanolo nifahaʼö? (b) Hadia manö ayati niʼogunaʼö ndra satua sokubaloi ba wamarou tödö nifahaʼö, ba hana wa tefaudu ayati andrö? (Faigi nisura ba gahe zura.)

¹⁰ Na so zi lö omasi mangai halöwö si sökhi andrö, moguna muʼodödögö ba wombulöʼö fangera-ngerania. Hewaʼae abua, ba hasambalö tola. Tola ladaʼi-daʼi sohalöwö ba danö wangadölöʼö sinanö si no aöndrö. Simanö göi ndraʼugö tola ödaʼi-daʼi wameʼe ba dödö nifahaʼö enaʼö omasi ia ifalua halöwönia ba gangowuloa. Hewisa lalania?

¹¹ Beʼe ginötöu ba wariawösa khö nifahaʼöu. Fatunö khönia wa moguna sibai ia ba gangowuloa. Na no arara, fatunö khönia hadia ayati si möi fanolo enaʼö itörö tödönia wawuʼusa linia khö Yehowa. (Zangombakha 5:4; Yesaya 6:8; Mataiʼo 6:24, 33; Luka 9:57-62; I Korindro 15:58; II Korindro 5:15; 13:5) Beʼe wanofu famarou dödö khönia, ’Hadia wawuʼusa limö khö Yehowa me öbayagö ndraʼugö idanö? Moloʼö yaʼugö hewisa dödö Yehowa me tebayagö ndraʼugö idanö?’ (Gamaedola 27:11) ’Hewisa göi dödö Gafökha?’ (I Fetero 5:8) Tola terou dödönia ba ayati daʼö.—Baso Heberaiʼo 4:12. *

12, 13. (a) Hadia gamuata niʼoromaʼö Gelisa? (b) Hadia howu-howu nibeʼe Yehowa khö Gelisa me lö faröi ia?

¹² Yaʼami si bohou ebua, moguna sibai ami ba gangowuloa! Hadia gamuata sameʼe yaʼugö mofozu ba wangai halöwö Yehowa? Da tafahaʼö ita khö Gelisa nifahaʼö ba ginötö meföna.

¹³ Me 3.000 fakhe zilalö, ikaoni Gelisa si bohou ebua Elia ba wanolo yaʼia. Fao dödö Gelisa ba lö faröi ia ba wamalua halöwö zawuyu. (II Razo 3:11) Ifomaha Gelisa Elia önö fakhe waʼara. Tobali, me arakhagö awai halöwönia ba ndraono Gizaraʼeli, iʼandrö Elia khö Gelisa enaʼö ibato wohalöwö khönia. Tölu kali imane Elisa, ’Lö fabalido khöu.’ Omasi ia na ara fao ia khö zamahaʼö yaʼia. Ba ifahowuʼö ia Yehowa. Tetehegö khönia wangila Elia me tefazawa ia si fao feʼugu-ugu mbanua.—II Razo 2:1-12.

14. (a) Hewisa woloʼöda duma-duma Gelisa? (b) Hana wamoguna böi faröi ita?

¹⁴ Hewisa nifahaʼö woloʼöra duma-duma Gelisa? Falua halöwö gofu hadia ia, he na hulö halöwö zawuyu. Törö tödöu wa samahaʼö yaʼugö no awöu. Fatunö khönia waʼomuso dödöu me no ifahaʼö ndraʼugö, oromaʼö wa omasi nasa ndraʼugö wotema famahaʼö moroi khönia. Sabölö moguna, böi faröi ndraʼugö ba halöwö nibeʼe khöu. Hadia mbörö? Na lö faröi ndraʼugö ba na  owölö-ölö ndraʼugö wohalöwö, faduhu dödö ndra satua sokubaloi wa omasi Yehowa iʼogunaʼö ndraʼugö ba halöwö khönia.—Zinunö 101:6; baso II Timoteo 2:2.

15, 16. (a) Hadia dandra wa ifosumange zamahaʼö yaʼia Elisa? (Faigi gambara ba ngaʼörö 14.) (b) Hana wa faduhu dödö zamaʼeleʼö tanö böʼö khö Gelisa?

¹⁵ Waö-waö Gelisa zangoromaʼö wamoguna tafosumange ndra satua sokubaloi si no toʼölö. Me no aefa möi Gelia ba Elisa khö ndra samaʼeleʼö ba Yerikho, möi ira ba Nidanö Yoridano. Aefa daʼö, ”ba ihalö mbarunia sebua Elia, igölugö ba iʼamöziʼö nidanö ba fabali nidanö”. Me no aefa laʼötö nidanö si no abeʼe andrö, ”ba laʼowaö-waöʼö wamatunö daʼö”. Ihaogö wamondrongo Elisa hadia niwaʼö Gelia lö aetu ifamaha ia. Lö iʼosonekhe ia Elisa. Tefazawa Gelia ba weʼugu-ugu mbanua, ba mangawuli Gelisa ba Nidanö Yoridano. Ibözi nidanö faoma baru Gelia imane, ’Hezoso Yehowa Lowalangi Gelia andrö?’ Sakalitö, fabali nidanö andrö.—II Razo 2:8-14.

¹⁶ Haogö angeraigö, wa iʼoʼö sibai Elisa dandra sahöli dödö nifalua Gelia me awena tefahaʼö ia. Hadia zi tobali famahaʼönia khöda? Lö imane dödönia Elisa ufalua zi faböʼö moroi ba nifalua Gelia börö me no so khögu waʼabölö. Hizaʼi, me iʼoʼö sibai simane nifalua Gelia, iforomaʼö wa ifosumange zamahaʼö yaʼia, daʼö mbörö wa faduhu dödö zamaʼeleʼö tanö böʼö khönia. (II Razo 2:15) Möi enoni Gelisa 60 fakhe waʼara, itehegö khönia Yehowa wamalua tandra sahöli-höli dödö, oya moroi ba nifalua Gelia. Hadia zi tobali famahaʼö khöda?

17. (a) Hewisa nifahaʼö tola iʼoʼö gamuata Gelisa? (b) Hadia lua-lua na lö faröi nifahaʼö andrö?

¹⁷ Na oya halöwö ni beʼe khöu ba gangowuloa, böi falua halöwö si fabörö-börö. Itaria lafaböʼöni lala halöwö ba mbanua niha keriso börö zoguna ba wamati ndra talifusöda mazui börö goi-goi moroi ba gangowuloa. Böi bulöʼö ha ba zomasi dödöu. Na iʼoʼö Elisa zimane nifalua Gelia, tobali faduhu dödö zamaʼeleʼö tanö böʼö khö Gelisa. Ba daʼö göi zangoromaʼö wa Elisa ifosumange zamahaʼö yaʼia. Simanö göi na öʼoʼö niwaʼö zamahaʼö yaʼugö moloʼö Sura Niʼamoniʼö, no öfosumange ndra satua sokubaloi ba faduhu dödö ndra talifusöda khöu. (Baso I Korindro 4:17.) Na itugu toʼölö ndraʼugö, tola öʼoʼö goi-goi si faböʼö-böʼö si tola manolo banua niha keriso ba woloʼö goi-goi gangowuloa Yehowa si tugu tedou. Ba ginötönia, itolo ndraʼugö Yehowa ba wamalua halöwö sabölö ebua moroi khö zamahaʼö yaʼugö simane me itolo Gelisa.—Yohane 14:12.

18. Hana wa böi mutaha-taha wamahaʼö ira talifusö ba gangowuloa?

¹⁸ Mangandrö ndraʼaga enaʼö famahaʼö ba zi dua migu andre tola tefarou dödö zatua sokubaloi ba wameʼe inötöra ba wamahaʼö ira talifusö. Ba mangandrö göi ndraʼaga salahi ndra talifusö nifahaʼö, enaʼö lafalua hadia zi no tefahaʼö yaʼira ba wondrorogö ono mbanua Yehowa. Famahaʼö andre zangaʼaroʼö fefu gangowuloa ba zi sagörö ulidanö enaʼö lö faröi ba ginötö waʼatosasa ba zi so föna.