JULIAN erinert sich wii eyer sich kexpiirt hot wii eyer ti pekhantmachung keheert hot tas sayn soon net mee Yeehoowa sayn Tsayer waar. Tee saat: “Ich sin mechtich traurich kep. Tee waar mayn elste khint un meyer waare kuute fraaynte; meyer hon fiile tinge mitsamer kemacht. Tee waar imer eene kuute soon; awer uf een mool, hot eyer aan kefang sich xlecht aan xtele. Mayn fraa hot ofts keprilt un ich wust net wii tëne treeste. Meyer hon uns imer kefroot ep mer was ferkheertes wii eltere kemacht hate.”

Was fer uersache kept ti Piipel fer yemant tesasosiire? Un wën tas soo fiil phayn pringt, warom khene mer saan tas ti tesasosyasyoon liip tsaycht?

Wën een ketaaftne Yeehoowa sayn Tsayer een xlim sint macht un sich net peroyt, wërt eyer tesasosiirt.

Yeehoowa waart net perfektsyoon fon uns; awer tee wil hon tas sayn tiiner tëm sayn kesetse aan heere un sich haylich aan xtele. Tsum payxpiil, Yeehoowa xikt tas sayn tiiner sole sich wech hale fon xweyere sinte soo wii seksuaal imoraaliteet, itolatrii, xteeleray, umpringeray un spiritismus. (1 Kor. 6:9, 10; Apo. 21:8)

Was Yeehoowa fon uns waart, is net xtreng un xitst uns. Tsum payxpiil, meyer al wole leepe tswixich layt woo friitlich un eerlich sin un ti priiter in te kemaynt sin kraat soo. Warom tuun se tiise kwaliteete tsayche? Wayl se sayn leepe tsu Yeehoowa tetikiirt hon un ferxproch hon noo keen was ti Piipel saat.

Un wën een ketaaftne krist een xweyer sint macht weeche ti imperfektsyoon? Es is xon pasiirt mit etliche fon Yeehoowa sayn tiiner fon te friirixe tsayte; awer Yeehoowa waar wilich fer tëne fertsaye. Tsum payxpiil, te kheenich Tawi hot atultëryo kemacht un een man um keprung. Noch soo, hot te profeet Natan kesaat tas Yeehoowa Tawi sayn sinte fertsayt hot. (2 Sam. 12:13)

Warom hot Yeehoowa Tawi fertsayt? Wayl Eyer khont siin tas Tawi sich wërklich peroyt hat. (Psal. 32:1-5) Un hayt aach, wën yemant woo een sint kemacht hot, sich wërklich peroyt un noo lost tas xlechtes mache, wërt eyer fertsayt. (Aph. 3:19; 26:20) Wën ti persoon tsaycht net tas se sich wërklich peroyt hot, mise ti elteste in te jutikatiiw komisyoon tëne tesasosiire.

Es khan xweyer sin ti tesasosyasyoon fon een parent orer fraaynt aan nëme. Meyer khene tenke tas ti tisipliin tsu xtreng is. Awer ti Piipel lost es taytlich tas ti tesasosyasyoon een pewaysung fon liip is.

Yeesus hot kesaat tas “ti kluucheet wërt kerecht ketsaycht torich sayn resultaate”. (Mat. 11:19, noote) Warom khene mer saan tas es kluuch is yemant woo sich net fon sayn sint peroyt, tesasosiire? Wole mer 3 uersache kuke:

Ti tesasosyasyoon xitst Yeehoowa sayn naame. Wii Yeehoowa sayn Tsayer, tuun mer Kot sayn naame nëme. (Isa. 43:10) Soo wii een khint sayn aanxtelung eer orer xaam fer sayn eltere pringe khan, khan ti aanxtelung fon Yeehoowa sayn tiiner eer orer xaam fer Sayn naame pringe. In Esekyël sayn taache, wën ti layt fon te natsyoone aan te yuute ketenkt hon, hon se aach aan Yeehoowa sayn naame ketenkt. (Ese. 36:19-23) Kraat soo hayt, tuun ti layt Yeehoowa sayn Tsayer mit Yeehoowa sayn naame ferpiine. Soo, wën mer Yeehoowa sayn kesetse aan heere, pringe mer eer tsu Sayn naame.

Te aphostel Pheeter hot ti kriste aan kereet: “Wii foliche khiner, lost net tas ti winxe, woo teyer friier hat wii teyer khee khëntnis hat, aych wayter mustere. Xtats tas, sayt haylich in ales was teyer macht, soo wii te Hayliche woo aych keruuft hot. Wayl es xteet kexrip: ‘Sayt haylich, wayl ich sin haylich.’” (1 Phe. 1:14-16) Tsum payxpiil, wën mer seksuaal imoraaliteet mache teete, teete mer uneer fer Kot sayn naame pringe. Awer wën mer unser aanxtelung sauwer hale, kepe mer eer tsu Yeehoowa.

Wën een Yeehoowa sayn Tsayer wayter xlechte tinge macht, tsiimlich sicher, tuun ti layt woo tëm khëne tas tsum wise kriin. Soo, wën se raus kriin tas eyer net mee Yeehoowa sayn Tsayer is, tuun se mërke tas Yeehoowa sayn folek aan heert was ti Piipel saat un ti kemaynt sauwer halt. Tsum payxpiil, eene man is tsu een fersamlung in Xwayts kang un hot fer ti priiter kesaat tas eyer wolt een Yeehoowa sayn Tsayer sin. Tee hot aus keleet tas sayn xwester weeche imoraaliteet tesasosiirt kep is un tee wolt teel mache fon een relichyoon woo ti aue net tsu macht fer ti xlecht aanxtelung.

Ti tesasosyasyoon halt ti kemaynt sauwer. Te aphostel Phaul hot ti korinter aan kesaat wiis kefeerlich waar in te kemaynt lose een persoon woo een sint kemacht hot, awer woo sich net peroyt hot. Tee hot ti xlecht influens fon tiise persoon ferklaycht mit te heep woo macht te taaych keere. Phaul hot kesaat: “Een pisye heep tuut te kans taaych keere mache.” Tan, hot eyer tëne aan kereet: “Tuut ti xlecht persoon tswixich aych raus tuun.” (1 Kor. 5:6, 11-13)

Es siit aus tas Phaul waar iwer eene man am xpreche, woo seksuaal imoraaliteet ausferxeemt pratikiirt hot. Etliche in te kemaynt hon soo kaar aan kefang ausreete fer te man sayn xlecht aanxtelung kepe. (1 Kor. 5:1, 2) Tas waar kefeerlich wayl ti anere kriste khente petrof wëre fon te imoraalix aanxtelung woo keweenlich in Korinto waar. Kraat soo hayt, wën ti kemaynt ti aue fer een xweyer sint tsu mache teet, khente etliche aan fange se tenke tas Yeehoowa sayn kesetse net wichtich sin. (Ekl. 8:11) Wën tiise sintiche mënxe in te kemaynt plaype teete, khente se te klaape fon te anere fernichte. Tii khente ferklaycht sin mit “felse woo unich tas waser ferxtekelt sin” un woo mache tas ti xif woo keeche tëne wiiter xtike, uner keen. (Yuu. 4, 12)

Ti tesasosyasyoon khan een sintiche persoon helfe se mërke tas se ferkheert is. Een mool, hot Yeesus een kexicht fertseelt iwer eene yunge man woo tas haus fon sayn fater kelos hot. Tee hot sayn kans ërpxaft in een imoraalix leepe aus kep. Mit te tsayt, hot te ferloerne soon kemërkt tas tas leepe wayt fon sayn fater khee tswek hat. Soo, hot eyer sich peroyt un ëntxlist tsurik tsu sayn familye keen. Te fater is aarich froo kep wii eyer kesiin hot tas sayn soon sayn aanxtelung keënert hat un tee hot te soon hërtslich tehëm aan kenom. (Luk. 15:11-24) Tiise kexicht helft uns ferxteen wii Yeehoowa sich xpiirt wën yemant sich peroyt. Tee selepst saat: “Ich fraye mich net aan te toot fon tëm xlechter, awer tas te xlechter sayn weech ënert un am leepe playpt.” (Ese. 33:11)

Ti kristlich kemaynt is unser kaystlich familye. Wën yemant tesasosiirt is, is tee net mee teel fon tiise familye. Noo te resultaate fon sayn xlecht aanxtelung mit mache, fiilaycht tuut eyer sayn feele mërke un sich traan tenke tas eyer frooer waar wën eyer een kuut fraayntxaft mit Yeehoowa un ti priiter hat. Im xtant, tas tuut tëm uf muute tsurik tsu sayn kaystlich familye khome.

Fer een tesasosiirt persoon helfe tsurik tsu te kemaynt khome, mise mer fest sin. Tas is een aat wii mer khene se liip tsayche. Tsum payxpiil, iwerlee tich tswaay mëner woo sin een përich fol xnee am krapele. Awer een propleem pasiirt un tii mise tas yemant se rete khomt. Soo lang wii se waarte, eene fon tëne wërt soo miit un xpiirt soo fiil khelt, tas eyer xloofe wil. Awer, wën eyer in te xnee in xlooft, tuut eyer xtërpe. Tes weeche, tuut sayn fraaynt tëm im kesicht haue, tas eyer net in xlooft. Kewis, tas khan een pisye wee mache, awer es khan tëm sayn leepe rete. Tawi hot was eenliches kesaat: “Wën te kerechte mich haue teet, tas weyer leaale liip.” (Psal. 141:5) Tawi wust tas ti tisipliin wee mache tuut, awer es teet tëm helfe.

In fiile situatsyoone, is ti tesasosyasyoon was ti persoon praycht fer tsurik tsu Yeehoowa khome. Am aanfang fom artikel, hon mer iwer Julian sayn soon kexproch. Tseen yoore noo sayn tesasosyasyoon, hot eyer sayn leepe keënert un is tsurik tsu te kemaynt khom. Hayt, tiint eyer wii een elteste. Tee saat: “Weeche ti tesasosyasyoon, hon ich ti konsekwënse fon mayn ëntxlise mit kemacht. Ich must soo een sort tisipliin kriin.” (Hep. 12:7-11)

Es is aarich traurich wën yemant tesasosiirt is. Awer te opjetiiw fon te tesasosyasyoon is ti persoon helfe tsurik tsu Yeehoowa khome. Wii khene mer tsayche tas mer tiise opjetiiw pay xteen?

Ti elteste fersuuche imer Yeehoowa sayn liip noo mache, hauptseechlich wën se fer yemant saan mise tas eyer net mee Yeehoowa sayn Tsayer is. Mit liip, tuun se fer ti persoon taytlich aus leye was se mache mus fer tsurik tsu Yeehoowa khome un noch mool teel fon te kemaynt sin. Wën yemant woo tesasosiirt is, tsaycht tas eyer wil tsurik tsu te kemaynt khome, khene ti elteste tëm als mool pesuuche fer tëm erinere was eyer mache mus fer tsurik tsu Yeehoowa khome.

Ti familye khan liip tsayche fer ti kemaynt un fer ti persoon woo tesasosiirt is, wën se ti elteste sayn ëntxlus pay xteen. Julian leet aus: “Tee waar noch mayn soon; awer ti aat wii eyer keleept hot, hot uns aus naner kemacht.”

Al in te kemaynt khene woer liip fer ti persoon woo tesasosiirt is tsayche, wën se ti tisipliin pay xteen woo Yeehoowa torich ti elteste kep hot. Es wil saan tas tii sole net tsayt mit te persoon fertraype orer soo kaar mit tëne xpreche. (1 Kor. 5:11; 2 Yo. 10, 11) Ti kemaynt sol aach fiil liip un hilef kepe fer ti familye fon tëm woo tesasosiirt is. Tas is een xweyer tsayt fer ti familye. Tes weeche, sole mer tëne nii pehantele wii wën se aach tesasosiirt weyere. (Rom. 12:13, 15)

Julian saat tsum xlus: “Wën yemant een sint macht un sich net peroyt, mus eyer tesasosiirt wëre. Tas helft uns se leepe in te aat wii Yeehoowa wil. Opwool es hot uns wee kemacht, mit te tsayt, is mayn soon tsurik tsu Yeehoowa khom. Tee weyer nii tsurik khom wën ich tolerant mit sayn xlecht aanxtelung weyer.”