“WA Julian walanzile vino wivwile pano umwana wawo umonsi wawinzilwe. Walanzile ukuti; pano nivwile ukuti umwana wane awizilwe naweni ngati insi yansilila, awili e katote wane, twivwananga nkaninye. Swinya twawombelanga ponga ivintu ivivule. Walinji amwana umuzima, lelo wizile atalika ukucita ivintu iviwipe. E wakwane walilanga cilawanda, ntamanyile nivyakucita pa ku mumyalalika. Lyonsinye twelenganyanga ukuti ncepamwi tutasambilizizye icete umwana witu.”

Acani cino tungalandila ukuti ukuwinga umwina Klistu mwi wungwe kwawa icetenye nanti acakuti kukaleta uwulanda? Avyani vino Amawaliko yalandapo vino vingaleng wumwi awingwe? Acani nkaninkani cino cikalenga umuntu ukuwingwa mwi wungwe?

Kwawa ivintu viwili vino vingalenga e Nte awingwe mwiwungwe. Icakutalicila ngawacita uluwembu ulukulu. Icaciti wili nga atalapizile ku luwembu luno acisile.

Nanti acakuti e Yehova atatuwuzya ukuti vyonsinye vino tukucita vizipizile ukuwa avilungamane, watupa amasundo amatele yano akakwenecela awawomvi wakwe ukukonka. Ku cakulolelako, e Yehova watunena ukuti tutazipizile ukuwa awazelele, ukupepa utuluwi, ukwiwa, awamilicisye, wacikoma, nanti ukupepa imizimu.​—1 Kor. 6:9, 10; Ukuwu. 21:8.

Swensinye twamanya ukuti amasundo ya kwe Yehova yawa icete swinya yangatucinjilila. Tukalonda ukwikala nu muntu wamutende, uwamiwele mizima swinya wino tungasuwila. Awantu wano tungazanako yo-o imiwele awanawitu na wankazi. Ala tukasalifya pa milapo yonsinye yino tukalapa kwe Leza iyakuti twandi twacita vyonsinye vino Izwi lyakwe likalanda.

Uzye cikawa wuli nga cakuti umwina Klistu wino wabatizwa, wacita uluwembu ulukulu pamulandu wakukanapwililika? Awawomvi wa kwe Yehova nawonye awakukali wacisilepo imembu zyamusango wo-o, lelo e Leza atawalesilepovye. Imfumu Davidi yacisile uluwembu luno lwamanyikwa nkaninye. Wacisile uwucende swinya wakomile nu muntu. Lelo e kasesema Nathani wamunenile ukuti: “Imfumu wakutetela” paluwembu lwako.​—2 Sam. 12:13.

E Leza wivwizile e Davidi uluse pamulandu wakuti walapizile ukufuma pansi ya mwezo. (Amalu. 32:1-5) Namweyanye amanda umuwomvi wa kwe Yehova angawingwa nga cakuti atalapizile nanti watwalilila ukucita iviwipe. (Imili. 3:19; 26:20) Nga cakuti wa eluda wano wali mwe komiti yawupinguzi walola ukuti wino awembusile atalapizile, wazipizile ukumuwinga mwi wungwe.

Kweni mpindi zimwi tungalola ngati wino awembusile atazipizile ukuwingwa, maka maka nga cakuti we lupwa lwitu nanti amuntu wino tukakwivwana nkaninye. Lelo nanti ciwe wo-o, izwi lya kwe Yehova lyalanda ivintu ivivule nkaninye vino vingalenga tusuwile ukuti, cawa icetenye ukuwinga wino atalapizile.

E Yesu walanzile ukuti “amano ya muntu yakalolecela mu milimo yakwe.” (Mat. 11:19) Mwawa uwuzima mukuwinga wino atalapizile mwi wungwe. Lekani tulande pa wuzima wutatu:

Ukuwinga wano wacisile uluwembu mwi wungwe kukalenga izina lya kwe Yehova ukucindikwa. Pa mulandu wakuti twitilwa pi zina lya kwe Yehova, vino tukacita viikalenga izina lyakwe ukucindikwa nanti ukukwelengulwa. (Ayize. 43:10) Ndi wulyanye vyo umwana akacita vikalenga awakwasi ukucindikwa nanti ukusalulwa, avino na wantu wakalola e Yehova ukulingana na vino wano witilwa pi zina lyakwe wakacita. Izina lya kwe Leza likacindikwa nga cakuti awantu wano witilwa pi zina lyakwe wakucindika amasundo yakwe. Wonye avino calinji na pano e Ezekiel walinji mu nsi. Awantu wamunko zinji walolanga awa Yuda ukuti wimililangako izina lya kwe Yehova.​—Ezek. 36:19-23.

Nga tukucita uwuzelele tungaleta umukwelengula pi zina lya kwe Leza ilitele. Umutumwa Paulo wasunzile awina Klistu ukuti: “Muwatontela Leza, mutize muwe nimiwele yino mwalinji nayo pano mwachilinji ukwiluka. Ukuwa, mwacita ivintu vyonsi ichete, muwe mwewatele ndivino Leza wino wawita mwemwe. Amawaliko Matele yati, ‘Mule muwe mwewatele, amuno nenji nemutele.’” (1 Pet. 1:14-16) Nga tuli ni miwele mizima swinya iyitele, tukalenga izina lya kwe Yehova ukucindikwa.

Nga cakuti e Nte akucita iviwipe awawuye wano wamumanya wangamanya vino acisile. Ukuwinga wino acisile uluwembu mwi wungwe, acilanjililo cakuti awantu wa kwe Yehova awatele amuno wakakwivwila amasundo yakwe. Umuntu wumwi ku Switzerland wayile mukulongana pa Ng’anda ya Wufumu swinya walanzile ukuti akulonda ukuwa Inte. E nkazi yakwe wawinzilwe pamulandu wa kucita uwuzelele. Acino walanzile ukuti walondanga ukuwa mwi wungwe muno “wasilekapovye nga cakuti wumwi wacita iviwipe.”

Ukuwinga wino acisile uluwembu kukalenga iwungwe lya wina Klistu ilyawusaka ukuwa ilicinjililwe. Umutumwa Paulo wasosile awina Korinti pa wuwipe wuno wawa mukuleka wino acisile uluwembu ukutwalilila ukuwa mwi wungwe. Wakolinye wano wakacita imembu ku mutawa nanti e yisiti wino akatutumula e fulawulo wensinye. “Umutawa wutici wukatutumula umunya wonsi,” wawanenile nu kuti: “Fumyani umuntu muwipe mwi wumba linu.”​—1 Kor. 5:6, 11-13.

Ncepamwi “umuntu muwipe” wino e Paulo walandangapo, wacitanga uwuzelele pa lwenze swinya awanawitu mwi wungwe watalisile ukulola ngati vino wacitanga vyalinji icetenye. (1 Kor. 5:1, 2) Wange waleke umuntu wamusango wo-o ukutwalilila ukuwa mwi wungwe, awina Klistu wanji ncepamwi ngawatalisile ukuvwambisya ukucita ivintu ivyawunyali vino awantu mwewowo umusango wacitanga. Wano wakacita iviwipe nga watwalilila ukucita iviwipe, wangalenga wanji ukusula amasundo ya kwe Leza. (Ekawi. 8:11) Swinya wano wasilapila wawa ngati “amawe yano yavwama mu minzi ” amuno wangalenga isuwilo lya wanawitu mwi wungwe ukumwela.​—Yud. 4, 12.

Ukuwinga wino aluvinye mwi wungwe kungalenga apiluke. E Yesu walanzile pa mulumendo wino wafumile pa wakwasi wakwe nukuyayonona ivyuma vyakwe vyonsinye mumikalile miwipe. We-e umwana waweni ngati wacuzile nkaninye pano wafumile pa wakwasi wakwe. Wizile akutuluka nu kulapila swinya wanyocezile ku wakwasi wakwe. (Luk. 15:11-24) Vino Yesu walanzile pa mukwasi wino wawa nu lukundo swinya wino wasecelezile pano umwana wakwe walapizile, vikatwavwa ukumanya vino Yehova wawa. E Yehova umweneco watunena ukuti; “Nsisechela ndinalola umuwembu akufwa ukuwa nkakunda ndinalola umuwembu watontoloka wawa nuwumi,”.​—Ezek. 33:11.

Avino cawa na kwewano wawingwa mwi wungwe. Pamulandu wakuti wakafuma mu lupwa lwa kumuzimu, wangakutuluka nu kulola ukuti wakupuswa ku vintu ivivule nkaninye. Nga welenganya pa viwipe vino vyawaciticila pa mulandu waluwembu luno wacisile, cingalenga wizuke vino wawanga ni nsansa pano walinji iviwuza vya kwe Yehova nawantu wakwe, cingalenga wiluke.

Pakwavwa wano wawinzilwe ukulapila, tuzipizile ukuwalanjizya ukuti twawakunda swinya tuzipizile ukukonka ukusunda kwa kwe Leza. E Davidi wino wimbizile amalumbo walanzile ukuti “Umuntu muzima angansunda ankalipile mbali ninkumbu, ukuwa ntanga ndeke umuwipe ampake amafuta kumutwe wane.” (Amalu. 141:5) Kucakulolelako, yelenganyani ukuti umuntu akulya e kandolo. Pano acili akulya, we-e e kandolo wamufina pa nsingo waleka nukufuta icete icakuti amaka yasila angafwa. Apano umuwuye wamuma nkaninye ulupi pa nsizi icakuti ne kandolo wino temufinile wafuma. Kweni ulupi lungaluma lelo lungalenga umuntu apusuke. Wonye avino calinji na kwe Davidi, wamanyile ukuti nga cakuti umuntu umulungamane wamukalipila, ivintu vingamuzipila.

Ilivule ukuwinga umuntu wino acisile uluwembu mwi wungwe kukalenga asalapulwe. Pano papisile imyaka mupipi ne 10, umwana wa Julian wino tulanzilepo kali, wapiluzile imiwele yakwe swinya wanyocezile kwi wungwe. Pe yo-o impindi we eluda. Walanzile ukuti. “Ukuwingwa mwi wungwe, kwalenzile ncule pa mulandu ni viwipe vino vyafumile mukucita uluwembu. Wo-o vino wambinzile mwi wungwe calenzile ukuti nsalapulwe.”​—Hebe. 12:7-11.

Kweni ukuwingwa acintu cimwi icilume nkaninye, lelo co-o citakupiliwula ukuti lyo calala casila ivintu vitalitela viwepo icete. Kwawa vino swensinye tungacita pakuti wino awinzilwe mwi wungwe asambilileko.

Wa eluda wano wawa nu mulimo wakupingula nu kuwinga wino acisile uluwembu mwi wungwe, wazipizile ukuwa nu lukundo ndi vino Yehova wawa. Pano wamunena ukuti wamuwinzile, wakawa ni cikuku kwe weliwe nu kumulondololela vino azipizile ukucita pakuti wize wamunyosye mwi wungwe. Mpindi zimwi wa eluda wakatandalila awawingwe wano wakulanjizya ukuti watalisile ukulapila pakuti wawanene vino wazipizile ukucita pakunyocela kwe Yehova. a

Walupwa wangalanjizya ukuti watemwa iwungwe ne lupwa lwawo nga cakuti watunjilila vino iwungwe lipinguzile. Pano umwana wawo wamuwinzile mwi wungwe, wa Julian walanzile ukuti “watwalilizile ukuwa amwana wane, lelo pamulandu wakuti wacisile uluwembu twalesile ukuvwanzyania nawe.”

Wonsinye mwi wungwe wangalanjizya ukuti wakunda wino awinzilwe nga cakuti watakwizya nu kuvwanga nawe. (1 Kor. 5:11; 2 Yoh. 10, 11) Nga wacita wo-o, lyo wakumwavwa ukukonka ukusunda kuno Yehova wamupa ukuwomvya wa eluda. Swinya wangalanjizya ulukundo kwa lupwa wa muntu wino awinzilwe wano wali nu wulanda nukuwatunjilila pakuti walola ukuti nawonye wangalanzyanya na wamwi wungwe.​—Roma. 12:13, 15.

Wa Julian mukulecelezya walanzile ukuti “ Ukuwinga umuntu mwi wungwe kwacindama amuno kukatwavwa ukwivwila amasundo ya kwe Yehova,” walanzile nukuti: “Nanti acakuti tukawa nu wulanda nga cakuti umuntu wawingwa mwi wungwe, mukupita kwa mpindi mukafuma ivizima. Nanga natetewezya umwana wane pano wacitanga iviwipe, na peyonye impindi nga tapiluka nu kunyocela kwe Yehova.”