KOLA mekune hmaca hnei Julian lo kola upetröne eë la nekö i nyidrë trahmany. Öni nyidrë: “Kola hace la hning, ke nyëne hi la neköng haetra, nge tru catre la ihnimi nyiho, nyiho pala hi lo a ce huliwa me ce mel.” Julian a qaja fe ka hape, ka lolo pala hi la thiina i nyën, ngo saze pi hi nyën, nge nyëne hë a kuca la itre ewekë ka ngazo. Atraqatre la hleuhleu ne la föi Julian, matre thatreine kö nyidrë akeukawane la hni nyiidro. Öni Julian hmaca jë: “Nyiho hë e cili a isa hnyinge ka hape, ‘Ma ka ngazo jë la aqane ini nyiho?’ ”

Nemene la itre kepine qa hnine la Tusi Hmitrötr ka upe la ekalesia troa upetröne eë la ketre atr? Nge ngacama hace la kola upetröne eë la ketre atr, hnauëne laka hatrene ihnimi hi lai?

E hna kuca la ketre ngazo ka tru hnene la Atre Anyipici Iehova, nge tha ietra kö angeic, tro ha upi angeic qa hnine la ekalesia.

Tha Iehova kö a ajane tro sa pexej, ngo Nyidrëti pe a ajane troa wië la thiina së hnene la hne së hna trongëne la itre wathebo i Nyidrë, laka, tha tro kö a kuci ngazo, me thili koi idrola, me atrekënö, me huliwa qene atrekënö, me ihumuth, me kuci haze.—1 Korinito 6:9, 10; Hna Amamane 21:8.

Ame la nöjei ewekë hnei Iehova hna amekötine koi së, tre, itre ewekë lai hne së hna atreine kuca, nge nyine loi koi së. Hanawange la ketre ceitun, aja së asë hi troa mel e nyipine la itre atr ka huliwa nyipici, me ka thele tingeting. Celë hi hne së hna öhne thene la itre trejine me easë. Hnauëne laka, angatr a ujë tune lai? Hnei angatr hna nue la mele i angatr koi Iehova, me sisinyi troa mele thenge la itre hna amekötine hnei Tusi Hmitrötr.

Ngo, tune kaa ju hë e kei ju la ketre trejine kowe la ngazo? Hna hane traqa lai kowe la itre hlue i Iehova ekö, ngo tha hnei Iehova kö hna nuetriji angatr palua. Kola tui Davita Joxu ekö, ngöne lo nyidrëti a nyixetë me Batheseba, me humuthe la föi nyiidro. Hnei Nathana  perofeta hna qaja koi Davita ka hape, ase hë Iehova nue la ngazo i nyidrë.—2 Samuela 12:13.

Pine nemene matre nue pi Iehova la ngazo i Davita? Pine laka öhne hi Iehova la nyipi ietra ka eje thei Davita. (Salamo 32:1-5) Enehila mina fe, kola nue la itre ngazo hna kuca hnene la itre trejin, e hnei angatr hna nyipi ietra, me hmaca qa ngöne la ngazo hna kuca. (Ite Huliwa 3:19; 26:20) Maine öhne jë hnene la itre qatre thup ka nyi atrene la komite ne iameköti ka hape, pëkö nyipi ietra thene lai trejin, tro lai a upi angeice tröne eë.

E hna upetröne eë la ketre atrene la hnepe lapa i epun, maine ketre sinee i epuni pena, eje hi lai laka, tha ewekë ka hmaloi kö troa kapa, nge maine jë tro epuni a mekun ka hape, tru menu pala ha la hna amekötin. Ngo, Wesi Ula i Iehova a amamane hnyawa koi së laka, ame la kola upetröne eë la ketre atr, tre, hatrene ihnimi hi lai.

Öni Iesu: “Hna qaja amekötine la inamacane hnene la nöjei huliwa ne ej.” (Mataio 11:19) Tro sa pane ce wange la köni kepin, matre loi e troa upetröne eë la ketre atr ka tha ietra kö.

Troa thupëne matre tha tro kö a adrone la ëje i Iehova. Easë la Itretre Anyipici Iehova, nge ëje i Nyidrë la hne së hna xom. Qa ngöne lai, ijije hi tro sa adrone maine atrune la ëje i Iehova. (Isaia 43:10) Ceitune hi lai memine la ketre nekönatr, e ka lolo la aqane ujë i nyën, tro ha qaja aloine la keme me thine i nyën. Ngo e ngazo, tro ha qeje gele nyidro. Ame ngöne lo hneijine i Ezekiela, mama cile hi kowe la itre nöje wanaithihlë ka hape, ka ce tro hi la pengöne la nöje Isaraela memine la ëje i Iehova. (Ezekiela 36:19-23) Enehila mina fe, öhne hnyawa hi la itre atr e cailo fen laka, ka ce tro hi la pengöne la Itretre Anyipici Iehova memine la ëje i Nyidrë. Haawe, maine tro sa catre drengethenge la itre hna amekötine hnei Iehova, tro hë së lai a atrune la ëje i Nyidrë.

Hanawange lo hna qaja hnei Peteru koi angetre Korinito ka hape: “Loi e cei tui nyipunie memine la ite ka idei, nge the cei tune kö memine la aja ka hekö i nyipunie, lo jidi pete kö ; ngo tro nyipunie a hmitöte ngöne la nöjei thina i nyipunie asë, tune la aqane hmitöte nyidëti ate hë nyipunie ; ke ase hë cinyihan ka hape, ‘Hmitöteju nyipunie ; ke hmitöte ni.’ ” (1 Peteru 1:14-16) E tro sa kei kowe la kuci ngazo, tro hë së lai a adrone la ëje i Iehova. Ngo, e tro sa thupëne matre tro pala hi a loi la aqane ujë së, tro hë së lai a atrune la ëje i Nyidrë.

E kei pi kowe la ngazo hnene la ketre trejin, tro fe hë lai a hane atre hnene la itre sinee i angeic. Haawe, ame hë la angatr a atre ka hape, tha atre Anyipici Iehova hmaca kö angeic, tro fe hë angatre lai a öhne ka hape, ame la hlue i Iehova, tre, ka drengethenge la hna amekötine hnei Tusi Hmitrötr. Ketre, ame la hlue i Iehova, ke ka thupëne fe angeic, matre tha tro kö a apuingazone la ekalesia. Hanawange la hna melëne hnene la ketre trahmanyi e Suisse. Ame lo angeic a xötrei lö hnine la Uma Ne Baselaia, öni angeic, pi tro fe angeic a hane sine la hmi së. Ame la angeic a qaja tun, ke hna upetröne eë la xa i angeic ka kuci ngazo. Önine jë hi lai trahmanyi ka hape, “Ajange troa lö hnine la ketre organizasio ka tha nyixölene kö la itre ka huliwa menu.”

Kola thupëne la ekalesia matre tha tro kö a apuingazon ej. Hnei Paulo hna hmekëne la ekalesia ne Korinito, ke eje pala kö thei angatr la ketre atr ka kuca la ngazo, nge ka tha ietra kö. Hnei angeice hna aceitunëne lai memine la levene ka acipane la falawa. Öni Paulo: “Tha ’te kö nyipunie laka, hna alevenëne la tepe ka tru hnene la levene ka co ?” Angeice pë hë a thuecatre pi koi angatr me hape: “Helënepi qa thei nyipunie la ate ka ngazo.”—1 Korinito 5:6, 11-13.

 Pëkö xou i angeic troa kuci ngazo. Ketre, kolo fe ha kapa hnene la itre xa trejine la thiina i angeic. (1 Korinito 5:1, 2) Ka hetre ethanyine la ewekë celë, ke, tro fe a hane löthe la itre Keresiano hnene la aqane mele ka sis ka eje thene la angetre Korinito ngöne la hneijine cili. Tu së mina fe enehila, e tro la ekalesia a wangesixane la itre huliwa ka sis hna kuca, tro hë la itre trejin a wangahmalohmaloeëne la itre wathebo i Iehova. (Ate Cainöj 8:11) Tune la ketre he ka të nge hna thë hnene la itre “iwanaca,” tro la aqane ujë ne la atr ka tha ietra kö a athixötrëne la itre trejin.—Iuda 4, 12, MN.

Kola xatuane la atr ka kuca la ngazo troa atrehmekune ka hape, ka tria angeic. Hnei Iesu hna hamëne la ceitun ne la ketre nekö trahmanyi ka trotrije la hnalapa i kem, me aluzin asë la edrö i angeic ngöne la nöjei pengöne aqane mele ka sis. Angeice pë hë a öhn e thupen, ka hape, qaane lo angeic a trotrije la hnalapa i kem, gufa la mele i angeic. Angeice pë hë a ietra ju me bëeke kowe la hnepe lapa i angeic. Atraqatre la madrinene la keme troa iöhnyi hmaca memine la nekö i nyidrë, me kepe angeic hmaca. (Luka 15:11-24) Haawe, easa öhne jëne la ceitune celë la pengö i Iehova, ngöne la kola ietra hnene la ketre atr. Öni Iehova: “Tha madine kö ni la meci ne la ate ka ngazo, ngo loi pe troa hmaca la ate ka ngazo qa ngöne la jë i nyën, mate mel.”—Ezekiela 33:11.

Ame la ekalesia, tre, lapa së hi lai ngöne la götrane u. Matre, ame la kola upetröne eë la ketre atr, tha angeice hmaca kö a hane sine la lapa së. Ame hë la angeic a xeni pune la huliwa i angeic, angeice ha atrehmekune la ngazo i angeic. Nge angeice hmaca mekun me ajan troa melëne lo ijine angeic a imelekeu hnyawa me Iehova memine la ekalesia. Celë hi lai ka troa upi angeic troa bëeke hmaca kowe la lapa i angeic.

E aja së troa xatuane la itre hna upetröne eë troa bëeke hmaca, loi e tro sa metrötrëne hnyawa la hna amekötine hnei Iehova. Pane mekune jë la lue atr ka elë hune la ketre wetr. Ijine hnötre catr, nge nyidroti a lapa treqene troa thepe nyidro qaa cili. Qa ngöne laka lepanyi catr, kolo ha kucakuca hnene la ketre, nge pi meköle hë angeic. Hnene pë hë la ketre hna lapa xe angeic matre tro angeic a hlë, ke e meköle hë, tro hë angeice lai a mec. Ngacama akötre pi hë la kola ixe, ngo ame pe, jëne iamele hi lai. Hnei Davita mina fe hna sajuëne la mekune celë, me hape: “Loi e lepi ni ngöne la ihnim, me ihaji ni hnene la ate thina ka meköt.” (Salamo 141:5) Atrehmekune hi Davita ka hape, ngacama akötre pi hë la kola haji angeic, ngo ixatua hi lai.

Tune lo kola xe lo lai atr, nyipi ewekë troa upetröne eë la ketre atr matre tro angeic a bëeke hmaca koi Iehova. Hnene la nekö i Julian, lo hna ithanatane hë e caha, hna ujë me bëeke hmaca kowe la ekalesia thupene la treene lao macatre ne lapa e tröne la ekalesia. Ame hë enehila, ketre qatre thupe hë angeic. Öni angeic: “Ixatua lai koi ni la kola upi ni qa hnine la ekalesia, ke eni a öhne e cili la ethanyine la mele hnenge hna iën.”—Heberu 12:7-11.

Akötre ka tru la kola upetröne eë la ketre atr. Ngo tha kolo kö lai a hape, ka luzi hë angeic. Nyipi ewekë pe tro sa metrötrëne la ihaji qaathei Iehova. Nemene la aqane tro sa kuca?

Loi e tro la itre qatre thup a nyitipune la aqane ihnimi Iehova ngöne la angatr a qaja kowe la ketre atr ka hape, tro ha upi angeic qa hnine la ekalesia. Tro mina fe angatr a qejepengöne hnyawa koi angeic la nyine tro angeic a kuca, matre troa bëeke hmaca koi Iehova me kowe la ekalesia. Ame la kola atre hnene la  itre qatre thup ka hape, kola pi bëeke hmaca hnene la ketre atr hna upetröne eë, loi e tro angatr a wai angeice lapa, me amexeje la nyine tro angeic a kuca matre bëeke hmaca koi Iehova. *—Wange ju la ithuemacany.

Tro mina fe la itre atrene la hnepe lapa a hane amamane la ihnimi angatre kowe la ekalesia memine la hna upetröne eë, jëne la hnei angatre hna sajuëne me metrötrëne la hna amekötine hnei itre qatre thup. Öni Julian, “Ngacama lue treneköne pala hi nyiho, ngo hnene la aqane mele i angeic hna eköthe la ketre ihag ka iananyi nyiho.”

Tro mina fe la ekalesia asë a amamane la ihnimi angatr kowe la atr hna upetröne eë, hnene la hnei angatr hna sajuëne me metrötrëne la hna amekötine hnei itre qatre thup. Kola hape, tha tro hmaca kö angatr a ce mele me angeic, maine ithanata koi angeice pena. (1 Korinito 5:11; 2 Ioane 10, 11) Ketre, loi e tro la ekalesia a hnime catrëne me xatuane la hnepe lapa ne la atr hna upetröne eë. Ketre ijine lai ka hace catre kowe la hnepe lapa. Matre, loi e tro sa thupën, ke hane jë fe angatre mekune ka hape, hna upi angatre fe qa hnine la ekalesia.—Roma 12:13, 15.

Öni Julian: “Ka nyipi ewekë catre la hna amekötine celë, ene la troa upetröne eë la ketre atr, ke, eje lai a upi së troa mele thenge la itre wathebo i Iehova. Ngacama akötre pi hë, ngo e qea ha, hetre eloine hne së hna kapa qa ngön. Maine hnenge ju ekö hna kapa la aqane ujë ne la neköng, tha tro pi kö angeice lai a bëeke hmaca.”