Cimeeyye Roduuwa Ikkadda Ikkitanno Gede Qajeelsitanno Gara
“Ani coyiˈranna macciishshoottore . . . ammanantino mannootira hadara wori.”—2 XIM. 2:2.
1. (a) Maganu soqqamaano hundinni jammarte qajeelshu daafira maa huwattino? Tini yannanke ledo mayi xaado afidhino? (b) Konni birxichira maa ronseemmo?
MAGANU soqqamaano hundinni jammarte, qajeelshu hendoonnire qineessate kaaˈlannota huwattino. Lawishshaho, Abirahaami Looxi gatisate “qajeeltino mannootasi haare haˈrino”; kuri mannooti uyinoonninsa looso qineessitino. (Kal. 14:14-16) Nugusu Daawiti waro, Maganu mine faarsitanno faarsaano “Yihowara faarsate qajeeltinoreeti”; konnira insa Magano guwisa dandiitino. (1 Zee. 25:7) Ninkeno yannankera Sheexaanunna harunsaanosi ledo ayyaanaamittete ola olammanni heeˈnoommo. (Efe. 6:11-13) Qoleno, Yihowara guweenya aate sharrammanni heeˈnoommo. (Ibi. 13:15, 16) Konni daafira, hundiri Maganu soqqamaanonte gede ninkerano hedonke qinaabbanno gede qajeelshu hasiisannonke. Yihowa songote giddo, cimeeyyete roduuwa qajeelsitanno gede halaafinate uyinonsa. (2 Xim. 2:2) Temokkiro noonsa cimeeyye roduuwa hoshsha towaatate ikkadda ikkitanno gede qajeelsitanni noohu hiittee doogganniiti?
ROSAANCHO AYYAANAAMITTETENNI JAWAACHISHI
2. Mittu cimeessi mittu rosaanchira qajeelsha aate kaˈˈara albaanni, maa assa hasiissannosiha ikkara dandaanno? Mayira?
2 Mitto cimeessa, gawartichu ledo heewisiisa dandiinanni. Mittu gawartichi wixa wixara albaanni, baatto roore guma uyitanno gede haˈrishsha tugara dandaanno. Hatteente gede, gari temokkiro nookkihura mittu rodiira qajeelsha aate kaˈˈakkira albaanni, rosaanchu wodani qajeelsha adhate roore qixxaawanno gede mite Qullaawu Maxaafi assaawe kula hasiissahera dandiitanno.—1 Xim. 4:6.
3. (a) Yesuusi Marqoosi 12:29, 30 aana coyiˈrinore rosaanchu ledo hasaawate horoonsiˈra dandiinannihu hiittoonniiti? (b) Cimeessu rosaanchu daafira assanno huuccatto rosaancho kaaˈlitannohu ma garinniiti?
3 Rosaanchu macciishshino halaali hedosinna assootesi mageeshshi geeshsha soorre woyyeessinoro afate, togo yite xaˈma dandaatto: ‘Ateneeto Yihowara sayisse aakki heeshshokki soorritinohu ma garinniiti?’ Tini xaˈmo, Yihowara woˈma lubbonni soqqamate yaa mayyaatero hasaabbinanni gede faro fantara dandiitanno. (Marqoosi 12:29, 30 nabbawi. *) Konni hasaawiˈne gedensaanni, Yihowa rosaanchoho qajeelsha gumulate kaaˈlannosiha qullaawa ayyaana aannosi gede huuccatto assattora dandaatto. Roduu isira yite assatto huuccatto macciishshasi lowo geeshsha jawaachishshannosi!
4. (a) Rosaanchu ayyaanaamittetenni lophanno gede kaaˈlitara dandiitannota mite Qullaawu Maxaafi xagge kuli. (b) Cimeeyye roduuwa qajeelsitanno wote, mixonsa maati?
4 Qajeelsha aa hanafatto wote umi qara, rosaanchu maahoyye yaa, ammanamanna shooshaqa ikka hasiissinota ikkitinota huwatanno gede kaaˈlitannosita mite Qullaawu Maxaafi xagge kulattosira dandaatto. (1 Neg. 19:19-21; Neh. 7:2; 13:13; Looso 18:24-26) Baattote haˈrishsha hasiissannonte gede, tini akattano rosaanchoho hasiissannote. Ayyaanaamittetenni rahe lophanno gede kaaˈlitannosi. Faransayete heeˈrannohu Zhani-Kilodi yinanni cimeessi togo yiino: “Qajeelsha eemmo wote qara mixoˈya, rosaanchu ayyaanaamittete hedo noosiha ikkanno gede kaaˈlate. Rosaanchu Maganu Qaali giddo noota ‘dhaggete coyibba’ laˈˈate ‘illesi faˈnitanno’ gede kaaˈlitanno xiqise mitteenni nabbambeemmo faro hasiˈreemmo.” (Far. 119:18) Rosaancho ayyaanaamittetenni jawaachisha dandiinanniti wole doogga hiikkuriiti?
MIXO FUSHSHIDHANNO GEDE KAAˈLENSA, KORKAATANO KULLENSA
5. (a) Mittu rosaanchi ledo ayyaanaamittete mixo daafira hasaawa mageeshshi geeshsha hasiissinote? (b) Cimeeyye shiimaadda ooso qajeelsa hasiissannonsahu mayiraati? (Lekkaalliidi qaagiishsha lai.)
5 Rosaancho, ‘Ayyaanaamitte mixokki maati?’ yite xaˈmisi. Mixo noosikkiha ikkiro, wonshiˈrara dandaanno mixo fushshiˈranno gede kaaˈlisi. Alba ati umikki fushshiˈrootto mixo kulattosira dandaatto; qolteno hatti mixokki woˈmiteenna mageeshshi geeshsha hagiidhoottoro iibbado simmeetenni kulisi. Tini doogo shota labbara dandiitanno; kayinni dancha guma abbitannote. Afirikaho heeˈrannohu Vikitoori yinanni cimeessinna suwisaanchi umisi xagge togo yee coyiˈrino: “Wedellichu noommo waro, mittu cimeessi mixoˈya daafira dancha gede doorantino xaˈmuwa xaˈminoe. Hatti xaˈmuwa soqqanshoˈya daafira seekke heda jammareemmo gede assitinoe.” Temokkiro noonsa cimeeyye, labballo roduuwa dirinsa garinni songote giddo mito looso uyine shiimaaddu heedheenna qajeelsa jammara hasiissannotano xawissino. Konni garinni anjenni qajeelsa, wedellootu hedonsa bebbeehantanno gede assannori batiˈrannote qeedhimmate yannarano ikkiro ayyaanaamittete mixo harunsitanno gede kaaˈlitannonsa. *—Faarso 71:5, 17 nabbawi. *
Rodooho oottosi loosi loosama hasiissinosihu mayiraatiro kulisi, qoleno hakkoye looso loosate assinorira galatisi (Gufo 5-8 lai)
6. Yesuusi woloota qajeelsate horoonsiˈrinoti kaajja doogo hiitteeti?
6 Mittu rosaanchi songote giddo soqqamate kaˈˈanno gede assate, loosannore calla ikkikkinni hakku loosi mayira hasiisinorono kulisi. Loosu loosamanno korkaata kulte Bayiru Rosiisaanchiha Yesuusi lawishsha harunsa dandaatto. Lawishshaho, Yesuusi hawaariyaatesi manna rosaano assitanno gede hajajara albaanni, hattee hajajo wonsha hasiissannonsahu mayiraatiro kulinonsa. Togo yiinonsa: “Silxaane baalanta iimanna uulla uyinoonnie.” Hakkiinni aanche togo yiino: “Konni daafira, hadhine duuchante daga manna . . . rosaano asse.” (Maatewoosi 28:18, 19) Roduuwa qajeelsate Yesuusi lawishsha harunsa dandaattohu hiittoonniiti?
7, 8. (a) Cimeeyye roduuwa qajeelsate Yesuusi lawishsha harunsa dandiitannohu hiittoonniiti? (b) Rosaancho galata mageeshshi geeshsha hasiissinote? (c) Cimeeyye roduuwa qajeelsitanno gede kaaˈlitanno assaawe hiitteeti? (“ Woloota Qajeelsa Dandiinanni Gara” yitanno saaxine lai.)
7 Rosaanchoho ootto loosira xinta ikkitannota Qullaawa Borro assaawe kulisi. Hatto assakki rosaanchu Qullaawu Maxaafihu xintu seeri garinni assaawanno gede rosiissannosi. Lawishshaho, mittu rodiira Mangistete Addaraashe nafara feyannonna kaxxine saˈˈate injaanno gede assara kuloottosi yine hendo. Tito 2:10 horoonsidhe, Addaraashe feyasinna eˈnanniwa seekkasi “Gatisaanchonke ikkino Magani roso gaamaarsate” kaaˈlitanno gara kulisi. Qoleno, songote giddo noo geerri daafira assaawanno gedenna loosisi insa kaaˈlanno gara hedanno gede kulisi. Togoo hasaawi rosaanchu hajajo calla heda agure roorenka mannu daafira assaawanno gede qajeelsannosi. Isi loosino loosi songote giddo noo roduuwa kaaˈlanni noo gara laˈˈasi hagiidhanno gede assitannosi.
8 Hakkiinni saeno, rosaanchu yoottosire assate sharramanno sharrora galatano deˈooti. Tini mageeshshi geeshsha hasiissinote? Wayi muˈro seekke lophitanno gede assannonte gede, galatuno rosaanchu ayyaanaamittetenni roore lophanno gede kaaˈlanno.—Maatewoosi 3:17 ledo heewisiisi.
QARRA IKKANNOHA WOLE COYE
9. (a) Qajeelsha lainohunni dureette gobbuwara heedhannote mite cimeeyyera qarra ikkannori maati? (b) Mitu wedellooti heeshshonsa giddo Maganu looso balaxisiisse egentinokkihu mayiraati?
9 Dureette gobbuwara heedhanno cimeeyyera qarra ikkara dandaannohu wolu coyi, wedella roduuwa songote looso loosate hasatto heedhannonsa gede kakkayisate. Mitu wedellu roduuwi songote halaafinate duqqa xooqqannohu mayiraatiro 20 meddi yitannote Galchimi ragi gobbuwara heedhannore temokkiro afidhino cimeeyye xaˈminoommo. Insa qoltino dawaro giddo qara tenneeti: Mito wedelloota ayyaanaamittete mixo harunsitanno gede anninsanna amansa anje dijawaachishinonsa. Togoo mixo harunsate widira dooˈinore mito wedelloota isinni annuwansanna amuuwinsa maalaamittete coyibba harunsitanno gede amaaltinonsa! Konni daafira kuri wedellooti heeshshonsa giddo Maganu looso balaxisiisse diegentino.—Mat. 10:24.
10, 11. (a) Cimeeyye songote giddo soqqamate hasatto noonsakkire labbanno roduuwa dirimu dirimunni kaaˈla dandiitannohu hiittoonniiti? (b) Mittu cimeessi togoo rodii ledo hasaawate hiittee xiqisubba horoonsiˈra dandaanno? Mayira? (Lekkaalliidi qaagiishsha lai.)
10 Mittu rodii songote giddo soqqamate hasatto noosikkiha lawannoha ikkiro, hedanno gara soorrine biddi assate lowo sharronna cinca hasiissannoha ikkirono, kuni dandaamannoreeti. Mittu gawartichi mite haqqe subbe lophitanno gede damatte sunu sununni suwisannonte gede, atino mito roduuwa songote giddo soqqamate noonsa lao biddi assidhanno gede sunu sununni kaaˈla dandaatto. Hiittoonni?
11 Togoo rodii ledo jaalooma kalaqiˈrate yanna gaaˈmi. Isi songote hasiisannoha ikkinota huwatanno gede kaaˈlisi. Hakkiinni, yanna saˈanni hadhanno wote ledosi ofolte mite Qullaawu Maxaafi xiqisubba horoonsidhe Yihowara isonooto sayise uyi wote eino qaale hedanno gede kaaˈlisi. (Mek. 5:4; Isa. 6:8; Mat. 6:24, 33; Luq. 9:57-62; 1 Qor. 15:58; 2 Qor. 5:15; 13:5) Togo yite xaˈmattosira dandaatto: ‘Ateneeto Yihowara sayisse uyitto wote mayite qaale eootto?’ Wodanasi kakkayisate togo yite ledde xaˈmisi: ‘Cuuamitto wote Yihowara mayi macciishshaminosiha lawannohe?’ (Law. 27:11) ‘Sheexaanehona?’ (1 Phe. 5:8) Dancha gede doorantino xiqisubba nabbawa mittu rodii wodana lowo geeshsha kakkayissara dandiitannota deˈooti. *—Ibiraawuyaani 4:12 nabbawi. *
ROSAANO, AMMANANTINOONNIRE IKKAˈNE LEELLISHSHE
12, 13. (a) Elsai rosaancho ikke noo wote hiittoo akata leellishino? (b) Elsai ammanaminoha ikkinotera Yihowa kiisinosihu hiittoonniiti?
12 Wedella roduuwa, kiˈne kaaˈlo songote hasiissanno! Ikkina, soqqanshoˈne qinaabbinota ikkitanno gede kaaˈlannoˈne akati hiikkoyeti? Tenne xaˈmora dawaro qolate, hanni hunda qajeelsha adhinohu mittu manchi heeshsho giddo ikkinore laˈno.
13 Mitu 3,000 diri albaanni, masaalaanchu Eeliyaasi aja beetto Elsai soqqamaanchosi ikkara koyisino. Elsai konne koyishsha bayichonko adhe konni jawu manchira mannu mishanno looso ammaname loosino. (2 Neg. 3:11) Hakkiinni Elsai mitu lewu diri geeshsha qajeelsha adhi gedensaanni, Eeliyaasi Isiraeelete gobbara loosanno loosi gumulamara kainota huwati. Hatte yannara Eeliyaasi dancha gede qajeelinohu Elsai iso harunsa aguranno gede kulisi; Elsai kayinni sase hige togo yee qolino: “Atewiinni dibaxxeemmo.” Isi dandaami geeshsha rosiisaanchisi ledo keeshshate murciˈrino. Yihowano Elsai ammanaminoha ikkino daafira, Eeliyaasi maalaletenni wolewa haˈranna laˈˈanno gede asse kiisinosi.—2 Neg. 2:1-12.
14. (a) Yannankera noo rosaano Elsai lawishsha harunsa dandiitannohu hiittoonniiti? (b) Mittu rosaanchi ammanaminoha ikkasi hasiissinota ikkitinohu mayiraati?
14 Kiˈne Elsai lawishsha harunsa dandiitinannihu hiittoonniiti? Mannu mishannohano ikkiro uyinanniˈne looso baalanka xiixantinikki loosse. Rosiisaanchoˈne jaaliˈne gede assitine laˈe; hattono, kiˈne qajeelsate yee assannore mageeshshi geeshsha naaddinanniro afanno gede asse. Togoo tumo qolaˈne, “Atewiinni dibaxxeemmo” yitinoonnisihu gedeeti. Roorenkanni kayinni, uyinanniˈne looso ammanantine loosse. Tini hasiissannota ikkitinohu mayiraati? Yihowa songote giddo kiˈnera lexxino halaafinate aaˈnera hasiˈrinota cimeeyye buuxa dandiitannohu ammanantinoonnire ikkitinoonnita leellishshinihu gedensaanniiti.—Far. 101:6; 2 Ximootewosi 2:2 nabbawi. *
ROSIISAANOˈNE AYIRRISSE
15, 16. (a) Elsai rosiisaanchosi ayirrisannota leellishinohu hiitte doogganniiti? (Umi misile lai.) (b) Wole masaalaano Elsai addaxxitanno gede assinori maati?
15 Eeliyaasi soqqamaanchi Elsai daafira kultanno xagge, labballu roduuwi temokkiro noonsa cimeeyye ayirrissannota leellishshanno garano xawissanno. Eeliyaasinna Elsai Iyyaarkote noo masaalaano marte towaattu gedensaanni, lamunku Yordaanoosi Laga martino. Hakkiicho, “Eeliyaasi uddiˈrino kaabba fushshe ere waa gani; hakkiinni wayi lamewa badami.” Lamunku moolino laga tayisse saˈu gedensaanni, “doogo hasaabbanni hadhu.” Hatte yannara, Elsai duuchankare afoommo yee dihedino. Rosiisaanchisi Eeliyaasiwiinni baxxi yanna geeshsha, isi coyiˈrannoha mitto mittonka qaale hixamanye macciishshino. Hakkiinni, Eeliyaasi hambabalattetenni iimira haˈrino. Elsai agure Yordaanosi Lagiwa hige Eeliyaasi uddanonni waa gane, “Eeliyaasi Magani Yihowa hiikko no?” yii. Xaano wayi lamewa badami.—2 Neg. 2:8-14.
16 Elsai loosinoti umi maalale Eeliyaasi jeefote loosi maalale gedeeta ikkitinota huwattinoonni? Tini maa rosiissannonke? Elsai xaate silxaane noosihu iso ikkino daafira, bayichonko assannore wole doogonni assa hasiissannosita dihedino. Hatteentenni, isi Eeliyaasi soqqanshosi soqqamino gara harunse rosiisaanchosi ayirrisannota leellishino; tini qolte wole masaalaano addaxxitannosi gede assitino. (2 Neg. 2:15) Gedensaanni kayinni, Elsai 60 diro masaalaancho ikke soqqami yannara Eeliyaasi loosino maalalenni roortinota batinye maalale loosanno gede Yihowa kaaˈlinosi. Kiˈne rosaano tenne xaggenni maa rossinanni?
17. (a) Yannankera noo rosaano Elsai lawishsha harunsa dandiitannohu hiittoonniiti? (b) Yanna saˈanni hadhanno wote, Yihowa ammanantino rosaano ma garinni horoonsiˈrara dandaanno?
17 Songote giddo halaafinate uyinanniˈne wote, hakkoye looso loonsanni gara bayichonko soorritine albiwiinni horo baxxino garinni loosa hasiissannoˈnehu gede assitine heddinoonte. Loonsanni gara soorra hasiissannoronna teˈee wossanate kiˈne hasatto ikkikkinni, songote hasiisannorenna Yihowa dirijjite uyitannonke biddishsha heda hasiissanno. Elsai Eeliyaasi horoonsiˈrino doogo soorrikki horoonsiˈre wole masaalaano addaxxitannosi gede assino, hattono rosiisaanchosi ayirrisannota leellishino. Hatteente gede, kiˈneno temokkiro noonsa cimeeyye horoonsidhanni keeshshitinota Qullaawu Maxaafi aana xintantino doogga horoonsidhine insa ayirrissinannita leellishanna ammanate roduuwiˈne addaxxitannoˈne gede assa dandiitinanni. (1 Qorontoosi 4:17 nabbawi. *) Ikkollana, temokkiro afidhinanni hadhinanni wote, songo albaagge hadhanni noote Yihowa dirijjite ledo taalo qaaffanno gede hasiissanno taashsho taashshitinanniti dihuluullissannote. Isinni Yihowa Elsai kaaˈlinte gede, kiˈneno albillitte rosiisaanoˈne loossinohunni roorino looso loossinanni gede assaˈnera dandaanno.—Yoh. 14:12.
18. Songote giddo noo roduuwa qajeelsa yannankera lowo geeshsha hasiissinota ikkitinohu mayiraati?
18 Konniranna sai birxichira shiqqino assaawe batinye cimeeyye roduuwa qajeelsate yanna gaaˈmitanno gede kakkayissanno yine hendeemmo. Ikkaddu roduuwi konne qajeelsha hagiirrunni adhite Yihowa hoshsha towaatate hayyotenni horoonsidhara halchineemmo. Konne assa alame woˈmate noo songuwa jawaata ikkitanno gedenna ninke mittu mittunku albillitte daggannote qarru yannara ammanammoommore ikkineemmo gede kaaˈlitannonke.
^ GUFO 3 Marqoosi 12:29, 30: “Yesuusi togo yee qoli: ‘Umiti tenneeti: “Isiraeeli macciishshi, Maganinke Yihowa mitto Yihowaati; atino Maganokki Yihowa woˈmu wodanikkinni, woˈma lubbokkinni, woˈma hedokkinninna woˈma wolqakkinni baxi.”’”
^ GUFO 5 Mittu wedellichi, ayyaanaamittetenni gikki yiinoha, shooshaqanna wole Qullaawa Borro guunte wonshannoha ikkiro, dirisi 20 woˈma hoogirono cimeeyye songote soqqamaancho ikkanno gede shiqishshara dandiitanno.—1 Xim. 3:8-10, 12; Maaja 1, 1989 Agarooshshu Shae (Ingilizete Afoo) qoola 29 lai.
^ GUFO 5 Faarso 71:5, 17: “Aliidi Mooticha Yihowa, hexxoˈya ateeti; anjeˈyanni jammare ate addaxxoommo. Magano, anjeˈyanni jammarte rosiisoottoe; anino xaa geeshsha dhaggete loosokki duduwanni noommo.”
^ GUFO 11 Hasaawu yannara Dotteessa 15, 2012 Agarooshshu Shaera qoola 14-16, gufo 8-13 nna “Maganu Baxillinni Fultinikki Heedhe,” fooliishsho 16, gufo 1-3 noo assaawe horoonsiˈra dandaatto.
^ GUFO 11 Ibiraawuyaani 4:12: “Maganu qaali heeshsho noohonna wolqa afiˈrinoho; lame widoonni qara afidhino bise baalantenni roore iibbinoho; lubbonna ayyaana hattono diimmichonna qoe bada geeshsha qase eanno; qoleno wodanu hedonna alaami maatiro bade afa dandaanno.”
^ GUFO 14 2 Ximootewosi 2:2: “Ani coyiˈranna macciishshoottorenna batinye farciˈraasine farcidhino coyibba, woloota rosiisate ikkadda ikkitinorira ammanantino mannootira hadara wori.”
^ GUFO 17 1 Qorontoosi 4:17: “Ximootewosi kiˈnewa soyanni noommohu iseraati; korkaatuno isi baxeemmohonna Mootichunni ammanamino beettoˈyaati. Isi Kiristoosi Yesuusi lainohunni horoonsiˈreemmota duuchante basera noo songo baalante giddo rosiiseemmo doogga qaagiissannoˈne.”
