1. (a) Ano an maiha na nga hinbabaroan han mga surugoon han Dios may kalabotan ha pagbansay, ngan paonan-o ito naaplikar yana? (b) Ano an aton hihisgotan hini nga artikulo?

AN MGA surugoon han Dios maiha na nga maaram nga an pagbansay o pagtutdo nagriresulta ha kalamposan. Pananglitan, “ginpagowa [ni Abram] an iya mga tinutdoan nga mga tawo” basi talwason hi Lot—ngan naglampos hira. (Gen. 14:14-16) Ha panahon ni Hadi David, an mga parakanta ha balay han Dios “gintutdoan hin kanta” nga nagdadayaw kan Jehova. (1 Kron. 25:7) Yana, nakikig-away kita kan Satanas ngan ha iya kalibotan. (Efe. 6:11-13) Nangangalimbasog liwat kita nga dayawon hi Jehova pinaagi ha pagpakilala han iya ngaran ha iba. (Heb. 13:15, 16) Salit pariho han mga surugoon han Dios ha naglabay, kinahanglan kita mabansay basi maglampos. Ha kongregasyon, igintapod ni Jehova ha mga tigurang an responsabilidad ha pagbansay ha iba. (2 Tim. 2:2) Ano nga pamaagi an ginagamit han eksperyensyado nga mga tigurang ha pagbansay ha kabugtoan nga kalalakin-an basi magin kwalipikado ha pag-ataman han panon?

2. Antes magbansay hin bugto, ano an bangin kinahanglan buhaton han usa nga tigurang, ngan kay ano?

² Sugad nga tigurang, maipapariho ka ha usa nga hardinero. Antes magtanom, bangin kinahanglan abunohan han hardinero an tuna basi magin mabungahon an tanom. Ha pariho nga paagi, antes bansayon han tigurang an usa nga bugto, bangin kinahanglan niya mag-unabi hin pipira nga prinsipyo ha Biblia nga mabulig ha bugto nga magin andam ha pag-aplikar han iya mahibabaroan.—1 Tim. 4:6.

3. (a) Paonan-o magagamit ha pakiistorya ha ginbabansay an ginsiring ni Jesus ha Marcos 12:29, 30? (b) Ano an mahimo magin epekto ha ginbabansay han pag-ampo han tigurang?

³ Basi hibaroan kon mationan-o kadaku an epekto han kamatuoran ha panhunahuna ngan pagbati han imo ginbabansay, mahimo mo hiya pakianhan, ‘Paonan-o an imo dedikasyon kan Jehova nakakaapekto han imo mga desisyon?’ Ito nga pakiana mahimo magresulta ha pagkaada mapulsanon nga pag-istorya mahitungod ha kon paonan-o kita makakag-alagad kan Jehova hin bug-os-kalag. (Basaha an Marcos 12:29, 30.) Katapos han iyo pag-istorya, mahimo ka mag-ampo kaupod niya basi hangyoon hi Jehova nga tagan hiya han baraan nga espiritu nga iya ginkikinahanglan ha iya pagbansay. Mapaparig-on gud hiya nga hibatian an imo kinasingkasing nga pag-ampo para ha iya!

4. (a) Pag-unabi hin mga asoy ha Biblia nga makakabulig ha ginbabansay nga mag-uswag. (b) Ano an sadang magin tumong han mga tigurang kon nagbabansay ha iba?

⁴ Ha tinikangan han pagbansay, hisguti an pipira nga asoy ha Biblia nga makakabulig ha ginbabansay nga hibaroan an pagkaimportante han pagin mabinuligon, masasarigan, ngan mapainubsanon. (1 Hadi 19:19-21; Neh. 7:2; 13:13; Buh. 18:24-26) Ini nga mga kalidad importante ha ginbabansay sugad la nga an abuno importante ha tuna. Mabulig ito nga mag-uswag dayon hiya ha espirituwal. Hi Jean-Claude nga tigurang ha Fransia, nagsiring: “An akon tumong ha pagbansay ha usa amo an pagbulig ha iya nga magin espirituwal nga tawo. Namimiling ako hin higayon nga makabasa kami hin espisipiko nga teksto basi ‘maabrihan an [iya] mga mata’ ha ‘urusahon nga mga bagay’ ha Pulong han Dios.” (Sal. 119:18; Maupay nga Sumat) Ano an iba pa nga paagi ha pagparig-on ha ginbabansay?

5. (a) Kay ano nga importante an pakiistorya ha ginbabansay mahitungod ha espirituwal nga mga tumong? (b) Kay ano nga sadang bansayon han mga tigurang an mga batan-on? (Kitaa an footnote.)

⁵ Pakianhi an imo ginbabansay, ‘Ano an imo espirituwal nga mga tumong?’ Kon waray pa hiya hito, buligi hiya nga magkaada hin makatadunganon nga tumong. May kadasig nga isumat ha iya an mahitungod han usa han imo mga tumong hadto ngan an kalipay nga imo inabat han nakab-ot mo ito. Simple la ini nga paagi pero epektibo. Hi Victor nga tigurang ngan payunir ha Aprika, nagsiring: “Han batan-on pa ako, ginpakianhan ako han usa nga tigurang mahitungod han akon mga tumong. An iya mga pakiana nakabulig ha akon nga seryoso nga hunahunaon an akon ministeryo.” An eksperyensyado nga mga tigurang nagsiring liwat nga importante an pagbansay ha mga brother samtang batan-on o tin-edyer pa pinaagi ha paghatag ha ira hin mga toka ha kongregasyon nga angayan ha ira edad. Mabulig ito ha ira nga magpabilin nga nakapokus ha ira espirituwal nga mga tumong samtang nagtitikaadulto hira ngan kon umatubang hira hin mga pagsulay.—Basaha an Salmo 71:5, 17. *

6. Ano nga importante nga paagi an gin-gamit ni Jesus ha pagbansay ha iba?

 ⁶ Maaaghat mo liwat an imo ginbabansay nga magserbi ha kabugtoan pinaagi ha pag-esplikar ha iya diri la kon ano an sadang niya buhaton kondi kon kay ano nga sadang liwat niya ito buhaton. Ha pagbuhat hito, ginsusubad mo an Bantogan nga Magturutdo nga hi Jesus. Pananglitan, antes sugoon an iya mga apostol nga maghimo hin mga disipulo, naghatag hi Jesus hin rason kon kay ano nga sadang nira ito sundon. Hiya nagsiring: “An ngatanan nga awtoridad ha langit ngan ha tuna iginhatag ha akon.” Katapos hiya nagdugang: “Salit kadto kamo ha mga tawo han ngatanan nga nasud ngan tutdui hira basi magin akon mga disipulo.” (Mat. 28:18, 19) Paonan-o mo masusubad an paagi ni Jesus ha pagbansay?

7, 8. (a) Paonan-o masusubad han mga tigurang yana an paagi ni Jesus ha pagbansay? (b) Kay ano nga importante nga kumendasyonan an ginbabansay? (c) Ano nga mga suhestyon an mabulig ha mga tigurang ha pagbansay ha iba? (Kitaa an kahon nga “ Kon Paonan-o Babansayon an Iba.”)

⁷ Kon gintutokahan an usa nga bugto, isaysay ha iya tikang ha Biblia kon kay ano nga importante an iya toka. Hito nga paagi, gintututdoan mo hiya nga maghunahuna uyon ha mga prinsipyo ha Biblia. Pananglitan, kon gintokahan mo an usa nga bugto ha pagtipig han entrada han Kingdom Hall nga limpyo ngan talwas agian, mahimo mo ipakita ha iya an Tito 2:10. Isaysay kon paonan-o ito nga buruhaton ‘makakahatag hin kadayawan ha katutdoan han aton Paratalwas, an Dios.’ Hangyoa liwat hiya nga hunahunaon an lagas nga kabugtoan ngan kon paonan-o hira magpapahimulos ha pagbuhat niya han iya toka. An pagkaada sugad nga pakiistorya mabulig ha ginbabansay nga magpokus ha mga tawo imbes ha mga surundon. Malilipay gud hiya nga makita kon paonan-o an kabugtoan nagpapahimulos han iya mga ginbubuhat.

⁸ Dugang pa, kumendasyoni an ginbabansay ha iya mga pangalimbasog nga iaplikar an imo mga suhestyon. Kay ano nga importante ito? Tungod kay mabulig ito ha iya nga mag-uswag, sugad la nga natubo an tanom kon ginsasaribohan.—Itanding an Mateo 3:17.

9. (a) Kay ano nga an pipira nga tigurang ha riko nga mga nasud nakukurian ha pagbansay ha iba? (b) Kay ano nga an kamatuoran waray gud magin prayoridad ha kinabuhi han pipira nga batan-on?

⁹ An mga tigurang ha riko nga mga nasud bangin nakukurian ha pagdasig ha kabugtoan nga kalalakin-an nga sobra 20 o sobra 30 anyos nga magbuhat hin dugang pa ha kongregasyon. Ginpakianhan namon an eksperyensyado nga mga tigurang tikang ha mga 20 nga nasud kon kay ano nga may batan-on nga mga brother nga diri interesado ha pagkarawat hin mga pribilehiyo ha kongregasyon. Kadam-an ha ira an nagsiring nga  han burobata pa ini nga kabugtoan, waray hira dasiga han ira mga kag-anak nga magkaada espirituwal nga mga tumong. Ngani, an pipira ha ira nga karuyag unta magkaada hin sugad nga mga tumong gin-aghat lugod han ira mga kag-anak nga magkab-ot hin sekular nga mga tumong! An kamatuoran waray gud magin prayoridad ha kinabuhi hini nga mga batan-on.—Mat. 10:24.

10, 11. (a) Paonan-o mahimo hinay-hinay nga mabuligan han tigurang an usa nga bugto nga mabag-o an iya panhunahuna? (b) Ano nga mga teksto an mahimo gamiton han tigurang basi maaghat an bugto, ngan kay ano? (Kitaa an footnote.)

¹⁰ Kon an usa nga bugto baga hin diri interesado pagbuhat hin dugang pa ha kongregasyon, kinahanglan an daku nga pangalimbasog ngan pagpailob basi mabag-o an iya panhunahuna, pero posible ito. Sugad la nga mahimo giyahan han hardinero an pagtubo han tanom pinaagi ha hinay-hinay nga pagtadong han lawas hito, mahimo mo liwat hinay-hinay nga buligan an bugto nga makita nga kinahanglan niya bag-uhon an iya panhunahuna may kalabotan ha pagkarawat hin mga pribilehiyo. Pero paonan-o?

¹¹ Paggahin hin panahon ha pakigsangkay hito nga bugto. Sumati hiya nga kinahanglan hiya han kongregasyon. Ngan paglabay han panahon, pakiistorya ha iya basi hisgotan an espisipiko nga mga teksto nga mabulig ha iya nga hunahunaon an iya dedikasyon kan Jehova. (Ekles. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5) Mahimo mo hiya pakianhan, ‘Ano an imo iginsaad kan Jehova han nagdedikar ka ha iya?’ Pangalimbasog nga mabantad an iya kasingkasing pinaagi ha pagpakiana, ‘Ha imo hunahuna, ano daw la an inabat ni Jehova han nabawtismohan ka?’ (Prob. 27:11) ‘Ano liwat an inabat ni Satanas?’ (1 Ped. 5:8) Ayaw gud minosa an mahimo magin epekto ha bugto han pagbasa hin pinili hin maopay nga mga teksto.—Basaha an Hebreo 4:12. *

12, 13. (a) Ano nga disposisyon an iginpakita ni Eliseo sugad nga ginbabansay? (b) Paonan-o ginbalosan ni Jehova an pagkamatinumanon ni Eliseo?

¹² Mga batan-on nga kabugtoan nga kalalakin-an, kinahanglan han kongregasyon an iyo bulig! Ano nga disposisyon an mabulig ha iyo nga magin malampuson ha pag-alagad kan Jehova? Basi mabaton ito, hisgotan naton an panhitabo ha kinabuhi han usa nga ginbansay hadto.

¹³ Mga 3,000 ka tuig na an naglabay, gin-aghat ni propeta Elias hi Eliseo nga magin iya kabulig. Inuyon dayon hi Eliseo ngan matinumanon nga nagbuhat hin ubos nga mga buruhaton para ha propeta. (2 Hadi 3:11) Paglabay hin mga unom ka tuig nga pagbansay, hinbaroan niya nga matatapos na an buruhaton ni Elias ha Israel. Hito nga higayon, ginsidngan ni Elias an iya nabansay nga kaupod nga umundang na pagsunod ha iya, pero tulo ka beses nga ginsidngan hiya ni Eliseo: “Diri ako mabaya ha imo.” Determinado gud hi Eliseo nga padayon nga umupod ha iya magturutdo tubtob nga posible. Ginbalosan ni Jehova an iya pagkamaunungon ngan pagkamatinumanon pinaagi ha pagtugot ha iya nga makita hi Elias nga gindara hin alipuros.—2 Hadi 2:1-12.

14. (a) Paonan-o masusubad han mga ginbabansay hi Eliseo? (b) Kay ano nga importante gud nga magin matinumanon an usa nga ginbabansay?

¹⁴ Paonan-o mo masusubad hi Eliseo? Magin andam ha pagkarawat hin mga toka—bisan hin ubos nga mga buruhaton. Tagda an nagbabansay ha imo sugad nga sangkay, ngan sumati hiya nga gin-aapresyar mo gud an iya bulig. Kon gin-aaplikar mo an iya mga igintututdo, sugad hin ginsisidngan mo hiya: “Diri ako mabaya ha imo.” Labaw ha ngatanan, magin matinumanon ha pagbuhat han bisan ano nga igintoka ha imo. Kay ano nga importante gud ito? Tungod kay kon iginpapakita mo nga matinumanon ngan masasarigan ka, makakasiguro an mga tigurang nga karuyag ni Jehova nga taporan ka hin dugang  nga responsabilidad ha kongregasyon.—Sal. 101:6; basaha an 2 Timoteo 2:2.

15, 16. (a) Paonan-o iginpakita ni Eliseo an respeto ha iya magturutdo? (Kitaa an retrato ha tinikangan hini nga artikulo.) (b) Kay ano nga nagkaada pagtapod kan Eliseo an iba nga propeta?

¹⁵ Iginpapakita liwat han asoy mahitungod kan Eliseo kon paonan-o maipapakita han kabugtoan nga kalalakin-an yana an respeto ha eksperyensyado nga mga tigurang. Katapos bisitahon nira Elias ngan Eliseo an usa nga grupo hin mga propeta ha Jerico, nagbaktas hira ngadto ha Salog Jordan. Didto, “kinuha ni Elias an iya kurugpos, ngan hakgumon ini ha tingob, ngan hampakon an mga tubig, ngan [ito] nagkabahin.” Pakatabok nira ha mamara nga tuna han salog, padayon hira nga nag-inistorya samtang naglalakat. Matin-aw nga waray maghunahuna hi Eliseo nga maaram na hiya han ngatanan. Tubtob han pagbaya ni Elias, ginpamatian gud niya an ngatanan nga ginsiring han iya magturutdo. Katapos, hi Elias gindara hin alipuros. Ha urhi, pagbalik ni Eliseo ha Jordan, iya ginhampak an tubig han bado ni Elias, ngan nagsiring: “Hain hi Jehova, an Dios ni Elias?” Makausa pa, nabahin an tubig han salog.—2 Hadi 2:8-14.

¹⁶ Naobserbaran mo ba nga an siyahan nga milagro nga ginhimo ni Eliseo pariho gud han ultimo nga milagro ni Elias? Ano an igintututdo hini ha aton? Waray maghunahuna hi Eliseo nga tungod kay may awtoridad na hiya, kinahanglan niya dayon bag-uhon an pamaagi ni Elias ha pagbuhat han mga butang. Lugod, pinaagi ha pagsubad han pamaagi ni Elias, iginpakita niya an respeto ha iya magturutdo, nga nakabulig ha iba nga propeta nga magkaada pagtapod ha iya. (2 Hadi 2:15) Kondi ha urhi, durante han iya 60 ka tuig nga pag-alagad sugad nga propeta, gintagan hiya ni Jehova hin gahum ha paghimo hin mas damu nga milagro kay han ginhimo ni Elias. Ano an leksyon nga igintututdo hini ha mga ginbabansay yana?

17. (a) Paonan-o masusubad han mga ginbabansay yana an disposisyon ni Eliseo? (b) Ha urhi, paonan-o mahimo gamiton ni Jehova an magtinumanon nga mga ginbabansay?

¹⁷ Kon nakakakarawat ka hin dugang nga responsabilidad ha kongregasyon, ayaw hunahunaa nga kinahanglan mo bag-uhon an nahiaraan na nga pamaagi ha pagbuhat han mga butang. Hinumdumi nga ginhihimo an mga pagbag-o diri tungod kay karuyag mo, kondi tungod han panginahanglan han kongregasyon ngan han giya han organisasyon ni Jehova. Tungod ha padayon nga paggamit ni Eliseo han pamaagi ni Elias, nagkaada pagtapod ha iya an iya mga igkasi-propeta ngan nagpakita ito han iya respeto ha iya magturutdo. Sugad man, kon padayon mo nga gagamiton an basado ha Biblia nga pamaagi han eksperyensyado nga mga tigurang, magkakaada pagtapod ha imo an kabugtoan ngan magpapakita ito han imo respeto ha mga tigurang. (Basaha an 1 Corinto 4:17.) Pero samtang nagkakaada ka eksperyensya, sigurado nga makikigbahin ka ha pagpatuman hin mga pagbag-o nga mabulig ha kongregasyon nga makadungan ha pag-uswag han organisasyon ni Jehova. Ngani, pariho kan Eliseo, bangin gamiton ka ni Jehova ha urhi ha pagbuhat hin labaw pa kay ha ginbuhat han imo magturutdo.—Juan 14:12.

18. Kay ano nga prayoridad gud yana an pagbansay ha kabugtoan nga kalalakin-an ha kongregasyon?

¹⁸ Naglalaom kami nga an mga suhestyon hini ngan han nauna nga artikulo mag-aaghat ha mas damu nga tigurang nga maggahin hin panahon ha pagbansay ha iba. Hinaot karawaton han kwalipikado nga kabugtoan nga kalalakin-an an sugad nga pagbansay ngan maaramon nga gamiton an ira hinbaroan ha pagbulig ha pag-ataman han mga karnero ni Jehova. An pagbuhat hito magpaparig-on han mga kongregasyon ha bug-os nga kalibotan ngan mabulig ha tagsa ha aton nga magpabilin nga matinumanon durante han tiarabot nga makatirigamnan nga mga panhitabo.