Le ancianoʼoboʼ bix unaj u kaʼanskoʼob uláakʼ sukuʼunoʼob
«Le baʼaxoʼob ta wuʼuyaj in waʼalik[oʼ] [...] kʼubéentoʼob tiʼ máaxoʼob chúukaʼan u yóoloʼob.» (2 TIM. 2:2)
1. 1) ¿Baʼax u yojel desde úuchjeakil le máaxoʼob meyajtik Diosoʼ, yéetel baʼaxten kʼaʼabéet u kaʼansaʼal máak bejlaʼeʼ? 2) ¿Baʼax ken k-il teʼ xookaʼ?
DESDE úuchjeakileʼ le máaxoʼob meyajtik Diosoʼ u yojloʼobeʼ le máax ku kaʼansaʼaloʼ maas maʼalob u beetik le baʼax ku kʼubéentaʼaltiʼoʼ. Jeʼex Abraneʼ tu yéeyaj máakoʼob «kaʼansaʼanoʼob baʼateʼel», le oʼolal páajchaj u salvartik Lot tiʼ u enemigoʼob (Gén. 14:14-16, Traducción del Nuevo Mundo). Tu kʼiiniloʼob rey David xaneʼ le máaxoʼob ku kʼaayoʼob utiaʼal u alabarkoʼob Jéeobaoʼ «kaʼansaʼanoʼob kʼaay» (1 Cró. 25:7). Teʼ kʼiinoʼobaʼ táan k-baʼateʼel tu contra Satanás yéetel tu contra le kʼasaʼan yóokʼol kaabaʼ (Efe. 6:11-13). K-ojel xan kʼaʼabéet k-tsʼáaik k-óol kʼaʼaytaj utiaʼal k-alabartik Jéeoba (Heb. 13:15, 16). Chéen baʼaleʼ jeʼex le máaxoʼob meyajt Dios úuchjeakiloʼ, utiaʼal k-ganartik le baʼateʼel yéetel utiaʼal k-alabartik Diosoʼ kʼaʼabéet u kaʼansaʼaltoʼon bix ken k-beetil. Utiaʼal leloʼ Jéeobaeʼ u tsʼaamaj le ancianoʼob utiaʼal u kaʼanskoʼonoʼoboʼ yéetel ku páaʼtik ka u beetoʼob (2 Tim. 2:2). Teʼ xookaʼ yaan k-ilik baʼax tsʼoʼok u beetik jujuntúul ancianoʼob utiaʼal u kaʼanskoʼob uláakʼ sukuʼunoʼob u kanáantoʼob le múuchʼuliloʼ.
ÁANTEʼEXOʼOB U MAAS YAABILTOʼOB JÉEOBA
2. ¿Baʼax maʼalob ka u beet juntúul anciano táanil tiʼ u káajal u kaʼansik juntúul sukuʼun, yéetel baʼaxten?
2 Le ancianoʼoboʼ beyoʼob jeʼex juntúul jardineroeʼ. Juntúul jardineroeʼ táanil tiʼ u pakʼik wa baʼaxeʼ, kʼaʼabéet u tsʼáaik fertilizante teʼ luʼumoʼ, beyoʼ yaan u nojochtal yéetel yaan u maʼalobtal le baʼax ken u pakʼoʼ. Juntúul anciano xaneʼ táanil tiʼ u káajal u kaʼansik juntúul sukuʼuneʼ maʼalob ka u xok tu yéetel jujunpʼéel tekstoʼob tiʼ le Bibliaoʼ. Tumen beyoʼ le sukuʼunoʼ preparado utiaʼal u kʼamik yéetel u beetik tuláakal baʼax kun kaʼansbiltiʼ (1 Tim. 4:6).
3. 1) Juntúul ancianoeʼ, ¿bix jeʼel u meyajtiʼ Marcos 12:29 yéetel 30 utiaʼal u yáantik juntúul sukuʼuneʼ? 2) ¿Baʼax jeʼel u yúuchul wa le anciano ku orar tu yoʼolal le sukuʼunoʼ?
3 Le ancianooʼ kʼaʼabéet u yojéeltik baʼax yaan tu puksiʼikʼal le sukuʼunoʼ. Utiaʼal u yojéeltikeʼ maʼalob ka u kʼáattiʼ baʼaxoʼob tsʼoʼok u beetik desde ka okjaʼanaji. Maʼ xaaneʼ ken tsʼoʼokkeʼ le ancianooʼ jeʼel u páajtal u yaʼaliktiʼ bix jeʼel u meyajtik Dios yéetel tuláakal u puksiʼikʼaleʼ (xok Marcos 12:29, 30). Maʼalob xan ka múul orarnak yéetel le sukuʼun utiaʼal u kʼáatik tiʼ Dios ka tsʼaʼabaktiʼ le kiliʼich muukʼ kʼaʼabéet utiaʼal u kaanbaloʼ. Ken u yuʼub le sukuʼun táan u orar le anciano tu yoʼolaloʼ, maʼ xaaneʼ yaan u taaktal u maas meyajtik Jéeoba.
4. 1) Aʼal jujunpʼéel tekstoʼob jeʼel u yáantik progresar le sukuʼunoʼoboʼ. 2) ¿Yéetel baʼax tuukulil unaj u yáantaʼal le sukuʼunoʼob tumen le ancianoʼoboʼ?
4 Táanil tiʼ u káajal u kaʼansaʼaleʼ le sukuʼunoʼ kʼaʼabéet u yilik baʼaxten unaj u yáantik u maasil, baʼaxten unaj u yilaʼal jeʼel u páajtal u confiar máak tiʼ letiʼeʼ yéetel baʼaxten maʼ unaj u taaskuba nojbaʼaliliʼ. Utiaʼal leloʼ maʼalob ka xakʼaltaʼak tu yéetel jujunpʼéel baʼaxoʼob ku yaʼalik le Bibliaoʼ (1 Rey. 19:19-21; Neh. 7:2; 13:13; Bax. 18:24-26). Le baʼaxoʼob ken u kan teʼ Bibliaoʼ bey jeʼex le fertilizante ku tsʼaʼabal teʼ luʼum utiaʼal u nojochtal le baʼax ku paʼakʼaloʼ. Beyoʼ le sukuʼun kun kaʼansbiloʼ séebaʼan kun progresar. Jean-Claude, juntúul anciano kajaʼan Franciaeʼ, ku yaʼalik yéetel baʼax tuukulil ku yáantik le sukuʼunoʼoboʼ: ku kaʼansiktiʼob u yiloʼob bix jeʼel u chʼaʼikoʼob en cuenta baʼax ku yaʼalik le Biblia utiaʼal u chʼaʼtuklikoʼob baʼax ken u beetoʼoboʼ. Letiʼeʼ tu yaʼaleʼ ku kaxtik u súutukil u xokik junpʼéel teksto jeʼel u beetik u maas taaktal u kaanbal tiʼ le Biblia le sukuʼun ku kaʼansikoʼ (Sal. 119:18). ¿Bix uláakʼ jeʼel u yáantaʼal le sukuʼunoʼoboʼ?
ÁANTEʼEXOʼOB UTIAʼAL U YANTALTIʼOB METAS
5. 1) ¿Bix jeʼel u yáantaʼal juntúul sukuʼun utiaʼal u yantal metas tiʼeʼ? 2) Le ancianoʼoboʼ, ¿baʼaxten kʼaʼanaʼan u yáantkoʼob le sukuʼunoʼob desde ken káajak u táankelemtaloʼoboʼ? (Ilawil le tsolajiloʼ.)
5 Kʼáat tiʼ le sukuʼun baʼax metasil yaantiʼoʼ. Wa minaʼan mix junpʼéel tiʼeʼ, áant ka yanaktiʼ junpʼéel meta jeʼel u béeytal u tsʼoʼokbesikeʼ. Aʼaltiʼ bukaʼaj kiʼimakchajik a wóol le ka ta tsʼoʼokbesaj junpʼéel meta. Jeʼex a wilkoʼ maʼ yaʼab baʼax kʼaʼabéet a waʼalikiʼ, pero yéetel leloʼ jach jeʼel a wáantik juntúul sukuʼuneʼ. Victor, juntúul anciano ku beetik u precursoril tu luʼumil Áfricaeʼ, ku yaʼalik: «Tin táankelmileʼ juntúul ancianoeʼ tu kʼáatajten baʼax metasil yaanten. Le baʼax tu kʼáatajtenoʼ tu beetaj in tuklik bix jeʼel in maas meyajtik Dioseʼ». Sukuʼunoʼob úuch joʼopʼok u beetik u ancianoiloʼobeʼ ku yaʼalikoʼobeʼ jach kʼaʼanaʼan u yáantaʼal le sukuʼunoʼob desde ken káajak u táankelemtaloʼoboʼ. Jeʼel u páajtal u tsʼaʼabal u beetoʼob jujunpʼéel meyajoʼob teʼ múuchʼulil, según u edad. Wa ku yáantaʼaloʼob desde ken káajak u táankelemtaloʼobeʼ, ken maas nojochchajkoʼobeʼ yaan u yantaltiʼob metas yéetel maʼ kun jáan náayal u yóoloʼob yéetel yaanal baʼal (xok Salmo 71:5, 17). *
Tsol tiʼ le sukuʼun baʼaxten unaj u beetik le baʼax ku yaʼalaʼaltiʼoʼ yéetel felicitart ken u beete (Ilawil xóotʼol 5 tak 8)
6. Aʼal baʼaxten maʼalob le bix tu yáantil Jesús u disipuloʼoboʼ.
6 Utiaʼal a wáantik juntúul sukuʼuneʼ, maʼ chéen unaj a waʼaliktiʼ baʼax unaj u beetkiʼ, baʼaxeʼ unaj xan a waʼaliktiʼ baʼaxten unaj u beetik. Jesús, le Maʼalob j-Kaʼansajoʼ, maʼ chéen tu yaʼalaj tiʼ u disipuloʼob ka xiʼikoʼob kʼaʼaytajiʼ, baʼaxeʼ tu yaʼalajtiʼob xan baʼaxten unaj u beetkoʼob. Letiʼeʼ tu yaʼalaj: «Tsʼoʼok u tsʼaʼabalten tuláakal páajtalil teʼ kaʼanoʼ bey xan way Luʼumeʼ. Le oʼolaleʼ, xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob» (Mat. 28:18, 19). Le ancianoʼoboʼ, ¿bix jeʼel u seguerkoʼob u ejemplo Jesuseʼ?
7, 8. 1) Le ancianoʼoboʼ, ¿bix jeʼel u yáantkoʼob u maasil jeʼex tu beetil Jesuseʼ? 2) ¿Baʼaxten jach maʼalob ka felicitartaʼak le sukuʼunoʼoboʼ? 3) ¿Baʼaxoʼob jeʼel u páajtal u beetik juntúul anciano utiaʼal u yáantik juntúul sukuʼuneʼ? (Ilawil le cuadro « Bix jeʼel u kaʼansaʼal le sukuʼunoʼoboʼ».)
7 Ken a waʼal tiʼ juntúul sukuʼun ka u beet junpʼéel meyaj teʼ múuchʼuliloʼ, meyajnaktech le Biblia utiaʼal a weʼesiktiʼ baʼaxten kʼaʼanaʼan le baʼax ken u beetoʼ. Beyoʼ yaan u yilkeʼ teʼ Biblia u taal le baʼax ka waʼaliktiʼoʼ, maʼ chéen teech tuklikiʼ. Ken a waʼal tiʼ juntúul sukuʼun ka u yil u pʼáatal limpio mantatsʼ u yookbal u Najil Reinoeʼ jeʼel u páajtal a weʼesiktiʼ baʼax ku yaʼalik Tito 2:10. Ken tsʼoʼokkeʼ tsoltiʼ baʼaxten le meyaj ku beetkoʼ jeʼel u beetik u maas kʼaʼamal le baʼax k-kʼaʼaytikoʼ. Aʼaltiʼ xan ka tuukulnak tiʼ le sukuʼunoʼob yaan u jaʼabiloʼoboʼ, tsʼoʼoleʼ kʼáattiʼ: «¿Bix jeʼel a wáantkoʼob wa ka beetik le baʼax ku yaʼalaʼaltechoʼ?». Beyoʼ maʼ chéen ken u beet tumen táan a waʼaliktiʼiʼ, baʼaxeʼ yaan u beetik tumen taak u yáantik u maasil. Ken u yil táan u yáantik le sukuʼunoʼoboʼ jach yaan u kiʼimaktal u yóol.
8 Maʼ u tuʼubultech a felicitartik juntúul sukuʼun ken u beet junpʼéel baʼax a waʼalmajtiʼ. ¿Baʼaxten jach maʼalob ka a felicitarte? Jeʼex le jaʼ ku yáantaj utiaʼal u nojochtal le baʼax ka pakʼikoʼ, ken a felicitart juntúul sukuʼuneʼ ka wáantik utiaʼal u progresar teʼ múuchʼuliloʼ (ket yéetel Mateo 3:17).
JUNPʼÉEL PROBLEMA KU YANTAL
9. 1) Yaan tuʼuxoʼobeʼ, ¿baʼax problemail ku aktáantik le ancianoʼob ken u yóotoʼob u yáantoʼob le sukuʼunoʼoboʼ? 2) ¿Baʼaxten yaan sukuʼunoʼobeʼ maʼ tu tsʼáaikoʼob táanil u meyajtikoʼob Dios?
9 Yaan ancianoʼobeʼ ku aktáantkoʼob junpʼéel problema ken u yóotoʼob u yáantoʼob le sukuʼunoʼob yaan 20 tak 30 años tiʼob utiaʼal u maas meyajoʼob teʼ múuchʼuliloʼ. Tiʼ óoliʼ 20 luʼumiloʼobeʼ le sukuʼunoʼob úuch káajak u beetik u ancianoiloʼoboʼ ku yaʼalikoʼob baʼaxten jujuntúul sukuʼunoʼobeʼ maʼ taak u beetkoʼob uláakʼ meyajoʼob teʼ múuchʼuliloʼ. Yaʼab tiʼ le ancianoʼoboʼ tu yaʼaloʼobeʼ jujuntúul sukuʼunoʼobeʼ ka káaj u táankelemtaloʼobeʼ maʼ áantaʼaboʼob tumen u taataʼob utiaʼal u tsʼáaik u yóoloʼob u meyajtoʼob Jéeobaiʼ. Yéetel kex yaan jujuntúul tiʼ letiʼob taak kaʼach u maas meyajtikoʼob Jéeobaeʼ ku yaʼalaʼaltiʼob tumen u taataʼob maas maʼalob ka kaʼanchajak u xookoʼob utiaʼal u yantaltiʼob junpʼéel maʼalob meyaj. Mix juntéen kaʼansaʼabtiʼob u tsʼáaʼob táanil u meyajtikoʼob Dios (Mat. 10:24).
10, 11. 1) Le ancianoʼoboʼ, ¿baʼax jeʼel u páajtal u beetkoʼob utiaʼal yáantkoʼob juntúul sukuʼun maʼ jach taak u beetik uláakʼ meyajoʼob teʼ múuchʼuliloʼ? 2) ¿Baʼax tekstoiloʼob jeʼel u páajtal u meyaj tiʼ juntúul anciano utiaʼal u yáantik juntúul sukuʼuneʼ, yéetel baʼaxten maʼalob ka u beet beyoʼ? (Ilawil le tsolajiloʼ.)
10 Wa juntúul sukuʼun maʼ jach taak u beetik uláakʼ meyajoʼob teʼ múuchʼuliloʼ, jeʼel u bisik tiempo u kʼexik bix u tuukuleʼ, le oʼolaleʼ kʼaʼabéet k-eʼesik paciencia. Juntúul jardineroeʼ utiaʼal maʼ u kʼéechel yaanal tuʼux le chan cheʼ ku pakʼikoʼ jujunpʼíitil u bin u tojkíintik. Teech xaneʼ utiaʼal a wáantik juntúul sukuʼun maʼ jach taak u beetik uláakʼ meyajoʼob teʼ múuchʼuliloʼ, jujunpʼíitil unaj a wáantik u kʼex bix u tuukul. ¿Bix jeʼel u páajtal a wáantikeʼ?
11 Yáaxeʼ unaj a wilik a biskaba yéetel le sukuʼunoʼ. Tsʼoʼoleʼ jeʼel u páajtal a waʼaliktiʼ jach jeʼel u yáantik le múuchʼuliloʼ. U jaajileʼ tumen u kʼubmaj u kuxtal tiʼ Jéeobaeʼ yaan baʼax ku páaʼtaʼal ka u beete. Utiaʼal a beetik u tuukul tiʼ leloʼ jeʼel u páajtal a xokik jujunpʼéel tekstoʼob tu yéeteleʼ (Ecl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Utiaʼal a kʼuchul tu puksiʼikʼaleʼ jeʼel u páajtal a kʼáatiktiʼeʼ: «¿Baʼax ta prometertaj tiʼ Jéeoba le ka ta kʼubaj a kuxtal tiʼ letiʼoʼ? Chéen a waʼalikeʼ, ¿bix tu yuʼubiluba Jéeoba le kʼiin ka okjaʼanajechoʼ?» (Pro. 27:11). «Kux túun Satanás, ¿bix tu yuʼubiluba?» (1 Ped. 5:8.) Wa ka beetik beyoʼ jeʼel a kʼuchul tu puksiʼikʼal le sukuʼunoʼ (xok Hebreoʼob 4:12). *
TÁANKELMEʼEX, CHÚUKPAJAK A WÓOLEʼEX
12, 13. 1) ¿Baʼax tu beetaj Eliseo ka invitartaʼab tumen Elías? 2) Tumen chúukpaj u yóol Eliseoeʼ, ¿baʼax chaʼab u yilik tumen Jéeoba?
12 ¡Táankelmeʼex, jach jeʼel a wáantkeʼex le múuchʼuliloʼ! Chéen baʼaleʼ utiaʼal u páajtal a beetkeʼexeʼ, ¿baʼax tuukulil unaj u yantalteʼex? Utiaʼal k-ojéeltikeʼ koʼoneʼex ilik baʼax tu beetaj Eliseo.
13 Walajki tres mil añosaʼ, profeta Elíaseʼ tu invitartaj Eliseo utiaʼal áantik. Eliseoeʼ tu séebaʼanil tu yóotaj u beete, tsʼoʼoleʼ chúukpaj u yóol u yáant Elías tak tiʼ meyajoʼob maʼ nojoch baʼal u yilaʼal tumen u maasiliʼ (2 Rey. 3:11). Seis años táan kaʼach u kaʼansaʼal Eliseo tumen Elías. Le taʼaytak u xuʼulul u beetik u profetail Elías tu luʼumil Israeloʼ, tu yaʼalaj tiʼ Eliseo jeʼel u páajtal u bineʼ. Chéen baʼaleʼ Eliseoeʼ óoxtéen tu yaʼalaj: «Maʼ bíin in pʼatech ta juunaliʼ». Eliseoeʼ u chʼaʼtukultmaj u pʼáatal tu yiknal Elías le bukaʼaj tiempo ku páajtaleʼ. Tumen chúukpaj u yóol u yáant Elíaseʼ, Jéeobaeʼ tu chaʼaj u yilik bix u bisaʼal Elías tumen junpʼéel kʼaʼamkach iikʼ (2 Rey. 2:1-12).
14. 1) Teʼ kʼiinoʼobaʼ, ¿bix jeʼel u beetik máak jeʼex Eliseoeʼ? 2) ¿Baʼaxten unaj u tsʼoʼokbesik máak le baʼax ku tsʼaʼabal u beetoʼ?
14 Teech táan a wáantaʼaleʼ, ¿bix jeʼel a beetik jeʼex Eliseoeʼ? Unaj a kʼamik le meyajoʼob ku yaʼalaʼaltech ka a beetoʼ, kex maʼ nojoch baʼal u yilaʼaloʼobiʼ. Kʼaʼajaktecheʼ a amigo le máax áantkechoʼ. Aʼaltiʼ kiʼimak a wóol tu yoʼolal baʼax ku beetik ta woʼolal, eʼestiʼ xan taak u seguer a kaanbal tiʼ letiʼ. Chéen baʼaleʼ junpʼéel baʼax maas kʼaʼanaʼaneʼ, letiʼe a tsʼoʼokbesik le baʼax ku tsʼaʼabal a beetoʼ. ¿Baʼaxten? Tumen wa ka beetik beyoʼ, le ancianoʼoboʼ yaan u yilkoʼobeʼ Jéeobaeʼ u kʼáat ka tsʼaʼabaktech uláakʼ meyajoʼob teʼ múuchʼuliloʼ (Sal. 101:6; xok 2 Timoteo 2:2).
RESPETARTEʼEX LE ÚUCHBEN ANCIANOʼOBOʼ
15, 16. 1) ¿Bix tu yeʼesil Eliseo ku respetartik le máax kaʼansoʼ? (Ilawil le dibujo yaan tu káajbal le xookaʼ.) 2) ¿Baʼaxten confiarnaj uláakʼ profetaʼob tiʼ Eliseo?
15 Le baʼax tu beetaj Eliseo úuchjeakiloʼ ku yeʼesik jach unaj u respetartaʼal le úuchben ancianoʼoboʼ. Le ka tsʼoʼok u bin Elías yéetel Eliseo u xíimbaltoʼob u jaats profetaʼob tu kaajil Jericoeʼ binoʼob tu jáal le río Jordanoʼ. Elías túuneʼ «tu chʼaʼaj u [nookʼeʼ,] tu kotsʼajeʼ ka tu pʼuchaj le jaʼoʼ; le jaʼ túunoʼ búuj kaʼatséelil». Letiʼob kaʼacheʼ «táan u tsikbaloʼob» ka tu kʼáatmáansoʼob le Jordán yóoʼ tikin luʼumoʼ. Eliseoeʼ tu jach uʼuyaj baʼax ku bin u yaʼalaʼaltiʼ, le oʼolal seguernaj u kaanbal tiʼ Elías, mix juntéen tu tuklaj wa tsʼoʼok u kanik tuláakal baʼal. Elíaseʼ bisaʼab tumen junpʼéel kʼaʼamkach iikʼ, ka tsʼoʼokeʼ Eliseoeʼ suunaj tu jáal le río Jordanoʼ. Letiʼeʼ tu pʼuchaj le jaʼ yéetel u nookʼ kaʼach Elíasoʼ, ka tu yaʼalaj: «¿Tuʼux yaan Yuumtsil u [Dios] Elías?». Le jaʼ túunoʼ búuj tu kaʼatéen (2 Rey. 2:8-14).
16 ¿Ta tsʼáaj wa cuenta le yáax milagro tu beetaj Eliseooʼ jach bey jeʼex le u tsʼook tu beetaj Elíasoʼ? ¿Baʼax ku kaʼansiktoʼon leloʼ? Eliseoeʼ maʼ tu tuklaj lelaʼ: «Bejlaʼeʼ teen le profetaoʼ, maʼ ken in beet le baʼaloʼob jeʼex u beetik kaʼach Elíasoʼ». Baʼaxeʼ tu yeʼesaj ku respetartik Elías tumen tu beetaj jeʼex kaʼansaʼabiktiʼoʼ. Leloʼ ilaʼab tumen u maasil profetaʼob le oʼolal confiarnajoʼob tiʼ Eliseo (2 Rey. 2:15). Eliseoeʼ 60 años tu beetaj u profetail yéetel tsʼaʼab u páajtalil u beetik maas yaʼab milagroʼob ke Elías. Le máaxoʼob táan u kaʼansaʼaloʼoboʼ, ¿baʼax jeʼel u kankoʼob tiʼ leloʼ?
17. 1) Le sukuʼunoʼob táan u kaʼansaʼaloʼob bejlaʼoʼ, ¿bix jeʼel u beetkoʼob jeʼex Eliseoeʼ? 2) Juntúul sukuʼun ku kaanbaleʼ, ¿baʼax jeʼel u yáantaʼal u beet tumen Jéeoba ken máanak kʼiineʼ?
17 Ken tsʼaʼabak a beet uláakʼ meyajoʼob teʼ múuchʼuliloʼ maʼ a tuklik wa tuláakal baʼal kʼaʼabéet a beetik yaanal bixi. Maʼ u tuʼubultecheʼ utiaʼal a kʼexik junpʼéel wa baʼaxeʼ, chéen unaj a beetik wa jach kʼaʼabéet teʼ múuchʼuliloʼ bey xan wa bey u yaʼalik u kaajal Jéeobaoʼ. Maʼ unaj a beetik chéen tumen uts ta tʼaaniʼ. Úuchik u beetik Eliseo le baʼax kaʼansaʼabtiʼ tumen Elíasoʼ tu yeʼesaj ku respetartik Elías yéetel confiarnaj u maasil profetaʼob tiʼ letiʼ. Bejlaʼa xaneʼ yaan sukuʼunoʼob ku kaʼanskoʼob tiʼ máak bix unaj u beetaʼal jujunpʼéel baʼaloʼob jeʼex u yaʼalik le Bibliaoʼ. Wa ka beetik jeʼex u kaʼanskoʼobtechoʼ, ka weʼesik ka respetartik le úuchben ancianoʼoboʼ. Tsʼoʼoleʼ le sukuʼunoʼob yéetel le kiikoʼob teʼ múuchʼuliloʼ yaan u confiaroʼob tiʼ teech (xok 1 Corintoiloʼob 4:17). Ken máanak kʼiineʼ yaan a maas kaanbal. Maʼ xaaneʼ yaan u kʼaʼabéettal a kʼexik jujunpʼéel baʼaloʼob teʼ múuchʼuliloʼ yéetel yaan a wilik u beetaʼal le baʼaloʼob jeʼex u bin u yaʼalik u kaajal Jéeobaoʼ. Jeʼex tu yáantil Eliseo u beet maas nojoch meyajoʼob ke Elíaseʼ, maʼ xaaneʼ Jéeobaeʼ yaan xan u yáantkech a beet maas nojoch meyajoʼob ke le máax kaʼansechoʼ (Juan 14:12).
18. ¿Baʼaxten jach kʼaʼabéet u kaʼansaʼal uláakʼ sukuʼunoʼob teʼ múuchʼuliloʼ?
18 K-páaʼtikeʼ le baʼaxoʼob ku yaʼalik le xook jeʼelaʼ, bey xan le máanikoʼ, ka u péeks le ancianoʼob u kaʼansoʼob uláakʼ sukuʼunoʼoboʼ. K-kʼáatik xan tiʼ Jéeoba ka u yóot le sukuʼunoʼob ka kaʼansaʼakoʼob utiaʼal u kanáantkoʼob le múuchʼuliloʼ. Wa ku kaʼansaʼal uláakʼ sukuʼunoʼobeʼ jach yaan u bin utsil tiʼ le múuchʼuliloʼoboʼ yéetel yaan u yáantik cada juntúul tiʼ toʼon utiaʼal u chúukpajal u yóol u meyajt Jéeoba teʼ kʼiinoʼob ku taaloʼ.
^ xóot’ol 5 Wa juntúul táankelem ku yeʼesik maʼalob bix u tuukul, kabal u yóol yéetel yaan uláakʼ jatsʼuts modos tiʼeʼ, le ancianoʼoboʼ jeʼel u páajtal u recomendarkoʼob utiaʼal u meyaj bey siervo ministerial kex minaʼan 20 años tiʼeʼ (1 Tim. 3:8-10, 12; ilawil U Pʼíich Tulumil Kanan ich español, 1 tiʼ julio tiʼ 1989, táan juʼun 29).
^ xóot’ol 11 Jeʼel u páajtal a xakʼaltik baʼax ku yaʼalik U Pʼíich Tulumil Kanan, 15 tiʼ abril tiʼ 2012, táan juʼun 14 tak 16, xóotʼol 8 tak 13; bey xan le libro «Pʼáateneʼex tiʼ u yaakunaj Jajal Dios», xook 16, xóotʼol 1 tak 3.
