“CUANDO ya anuncia que yan disfellow el de mio anak hombre, ya queda gayot yo bien triste,” ya habla si Julian. “Ele el de mio de con todo mayor anak y bien cerca kame na uno y otro; manada kame cosas que ya hace junto. Un buen anak le pero bigla lang ya principia le hace maga cosas que gendeh aceptable. Ya llura que llura el de mio mujer y no sabe yo si paquemodo con ele dale comforta. Pirmi kame ta pregunta con el diamon mismo cuerpo si ya falla ba kame como mayores.”

Porque puede habla que un amable provision el disfellowshipping ciendo ta causa man este bien grande dolor? Cosa el maga razon que base na Biblia si porque tiene disfellowshipping? Y porque tan disfellow con el un persona?

Tan disfellow con el un bautizao Testigo de Jehova si ya hace le con este dos cosas. El una, ya comete le un serioso culpa. El ika-dos, nuay le arripinti na cosa le ya hace.

Maskin pa gendeh kanaton ta expecta perfeccion si Jehova, ta expecta le que el de suyu maga siervo hay obedece con el de suyu maga ley y esta sagrao. Por ejemplo, ya manda kanaton si Jehova que evita con el maga serioso culpa igual na sexual imoralidad, idolatria, ladronadas, extorcion, matanza y espiritismo.​—1 Cor. 6:9, 10; Rev. 21:8.

Gendeh ba tu man uyun que razonable y ta protege kanaton el maga principio de Jehova? Quien ba el no quierre que vivi junto con el maga gente que decente, honesto y ta mentena paz? Ese el cosa kita ta experiencia na diaton maga espiritual hermano y hermana. Por causa se cay ya dedica kita el diaton vida con Dios y ya promete que vivi harmonia na de suyu maga principio na Biblia.

Pero, paquemodo si el un bautizao Cristiano ya puede comete serioso culpa por causa na imperfeccion? El maga fiel siervo de Jehova de antes ya puede hace ansina maga kamali pero nuay kanila dayun abandona el Dios. El un ejemplo de ese amo si Rey David. Ya comete le adulterio y matanza pero maskin pa ansina, si profeta Natan ya habla con ele: “Ya perdona si Jehova con el de tuyu culpa.”​—2 Sam. 12:13.

Ya perdona el Dios con el culpa de David cay sincero este ya arripinti. (Sal. 32:1-5) Na igual manera, hay man disfellow lang el un siervo de Jehova ahora si nuay le arripinti o ta continua le hace si cosa el malo. (Act. 3:19; 26:20) Si el maga anciano quien ta sirvi na judicial committee gendeh ta puede mira evidencia que deverasan ta arripinti el persona, debe con ele man disfellow.

Si yan disfellow el un miembro del diaton familia o un amigo, posible dificil para acepta na primero con el decision y sinti que bien por demas el disciplina. Pero, el Palabra de Jehova claro ta dale mira kanaton que amable ese decision.

Ya habla si Jesus que “sabe kita que el sabiduria de Dios bien verdadero gayot, cay puede kita mira el resulta de ese.” (Mat. 11:19, El Nuevo Testamento) Considera con el tres razon si porque un buen decision que man disfellow con el un persona si nuay ele arripinti.

El disfellowshipping ta honra con el nombre de Jehova. Ciendo ta lleva kita con el nombre de Jehova, el cosa kita ta hace ta afecta si cosa el mirada del maga gente con ele. (Isa. 43:10) El conducta del un anak puede lleva honor o verguenza na de suyu mayores. Ansina tambien el efecto na nombre de Jehova el conducta del de suyu maga siervo. Ta puede protege con el buen nombre del Dios si el maga gente quien ta lleva con ese nombre ta sigui con el maga principio na moral de Jehova. Semejante ese na tiempo de Ezequiel donde sabe el maga gente que el maga Judio amo el maga siervo de Jehova.​—Eze. 36:19-23.

Ta lleva kita verguenza na sagrao nombre del Dios si ta practica kita imoralidad. Ya conseja si apostol Pedro con el maga Cristiano: “Como maga obediente anak, no mas ya ustedes man pa-influencia na maga deseo que tiene ustedes de antes cuando nuay pa ustedes saber, pero igual con el Sagrao Dios quien ya llama con ustedes, queda ustedes sagrao na todo de ustedes conducta, cay este escribido: ‘Debe ustedes queda sagrao, cay iyo sagrao.’” (1 Ped. 1:14-16, NWT) Si ta mentena kita limpio conducta, ta lleva kita honor na nombre del Dios.

Pero si el un Testigo de Jehova ya hace si cosa el malo, grande el posibilidad que hay sabe acerca con este el de suyu maga amigo y conoce. Si man disfellow con ele, hay puede sila mira que limpio el maga siervo de Jehova y ta sigui con el maga principio na Biblia. Por ejemplo, el un gente ya anda na miting na Kingdom Hall na Switzerland y ya habla le que quierre le queda uno del maga Testigo de Jehova. Yan disfellow con el de suyu hermana cay ya comete este imoralidad. Ya habla le que quierre le queda parte del un organizacion que “gendeh ta consinti con el maga mal practica.”

El disfellowshipping ta ayuda para mentena limpio el congregacion. Ya dale aviso si apostol Pablo con el maga de Corinto que peligroso si permiti sila que esta na congregacion aquellos quien ya comete culpa que gendeh ta arripinti. Ya compara le con el mal influencia de ese maga persona na levadura que ta causa para alza el entero masa. “Un poco lang de levadura necesita para hace alza con el entero masa,” ya habla le. Despues, ya conseja le kanila: “Manda sale na de ustedes comunidad con aquellos ta hace malo.”​—1 Cor. 5:6, 11-13.

Ta sale que el persona con quien ya refiri si Pablo ya comete imoralidad y nuay tiene huya. Y el cuanto Cristiano yan razon pa gane para con ese persona. (1 Cor. 5:1, 2) Si consinti lang sila con ese serioso culpa, el otro maga Cristiano posible sigui con el maga imoral practica que comon na diila ciudad. Posible tambien que pensa el otro que gendeh importante el maga principio de Jehova. (Ecl. 8:11) Mas pa, este maga persona que nuay arripinti puede queda como “maga piedra que escondido abajo’y agua” y causa para sumi o destroza el fe del otro na congregacion.​—Jud. 4, 12, NWT.

El disfellowshipping puede ayuda con el quien ya culpa para arripinti. Ya usa si Jesus un ilustracion acerca na un joven hombre quien ya sale na casa del de suyu tata y ya malgasta con el de suyu todo herencia y ya vivi un imoral vida. Este anak ya puede realiza que bien dificil el vida si nuay le na poder del de suyu tata. Poreso, ya arripinti le y ya hace manera para bira na de suyu familia. Bien alegre el tata cuando ya mira le que ya cambia el de suyu anak. (Luc. 15:11-24) Este ilustracion puede ayuda kanaton para entende si cosa ta sinti si Jehova si ta arripinti el un persona. Ya asigura le kanaton: “Gendeh yo ta queda alegre si ta muri el malo, sino alegre yo si ta cambia le y ta continua vivi.”​—Eze. 33:11.

Aquellos quien yan disfellow, gendeh mas parte del Cristiano congregacion​—el diila espiritual familia—​y posible puede este ayuda kanila para realiza si cosa ya perde kanila. Si principia sila experiencia con el maga mal resulta del cosa sila ya hace y si acorda sila el tiempo cuando alegre sila y tiene pa buen relacion con Jehova y con el de suyu maga siervo, puede este ayuda kanila para arripinti.

Para puede ayuda con el quien yan disfellow, necesita dale mira amor y suporta con el disciplina. Si salmista David ya habla: “Si hace man sinti duele conmigo el recto, expresion se de amor leal; si regaña man le conmigo, queda se como aceite na de mio cabeza.” (Sal. 141:5) Para ilustra: Imagina con el dos gente quien ta espera que tiene kanila quien man rescue. Cay bien frio, el uno kanila ya cansa gayot el cuerpo y quierre durmi. Pero si puede le durmi, hay muri le. Para gendeh le puede durmi, ta palmadia con ele el de suyu amigo. Maskin pa duele quel, puede quel salva con el de suyu vida. Na igual manera, ya realiza si David que maskin pa duele el disciplina puede este ayuda con ele.

Na manada situacion, el disfellowshipping amo el disciplina que necesita el quien ya culpa. Despues de maga diez año, el anak de Julian que ya menciona na introduccion, ya hace maga cambio na de suyu vida, ya bira na congregacion y ahora ta sirvi ya como un anciano. “Durante el tiempo que disfellow yo, ya realiza yo que gendeh bueno el maga resulta del maga cosa yo ta hace,” ya admiti el anak de Julian. “Necesita yo con aquel disciplina.”​—Heb. 12:7-11.

Bien maka-triste si tiene quien tan disfellow pero el proposito de este amo para ayuda con ele que bira con Jehova. Cosa hace el cada uno kanaton para dale mira que quierre kita que cumpli ese proposito?

El maga anciano pirmi ta pricura imita con el amor de Jehova especialmente si tan cuento sila con el persona con quien man disfellow. Si ta habla sila con ele acerca na diila decision, claro y na buen manera sila ta explica el maga cosas que necesita le hace para puede bira na congregacion. Si aquellos maga yan disfellow ya dale mira que ya hace sila maga cambio, tiene maga tiempo que el maga anciano puede visita kanila y hace acorda si cosa sila necesita hace para puede bira con Jehova. *

El maga miembro del familia puede dale mira el diila amor para na congregacion y para con el quien ya culpa si respeta sila con el decision del maga anciano. Si Julian ya explica: “Anak siempre le de mio pero gendeh mas kame puede man junto con ele por causa na cosa le ya decidi hace.”

El todo na congregacion puede dale mira el diila amor si evita sila man cuento con el un persona quien yan disfellow. (1 Cor. 5:11; 2 Juan 10, 11) Si hace sila se, ta dale sila mira que ta suporta sila con el disciplina que ya dale si Jehova por medio na maga anciano. Puede tambien kita dale mira amor y suporta con el familia del quien yan disfellow quien ya queda gayot triste y necesita kita manda sinti kanila que parte siempre sila del congregacion.​—Roma 12:13, 15.

Ya habla si Julian: “Si el un persona ya culpa y nuay arripinti, necesita con ele man disfellow. Puede este ayuda con ele para vivi asegun na maga principio de Jehova. Maskin pa ya sinti gayot kame duele, ya tene quel buen resulta na uliji. Si ya continua yo man junto con el de mio anak, gendeh gayot ele bira con Jehova.”