Хулийан дьбежә: «Чахе щьватеда әʹлам кьрьн, ԝәки кӧрʹе мә жь щьвате һатә дәрхьстьне, мьн тʹьре дьне сәр мьнда һьлшийа. Жь зарʹед дьн әԝ йе лапи мәзьн бу у әм тʹәви ԝи гәләк незик бун, чьмки мә гәләк тьшт тʹәвайи дькьр. Әԝ зарʹәки баш бу. Ньшкева әԝи дәстпекьр хԝә нәрʹаст бьдә кʹьфше. Жьна мьн тʹьме дьгьрийа у мьн ньзаньбу ча бәр дьле ԝеда бем. Мә фәʹм нәдькьр, чьма тьштәки ӧса ԛәԝьми у мә хԝә нәһәԛ дькьр».

Һәрге дәрхьстьна жь щьвате һаԛас еш тинә, чьрʹа әм дькарьн бежьн, ԝәки әв йәк һʹьзкьрьне әʹйан дькә? Сәр һʹиме кʹижан принсипед Кʹьтеба Пироз мәрьв жь щьвате те дәрхьстьне? Бона чь мәрьв жь щьвате те дәрхьстьне?

Дӧ мәʹни һәйә жь бо чь жи Шәʹде Йаһоԝа кӧ ньхӧманди йә дькарә жь щьвате бе дәрхьстьне. Йа пешьн чахе әԝ гӧне гьран дькә, у йа дӧда чахе гӧне хԝә надә рʹуйе хԝә.

Рʹаст ә Йаһоԝа кʹамьлийе жь мә дәʹԝа накә, ле диса жи әԝ һивийе йә кӧ әме ль гора принсипед ԝийә пироз бьжин. Йаһоԝа гӧнед гьран ԛәдәхә дькә. Мәсәлә йед ӧса ча бенамуси, дьзи, пʹутпʹарьсти, тʹаланкьр, меркӧжи у сербази (1 Корн. 6:9, 10; Әʹйан. 21:8).

Дьԛәԝьмә һуне ԛайил бьн, ԝәки нормед Йаһоԝа бь сәрԝахти нә у мә дьпарезьн. Гьшк жи дьхԝазьн тʹәви мәрьвед әʹдьлайиһʹьз, мәʹрифәт у бь итʹбар бьжин. Хушк-бьред мәйә рʹӧһʹани һәма мәрьвнә ӧса ньн, чьмки чахе ԝана әʹмьре хԝә тʹәсмили Йаһоԝа кьрьнә, бь ԝе йәке ԝана соз данә кӧ ԝе ль гора рʹебәрийа Хәбәра ԝи бьжин.

Ле чь дьԛәԝьмә чахе Мәсиһийе ньхӧманди жь бо сьстбуна хԝә гӧне гьран дькә? Хьзмәткʹаред Йаһоԝайә ԝәʹде бәре жи гӧнед гьран дькьрьн, ле йәкә Хԝәде пьшта хԝә нәдьда ԝан. Ԝәрә дина хԝә бьдьнә мәсәла Даԝьд Пʹадша. Рʹаст ә әԝи бенамуси кьр, мәрьв кӧшт, ле Натʹан пʹехәмбәр готә ԝи: «Хӧдан гӧнәһе тә афу кьр» (2 Сам. 12:13, ИМ).

Хԝәде бахшандә Даԝьд, чьмки әԝи бь дьл у щан гӧне хԝә да рʹуйе хԝә (Зәб. 32:1-5). Рʹожед мәда жи хьзмәткʹаред Йаһоԝа жь щьвате тенә дәрхьстьне тʹәне ԝи чахи, гава әԝана тʹобә накьн йан жи бәрдәԝам дькьн гӧнә бькьн (Кʹар. Шанд. 3:19; 26:20). Чахе найе кʹьфше, ԝәки мәрьве кӧ гӧнә кьрийә, бь дьл у щан тʹобә дькә, рʹуспийед жь комитейа диԝанкьрьне, гәрәке ԝи жь щьвате дәрхьн.

Пешийе ӧса дькарә бе кʹьфше, ԝәки әв сафикьрьн гәләк сәрт ә, илаһи чахе мәрьве мәйи һʹьзкьри жь щьвате те дәрхьстьне. Чь жи һәбә, Хәбәра Хԝәде зәлал мәрʹа дьдә кʹьфше, ԝәки әв сафикьрьн сәр һʹиме һʹьзкьрьне йә.

Иса гот ԝәки «сәрԝахти бь әʹмәлед хԝә кʹьфш дьбә кӧ әв рʹаст ә» (Мәт. 11:19). Чахе мәрьв гӧне хԝә надә рʹуйе хԝә, дәрхьстьна ԝийә жь щьвате гәләк алийава кʹаре тинә. Дина хԝә бьдьнә ԝан се тьшта, чьда дәрхьстьна жь щьвате кʹаре тинә:

Дәрхьстьна жь щьвате наве Йаһоԝа рʹумәт дькә. Жь бо ве йәке, кӧ наве Йаһоԝа сәр мә йә, рʹабун-рʹуньштьна мә сәр наве ԝи һʹӧкӧм дьбә (Иша. 43:10). Гава мәрьв дина хԝә дьдьнә рʹабун-рʹуньштьна зарʹа, әԝана фәʹм дькьн кӧ де-бавед ԝан чь щурʹәйи нә. Анәгори ԝе йәке, рʹабун-рʹуньштьна ԝан мәрьва, йед кӧ наве Йаһоԝа сәр ԝан ә, һʹӧкӧм дьбә сәр ньһерʹандьна мәрийа дәрһәԛа Йаһоԝа. Чахе хьзмәткʹаред Йаһоԝа хԝә ль нормед ԝийә бьльнд дьгьрьн, наве Хԝәде рʹумәт дьбә. Әв йәк рʹьнд дьһатә кʹьфше, гава ԝәʹде Һәзәԛел пʹехәмбәр щьмәʹтед пʹутпʹарьст наве Йаһоԝа щьмәʹта Щьһуйава гьредьдан (Һәзԛл. 36:19-23).

Һәрге әм бенамусийе бькьн, бь ве йәке әме наве Хԝәде беһӧрмәт кьн. Пәтрусе шанди ширәтәкә ӧса да Мәсиһийа: «Мина зарʹед гӧһдар бьн, нәбьнә мина ԝи ԝәхте дьлхԝәстьнед хԝәйә нәзанийа хԝәда. Ле мина ԝи Пирозе кӧ гази ԝә кьр, һун жи пироз бьн нава һʹәму рʹабун-рʹуньштьна хԝәда. Чаԝа ньвисар ә: ‹Пироз бьн, чьмки әзи пироз ьм›» (1 Пәт. 1:14-16). Рʹабун-рʹуньштьна нав-намуси у маԛули, наве Хԝәде рʹумәт дькә.

Һәрге Шәʹдәки Йаһоԝа хԝә ль хьрабийе гьртийә, һәмьки һәвал у мәрьвед ԝийи незик дәрһәԛа ве йәке ԝе пебьһʹәсьн. Дәрхьстьна жь щьвате дьдә кʹьфше, ԝәки тʹәне әԝ мәрьв дькарьн нава щьмәʹта Хԝәдеда бьн, йед кӧ ль гора нормед ԝийә пироз дьжин. Щарәке Сԝисрәйеда мерәк һатә Ода Щьвате у гот, ԝәки дьхԝазә бьбә Шәʹде Йаһоԝа. Хушка ԝи жь щьвате һатә дәрхьстьне бона бенамусийе. Әԝи гот ԝәки дьхԝазә бькʹәвә нав тʹәшкиләтәкә ӧса, кʹидәре кӧ чʹәʹве хԝә сәр гӧнә данадьн.

Дәрхьстьна жь щьвате тʹәмьзайа щьвате хԝәй дькә. Паԝлосе шанди Корьнтʹийарʹа дьгот, ԝәки чьԛас хоф ә гава мәрьве кӧ гӧнә дькә жь щьвате найе дәрхьстьне. Паԝлос сәва кӧ бьдә кʹьфше ԝәки ча кьред ԝан мәрьва дькарьн сәр щьвате һʹӧкӧм бьн, мәсәла һәвиртьрʹшк ани у гот: «Һьнәк һәвиртьрʹшк тʹәмамийа шкәве һьлтинә». Паше әԝи ширәтәкә ӧса да: «Йе хьраб жь нава хԝә дәрхьн» (1 Корн. 5:6, 11-13).

Ча те кʹьфше әв мәрьв дәрһәԛа кʹижани Паԝлос дьгот, бенамуси дькьр у ԛә шәрм жи нәдькьр, у әндәмед щьвате жи ԝи рʹаст дәрдьхьстьн (1 Корн. 5:1, 2). Һәрге щьвате әв гӧне гьран пьшт гӧһе хԝәва бавита, әв йәк ԝе сәр ньһерʹандьна Мәсиһийед дьн жи һьндава нормед намусийе һʹӧкӧм кьра. Мәрьве кӧ чʹәʹве хԝә сәр гӧне гьран дадьдә, бь ԝе йәке әԝ кәсед дьн һелан дькә, ԝәки нормед Хԝәде беһӧрмәт кьн (Ԝаиз 8:11). Мәрьвед кӧ гӧнед хԝә тʹобә накьн, мина «ләкʹә нә», у жь бо ԝан хушк-бьра дькарьн баԝәрийа хԝә ӧнда кьн (Щьһуд. 4, 12).

Дәрхьстьна жь щьвате дькарә мәрьв һелан кә кӧ бе сәр һʹьше хԝә у вәгәрʹә щьвате. Щарәке Иса мәтʹәлокәк дәрһәԛа хортәки щаһьл гьли кьр, кʹижан кӧ мала баве хԝә һишт у мьлкʹе хԝә бь щурʹе нәщайиз хәрщ кьр. Әв кӧрʹе нәгӧһдар хԝәха избат бу, ԝәки жийина жь мал дәр, зәʹмәт у бош-бәтал ә. Ахьрийе әв һатә сәр һʹьше хԝә, тʹобә кьр у вәгәрʹийа мале (Луԛа 15:11-24). Әԝ йәк кӧ баве жь мәтʹәлока Иса, бь шабун рʹасти кӧрʹе хԝә һат, али мә дькә һәстед Йаһоԝа фәʹм бькьн. Йаһоԝа дьбежә: «Әз нә жь мьрьна йе хьраб, ле жь вәгәрʹина зьламе хьраб кӧ жь рʹейа хԝә вәгәрʹә у бьжи зәԝԛе [шабуне] дьгьрьм» (Һәзԛл. 33:11).

Анәгори мәтʹәлока Иса, кәсед жь щьвате дәрхьсти дькарьн бенә сәр һʹьше хԝә, фәʹм бькьн кӧ чь ӧнда кьрьнә у һелан бьн вәгәрʹьн малбәта хԝәйә рʹӧһʹани. Ахьрийа кьред ԝанә хьраб у ӧса жи биранина дәрһәԛа ԝи ԝәʹдәйи, кӧ ча әԝана бәхтәԝар бун, гава һәләԛәтийа ԝан тʹәви Йаһоԝа у щьмәʹта ԝи баш бу, дькарьн ԝана һелан кьн кӧ тʹобә бькьн.

Сәва кӧ дәрхьстьна жь щьвате кʹаре бинә, лазьм ә һʹьзкьрьне бьдьнә кʹьфше у сәбьр кьн. Зәбуреда Даԝьд ӧса гот: «Бьра йе рʹаст мьн ширәт кә, әв йәк ширьнайи йә, бьра мьн һьле, әԝ йәк рʹуне хас ә» (Зәб. 141:5). Дәрәщәкә ӧса бьдә бәр чʹәʹве хԝә: Зьвьстане дӧ мер дьчьнә сәре чʹийе. Йәк жь ԝан гәләк дьԝәстә у дьщәмьдә, хәԝа ԝи те у әԝ дьхԝазә рʹазе. Ле һәрге әԝ сәр бәрфе вәләзә у хәԝрʹа һәрʹә, ԝе бьԛәрʹьмә у бьмьрә. Һʹәта кӧ хьлазкʹар бен, һәвале ԝи сьфәте ԝи дьхә, сәва кӧ әԝ хәԝрʹа нәчә. Рʹаст ә һәвале ԝи бь ве йәке ԝи дешинә, ле әʹмьре ԝи хьлаз дькә. Даԝьд Пʹадша жи фәʹм дькьр, ԝәки гава мәрьве рʹаст ԝи ширәт дькә, әв йәк дькарә дьле ԝи бешинә, ле ахьрийеда әв йәк жерʹа кʹаре тинә.

Гәләк щар бь сайа дәрхьстьна жь щьвате, мәрьв кʹаре дьстинә. Кӧрʹе Хулийан дәрһәԛа кʹижани мә серида гот, ԝәкә дәһә сал шунда әʹмьре хԝә гӧһаст, вәгәрʹийа щьвате у ньһа ча рʹуспи хьзмәт дькә. Әԝ дьбежә: «Чахе әз жь щьвате һатьмә дәрхьстьне, мьн зәлал фәʹм кьр кӧ щурʹе жийина мьн, мьн бәрбь чь дьбә. Әв щәзакьрьн мьнрʹа гәләк лазьм бу» (Ибрн. 12:7-11).

Рʹаст ә дәрхьстьна жь щьвате дәрдәки мәзьн ә, ле диса жи әв хьлазийа һәр тьшти нинә. Һәр кәс жь мә дькарә тьштәки бькә, сәва кӧ мәрьве жь щьвате дәрхьсти кʹаре бьстинә.

Рʹуспийед кӧ мәрьврʹа дьбежьн ԝәки әԝ жь щьвате һатийә дәрхьстьне, чʹәʹв дьдьнә Йаһоԝа у бь һʹьзкьрьне ԝе йәке дькьн. Әԝана ӧса жи бь нәрми ԝи мәрьвирʹа шьровәдькьн, кӧ әԝ чь гәрәке бькә, сәва кӧ вәгәрʹә щьвате. Рʹуспи щар-щара тʹәсәлийа ԝан дькьн, йед кӧ дьдьнә кʹьфше ԝәки дьхԝазьн вәгәрʹьн бал Йаһоԝа, сәва кӧ биньн бира ԝан кӧ диса әԝана чь гӧһастьна гәрәке бькьн. *

Нәфәред ԝи кәси кӧ жь щьвате һатийә дәрхьстьне, һʹьзкьрьна хԝә һьндава ԝи у һьндава щьвате бь ԝе йәке дьдьнә кʹьфше, кӧ пьштгьрийа ве сафикьрьне дькьн. Хулийан дьбежә: «Рʹаст ә әԝ диса жи кӧрʹе мә бу, ле бь кьред хԝә, әԝи диԝар кьрә ортʹа мә у хԝә».

Һʹәму әндәмед щьвате һʹьзкьрьна хԝә һьндава йе жь щьвате дәрхьсти, бь ве йәке әʹйан дькьн, кӧ тʹәви ԝи хәбәр надьн (1 Корн. 5:11; 2 Йуһʹн. 10, 11). Ӧса әԝана пьштгьрийа сафикьрьна Йаһоԝа дькьн, кʹижан кӧ әԝ бь дәсте рʹуспийа тинә сери. Хенщи ԝе йәке, хушк-бьра бь дьлшәԝати бәр дьле нәфәред ԝи кәсида тен, кӧ жь щьвате һатийә дәрхьстьне. Әм гәрәке хԝә ӧса нәдьнә кʹьфше кӧ те бежи әԝана жи жь щьвате һатьнә дәрхьстьне (Рʹом. 12:13, 15).

Хулийан дьбежә: «Дәрхьстьна жь щьвате гәләк лазьм ә. Әв аликʹарийе дьдә, ԝәки ль гора нормед Йаһоԝайи нав-намусийе бьжин. Рʹаст ә пешийе әв еше тинә, ле ахьрийа ԝе бәред баш ьн. Һәрге мьн чʹәʹве хԝә сәр гӧнед кӧрʹе хԝә бьгьрта, әԝи ԝе тʹӧ щар хԝә рʹаст нәкьра».