1. а) Худайың гуллукчылары түргенлешмек бабатда нәмә гөз етирдилер ве шу гүнлер нәдип түргенлешйәрлер? б) Биз шу макалада нәме барада гүррүң эдерис?

ХУДАЙЫҢ гуллукчылары үстүнлик газанмак үчин түргенлешмегиң ваҗыпдыгына дүшүнйәрлер. Ыбрайым пыгамбер «түргенлешен... эсгерлери» билен Луты халас эдип, еңиш газанды (Гел. чык. 14:14—16). Давут патышаның гүнлеринде Ехованы шөхратландырмак үчин «Реббиң өңүнде айдым айтмаклыга түргенлешдирилен» адамлар барды (1 Йыл. 25:7). Шу гүнлер бизем Шейтан ве онуң яранлары билен рухы сөвеши алып барярыс (Эфес. 6:11—13). Биз Ехованы шөхратландырмак үчин тагалла эдйәрис (Евр. 13:15, 16). Худайың өңки гуллукчылары ялы, бизем үстүнлик газанмак үчин түргенлешмели, ягны гурамада берилйән борчлары ерине етирмеги өвренмели. Яшулулар доганлары йыгнакда җогапкәрли борч алмага тайярламалы. Себәби муны Ехова табшырды (2 Тим. 2:2). Теҗрибели яшулалар доганлара сүриниң аладасыны этмеги нәхили усуллар билен өвредйәрлер?

2. Яшулулар доганларың укыбыны өсдүрмек үчин нәме этмели ве нәме үчин?

² Хава, яшулулары багбана меңзетсе боляр. Белки-де,  багбан нахалы экмезинден өң, топрагы юмшадып, говы иймитлендирмегиң герекдигини гөрер. Шонуң ялы сизем теҗрибеси аз доганларың укыбыны өсдүрмәге көмек этмек үчин, илки билен, оларың йүрегини тәлим алмага тайярлап, Мукаддес Язгылар аркалы беркитмелидигине гөз етирерсиңиз (1 Тим. 4:6).

3. a) Маркус 12:29, 30-нҗы аятларың эсасында нәме барада гүррүң эдип болар? б) Яшулының догасы догана нәхили тәсир эдер?

³ Белки-де, сиз догандан: «Өзүңи Ехова багыш эдениңден соңра дурмушың өзгердими?» дийип сорасаңыз, онуң пикирлерини ве максатларыны аныклап билерсиңиз. Шонда сиз җан аяман гуллук этмек барада гүррүң эдип билерсиңиз (Маркус 12:29, 30-нҗы аятлары окаң). Соңра сиз доганың җогапкәрли борҗы алмагы үчин Еховадан мукаддес рухы диләп билерсиңиз. Доган өзи хакда йүрекден эдилен доганы эшидип, рухланса герек!

4. a) Рухы тайдан өсмәге хөвеслендирйән кәбир аятлары мысал гетириң. б) Яшулулар доганлары тайярланда нәмәни гөз өңүнде тутмалы?

⁴ Сиз кәбир аятлар аркалы догана ыхласлы, ынамдар ве кичигөвүнли болмагың ваҗыпдыгыны дүшүндирип билерсиңиз (1 Пат. 19:19—21; Нех. 7:2; 13:13; Рес. иш. 18:24—26). Шейле хәсиетлер рухы тайдан чалт өсмәге көмек эдйәр. Олары топрагы мес эдйән дөкүне меңзетсе боляр. Франциялы яшулы Жан-Клод шейле диййәр: «Мен доганлары тайярланымда, эсасанам, оларың рухы тайдан догры гарайышда болмагына үнс берйәрин. Мен хер бир пурсатдан пейдаланып, Худайың Сөзүндәки „аҗайып затлара“ „гөзлерини ачмага“ көмек эдйән герекли аяды биле окаярын» (Зеб. 119:18). Ене-де нәхили усуллар окувчыны рухы тайдан беркитмәге көмек эдйәр?

5. a) Яшулулар нәме үчин доганларың рухы максатлары барада сорамалы? б) Яшулулылар доганлары нәме үчин яшлыгындан тайярламалы? (Чыкгыда середиң).

⁵ Сиз окувчыдан: «Сениң нәхили рухы максатларың бар?» дийип сораң. Эгер онуң максады ёк болса, оңа анык ве етип биләйҗек максат гоймага көмек эдиң. Сиз гоян максатларыңыз барада ве олара етениңизде нәхили шатлык тапандыгыңызы гүррүң бериң. Бу усул йөнекей болуп гөрүнсе-де, өрән пейдалы. Африкада пионер болуп гуллук эдйән Виктор атлы яшулы шейле ятлаяр: «Мен етгинҗекгәм бир яшулы доган маңа максатларым барада бирнәче ойландырыҗы сораглары берди. Шейле сораглар өз рухы ягдайым барада чынлакай пикирленмәге көмек этди». Теҗрибели яшулулар йыгнакда доганларың яшына гөрә юмушлары табшырып, етгинҗек дөврүнден талаба лайык гелмәге көмек этмегиң ваҗыпдыгыны ныгтаярлар. Шонда доганлар яшлык хөвеслеринден гачып, үнсүни рухы максатлара гөнүкдирип билерлер * (Зебур 71:5, 17-нҗи аятлары окаң).

6. Иса нәхили гөрелде галдырды?

⁶ Сиз догана юмшы нәдип этмелидигини дәл-де, нәме үчин ерине етирмелидигини дүшүндирсеңиз, ол муны хөвес билен эдер. Бу бабатда сиз Бейик Мугаллым Иса Месихден гөрелде алып билерсиңиз. Меселем, ол ресулларына  юмуш табшыряр ве себәбини шейле дүшүндирип: «Әхли ыгтыяр ерде-гөкде Маңа берилди. Шонуң үчин, гидиң-де, бүтин миллетлери шәгирт эдиң» диййәр (Мат. 28:18, 19). Сиз Исаның гөрелдесине нәдип эерип билерсиңиз?

7, 8. a) Яшулулар Исаның гөрелдесине нәдип эерип билерлер? б) Нәме үчин өвгүли сөзлери айтмалы? в) Яшулулар доганлара көмек этмек бабатда нәхили усуллардан пейдаланып билерлер? (« Доганлара талаба лайык гелмәге көмек эдиң» диен чарчува середиң).

⁷ Сиз Мукаддес Язгылар аркалы юмшуң нәме себәпден табшырыландыгыны дүшүндириң. Шонда догана ондакы принциплериң эсасында пикирленмәге көмек эдерсиңиз. Айдалы, сиз догана Патышалык залының өңүни арассаламагы ве йөремек үчин ховпсыз болмагыны табшырярсыңыз. Шонда сиз Титус 2:9-ы окап, Патышалык залының говы ягдайда сакланмагының «Худайымызың таглыматыны хер бабатда безейәндигини» дүшүндириң. Мундан башга-да, онуң гарташан доган-уялара нәхили пейда гетирйәндиги барада ойланмага көмек эдиң. Шейле гүррүңдешлик догана тертип-дүзгүн барада дәл-де, адамлар хакда алада этмеги өвредер. Ол ерине етирйән ишиниң имандашларына нәхили пейда гетирйәндигини гөрүп, көп шатлык тапар.

⁸ Элбетде, догана маслахата эермәге җан эдйәндиги үчин өвгүли сөзлери айдың. Нәме үчин? Өсүмлигиң өсмегине сувуң герек болшы ялы, йүрекден айдылан өвгүли сөзлер доганы рухы тайдан беркидйәр (Матта 3:17-ни деңешдириң).

9. a) Бай юртларда яшаян яшулулар нәхили кынчылыклара душ гелйәрлер? б) Кәбир яш доганлар нәме үчин Патышалык ишлерини биринҗи орунда гоймаярлар?

⁹ Бай юртлардакы яшулулар башга-да кынчылыга душ гелйәрлер. Меселем, олара сувда чокундырылан 20-30 яшларындакы доганлары рухы тайдан өсмәге хөвеслендирмек аңсат болмаяр. Биз 20 саны гүнбатар юртларындакы теҗрибели яшулулардан яш доганларың җогапкәрли борчлары алмакдан чекинйәндигиниң себәбини сорадык. Шонда олар доганлары яшлыгындан рухы максат гоймага хөвеслендирилмәндигини айтдылар. Эмма кәбир доганлара яшулулар көмек этсе-де, оларың ата-энелери дүнъеви максатлара хөвеслендирйәрдилер. Шейле яшлар Патышалык  ишлерини хич хачан биринҗи орунда гоймандырлар (Мат. 10:24).

10, 11. a) Догана рухы максатлары гоймага яшулы нәдип кем-кемден көмек эдип билер? б) Яшулы хайсы аятлар аркалы пикир алшып билер ве нәме үчин? (Чыкгыда середиң).

¹⁰ Яшулулар рухы максатлары болмадык доганларың пикирини өзгертмек үчин көп тагалла этмели ве сабырлы болмалы. Багбан эгри агачларың гөни өсмеги үчин, олары юваш-ювашдан дикелдйәр. Яшулы хем доганы җогапкәрли борчлары алмага хөвеслендирмек үчин, оңа догры гарайышда болмага кем-кемден көмек эдйәр. Нәдип?

¹¹ Сиз доганың хакыкы досты болмак үчин вагт сарп эдиң. Онуң йыгнага гереклидигини айдың. Соңра онуң билен аркайынчылыкда кәбир аятларың эсасында өзүни Ехова нәме үчин багыш эдендиги барада ойланмага көмек эдиң (Ваг. 5:4; Иш. 6:8; Мат. 6:24, 33; Лука 9:57—62; 1 Кор. 15:58; 2 Кор. 5:15; 13:5). Сиз онуң йүрегине тәсир эдйән шейле сораглары бериң: «Өзүңи Ехова багыш эдениңде нәмәни сөз бердиң? Ехова сениң сувда чокундырыландыгыңы гөренде өзүни нәхили дуяндыр? Бу Шейтана нәхили тәсир эдендир?» (Сүл. тым. 27:11; 1 Пет. 5:8). Говы сайланан аятларың гүйчли тәсир этҗекдигине хич хачан шүбхеленмәң * (Еврейлер 4:12-ни окаң).

12, 13. a) Эляша нәхили гарайышдады? б) Ехова Эляшаны нәдип паталады?

¹² Йыгнакда җогапкәрли борчлары алмак ислейән доганлар, сиз барада нәме дийсе болар? Сиз үстүнлик газанмак үчин нәхили гарайышда болмалы? Гелиң, бу сорагың җогабыны билмек үчин гечмишде болан бир вака середелиң.

¹³ Такмынан 3 000 йыл мундан озал Ыляс пыгамбер Эляшаны көмеклешмәге чагыряр. Эляша чакылыга деррев сесленип, хорматсыз хасапланылян ишлери ерине етирип, гарры пыгамбере вепалы гуллук эдйәр (2 Пат. 3:11). Эляша алты йыл хызмат эденден соңра Ыляс пыгамбериң Ысрайылда гуллук этмели вагтының тамамланып баряндыгына дүшүнйәр. Ыляс окувчысыны долы тайярлаяр. Ол ёлда барярка Эляша өзи билен гитмәге ругсат бермейәр. Эмма Эляша үч гезегем мугаллымына: «Мен сенден галмарын» дийип җогап берйәр. Ол соңуна ченли пыгамбериң янында болмагы йүрегине дүвйәр. Ехова Эляшаның вепалылыгы үчин паталап, Ылясың гудрат билен гөге галандыгының шаяды болмага мүмкинчилик берйәр (2 Пат. 2:1—12).

14. a) Окувчылар Эляшаның гөрелдесине нәдип эерип билерлер? б) Вепалы болмак нәме үчин ваҗып?

¹⁴ Сиз Эляшаның гөрелдесине нәдип эерип билерсиңиз? Эгер сизе-де хорматсыз хасапланылян юмуш табшырылса, оны деррев ерине етириң. Мугаллымыңызы дост хөкмүнде гыммат сайып, эдйән аладасына миннетдарлыгыңызы билдириң. Шонда сиз Эляшаның гөрелдесине эерип: «Мен сенден галмарын» диййән ялы боларсыңыз. Сиз табшырылан юмушларың әхлисини ерине етирип, вепалы болуң. Бу ваҗыпмы? Элбетде, себәби яшулулар вепалылыгыңызы  ве ынама мынасыпдыгыңызы гөренлеринде, Ехованың сизе гошмача җогапкәрли ишлери табшырмак ислейәндигине дүшүнерлер (Зеб. 101:6; 2 Тимотеос 2:2-ни окаң).

15, 16. a) Эляша мугаллымына хормат гойяндыгыны нәдип гөркезйәр? (Макаланың башындакы сурата середиң). б) Эляша пыгамберлери нәдип рухландыряр?

¹⁵ Эляшаның галдыран гөрелдеси доганлара теҗрибели яшулулара нәдип хормат гоймалыдыгыны өвредйәр. Ыляс билен Эляша Ерихода яшаян пыгамберлер билен гөрүшенден соңра Иордана тарап ёла дүшйәрлер. Деряның кенарында «Ыляс донуны алып, дүйрледи-де, онуң билен сува урды. Сув бөлүнип, ики тарапа чекилди». Олар деряның бейлеки кенарына гечип, ене-де гүррүңини довам этдилер. Йөне Эляша инди хемме зады билйәрин диймегиң дерегине, мугаллымының айдян хер бир сөзүни ере гачырман үнсли диңлейәрди. Соңра Ыляс пыгамбер харасат ичинде гөге гөтерилйәр. Эляша ызына доланяр ве Иорданың кенарына барып: «Ханы, Ылясың Худайы Реб ниреде?» дийип гыгыряр. Ол пыгамберден галан доны алып, сува уряр ве сув ене-де ики тарапа бөлүнйәр (2 Пат. 2:8—14).

¹⁶ Үнс берен болсаңыз, Эляшаның илкинҗи гудраты Ыляс пыгамбериң соңкы гудратына меңзешди. Мундан нәме өвренсе болар? Эляша пыгамбер боландан соңра мен хемме зады башгача этмелидирин дийип пикир этмейәр. Гайтам, ол мугаллымына хормат гойяндыгыны иш йүзүнде гөркезип, бейлеки пыгамберлери хем рухландыряр (2 Пат. 2:15). Эляша пыгамбер болуп 60 йыллап гуллук эдйәр ве Ехова оңа Ылясданам көп гудратлары гөркезмәге гүйч берйәр. Окувчылар онуң гөрелдесине нәдип эерип билерлер?

17. a) Окувчылар Эляшаның гөрелдесине нәдип эерип билерлер? б) Вепалы окувчылара Ехова нәхили мүмкинчилик берер?

¹⁷ Сизе йыгнакда җогапкәрли борчлар берленде, деррев дүйпгөтер өзгеришлер этмели дийип пикир этмәң. Бу сизиң ислегиңизе дәл-де, йыгнагың зерурлыкларына ве Ехованың гурамасының берйән гөркезмесине баглы боляр. Эляша пыгамберлери рухландырярды ве мугаллымына хормат гойярды. Сиз хем яшулуларың Мукаддес Язгылара эсасланып эдйән ишлерини голдап, имандашларыңызы рухландырмалы ве мугаллымыңыза хормат гоймалы (1 Коринтослылар 4:17-ни окаң). Доган-уялар гурама билен дең йөрәр ялы, Ехова сизиң теҗрибәңизи уланып, өзгеришлер этмәге ёл берҗекдигине шүбхеленмән билерсиңиз. Белки, Ехова Эляша ялы мугаллымыңыздан-да хас көп ишлери этмәге сизи өз вагтында уланар (Яхя 14:12).

18. Доганлара җогапкәрли борчлары алмага көмек этмеги нәме үчин биринҗи орунда гоймалы?

¹⁸ Биз өңки ве шу макалада доганлара җогапкәрли борчлары алмага көмек этмеги биринҗи орунда гоймалыдыгыны өврендик. Берлен маслахатлар яшулулара пейдалы болар дийип умыт эдйәрис! Гой, доганлар берилйән көмеги хөвес билен кабул эдип, акылдарлык билен имандашларының аладасыны этсинлер! Шонда олар бүтин дүнйәдәки доган-уялара рухы тайдан беркемәге ве гелеҗекдәки ваҗып дөвүрде-де вепалы галмага көмек эдерлер.