“IDI nangngegko ti pakaammo a nailaksid ti anakko, kasla nagtupak ti langit kaniak,” malagip ni Julian. “Isu ti inauna nga anakko, ken nasingedkami nga agama; kanayon nga agkaduakami. Nakasingsingpet, ngem bigla a nagbalbaliw. Masansan nga agsangit ni baketko, ket diak ammo no kasanok a liwliwaen. Kanayon nga isaludsodmi iti bagimi no ania ti nagkuranganmi kas nagannak.”

Apay a maikuna a naayat nga urnos ti pannakailaksid ti maysa a Kristiano no agresulta met dayta iti nakaro a saem? Ania ti ibaga ti Kasuratan a pakaibatayan ti kasta a nadagsen a desision? Ken ania ti makagapu a mailaksid ti maysa a Kristiano?

Adda dua a pakaibatayan ti pannakailaksid ti maysa a Saksi ni Jehova: No nakaaramid iti nadagsen a basol ken no saan nga agbabbabawi.

Nupay saan a kalikaguman kadatayo ni Jehova ti kinaperpekto, adda impaayna a pagalagadan ti kinasanto a namnamaenna a tungpalentayo. Kas pagarigan, impaganetget ni Jehova a masapul a liklikantayo dagiti serioso a basol a kas iti seksual nga immoralidad, idolatria, panagtakaw, panangkikil, panangpapatay, ken espiritismo.—1 Cor. 6:9, 10; Apoc. 21:8.

Sigurado nga umanamongka a ti nadalus a pagalagadan ni Jehova ket nainkalintegan ken agserbi a proteksiontayo. Kayattayo la ketdi ti makikadua kadagiti natalna ken nasingpet a tattao a mabalintayo a pagtalkan. Kasta a kasasaad ti masarakantayo iti tengnga dagiti naespirituan a kakabsattayo. Agyamantayo ta idi nagdedikartayo iti Dios, inkaritayo nga agbiagtayo maitunos kadagiti pagalagadan ti Biblia.

Ngem kasanon no nakaaramid iti serioso a basol ti maysa a bautisado a Kristiano gapu iti kinaimperpekto? Adda dagiti matalek nga adipen ti Dios idi un-unana a nakaaramid iti kasta a basol, ngem saan ida a tinallikudan ti Dios. Maysa kadakuada ni Ari David a nakabasol iti pannakikamalala ken pammapatay. Ngem imbaga kenkuana ni propeta Natan: “Ni Jehova . . . palabasenna ti basolmo.”—2 Sam. 12:13.

Pinakawan ti Dios ti basol ni David gapu ta sipapasnek a nagbabawi. (Sal. 32:1-5) Kasta met ita, mailaksid laeng ti maysa nga adipen ni Jehova no saan nga agbabawi ken itultuloyna ti agaramid iti dakes. (Ara. 3:19; 26:20) No makita ti hudisial a komite a saan a naimpusuan nga agbabawi ti nakabasol, rumbeng nga ilaksidda.

Iti damo, baka ipapantayo a naulpit wenno awanan asi ti desision a panangilaksid iti nakabasol, nangruna no nasingedtayo iti dayta a tao. Ngem mangted ti Sao ti Dios kadagiti nainkalintegan a rason a makapagtalektayo a naayat dayta a desision.

Kinuna ni Jesus a “ti kinasirib mapaneknekan a nalinteg babaen iti ar-aramidna.” (Mat. 11:19) Adu ti pagimbagan ti nainsiriban a desision a panangilaksid iti di agbabbabawi a nakabasol. Usigentayo ti tallo kadagitoy.

Pakaidayawan ti nagan ni Jehova. Gapu ta awittayo ti nagan ni Jehova, maapektaran ti naganna iti aniaman nga aramidentayo. (Isa. 43:10) No kasano a mabalin a maidayaw wenno maumsi dagiti nagannak gapu iti ar-aramiden ti anakda, maapektaran met ti panangmatmat dagiti tattao ken Jehova gapu iti naimbag wenno dakes nga ar-aramiden dagiti Saksina. Maidaydayaw ti nagan ti Dios no dagiti mangaw-awit iti dayta an-annurotenda dagiti moral a pagalagadan ni Jehova. Umasping iti dayta ti napasamak idi kaaldawan ni Ezequiel idi a dagiti tattao iti nasnasion innaigda ti nagan ni Jehova kadagiti Judio.—Ezeq. 36:19-23.

Maumsi ti nasantuan a nagan ti Dios no agar-aramidtayo iti immoralidad. Imbalakad ni apostol Pedro kadagiti Kristiano: “Kas natulnog nga annak, sumardengkayo a maisuksukog maitunos kadagiti tarigagay a sigud nga adda kadakayo iti kinaignoranteyo, no di ket, maitunos iti Daydiay Santo a nangayab kadakayo, agbalinkayo met a nasantuan a mismo iti isuamin a kababalinyo, agsipud ta adda a naisurat: ‘Masapul a nasantuankayo, agsipud ta nasantuanak.’” (1 Ped. 1:14-16) Ti nadalus ken nasantuan a kababalin ket pakaidayawan ti nagan ti Dios.

No agar-aramid iti dakes ti maysa a Saksi ni Jehova, mabalin a maammuanto dayta dagiti gagayyem ken am-ammona. Ti urnos a panangilaksid paneknekanna nga adda nadalus nga ili ni Jehova a mangan-annurot kadagiti pagalagadan ti Biblia. Adda maysa a lalaki a nakigimong iti maysa a Kingdom Hall idiay Switzerland, ket kinunana a kayatna ti agbalin a miembro ti kongregasion. Nailaksid ti kabsatna a babai gapu iti immoralidad. Imbagana a kayatna ti makikadua iti maysa nga organisasion a ‘saan a mangpampanuynoy iti dakes nga ar-aramid.’

Pagtalinaedenna a nadalus ti kongregasion Kristiano. Pinakdaaran ni apostol Pablo dagiti taga-Corinto a napeggad no mapalubosan nga agtalinaed iti kongregasion dagiti sipapakinakem nga agbasbasol. Inyarigna ti dakes nga impluensia dagita a tattao iti lebadura a mangpaalsa iti sibubukel a masa. “Ti bassit a lebadura paalsaenna ti intero a masa,” kinunana. Sa imbalakadna: “Ikkatenyo ti nadangkes a tao iti tengngayo.”—1 Cor. 5:6, 11-13.

Nalawag a “ti nadangkes a tao” a dinakamat ni Pablo ket sibabatad nga agar-aramid iti immoralidad. Ken inkalintegan pay ketdi ti dadduma a miembro ti kongregasion ti ar-aramidenna. (1 Cor. 5:1, 2) No koma napanuynoyan ti kasta a nadagsen a basol, mabalin nga impagarup ti dadduma a Kristiano a mabalinda a tuladen ti immoral a panagbiag dagiti tattao iti siudad a pagnanaedanda. No mabaybay-an ti maysa a sipapakinakem nga agbasbasol, mabalin nga ibilangton ti dadduma a saan a napateg dagiti pagalagadan ti Dios. (Ecl. 8:11) Kanayonanna, dagitoy a di agbabbabawi a nakabasol ket mayarig “kadagiti bato a nailemmeng iti uneg ti danum” a mabalin a mangdadael iti pammati ti dadduma a miembro ti kongregasion.—Jud. 4, 12.

Tapno mabigbig ti maysa ti kinadagsen ti basolna. Iti naminsan, dinakamat ni Jesus ti maysa nga agtutubo a lalaki a nangpanaw iti pagtaengan ni amana ket inibusna ti tawidna iti nalabes a panagragragsak. Naamiris ti barayuboy nga anak a narigat ken nakakaasi ti biagna no awan iti pagtaengan ni amana. Idi agangay, nabigbigna ti kamalina, nagbabawi, ket nagsubli iti pamiliana. (Luc. 15:11-24) Ti panangdeskribir ni Jesus iti naayat nga ama a nagrag-o iti panagbalbaliw ti anakna matulongannatayo a mangtarus iti rikrikna ni Jehova. Ipasigurado ni Jehova kadatayo: “Maragsakanak, saan nga iti ipapatay ti nadangkes, no di ket iti daydiay itatallikud ti maysa a nadangkes manipud iti dalanna ket pudno nga agtultuloy nga agbiag.”—Ezeq. 33:11.

Kasta met laeng ita, dagiti nailaksid nga indibidual a saanen a paset ti kongregasion Kristiano—ti naespirituan a pamiliada—mabalin a maamirisdanto  a dakkel ti pukawda. Mabalin a matignayda nga agsubli no mabigbigda dagiti nasaem a bunga ti basolda ken no malagipda dagiti naragsak a kapadasanda idi nasayaat pay ti relasionda ken Jehova ken iti organisasionna.

Kasapulan ti ayat ken natibker a pakinakem tapno matignay nga agbabawi ti nakabasol. “No kabilennak koma daydiay nalinteg, maysa dayta a naayat a kinamanangngaasi,” kinuna ni salmista David, “ket no tubngarennak koma, lana dayta iti ulok.” (Sal. 141:5) Kas panangiladawan: Adda dua a hiker a sumangsang-at iti kabambantayan a naabbungotan iti niebe. Napaksuyan ti maysa kadakuada ket agkutkutimermer ken agdudungsan gapu iti hypothermia. Sigurado a matay no makaturog iti kaniebean. Bayat nga agur-urayda iti tulong, pasaray tungpaen ti kaduana tapno saan a makaturog. Nasakit ti matungpa, ngem makatulong dayta tapno maispal ti biagna. Umasping iti dayta, nabigbig ni David a pagsayaatanna ti nasakit a pannubngar ti maysa a nalinteg a tao.

Kaaduanna, ti pannakailaksid ket isu ti disiplina a kasapulan ti nakabasol. Kalpasan ti agarup sangapulo a tawen, nagbabawi ti anak ni Julian a nadakamat itay, inlintegna ti biagna, nagsubli iti kongregasion, ket agserserbi itan kas panglakayen. “Sinagabak dagiti nasaem a bunga ti pannakailaksidko,” inaminna. “Kasta a disiplina ti kasapulak.”—Heb. 12:7-11.

Pudno a maysa a naespirituan a trahedia ti pannakailaksid, ngem mabalin a pagballigian dayta. Adda amin pasettayo tapno maibanag ti panggep ti pannakailaksid.

Dagiti panglakayen a nadutokan a mangibaga a mailaksid ti nakabasol ikagumaanda nga iyanninaw ti ayat ni Jehova. Siaanus ken silalawag a dakamatenda dagiti addang nga aramidenna tapno makasubli iti kongregasion. Tapno mapalagipan dagiti nailaksid no kasanoda nga agsubli ken Jehova, mabalin a sagpaminsan a bisitaen dagiti panglakayen dagidiay mangipakpakita iti panagbalbaliw. *

Dagiti miembro ti pamilia maipakitada ti ayat iti kongregasion ken iti nakabasol babaen ti panangraemda iti desision a pannakailaksid. “Anakko latta isuna,” kuna ni Julian, “ngem ti dakes a panagbiagna ti nanglapped iti relasionmi nga agama.”

Amin a miembro ti kongregasion maipakitada ti pudno nga ayat no saanda a makilangen ken saanda a kasarsarita ti tao a nailaksid. (1 Cor. 5:11; 2 Juan 10, 11) No aramidenda dayta, supsuportaranda ti disiplina nga impaay ni Jehova babaen kadagiti panglakayen. Mabalin met a mangipakitada iti ad-adda pay nga ayat ken suporta iti pamilia ti nailaksid, ta agsagsagabada met ken saanda koma a marikna a karamanda a liklikan dagiti kakabsat.—Roma 12:13, 15.

“Ti panangilaksid ket urnos a kasapulantayo, a makatulong tapno makapagbiagtayo maitunos kadagiti pagalagadan ni Jehova,” kuna ni Julian. “Nasaem dayta ngem nasayaat ti pagbanaganna. No pinanuynoyak koma ti dakes nga aramid ti anakko, saan koma a pulos nakasubli.”