JULIAN nọ tare taghene, “ọke re ghwoghwo taghene e le ọmọ mẹ ọhworhare nẹ ukoko, nọ họhọre taghene mie rhe vwo akpọ owuorowu mi ne nyerẹn-ẹn. Ọye yẹ ọmọ mẹ ọkpako, ame i kẹroma omamọ; ame e ji ruẹ ekwakwa buebun kugbe. Ọ dabu dje omamọ udje, ọrẹn ogege uruemrien no wenerin. Ane mẹ ọ viẹre omamọ, mie rhe oborẹ mi na ha urhebro riẹn lele-e. Ame ne roro sẹ ame yi vwa dabu mọriẹn.”

Mesoriẹ ana ta taghene re ne le Olele Kristi nẹ ukoko emru ẹguọlọ, dedevwo ọ miama omamọ? Mesoriẹ i Baibol na o tiobọnẹ urhi ọnana? Mesoriẹ e le ohworho nẹ ukoko?

Ekwakwa eva ina vi phia vwẹre bọmọke ana ki sabu le Oseri Jehova nẹ ukoko. Ọrukaro, orhianẹ Oseri Jehova ro bromarhame ne o ruẹ ọdandan ọghwaghwa. Ọreva, orhianẹ o kwe ghwiẹriẹ-ẹ.

Jehova ohworho rọ fonron, omarana ọ ji guọlọ nẹ idibo yi i vwo uruemru ọnana, dedevwo o rheri taghene ọwan a gba-a. Jerẹ udje Jehova ọ guọlọre na kẹnoma nẹ edandan eghwaghwa enana jerẹ, ọfanrhiẹn, emẹgọ, ọwiẹghwọ, uhieso, ekwakwa awan re ken ha, ihworho ekpe, ọrhẹ irueruo eda.—1 Cor. 6:9, 10; Rev. 21:8.

O fori ne rhe taghene irhi Jehova i fonron, aye a ji sẹrorẹ ọwan. Ọwan i guọlọre nẹ ere rhirhiẹ kẹrẹ ọwan i rhiẹ ihworho ufuoma, ra ji hẹrosua. Ana sabu mẹrẹn aruẹ ihworho enana uvuẹn ukoko i Jehova, nime ọke ra homakpahontọre rẹn Osolobrugwẹ, ọwan i veri taghene ene nyerẹn lele ekpọvi enẹyen ri ha uvuẹn i Baibol na.

Ọrẹn me yọ nọ phia orhianẹ Olele Kristi ro bromarhame ne, o ruẹ ọdandan ọghwaghwa fọkiẹ ijẹgba? Idibo i Jehova ri fuevwan ọke ahwanren i ji ru sọ, ọrẹn Jehova ọ tiẹn aye-e. Orodje David udje owu. David o lele ane ọwọrọ ghwọwe, no kpe esa ọmase na; ọrẹn ọmẹraro Nathan nọ ta riẹn: “Jehova ọ ha ọdandan ọnọ harhomu ne.”—2 Samuel 12:13.

Fọkime David ọ ghwẹriẹ nẹ ẹhẹn rhe, Jehova nọ harhomie. (Ps. 32:1-5) Omaran ọ ji havwọ inyenana, odibo i Jehova orho ruẹ ekwakwa ri vwe serhọ yanghene o kwe ghwiẹriẹ-ẹ, ne le yi nẹ ukoko. (Acts 3:19; 26:20) Orhianẹ ohworho na o kwe dje oka ẹghwẹriẹ phia-a, ọke ọrana ekpako re guẹnzọn na ni ne le ọravwọ nẹ ukoko.

Ọke ukaro, ana sabu rhe roro taghene erhe le ohworho nẹ ukoko o serhọ-ọ, yanghene o dje uruemru esiri phia-a, maido orhianẹ ohworho na ọ kẹrerẹ ọwan omamọ. Ọrẹn, Baibol na ọ yẹrẹ ọwan imwẹro taghene aruẹ orhienbro ọnana o dje ẹguọlọ phia.

Jesu ọ tare taghene, “a mẹrẹn ẹghwanren vwrurhe nyoma ewian yen.” (Matt. 11:19, ekete ra djokarhọ) Erere o nie sa erhe le ohworho nẹ ukoko. Roro kpahen erere esa enana:

Erhe le ohworho nẹ ukoko ọ ha ujiri vwe odẹ i Jehova. Re rhiẹ Iseri Jehova na, uruemru ọwan ọ hobọte odẹ i Jehova. (Isa. 43:10) Jerẹ oborẹ uruemru ọmọ ọnọ sabu họghọ yanghene ephien vwe eri vwiẹriẹ, uruemru ọwan ọnọ ji sabu họghọ yanghene ephien vwe i Jehova. Ihworho ina sabu jiri Jehova orhianẹ idibo yi a nyalele irhi enẹyen. Erhirhiẹ ọnana ọ ji họhọ oborẹ ọ phiare ọke Ezekiel, ọke ihworho egbamwa na a ha odẹ i Jehova se itu Jew na.—Ezek. 36:19-23.

Ana ha ephien vwe odẹ i Jehova orhianẹ ọwan i vwobọrhọ irueruo ọfanrhiẹn. Ọnyikọ Peter ọ ha urhebro rẹn Ilele Kristi taghene: “Rẹ are e rhiẹ emọ ra huvwele na, are i vwe jenẹ ojemẹ are i vwori ọke are e rhiẹ igbori no sun are-e, ọrẹn, are i họhọ Ohworho Ọfuanfon ro serẹ are, are i rhiẹ ihworho ri fonron uvuẹn ọsoso uruemru are, fọkime a ya riẹ rhotọre: ‘Are ina vi fon, fọkime mẹmẹ ọfuanfon.’” (1 Pet. 1:14-16) Itiọrurhomẹmro, uruemru ọfuanfon ọ họghọ vwe odẹ Osolobrugwẹ.

Oseri Jehova orho ruẹ ọdandan, o fiotọre taghene igbehian yen yanghene ihworho ri rherie ine rhe kpahiẹn. Udjoghwẹ re le ohworho nẹ ukoko o djephia taghene Jehova o vwo ihworho ri fonron, ra nyalele ekpọvi ri ha uvuẹn Baibol na, ri ji guọlọ sẹrorẹ uruemru ọfuanfon. Ọhworhare owu rọ rhiẹ uyono ukoko uvuẹn Aghwẹlẹ Uvie owu rọ ha Switzerland, nọ tare taghene ọ guọlọ rhiẹ owuọwan usuẹn Iseri Jehova. E le omizie ọmase nẹ ukoko fọkiẹ irueruo ọfanrhiẹn. Nọ tare taghene ọ guọlọ kwomakugbe ukoko ro vwo “rhurhu ọdandan ihworho ri ru sọ.”

Erhe le ohworho nẹ ukoko, ọ lẹrhẹ ukoko na fuan. Ọnyikọ Paul ọ ha orhetio rẹn imizu ri ha Corinth kpahen imwofẹn ri havwiẹ, aye i rhe kwe nẹ iruedandan ri vwa guọlọ ghwẹriẹ ni rhirhiẹ uvwre aye. Ọ ha aruẹ ihworho enana vwanvwọn oborẹ ọ lẹrhẹ emru phie, rọ nọ sabu lẹrhẹ ibrẹdi kpare. No tiri aye orhọ taghene, “ibiẹ oborẹ ọ lẹrhẹ ekwakwa phie, yo ruẹ ọsoso oborẹ a ha ruẹ ibrẹdi na phie.” Omarana nọ ha urhebro phia taghene: “Are i tiẹ ọvwọkon na nẹ uvwre are.”—1 Cor. 5:6, 11-13.

“Ọvwọkon” ri Paul ọ hunute o mevirhọ ohworho rọ ha arudo ruẹ irueruo ọfanrhiẹn. Awọrọ uvuẹn ukoko na a tobọ nie taghene oborẹ o ruru na o serhọ. (1 Cor. 5:1, 2) Erhe le ohworho ro ruẹ ọdandan na-a, Ilele Kristi erọrọ ina sabu hẹrokele ọravwọ vwobọrhọ ekwakwa ri vwa fon rẹ ihworho amwa na e ruẹ. Arha kpariroro vrẹn edandan ra ha arudo ru, ihworho i rha ha ukẹro ọghoghanren ni irhi Osolobrugwẹ-ẹ. (Eccl. 8:11) Habaye, iruedandan ri vwe kwe ghwẹriẹ ina sabu họhọ “itita re tinu obotọre ame,” re kpogho esegburhomẹmro awọrọ uvuẹn ukoko na.—Jude 4, 12.

Erhe le ohworho nẹ ukoko ọnọ sabu lẹrhẹ ọravwọ ghwẹriẹ. Jesu ọ ta kpahen idama owu ro nẹ oghwa ọsẹ ye riẹ ekete ọrọrọ ya ghwọghọ oborẹ o vwori fughwẹ. Ọmọ osoghoro na nọ mẹrẹnvwrurhe taghene akpenyerẹn uvuẹn oghwa ọsẹ ye yọ mai serhọ. Omarana, ọmọ na nọ ghwẹriẹ nẹ ọdandan yen, ji kpare idjaghwẹ rọ ghwẹrioma bru ekrun ọnẹyen. (Luke 15:11-24) Uruemru ẹguọlọ rẹ ọsẹ na o dje kpahen ọmọ na ri Jesu ọ hunute, ọ ha userhumu rẹn ọwan rhe oborẹ Jehova o roro kpahen ọwan. Jehova nọ tare taghene, “Mie vwo omamerhomẹ kpahen uhwu ọvwọko-on, ọrẹn jenẹ ọvwọkon na wene izede yi nọ sabu rhe nyerẹn.”—Ezek. 33:11.

Nime ihworho re leri arha ha usuẹn ukoko Ilele Kristi na-a, aye ni na sabu mẹrẹnvwrurhe taghene emru ọduado yo vru nẹ aye obọ. Ọkezẹko, oborẹ o nerhumu ọdandan aye rhe, ọrhẹ ekwakwa irhorhomu rẹ aye i ru kugbe bi ọke aye e ji vwo obọdẹn onyerẹnkugbe rhẹ i Jehova, ọnọ sabu lẹrhẹ aye rharhumu bru i Jehova.

A guọlọ omẹdamu ọrhẹ ẹguọlọ na sabu ru oborẹ orhomurun. Ọbo ijoro David nọ tare, “Orhianẹ ohworho ọvwata ọ ghwẹriẹ mẹ, ono rhiẹ irueruo ẹguọlọ atamwu,” orhianẹ “ọ ghwọghwu mẹ, ọnọ họhọ emri re rhiẹ rhẹ urhomu mẹ.” (Ps. 141:5) Jerẹ udje: Roro kpahen ohworho rẹ oma ọ ghwọghọre nime ọ nya ugbo oseseri uvuẹn imito. Ọke oru, erinrin nọ kpa ye gbangbanhon omerhẹn no ji suien. Ọrhọ merhẹn uvuẹn imito na, ono hwuo. Ọke rọ hẹrhẹ eri na ha userhumu riẹn, ọreva ye ro lelirie nya onya na nọ ghwiẹ ye ọkezẹko nẹ omayen o gogovi. Dedevwo ẹghwiẹ na ọnọ sabu miamiẹ, ọrẹn ọnọ sabu simi arhọ ye. Omaran ọ ji havwọ, David ọ mẹrẹnvwrurhe taghene ọvwata ọrhọ ghwọghwie, ọnọ rhua erere vwe yi.

Uvuẹn erhirhiẹ buebun, erhe le ohworho ro ru sọ nẹ ukoko, ọ kpọ ọravwọ viẹ. Ọke emrẹ ẹgbukpe ikpe a vrẹn, ọmọ ọhworhare i Julian ra hunute vrẹn ne, no wene akpenyerẹn yen, ji ghwẹrioma rhiẹ ukoko na, vwana, ọ ga ẹrhẹ ọkpako ne. Nọ tare: “Fọkime e leri mẹ nẹ ukoko, ni mi sabu roro kpahen oborẹ mie nyerẹn akpọ mẹ lele, ji ghwẹriẹ. Mi ghini guọlọ aruẹ ọghwọghwu ọrana.”—Heb. 12:7-11.

Itiọrurhomẹmro, erhe le ohworho ro ru sọ nẹ ukoko, ọ miama omamọ, ọrẹn o fo na lẹrhẹ erhirhiẹ na gbanhon vrẹn oborẹ ọ havwọ-ọ. O fori nẹ ọwan ephian i hobọtua ẹkwaphiẹrhotọre na, nọ sabu wian.

Ekpako arha guọlọ ta rẹn ohworho taghene e lerie nẹ ukoko ne, o fori nẹ aye i damoma dje ẹguọlọ i Jehova phia. Ekpako na i rha ta rẹn ohworho na kpahen orhienbro aye, aye na dabu dje idjaghwẹ rọ nọ kpare riẹn, nọ sabu rharhumu ghwẹrioma rhiẹ ukoko na. Ekpako na i rha mẹrẹnvwrurhe taghene ọravwọ o dje oka ẹghwẹriẹ phia, aye na kọn bruie ọkezẹko ji ha urhebro riẹn nọ sabu rharhumu bru i Jehova. *

Ekrun ohworho re le nẹ ukoko na ina sabu dje ẹguọlọ rẹn ukoko na ọrhẹ ọre leri na, nyoma aye hobọtua orhienbro na. Julian nọ tare: “Ọye jẹ ọmọ mẹ, ọrẹn, aruẹ akpenyerẹn yen o fi ukọ rhẹ onyerẹnkugbe ame ne.”

Ọsoso ihworho ri ha uvuẹn ukoko na ina sabu dje ẹguọlọ phia nyoma aye ina kẹnoma rẹn ohworho re le nẹ ukoko na, aye i vwe lelie ru kugbe-e. (1 Cor. 5:11; 2 John 10, 11) Ọnana no djephia taghene aye a nyalele ọghwọghwu ri Jehova ọ haphia nyoma ekpako na. Habaye, ekpako na ina sabu dje ẹguọlọ ọrhẹ obẹhatua rẹn ekrun ohworho re leri na, nọ jọ rhọ họhọ taghene e ji le aye nẹ ukoko.—Rom. 12:13, 15.

Julian no fuen ẹmriẹn omana: “Re ne le ohworho ro ru sọ nẹ ukoko omamọ ẹkwaphiẹrhotọre, nime ọ ha userhumu rẹn ọwan nyerẹn lele irhi Jehova. Dedevwo ọ miama omamọ, ọrẹn omamọ erere o nie sa. Orhianẹ mi rhurhu ọdandan ọmọ mẹ, manẹ ọ vwo sabu ghwẹrioma rhe-e.”