TAIÑ peñi Julian feipi: “Tañi hunen fotüm huemünentungelu ti trahunche mu, rume cutrantupiuquelehuen. Rume quiñeucülefuyu. Fillque dungu trür femquefuyu. Rume cüme huechengefui, huelu huesaque dungu mu conrumetui. Tañi domo fill antü ngümaquefui, iñche quimlafun chumngechi ñi yafültucuafiel. Cümeque chaungelafuyu chi piquefuyu”.

Felei, rume hueñancün-ngei ñi huemünentungen quiñe che. ¿Chumngelu feipingeafui ñi pengelngen piuqueyehun? Biblia, ¿chumngelu feipiquei ñi huemünentungeal quiñe che? ¿Inei engün huemünentungequei ti trahunche mu? Peafiyiñ.

Quiñe Dunguquelu Ineingen Jehová huemünentungeafui ti trahunche mu huesa culpale, huelu repentiutunole.

Chau Jehová feipiquelaeiñmu taiñ turpu huelulcaunoal, huelu ayüniei taiñ inayafiel ñi feipin taiñ mongen mu. Quisu feipiqueiñmu taiñ femnoal pod cudumuhun, taiñ poyenoafiel adentun, hueñenoal, langümchenoal ca fülconnoal pu huesaque püllü mu (1 Cor. 6:9, 10; Apoc. 21:8).

Felei llemai, Jehová tañi huercün dungu pepilfali ca cümelcaqueiñmu. Fautizaulu iñchiñ, feipicünufiyiñ ta Jehová taiñ inayafiel ñi feipin. Feimu com pu coneltulelu ti trahunche mu cüme piuquengei ca nor piuquengei, fei cüme duamelqueiñmu.

Huelu, ¿huesa culpale cai quiñe cristiano? Cuifi mu quiñeque poyequefilu ta Jehová huesa culpafuingün, huelu Jehová pürüm famentufemlaeyu engün. Quiñe tüfa ta David. Quisu cudumfi ca huentru tañi domo ca langümfalfi ti huentru, huelu Jehová perdonaeyu (2 Sam. 12:13).

David rüf piuque mu repentiucülefui, feimu perdonaeyu Jehová (Sal. 32:1-5). Ca femngechi quiñe cristiano rüf repentiule ca elcünutule tañi huesa femün, huemünentungelayai ti trahunche mu (Hech. 3:19; 26:20). Huelu quimfalnole tañi repentiucülen, pu loncolelu huemünentuaeyu ti trahunche mu.

Quiñe taiñ pu che cam quiñe hueni huemünentungele, nüngaituafuiñ. Pu loncolelu cutranpiuqueyechequelai ca piuqueyechequelai rume piafui taiñ raquiduam. Huelu Biblia quimeltuquei huemünentungen mu quiñe che, pengelngequei piuqueyehun.

Jesús feipi ñi chum tripan mu quiñe dungu quimfali ñi cüme dungungen cam huesa dungungen (Mat. 11:19). Hueñancün-ngeafui rume, huemünentungen mu quiñe che cümeque dungu tripaquei. Feula peafiyiñ.

Yamniengequei Jehová tañi üi. Iñchiñ am yenielu Jehová tañi üi, taiñ femün mu püramyengeafui ta Jehová cam huesa dunguyengeafui (Is. 43:10). Quiñe ejemplo: quiñe pichi huentru cüme femle, saquingeai tañi pu chau. Huelu huesa femle, huesa dunguyengeaingu llemai. Cuifi, Ezequiel tañi antü mu tati pu che quimniefui tati pu judio ñi serfiquefiel ta Jehová (Ezeq. 36:19-23). Ca femngechi fachantü pu che quimniei taiñ serfiquefiel ta Jehová. Feimu cüme femliyiñ, püramyengeai ta Jehová.

Huelu confuliyiñ pod cudumuhun mu, pu che huesa dunguyerpuafui ta Jehová. Feimu Pedro ngülamtui: “Eluulayaimün tamün ngünenieaeteu ti cuifique illutun tamün niequefel petu tamün quimnofiel ta Chau Dios. Doi mai chumngechi lifngei Chau Ngünechen tamün mangeleteu, eimün ca lif chengeaimün com tamün femün meu. Chau Ngünechen ñi huirintucuel feipilei: ‘Chumngechi ñi lifngen iñche, eimün ca lif chengeaimün’” (1 Ped. 1:14-16). Felei llemai, cüme yenieliyiñ taiñ mongen, püramyengeai ta Jehová.

Quiñe testigo huesaque dungu femmequele, caquelu pu che quimüñmayafeyu, fei huesa dunguyeafuingün ta Jehová. Huelu tati huesa femmequelu huemünentungele, fei caquelu pu che ngüneduamafuingün pu testigo ñi yamniefiel Biblia ñi quimeltun ca ñi coneltun re norngechi che müten ti trahunche mu. Peafiyiñ quiñe rupan dungu. Suiza mapu mu quiñe huentru amui Trahunhue Ruca mu, fei feipi ñi cüpa testigongen. ¿Chumngelu? Tüfachi huentru ñi lamngen pod cudumuhun mu confui, feimu huemünentungei ti trahunche mu. Ti huentru afmatulehuei ñi rulpacünungequenon ti huesaque culpan ti trahunche mu.

Cuñiutucungequei ti trahunche. Apostol Pablo feipi quiñe culpafe coneltulele ti trahunche mu, huesalcayafui ta caquelu. Pablo feipi: “Quiñe pichin fayümhue, fayümquefi com ti masan”. Ca femngechi quiñe culpafe huelulcayafui ñi raquiduam ta caquelu che, fei inayentuafeyu tañi huesa femün. Ca feipi: “Huemünentuafimün feichi huesa che eimün mu mülelu” (1 Cor. 5:6, 11-13).

Feichi huentru ñi nütramcael Pablo femmequefui pod cudumuhun, yehuequelafui rume. Pu coneltulelu ti trahunche mu, rume huesa dungu no fel tañi femün pirqueingün (1 Cor. 5:1, 2). Huemünentungenole tüfachi huentru, pu coneltulelu ti trahunche mu ca conürpuafuingün pod cudumuhun mu. Ca femngechi fachantü huemünentungenole pu culpafe, ti trahunche müte falintuhuelayafui Jehová tañi huercün dungu (Ecl. 8:11). Biblia feipi pu culpafe repentiutunole, “miñche co ellcalechi cura” reque feleingün (Jud. 4, 12). Mutrurtucuafuingün reque caquelu cristiano ñi püntütripayal Jehová mu.

Ti culpafe cüme elcünutuafui tañi mongen. Jesús entui quiñe nütram. Quiñe hueche huentru huedhuedcahui, cañpüle amui, com apümtucui tañi plata ca coni huesaque dungu meu. Rupachi antü mu, ngüneduami fente ñi huesa amuletun tañi mongen. Feimu checontui ca huiñotui ñi ruca mu (Luc. 15:11-24). Ti chau ayühunquechi lloutueyu. Ca femngechi Jehová ayühunquechi llouquefi com pu culpafe huiñoraquiduamtulu. Biblia mu Chau Jehová feipi: “Ayühulquelaeneu layüm huesaque che, doi mai ayühulqueneu quiñe huesa che huiñoraquiduamtual ñi mongeleal” (Ezeq. 33:11).

Taiñ trahunche quiñe familia reque felei. Quiñe che huemünentungele, coneltuhuelai tüfachi familia mu. Inaduamle ñi fente huesa femün, huiñoraquiduamtuafui chi. Acordayafui chi ñi ayüucülefel cüme hueniyequefulu Jehová. Hueñancütuafui pu peñi ca pu lamngen ti trahunche mu. Com tüfachi dungu mu, ti huemünentungelu repentiutuafui ca huiñotuafui trahunche mu.

¿Chumngechi quelluafuiñ quiñe huemünentungelu ñi huiñotual trahunche mu? Mülei taiñ inayafiel ñi feipin Chau Dios Biblia mu, femngechi pengelelafiyiñ taiñ piuqueyeniefiel. Peaiñ quiñe ejemplo. Raquiduamaiñ epu che amulu montaña mu. Fei pepi tripalaingu ti pire mu. Petu üngümcülelu ñi montulngeal, quiñe tüfachi che fente cansalelu ca chocolelu umaunagmequeafui. Fei ñi compañ hulelafeyu ange mu ñi nepeleal. ¿Chumngelu? Ti compañ layafui umaunagle. Ñi hulelngen cutrantuafui chi, huelu montulelafeyu ñi mongen. David feipi: “Hulelelimu quiñe nor che, femngechi pengelafeneu tañi nor piuquengen” (Sal. 141:5). David quimniefui norümngeliyiñ cutrantuafuiñ, huelu montulelafeiñmu taiñ mongen.

Ti huemünentun trürümngeafui chumngechi hulelcamequengen tati montañista umaunagmequelu. Quelluquefi ñi nepeleal. Fei huemünentun quelluafeyu ti huesa culpalu ñi huiñotual Jehová mu. Femngechi rupai Julian ñi fotüm taiñ nütramcapeel ti hunen parrafo mu. Quisu cüme elcünutui ñi mongen, fei rupalu mari tripantu huiñotui Jehová mu. Feula loncolei ti trahunche mu. Ca feipi ñi quellueteu ñi huemünentungen, fei inaduami ñi huesa tripaquen feyentunofiel ta Jehová. Quisu feipi: “Rüfcünu, duamniefun ñi norümtungeal” (Heb. 12:7-11).

Rume hueñancün-ngei ñi huemünentungeel quiñe che trahunche mu. Huelu acordayaiñ tüfachi che huiñotuafui Jehová mu. Com iñchiñ quelluntucuafuiñ ti huemünentungelu ñi cüme elcünutual ñi mongen ca ñi huiñotual trahunche mu. ¿Chem chumafuiñ?

Pu loncolelu piuqueyenquechi feipiquefingün ti che ñi coneltuhuenoal trahunche mu. Ca feipiquefingün chumngechi huiñotual trahunche mu. Rupachi antü pu loncolelu inaduamle engün ñi cüme elcünumequetun ñi mongen, fei pemeafeyu ca feipingeafui chumngechi ñi huiño testigongeal.

Ti familia mülei ñi respetayafiel ñi femün pu loncolelu, femngechi pengelafuingün ñi piuqueyefiel ti trahunche ca ti huemünentungelu. Taiñ peñi Julian feipi: “Rumel piuqueyeniefun tañi fotüm, huelu tañi huesa femün mu quiñe malal reque felei iñchiu mu”.

Pu peñi ca pu lamngen trahunche mu mülei ñi respetayafiel ñi femün pu loncolelu, femngechi pengelafui ñi piuqueyefiel ti huemünentungelu. Feimu quiñeucülequelai ca nütramcaquelai ti huemünentungelu engu (1 Cor. 5:11; 2 Juan 10, 11). Ca ti trahunche mülei ñi pengelelafiel piuqueyehun ti familia huemünentungelu quiñe che. Tüfachi familia rume cutrantupiuqueleingün, feimu quisu engün huemünentungelu troquilayafiyiñ. Feimu quiñe püle tripalayaiñ quisu engün mu (Rom. 12:13, 15).

Julian feipi: “Ti huemünentun quiñeque mu duamfalngei, femngechi acordalqueiñmu mülei ñi feyentuafiel Jehová”. Ca feipi: “Cutrancahuafui che, huelu af meu rume cüme tripaquetui. Püntütripanofuli tañi fotüm huemünentungelu, quisu ¿huiñopetuafui chi Jehová mu?”.