JULIAN kiijtoua: “Tlauel nechyolkokok kema kiijtojkej noachtouikone kikixtijtoyaj tlen tlanechikoli. Tlauel kuali nimouikayaya iuaya uan tijchiuayayaj miak tlamantli sansejko. Ya nochipa kuali monejnemiltijtoya uan teipa san nima pejki kichiua tlen amo kuali. Nosiua tlauel mochokiliyaya uan amo nijmatiyaya kenijkatsa nijyolchikauas. Timoiljuiyayaj uelis tojuantij timokuapolojkej kema tikiskaltijkej”.

¿Kenke uelis tikijtosej kinextiaj kiikneliaj se akajya kema kikixtiaj tlen tlanechikoli tlaj tlauel techyolkokoua? ¿Kenke Biblia kiijtoua kiampa kinamiki mochiuas? ¿Kenke kikixtiaj se akajya tlen tlanechikoli?

Onka ome tlamantli tlen kichiua ma kikixtikaj tlen tlanechikoli se Jehová itlajtoltemajka. Se, pampa kichiua se ueyi tlajtlakoli, uan ome, pampa amo moyolkuepa.

Maske Jehová kimati tielij titlajtlakolejkej, kineki ma tijchiuakaj ipan tonemilis tlen ya technauatia. Se neskayotl, ya kiijtoua amo ma timomekatikaj, amo ma tikinueyichiuakaj teotsitsij, amo ma titlachtekikaj, amo ma titlakajkayauakaj, amo ma titemiktikaj uan amo ma titetlajchiuikaj (1 Cor. 6:9, 10; Apoc. 21:8).

Ta tijmati toTeotsij itlanauatiljuaj amo tlauel ouij tijchiuasej uan tlauel techpaleuia. Uan nochi techpaktiskia tiitstosej ininuaya maseualmej katli amo mosisiniaj, katli kuali monejnemiltiaj uan katli temachmej. Kiampa itstokej toikniuaj ipan Jehová itlanechikol. Tlauel kuali tijyolmatij tiitstosej ininuaya pampa kema timoatsonpoliuiltijkej, tikiljuijkej Jehová tijchiuaskiaj tlen technauatia.

¿Uan tlake pano tlaj se akajya tlajtlakolchiua pampa amo momokuitlauik? Uejkajkia, se keskij Jehová itekipanojkauaj nojkia kichijkej uejueyi tlajtlakoli uan ya amo nima kintlauelkajki. Kiampa kipanok David, maske ya momekatik uan temiktik, nopa tlajtolpanextijketl Natán kiiljuik: “ToTeko mitstlapojpoljuijtok motlajtlakol” (2 Sam. 12:13).

¿Kenke Jehová kitlapojpoljuik David? Pampa moyolkueptoya ika nochi iyolo (Sal. 32:1-5). Ipan ni tonali nojkia kiampa pano, tlaj se akajya kichiua se ueyi tlajtlakoli uan teipa moyolkuepa uan ayokmo kichiua tlen amo kuali, amo kikixtiaj tlen tlanechikoli (Hech. 3:19; 26:20). Uan tlaj nopa maseuali amo nelnelia moyolkuepa, ueuejtlakamej katli kichiuaj nopa comité judicial moneki kikixtisej.

Uelis timoiljuisej amo kuali kema ueuejtlakamej kichiuaj ni tlamantli, uan uelis nojua kiampa tijyolmatij tlaj kuali timouampojchijtoyaj iuaya nopa toikni katli kikixtijkej. Maske kiampa timoiljuiaj, Biblia kiijtoua kinextiaj kiikneliaj katli kikixtiaj tlen tlanechikoli.

Jesús kiijtok se akajya kinextia tlalnamikilistli kema kichiua tlen xitlauak (Mat. 11:19). Kema kikixtiaj tlen tlanechikoli se katli amo moyolkuepa, tlauel tlapaleuia. Ma tikitakaj eyi tlamantli tlen pano:

Kichiua sekinok kuali ma kiitakaj Jehová. Tojuantij tielij Jehová itlajtoltemakauaj, yeka ika tlen tijchiuaj uelis tijchiuasej sekinok kuali ma kiitakaj Jehová o amo (Is. 43:10). Sanse kej se konetl uelis kichiuas sekinok kuali ma kinitakaj itatauaj o amo, ika tlen tijchiuaj tojuantij nojkia uelis tijchiuasej sekinok ma kiijtokaj tlen kuali o tlen amo kuali tlen Jehová. Kema itstoya tlajtolpanextijketl Ezequiel, sekinok altepemej tlen itstoyaj nechka Israel, kinixmatiyayaj judíos pampa kiueyichiuayayaj Jehová (Ezeq. 36:19-23). Tojuantij nojkia kiampa techpano pampa maseualmej kimatij tijtekipanouaj Jehová. Yeka, tlaj kuali timonejnemiltiaj, sekinok kiijtosej kuajkuali tlamantli tlen Jehová.

Tlaj timomekatiskiaj, sekinok kiijtoskiaj tlen amo kuali tlen Jehová. Yeka apóstol Pedro kiijtok: “Amo xijchiuakaj nopa tlamantli axkuali tlen inkichiuayayaj achtouia kema axtleno inkimachiliyayaj tlen iTlajtol toTeko. Tlatsejtseloltik toTeko tlen inmechnotstok para xiitstokaj ininkoneuaj; uajka inmojuantij nojkia xiitstokaj intlatsejtseloltikej uan xijchiuakaj tlen senkistok kuali. Pampa ijkuilijtok ipan iTlajtol toTeko kampa yajaya kiijtok: ‘Moneki xiitstokaj intlatsejtseloltikej pampa na nitlatsejtseloltik’ ” (1 Ped. 1:14-16). Kema kuali timonejnemiltiaj, sekinok kuali kiitaj toTeotsij.

Kema se Jehová itlajtoltemajka tlajtlakolchijtinemi, iteixmatkauaj kimatij tlen kichijtinemi. Yeka, kema kikixtiaj tlen tlanechikoli, sekinok maseualmej kiitaj ipan Jehová itlanechikol amo mochiua tlen amo kuali uan moyakanaj ika Jehová itlanauatiljuaj tlen eltok ipan Biblia. Ma tikitakaj tlen kiijtok se tlakatl tlen eua Suiza. Kema yajki ipan se tlanechikoli tlen Jehová itlajtoltemakauaj, kiijtok kinekiyaya mochiuas se Jehová itlajtoltemajka. ¿Kenke kiampa kinekiyaya kichiuas? Pampa isiuaikni kikixtijtoyaj tlen tlanechikoli pampa momekatik, uan ya kiijtok kinekiyaya itstos ipan se tlanechikoli kampa “amo aka kikauaj ma kichiua tlen amo kuali”.

Kinpaleuia toikniuaj tlen tlanechikoli kuali ma itstokaj. Apóstol Pablo kiijtok kinpanoskia tlen amo kuali sekinok toikniuaj tlaj nojua itstoskia ipan tlanechikoli se akajya katli tlajtlakolchiua uan amo moyolkuepa. Kiijtok sanse kej se kentsi tlasonejkayotl “kisoneua miak pantsi”, nojkia se akajya katli tlajtlakolchijtok uelis kichiuas sekinok ma kichiuakaj tlen amo kuali. Yeka, Pablo kiniljuik: “Moneki inmojuantij xijkixtikaj nopa fiero tlakatl para ma ayok mosentili inmouaya” (1 Cor. 5:6, 11-13).

Nopa tlakatl tlen kiijtok apóstol Pablo, momekatiyaya uan ayokmo kitlatiyaya tlen kichiuayaya. Yeka, se keskij tlaneltokanij pejkej ayokmo kenijki kiitaj tlen kichiuayaya (1 Cor. 5:1, 2). Tlaj nojua kikauaskiaj nopa tlakatl kiampa ma kichiua, uelis toikniuaj ayokmo kenijki kiitaskiaj momekatisej, kej kichiuayayaj maseualmej tlen Corinto. Nojkia, tlaj ipan ni tonali nojua kinkauasej ipan tlanechikoli katli tlajtlakolchiuaj, uelis kichiuasej sekinok ayokmo ma kipatiitakaj toTeotsij itlanauatiljuaj (Ecl. 8:11). Katli tlajtlakolchiuaj uan amo moyolkuepaj elij kej tetl tlen moatsintlanojtok uan amo nesi, pampa uelis kichiuasej sekinok amo kuali ma tlaneltokakaj (Jud. 4, 12).

Uelis kichiuas nopa tlajtlakolchijketl ma kipatla inemilis. Jesús kamanaltik tlen se telpokatl katli kistejki ichaj, kinempolok itomi uan auilnenki. Nopa telpokatl tlauel ouij kimatki itstos uejka tlen ichampoyouaj. Teipa motlalnamiktik, moyolkuepki uan tlakuepilik ichaj (Luc. 15:11-24). Itata kiselik ika miak pakilistli. Jesús techpaleuik ma tijkuamachilikaj tlen Jehová kiyolmati kema kiijtok tlen kichijki nopa tetaj katli tlauel teiknelia. Jehová amo kineki ma miki yon se maseuali, ya kineki “ma kikaua iojui tlen axkuali uan ma nelia kipia yolistli” (Ezeq. 33:11).

Katli kinkixtiaj tlen tlanechikoli ayokmo elij Jehová itlajtoltemakauaj uan ayokmo elij kejuak ininchampoyouaj. Nopa uelis kinpaleuis ma kiitakaj nochi tlen ayokmo kipiaj. Nojkia uelis kiitasej tlauel ouij itstokej pampa amo kuali tlen kichijkej. Uelis kiilnamikisej tlauel yolpakiyayaj kema kuali mouampojchijtoyaj iuaya Jehová uan itstoyaj ininuaya toikniuaj. Nopa uelis kichiuas ma moyolkuepakaj uan sampa ma kinekikaj kitekipanosej Jehová.

Tlaj tijnekij ma moyolkuepa se akajya, amo san moneki tlaiknelili, nojkia moneki xitlauak ma kitlalnamiktikaj. David kiijtok: “Ya nopa nikitaskia keja se tlamantli kuali tlen nechchiuiliaj. Intla tlakamej tlen kuajkualmej nechtlakaualtisej, elis keja se pajtli para na” (Sal. 141:5). ¿Tlake uelis techpaleuis ma tijkuamachilikaj tlen David kiijtok? Ximoiljui se akajya tlakuajtok uan kechkuatakani ika se achi nakatl. Ya amo ueli tlaijiyotilana uan kimati ayokmo tleno uelis kichiuas, nojkia ayokmo ueli kamanalti. Tlaj amo aka kipaleuia, nopa tlakatl mikis. Teipa, se iuampo miakpa kipankajkapania pampa kineki kipaleuis. Maske uelis nopa tlakatl kikokoua pampa kipankajkapaniaj, tlen kichiua iuampo kipaleuis amo ma miki. David nojkia kiampa moiljuiyaya, ya kitlaskamatiyaya pampa kitlalnamiktiyayaj, uan maske uelis kiyolkokouayaya tlen kiiljuiyayaj, kimatiyaya tlauel kipaleuiskia.

Uelis tlauel kipaleuis se akajya tlaj kikixtiaj tlen tlanechikoli. Kema panok se matlaktli xiuitl kikixtijkej tlen tlanechikoli, Julian ikone, katli achtouia tikijtojkej, ayokmo kichijki tlen amo kuali uan sampa tlakuepilik ipan tlanechikoli. Nama tlatekipanoua kej ueuejtlakatl uan kiijtoua: “Kema nechkixtijkej, kichijki noselti ma nikijiyoui tlen nechpanoyaya pampa amo kuali tlen nijtlapejpenik. Tlauel monekiyaya kiampa ma nechtlalnamiktikaj” (Heb. 12:7-11).

Maske tlauel teyolkokoua kema kikixtiaj se akajya tlen tlanechikoli, teipa sampa uelis tlakuepilis. Nochi uelis titlapaleuisej uan kiampa motlalnamiktis katli kikixtijtokej.

Ueuejtlakamej moneki kichiuasej kej Jehová uan kinextisej kiikneliaj se akajya kema kiiljuisej kikixtisej tlen tlanechikoli. Yeka, ika kuali kiiljuiaj tlake moneki kichiuas tlaj kineki sampa tlakuepilis. Nojkia, kemantika kinpaxalouaj katli kinkixtijtokej tlen tlanechikoli uan kinextijtokej kinekij kipatlasej ininnemilis. Kema kiampa kichiuaj, kinilnamikiliaj tlake moneki kichiuasej tlaj kinekij sampa kitekipanosej Jehová. *

Ichampoyouaj kinextiaj kiikneliaj katli kikixtijkej uan katli itstokej ipan tlanechikoli kema kitlepanitaj tlen kitlapejpenijkej ueuejtlakamej. Julian kiijtoua: “Maske tlauel nikiknelia nokone, kej monejnemiltik, kichijki ma timouejkatlalikaj”.

Nochi katli itstokej ipan tlanechikoli uelis kinextisej kinikneliaj katli kinkixtijtokej kema amo monojnotsasej ininuaya (1 Cor. 5:11; 2 Juan 10, 11). Kiampa kinpaleuiaj ma motlalnamiktikaj uan ma kiitakaj Jehová kinpaleuia ika ueuejtlakamej. Uan amo san ya nopa uelis kichiuasej toikniuaj, nojkia moneki kinextisej kinikneliaj ichampoyouaj katli kikixtijtokej uan kinpaleuisej pampa tlaijiyouijtokej. Amo ma timouejkatlalikaj tlen inijuantij pampa inijuantij amo kinkixtijtokej (Rom. 12:13, 15).

Julian kiijtoua: “Kema kikixtiaj se akajya katli tlajtlakolchijki, techpaleuia tijtlepanitasej tlen Jehová tlanauatia. Uan maske techyolkokoua, teipa kichiua kuali ma tiitstokaj. Tlaj nijkajtoskia nokone nojua ma kichiua tlen amo kuali, nimoiljuia amo kema sampa tlakuepilijtoskia ipan tlanechikoli”.