TADIKAKA ta Julian, ia gwau: “Lau be egu natuna idia atoa siri ena hadibaia hereva lau kamonai neganai, lau daradoko momokani. Ia be egu natuna mero roboana, bona ai be tura namodia bona ai gaukara hebou. Ia be kara namo merona, to gabeai ena kara ia dika ia lao. Egu adavana be nega momo ia taitai, bona lau diba lasi edena dala ai ena lalona lau hagoadaia. Nega momo ai ta ta dekenai ai henanadai bema ai be tama sina ena maduna ai huaia namonamo eiava lasi.”

Dahaka dainai ita gwau Keristani tauna ta atoa siri karana be lalokau karana, bema unai ese lalohisihisi ia havaraia? Kerere tauna atoa siri ena badina be Baibel ese edena bamona ia herevalaia? Bona dahaka dainai ta be kongrigeisen amo idia atoa siri?

Iehova ena Witnes tauna ta idia atoa siri ena badina rua be inai. Ginigunana be, ia bapatiso tadikaka o taihu ta be kara dika badana ta ia karaia. Iharuana be, ia helalo-kerehai lasi.

Ena be Iehova ia diba ita be goevadae lasi taudia, to ia ura Baibel lalonai idia noho taravatu helagadia do ita badinaia. Hegeregere, Iehova ia gwau namona be matabodaga, kaivakuku tomadiho henia, henaohenao, ala-ala, bona meamea karadia do ita dadaraia.—1 Kor. 6:9, 10; Apok. 21:8.

Iehova ena taravatu goevadia ita badinaia be auka lasi bona ita ia gimaia diba. Momokani, ita ibounai ita ura taunimanima namodia huanai mai maino ida ita noho. Iseda tadikaka taihu huanai maino ita davaria diba, bona ita moale badina Iehova dekenai iseda mauri ita gwauhamatalaia, bona ita gwauhamata Baibel ena hakaua herevadia do ita badinaia.

To, dahaka do ia vara bema ia manoka tadikaka o taihu ta ese kara dika badana ta ia karaia? Idaunegai Iehova ena kamonai hesiai taudia haida be unai bamona kerere idia karaia danu, to Iehova ese idia ia dadaraia momokani lasi. Unai bamona tauna ta be King Davida. Ia be ia heudahanai bona ala-ala karana ia karaia, to peroveta tauna Natana ese ia hamaoroa, ia gwau: “[Iehova] ese oiemu dika ia gwauatao vadaeni.”—2 Sam. 12:13.

Dirava ese Davida ena dika ia gwauatao badina Davida ia helalo-kerehai. (Sal. 32:1-5) Unai hegeregerena, hari bema Iehova ena hesiai tauna ta be ia helalo-kerehai lasi o kara dika ia karaia loulou, ia be kongrigeisen amo do idia atoa siri. (Kara 3:19; 26:20) Bema hahemaoro komiti ai idia noho elda taudia idia itaia ta be ia helalo-kerehai momokani lasi, vadaeni ia idia atoa siri diba.

Bema idia atoa siri tauna be eda famili o varavara ta, reana matamanai do ita laloa unai atoa siri karana ena disisen be maoro lasi o kara aukana. To, Iehova ena Hereva ese ita ia durua ita abia dae unai disisen be lalokau karana ta.

Iesu ia gwau: “Tau ta ese ia karaia kara namodia  ese idia hamomokania, ia be aonega tauna.” (Mat. 11:19) Ia helalo-kerehai lasi kerere tauna atoa siri karana be aonega karana, bona unai ese namo ia havaraia diba. Mani inai point toi oi laloa:

Kerere tauna atoa siri karana ese Iehova ena ladana ia hanamoa. Ita be Iehova ena ladana ita abia taudia dainai, iseda kara ese Iehova ena ladana ia hanamoa o hadikaia diba. (Isa. 43:10) Natuna ta ena kara ese ena tama sina edia ladana hanamoa o hadikaia hegeregerena, Iehova ena ladana idia abia taudia edia kara dainai, ma haida ese Iehova idia hanamoa o hadikaia diba. Bema Iena ladana idia abia taudia ese iena kara maoromaoro taravatudia idia badinaia, taunimanima ese Dirava ena ladana namona do idia gimaia. Esekiela ena negai danu taunimanima ese Iehova ena ladana be Iuda taudia ida idia hahegeregerea.—Ese. 36:19-23.

Matabodaga karadia ita karaia neganai, Dirava ena ladana helagana do ita hadikaia. Aposetolo Petero ese Keristani taudia ia hamaoroa, ia gwau: “Umui be kamonai natudia, unai dainai guna Dirava umui diba lasi neganai umui badinaia ura idauidau umui dadaraia, to umui ia boiria Helaga Tauna hegeregerena, emui kara ibounai lalonai do umui helaga, badina Toretore Helagadia ia gwau: ‘Do umui helaga, badina lau be lau helaga.’” (1 Pet. 1:14-16) Kara namo bona helaga karadia ese Dirava ena ladana idia hanamoa.

Iehova ena Witnes tauna ta be kara dika ia karaia neganai, nega momo ena turana o ia ida idia gaukara hebou taudia be unai do idia diba. Atoa siri karana ese ia hahedinaraia Iehova ena taunimanima be kara goeva taudia bona Baibel ena hakaua herevadia idia badinaia, unai amo idia helaga noho. Switzerland ai, tau ta be Kingdom Hall ena hebou ta dekenai ia lao, bona ia gwau ia ura unai kongrigeisen do ia bamoa. Iena taihuna be matabodaga karana dainai orea amo idia atoa siri. Unai tau ia gwau ia ura unai bamona oreana, “kara dika ia haheaukalaia lasi” oreana, lalonai do ia vareai.

Kerere tauna atoa siri karana ese Keristani kongrigeisen goevana ia gimaia. Aposetolo Paulo ese Korinto taudia ia hadibaia mai ura ida kara dika idia karaia taudia be edia huanai idia noho lasi be namo. Ia ese unai kara dika taudia ia herevalaia neganai, ia gwau: “Hatubua muramura sisina ese paraoa ibounai ia hatubua.” Bena inai sisiba ia henia, ia gwau: “Kara dika tauna be umui emui huana amo umui kokia.”—1 Kor. 5:6, 11-13.

Paulo ese ia herevalaia “kara dika tauna” be matabodaga karana ia karaia. Bona kongrigeisen ai haida be ena kara dika rohorohona idia herevalaia. (1 Kor. 5:1, 2) Bema unai kara dika badana ia karaia tauna be edia huana amo idia kokia lasi, reana Keristani taudia ma haida do idia laloa idia noho hanuana ena matabodaga kastom karadia idia badinaia be kerere lasi. Bema kerere tauna idia kokia lasi, ma haida ese Dirava ena taravatu do idia matauraia lasi. (Had. 8:11) Danu, idia helalo-kerehai lasi kerere taudia be “ranu henunai idia noho nadi bamona” bona bouti be nadi ia botaia bona makohi hegeregerena, kongrigeisen taudia edia abidadama idia hadikaia diba.—Iuda 4, 12.

Kerere tauna atoa siri karana ese kerere tauna ia durua lalohadai maorona ia abia totona. Nega ta Iesu ia gwau, mero ta be ena tamana ia rakatania bona tano daudauna dekenai ia lao, bona unuseniai mauri dikana amo ena kohu ibounai ia haorea. Unai boio merona be hekwakwanai ia davaria murinai, ia laloparara ena tamana ena ruma ia rakatania dainai mauri be anina lasi. Gabeai unai mero be lalohadai maorona ia abia, ia helalo-kerehai, bona ena famili dekenai ia giroa lou. (Luka 15:11-24) Iesu ma gwau unai lalokau tamana ia itaia ena natuna ena kara ia haidaua neganai ia moale, unai ese ita ia durua Iehova ena hemami ita lalopararalaia totona. Iehova ia gwau: “Kara dika tauna ena mase lau moalelaia lasi. To dika tauna bema iena dika ia rakatania, vadaeni mauri ia davaria, unai kara dekenai do lau moale momokani.”—Ese. 33:11.

Unai hegeregerena, Keristani kongrigeisen amo idia atoa siri taudia idia laloparara idia be mai anina bada gaudia idia haboioa. Idia edia kara dika dainai idia davaria hekwakwanai bona guna Iehova idia tura henia negana ena moale idia laloa lou neganai, unai ese idia ia doria lalohadai maorona idia abia totona.

Idia atoa siri kerere tauna ia helalo-kerehai totona, lalokau bona gini goada karana be mai anina bada. Salamo torea tauna Davida ia gwau: “Tau namona  ese, iena bogahisihisi dekena amo, lau do ia dadabaia, o lau dekenai do ia gwau henia, be namo.” (Sal. 141:5) Mani inai oi laloa: Tau ta be ia aniani lalonai vamu ta be ena gadona ai ia kamokau o ia stak. Bena unai tau be ia hahodi namonamo lasi, bona ena goada ia ore. Bona ia hereva diba lasi. Bema ta ese ia durua haraga lasi do ia mase. Bena ena turana ta ese ena doruna ia pataia, unai amo ena gadona ai ia noho vamu do ia raka-lasi. Ena be ia pataia neganai do ia hisihisi, to unai ese ia ia hamauria diba. Unai hegeregerena, Davida ia gwau ena kerere dainai kara namo tauna ese ia sisiba henia be namo, herevana unai be mai ena hisihisi.

Nega momo atoa siri karana ese kerere tauna ia matahakani henia. Lagani 10 bamona murinai, matamanai ita herevalaia tadikaka Julian ena natuna ese ena mauri ia haidaua, kongrigeisen dekenai ia giroa lou, bona hari ia be elda tauna. Ia gwau: “Lau idia atoa siri negana amo lau ese mauri ena hekwakwanai idauidau lau davaria. Unai matahakani karana ese lau ia durua bada.”—Heb. 12:7-11.

Momokani, ta be idia atoa siri dainai ena hetura karana Iehova ida ia dika, to unai hetura karana ia hanamoa lou diba. Unai dainai, ita ibounai ese atoa siri taravatuna ita badinaia be namo.

Atoa siri disisen idia karaia elda taudia be idia gaukara goada Iehova ena lalokau idia hahedinaraia totona. Kerere tauna dekenai atoa siri ena hadibaia hereva idia gwauraia neganai, mai hebogahisi ida ia idia hadibaia dahaka ia karaia diba kongrigeisen ai idia abia-vareai-lou totona. Nega haida elda taudia be helalo-kerehai toana idia hahedinaraia taudia idia vadivadi henia, unai amo ia idia hadibaia lou Iehova dekenai idia giroa lou totona. *

Famili taudia ese kongrigeisen bona idia atoa siri tauna dekenai lalokau idia hahedinaraia dalana ta be, atoa siri karana ena disisen idia matauraia. Matamanai ita herevalaia Julian ia gwau: “Ia be lau egu natuna mero, to ena mauri dalana ese ai idia hapararaia.”

Kongrigeisen taudia ibounai ese idia atoa siri tauna idia hereva henia lasi karana amo idia hahedinaraia Dirava ena hakaua herevadia idia lalokau henia. (1 Kor. 5:11; 2 Ioa. 10, 11) Unai idia karaia amo idia atoa siri tauna idia durua Iehova ese elda amo ia henia sisiba ia badinaia totona. Danu, namo lasi kerere tauna ena famili idia lalohisihisi bona idia laloa idia danu be tadikaka taihu do idia bamoa lasi totona, namona be kongrigeisen taudia ese idia dekenai lalokau idia hahedinaraia bona idia durua.—Roma 12:13, 15.

Julian ena hereva dokonai, ia gwau: “Atoa siri karana be mai anina bada ita dekenai, unai ese ita ia durua eda mauri lalonai Iehova ena taravatu ita badinaia totona. Ena be idia atoa siri tauna be nega daudau hisihisi ia abia, to unai ese ia dekenai anina namona ia havaraia diba. Bema lau be egu natuna ena kara dika lau itaia bona kara ta lau karaia lasi, unai ese ia do ia durua lasi.”