TQʼAMA Julian jlu: «Tej tetz qʼoʼn tqanil qa otoq tzʼex expulsarin tnejel nkʼwale, tzaj nim nbʼise tuʼnju in che bʼanttoq tiʼchaq quʼne junx ex qamiwtoq qibʼe. Kukxtoq in kubʼ tqʼoʼn nkʼwale tbʼanel techel, pero noq minabʼen chʼexpaj ex ok ten bʼinchal nya bʼaʼn. Tkyaqil ambʼil oqʼ nxuʼjile ex mintiʼ el nnikʼe tiʼj tzeʼn tuʼn t-xi nqʼuqbʼaʼne tkʼuʼj. Kubʼ qxjeline alkye onbʼil mintiʼ otoq txi qqʼoʼne te».

Maske in tzaj nim bʼis aj tex expulsarin jun xjal, ¿tiquʼn in xi qqʼamaʼn qa jun yekʼbʼil tiʼj kʼujlabʼil? ¿Tiquʼn in tzaj tqʼamaʼn Biblia tuʼn tex expulsarit jun xjal? ¿Tiquʼn jaku tzʼex expulsarin jun xjal toj ttnam Jehová?

Il tiʼj tuʼn tbʼaj kabʼe tiʼ tuʼntzun tex expulsarin jun testigo de Jehová. Tnejel, qa ma kubʼ tbʼinchaʼn jun matij il. Tkabʼin, qa mintiʼ ma tzʼajtz tiʼj tanmi.

Mintiʼ in nayon Jehová tuʼn kyok tmajen te tzʼaqli, pero taj tuʼn tjapun qe tley kyuʼn. Jun techel, nya taj Jehová tuʼn qyaẍin, tuʼn qkʼulin kywitz tilbʼilal, tuʼn qel qʼan, tuʼn qsbʼuʼn, tuʼn tkubʼ qbʼyoʼn jun xjal ex nya taj tuʼn qxiʼ kyukʼil chman (1 Cor. 6:9, 10; Apoc. 21:8).

Toj tumel qe kawbʼil in che kubʼ tqʼoʼn Jehová ex in che onin qiʼj. Qkyaqil qaj tuʼn qten kyukʼil xjal at tbʼanel kymod, in che jyon tiʼj mujbʼabʼil ex jaku tzʼok qeʼ qkʼuʼj kyiʼj. Atzun jlu in bʼant kyuʼn tmajen Jehová. Mintiʼ in bʼaj qkʼuʼj aj qten kyukʼil erman tuʼnju qkyaqilx xi qtziyen te Jehová tuʼn t-xi qbʼiʼn qe tkawbʼil tej t-xi qqʼamaʼn te tuʼn qajbʼen te.

Pero, ¿tiʼ in bʼaj qa ma kubʼ tbʼinchaʼn jun okslal jun matij il? Toj ambʼil ojtxe, ateʼ junjun tmajen Jehová kubʼ kybʼinchaʼn jun matij il, pero mintiʼ i el tikʼun Jehová. Kyxol jlu ten David. Maske yaẍin ex kubʼ tbʼyoʼn jun xjal, xi tqʼamaʼn profeta Natán jlu te: «Ma najset tila tuʼn Qman» (2 Sam. 12:13).

¿Tiquʼn kubʼ tnajsaʼn Jehová til? Tuʼnju ax tok ajtz tiʼj tanmi (Sal. 32:1-5). Chʼixme ax jlu in bʼaj toj ambʼil jaʼlo, qa at jun okslal in kubʼ tbʼinchaʼn jun matij il, pero in najtz tiʼj tanmi ex in kyaj tkolin nya bʼaʼn, mintiʼ in nex lajoʼn toj ttnam Jehová (Hech. 3:19; 26:20). Qatzun mintiʼ in najtz tiʼj tanmi, in xi kyqʼamaʼn kʼloj ansyan in xi bʼinchante tiʼj nya bʼaʼn qa kʼelex expulsarin.

Jaku kubʼ qximen qa nya toj tumel aj tex expulsarin jun xjal, mas qa jun qfamilia moqa jun qamiw. Noqtzun tuʼnj, in tzaj tyekʼin Biblia qa jun yekʼbʼil tiʼj kʼujlabʼil aj tex expulsarin jun xjal.

Tqʼama Jesús qa in nel nikʼbʼaj tiʼj qa at tnabʼil jun xjal tuʼn tbʼinchbʼen (Mat. 11:19). Tuʼntzunju, aj tex expulsarin jun xjal mintiʼ in najtz tiʼj tanmi, jaku txi qqʼamaʼn qa tbʼanel jlu ex toj tumel tuʼnju in nonin tuʼn tbʼant oxe tiʼ. Qo xnaqʼtzan tiʼj.

In nonin tuʼn kyyolin xjal bʼaʼn tiʼj Jehová. Tuʼnju o qo ok te ttestiw Jehová, in nonin qbʼinchbʼen tuʼn kyyolin xjal bʼaʼn tiʼj (Is. 43:10). Ik tzeʼn in bʼaj tiʼj jun kʼwal, qa tbʼanel tbʼinchbʼen, in che yolin xjal bʼaʼn kyiʼj tman. Ax ikx qe, tukʼil qbʼinchbʼen jaku che yolin xjal bʼaʼn tiʼj Jehová moqa nya bʼaʼn. Toj ambʼil tej tten Ezequiel, e yolin xjal tiʼj Jehová tej kyyolin kyiʼj aj Israel (Ezeq. 36:19-23). Ax jlu in bʼaj toj ambʼil jaʼlo, aj kyyolin xjal qiʼj ax ikx in che yolin tiʼj Jehová. Tuʼntzunju, qa tbʼanel aju in bʼant quʼn, jaku jaw nimsaʼn tuʼn.

Pero qa ma kubʼ qbʼinchaʼn jun matij il, jaku bʼaj qtzʼilsaʼn tbʼi Dios. Tuʼntzunju, tqʼama apóstol Pedro consej lu: «Miʼn txi kyqʼoʼntle ambʼil teju kyajbʼile mya bʼaʼn, ik tzaʼn o kybʼinchaye ojtxi tej naʼnxtoq tel kynikʼe tiʼj tyol Dios. Ik tzaʼn te Dios xjante, aju txkon kyeye, ikxtzun kyeye kypaʼmil kyibʼe tiʼj tkyaqil mya bʼaʼn, tuʼntzun kyoke xjan; porke tzʼibʼamaj ju yol lu tuj Tuʼjil: Che okxe xjan, porke weye xjan qine, chi Dios» (1 Ped. 1:14-16). Ikju, in che yolin xjal tbʼanel tiʼj Jehová qa ma kubʼ qbʼinchaʼn qe tiʼchaq toj tumel.

Pero qa in kubʼ tbʼinchaʼn jun testigo de Jehová jun nya bʼaʼn, kʼokel kybʼiʼn xjal jlu ex che yolil nya bʼaʼn tiʼj Jehová. Qa in bʼaj jlu, in nex expulsarin xjal tuʼntzun tkubʼ qyekʼin qa saq te Jehová ttnam. Jun techel, jun maj xi jun xjal toj jun Ja te Chmabʼil te tnam Suiza ex xi tqʼamaʼn qa tajtoq tuʼn tok te testigo de Jehová. ¿Tiquʼn tqʼama jlu? Tuʼnju el tnikʼ tiʼj qa otoq tzʼex expulsarin tanabʼ tej tyaẍin ex tqʼama qa tajtoq tuʼn tten toj jun kʼloj xjal jatumel mintiʼ in xi qʼoʼn ambʼil te nya bʼaʼn.

In nonin tuʼn kyok xqʼuqit erman. Xi tqʼamaʼn apóstol Pablo kye okslal te Corinto qa jakutoq tzaj nya bʼaʼn tiʼj kʼloj okslal tuʼn jun xjal otoq tbʼincha jun matij il. Tqʼama jlu: «¿Mintiʼpe bʼaʼn kyuʼne, tkyaqil tqʼotjil pan in jaw mal tkʼuʼj tuʼn chʼin t-samel?». Kyuʼn yol lu, tqʼama qa jaku tzʼel kykanoʼn txqantl tiʼjju in bʼant tuʼn jun xjal. Yajxitl tqʼama jlu kye: «Kyjaʼtzun, aju xjal bʼinchal mya bʼaʼn, kyiʼmele kyxole» (1 Cor. 5:6, 11-13).

In nel qnikʼ tiʼj qa aju xjal yolin apóstol Pablo tiʼj, in yaẍintoq ex mintiʼtoq in tzaj tchʼixwi. Tuʼntzunju, ateʼ junjun kubʼ kyximen qa nya jun matij il aju in bʼanttoq tuʼn xjal (1 Cor. 5:1, 2). Noqwit xi qʼoʼn ambʼil tuʼn kukx tyaẍin xjal, bʼalo jakutoq che ok lepeʼ txqantl okslal tiʼjju in bʼant kyuʼn xjal te tnam Corinto. Ax jlu jaku bʼaj toj ambʼil jaʼlo, qa ma txi qʼet ambʼil tej jun okslal tuʼn tkubʼ tbʼinchaʼn jun matij il, tuʼn jlu jaku kubʼ kyximen txqantl qa nya nim toklen tuʼn t-xi kybʼiʼn qe tkawbʼil Dios (Ecl. 8:11). Aqeju in kubʼ kybʼinchaʼn jun matij il ex mintiʼ in najtz tiʼj kyanmi, in che ok «ik tzaʼn jun tzʼil» qxol ex mlay che onin tiʼj kyokslabʼil txqantl (Jud. 4, 12).

Jaku tzʼonin tuʼn tchʼexpaj tmod aju in bʼinchan il. Yolin Jesús tiʼj jun kuʼxun. Ex oq toj tja, xi tkʼayin t-erencia ex bʼaj tnajsaʼn tpwaq kyukʼil xuʼj tej tyaẍin. Tuʼn jlu, el tnikʼ tiʼj qa kwest tanqʼibʼil tuʼnju najchaq taʼ kyiʼj tfamilia. Pero pon jun qʼij, ajtz tiʼj tanmi kuʼxun lu ex meltzʼaj tja (Luc. 15:11-24). Tejtzun tmeltzʼaj tja, nim jaw tzalaj tman tiʼj. Aju tqʼama Jesús tiʼj mambʼaj lu, in nonin qiʼj tuʼn tel qnikʼ tiʼj tkʼujlabʼil Jehová at qiʼj. In tzaj tqʼamaʼn Biblia qa nya taj Dios tuʼn tnaj jun aj il, sino taj «tuʼn tbʼaj tchʼexpuʼn tmod tuʼntzun tanqʼin» (Ezeq. 33:11).

Chʼixme ik tzeʼn jlu, aʼyeju o che ex expulsarin, ya mlay che ten toj kʼloj okslal ex jaku tzʼonin kyiʼj tuʼn tel kynikʼ tiʼjju o txi kynajsaʼn. Bʼalo jaku tzʼok kyqʼoʼn kywitz tiʼj nya bʼaʼn o tzaj tuʼn kybʼinchbʼen. Ax ikx, jakulo tzaj kynaʼn qa e tzalaj tej tten jun tbʼanel kyamiwbʼil tukʼil Jehová ex kyukʼil erman. A jlu jaku tzʼonin kyiʼj tuʼn kymeltzʼaj tukʼil Jehová.

Tuʼn qonin tiʼj jun xjal tuʼn tmeltzʼaj toj tnam Jehová, il tiʼj tuʼn qten tzʼaqli twitz Jehová ex tuʼn tkubʼ qyekʼin qkʼujlabʼil. Tqʼama rey David jlu: «Qa ma kubʼ tqʼoʼn xjal tzʼaqlxix ncastiwoye jun xtalbʼil ok tbʼinchaʼ weye, ex mer ik tzaʼn perjum te weye qa ma chin ok tmayoʼn» (Sal. 141:5). Tuʼn tel qnikʼ kyiʼj yol lu, qo ximen tiʼj techel lu. Qo ximen tiʼj qa in che jax jun kʼloj xjal twi witz ex at nim cheʼw ex hielo. Pero in sikt jun kyukʼil, ex in xi tzyet tuʼn tchewix ex tuʼn ttzaj twatl. Noqtzun tuʼnj, qa ma tzaj twatl, jaku kyim tuʼn cheʼw. Tuʼn miʼn ttzaj twatl, in xi tqʼoʼn tukʼil jun toj twitz akux in che pon xjal onil kye. Maske ma choʼn toj twitz, jaku tzʼonin tiʼj tuʼn miʼn tkyim. Chʼixme axju bʼaj tiʼj David, xi tqʼoʼn chjonte tej t-xi kawin maske kuʼx choʼn toj tanmi, pero el tnikʼ tiʼj qa kʼoniltoq jlu tiʼj.

Tuʼn tajtz tiʼj tanmi jun aj il, nim toklen tuʼn tex expulsarin. Tej tikʼ lajaj abʼqʼi tej tex expulsarin tkʼwal Julian, aju ma qo yolin tiʼj tej saj tzyet xnaqʼtzbʼil, kubʼ tchʼexpuʼn tanqʼibʼil ex meltzʼaj toj ttnam Jehová. Toj ambʼil jaʼlo in najbʼen te ansyan ex in tzaj tqʼamaʼn jlu: «Onin expulsión wiʼje tuʼn tel nnikʼe tiʼj qa mintiʼ otoq chin bʼine te Jehová. Tuʼntzunju, iltoq tiʼj tuʼn ntzaj kawine» (Heb. 12:7-11).

In tzaj qbʼis aj tex lajoʼn jun xjal, pero jaku meltzʼaj juntl maj tukʼil Jehová. Qkyaqilx jaku qo onin tuʼn tonin kawbʼil tiʼj xjal.

Il tiʼj tuʼn tel kykanoʼn ansyan tkʼujlabʼil Jehová ex mas aj t-xi kyqʼamaʼn te xjal qa ya nya testigo de Jehová. Tuʼn tbʼant jlu kyuʼn, toj tumel kxel kyqʼamaʼn te xjal tiʼ il tiʼj tuʼn tbʼant tuʼn tuʼn tmeltzʼaj toj ttnam Jehová. Aj tbʼet ambʼil, aj tel kynikʼ ansyan tiʼj qa in nok tilil tuʼn xjal tuʼn tchʼexpaj tanqʼibʼil ex tuʼn tmeltzʼaj toj ttnam Jehová, in cheʼx junjun maj visitarilte xjal tuʼntzun t-xi kyqʼamaʼn te tiʼ tuʼn tbʼant tuʼn. *

In kubʼ kyyekʼin toj tja xjal kykʼujlabʼil kyiʼj erman ex tiʼj aj il, aj kyonin tiʼjju otoq kubʼ kyximen ansyan. Naʼnx jlu tuʼn Julian: «Kukxtoq kʼujlaʼn nkʼwale wuʼne, pero ya mintiʼ in yoline tukʼil tuʼnju kubʼ tbʼinchaʼn nya bʼaʼn».

Ax ikx jaku kubʼ kyyekʼin erman kʼujlabʼil tiʼj xjal in nex expulsarin, qa ya mintiʼ ma che yolin tukʼil (1 Cor. 5:11; 2 Juan 10, 11). Iktzun tten in nok kyqʼoʼn toklen kawbʼil otoq txi tqʼoʼn Jehová te xjal. Pero nya oʼkxju kbʼantel kyuʼn erman, ax ikx nim toklen tuʼn t-xi kyqʼuqbʼaʼn kykʼuʼj toj tja xjal otoq tzʼex expulsarin tuʼnju in che bʼisun. Bʼaʼn tuʼn ttzaj qnaʼn qa nya aqe ma che ex expulsarin, tuʼntzunju nim toklen tuʼn kukx qten kytxlaj (Rom. 12:13, 15).

In tzaj tqʼamaʼntl Julian jlu: «In nonin expulsión qiʼj tuʼn tok qqʼoʼn toklen qe tkawbʼil Jehová. Maske in tzaj qbʼis tuʼn, aj tikʼ ambʼil in tzaj tbʼanel qe tuʼn. Noqwit tzaj qʼaqʼin nkʼuʼje tiʼj nkʼwale, mintiʼwtlo o meltzʼaj juntl maj toj ttnam Jehová».