“DIA m’a tende e anuncio cu nos yiu mayo a ser expulsa, tabata comosifuera mundo a caba pa mi”, Julian a bisa. El a sigui conta: “Nos tabata hopi pega y tabata haci hopi cos hunto. E tabata un yiu homber ehemplar, pero, di un dia pa otro, el a cuminsa comporta su mes malo. Mi casa tabata yora so, y mi no tabata sa con pa consol’e. Nos tabata blo puntra nos mes ta unda nos a faya como mayor.”

Con un hende por bisa cu expulsion ta un muestra di amor si e ta causa asina tanto dolor? Dicon Bijbel ta bisa cu mester tuma un medida asina drastico? Ki ora un persona ta ser expulsa for di e congregacion?

Tin dos factor determinante pa expulsa un testigo di Jehova for di e congregacion cristian. Prome, e mester a comete un pica grave, y di dos, e no a arepenti di su pica.

Aunke Jehova no ta exigi perfeccion for di su sirbidornan, e ta spera si cu nan ta cumpli cu su normanan santo. Por ehempel, Jehova ta prohibi picanan serio manera inmoralidad sexual, idolatria, hortamento, chantahe of extorsion, matamento y spiritismo.—1 Cor. 6:9, 10; Rev. 21:8.

Bo no ta haya cu e normanan limpi di Jehova ta rasonabel y ta un proteccion pa nos? Ta ken no ta prefera di biba meymey di hende pacifico, decente y confiabel? Esey ta e ambiente cu ta reina den e pueblo di Dios. E trankilidad cu nos ta sinti ora nos ta meymey di nos rumannan spiritual ta pasobra dia nos a dedica nos mes na Jehova nos tur a priminti di biba na harmonia cu e instruccionnan den su Palabra.

Pero kico si un cristian batisa comete un pica serio pa motibo di debilidad? Den pasado tabatin sirbidornan fiel di Jehova cu a comete pica grave, pero toch Dios no a rechasa nan automaticamente. Un ehempel bon conoci di esaki ta Rey David. El a comete adulterio y asesinato. Pero a pesar di esey, profeta Natan a bis’e: “SEÑOR ... a pordoná bo piká.”—2 Sam. 12:13, BPK.

Dios a pordona David su pica pasobra David tabata sinceramente arepenti. (Sal. 32:1-5) Awe ta mescos. Si un sirbidor di Jehova cu a comete un pica serio arepenti y stop di practica loke ta malo, lo e no ser expulsa for di e congregacion. (Echo. 3:19; 26:20) Pero si e ancianonan cu ta forma e comite hudicial nota cu e persona no a arepenti di curason, nan mester expuls’e.

Na prome instante, nos lo por sinti cu e decision pa expulsa un ruman ta algo hopi drastico of hasta ta demostra un falta di amor, specialmente si nos tin lasonan estrecho cu ne. Sinembargo, Bijbel ta duna nos bon motibo pa mira expulsion como un muestra di amor.

Hesus a indica cu “sabiduria ta demostra pa medio di su obranan cu e ta husto.” (Mat. 11:19) Pues, e decision di expulsa un pecador cu no a  arepenti ta un decision sabi y na su luga pasobra e ta produci resultadonan husto. Ban analisa tres di e resultadonan aki:

Expulsion di un persona cu a comete un mal echo ta trece honor pa e nomber di Jehova. Como cu nos ta carga e nomber di Jehova, nos conducta ta influencia e opinion cu hende tin di dje. (Isa. 43:10) Mescos cu un yiu su comportacion por trece sea honor of reproche riba su mayornan, asina tambe nos forma di actua ta pone cu hende tin sea un opinion positivo of negativo di Jehova. Den tempo di Ezekiel, e nacionnan bisiña di Israel tabata conecta e Hudiunan cu e nomber di Jehova. (Eze. 36:19-23) Awe tambe hende ta conecta testigonan di Jehova cu e nomber di Jehova. Pues si nos ta obedece e leynan di Jehova, nos lo halsa su bon nomber.

Pero si nos ta comete inmoralidad sexual, nos lo trece reproche riba e nomber di Jehova. Apostel Pedro a conseha cristiannan: “Como yiu obediente, no laga e deseonan cu boso tabatin tempo cu boso no tabata conoce Dios forma boso mas. Mas bien, di acuerdo cu Esun Santo cu a yama boso, bira santo den tur boso conducta, pasobra ta para skirbi: ‘Boso mester ta santo, pasobra ami ta santo.’” (1 Ped. 1:14-16) Pues, conducta cu ta limpi y santo ta trece honor pa e nomber di Dios.

Si un testigo di Jehova desaroya e custumber di haci loke ta malo, muy probablemente su amigo- y conocinan ta haya sa di esaki. Den tal caso, e expulsion ta sirbi pa demostra cu Jehova tin un pueblo limpi cu ta pega na e normanan di Bijbel pa mantene e santidad ey. Por ehempel, un biaha un homber a cana drenta un Salon di Reino na Suisa y bisa cu e kier bira testigo di Jehova. Dicon? Pasobra su ruman muher a ser expulsa pa motibo cu el a comete inmoralidad sexual. E homber a bisa cu e kier pertenece na un organisacion cu “no ta tolera mal conducta.”

Expulsion ta proteha e rumannan den congregacion. Apostel Pablo a bisa e cristiannan di Corinto cu ta peligroso pa laga pecador cu no a arepenti keda den e congregacion. El a splica cu mescos cu “un tiki zuurdeeg ta fermenta henter e mansa”, asina e pecador por tin un mal influencia riba e hendenan rond di dje. Pesey el a conseha nan: “Saca e malbado for di meymey di boso.”—1 Cor. 5:6, 11-13.

Aparentemente, “e malbado” cu Pablo a papia di dje tabata comete inmoralidad sexual abiertamente. Como resultado, otro miembronan di e congregacion a cuminsa hustifica loke e tabata haci. (1 Cor. 5:1, 2) Si e congregacion lo a tolera e pica serio ey, otro cristiannan lo por a sinti nan inclina pa sigui e custumbernan inmoral cu tabata hopi comun den e stad di Corinto. Awe ta mescos. Si e congregacion ta permiti un cristian comete pica grave, esey por pone cu otro rumannan ta cuminsa pasa por halto di e normanan di Dios. (Ecl. 8:11) Ademas, pecador cu no arepenti por bira manera “baranca scondi bou di awa” cu ta sink e fe di nan rumannan den congregacion.—Judas 4, 12.

Expulsion por pone e pecador cambia su mal actitud. Un biaha Hesus a conta di un hoben cu a bay for di cas di su tata y a malgasta su herencia hibando un bida di paranda. E yiu perdi a siña na un manera duro cu bida leu for di su famia tabata teribel. Finalmente, e yiu a recobra su sano huicio. El a arepenti y a tuma e iniciativa pa bay bek cerca su famia. (Luc. 15:11-24) Su tata a ricibie cu hopi alegria. E manera cu Hesus a describi e tata amoroso ey ta yuda nos compronde e sintimentonan di Jehova. Bijbel ta splica cu Dios no kier pa un pecador bay perdi. E ta sigura nos: “Mi no tin placer den e morto di e malbado, ma mas bien cu e malbado bira for di su caminda y biba.”—Eze. 33:11.

Asina tambe, personanan cu ser expulsa no ta miembro mas di e congregacion cristian—cu ta nan famia spiritual—y kisas cu tempo nan ta bin realisa kico nan a perde. Talbes nan ta mira e consecuencianan di nan decisionnan y ta corda con feliz nan tabata tempo nan tabatin un bon relacion cu Jehova y cu su pueblo. Como resultado, nan ta recobra nan sano huicio y ta bolbe na Jehova.

 Pa un pecador por arepenti, mester trat’e cu amor pero tambe cu firmeza. E salmista David a bisa: “Si e husto mester golpia mi, esey lo ta un bondad amoroso; y si e mester reprende mi, esey lo ta azeta riba cabes.” (Sal. 141:5, NW) Pues, David a admiti cu por sosode cu un persona husto mester dun’e un coreccion doloroso, y lo el a keda contento cu esey pasobra lo tabata pa su mes bon. Pa nos por compronde esaki mihor, pensa riba e siguiente situacion: Imagina bo cu un persona ta comiendo y un pida carni ta pega den su garganta. Casi e no por hala rosea mas, e no por papia y ta cuminsa perde conocemento. Si un hende no yud’e lihe, e ta muri. E ora ey un amigo ta dicidi di dal e riba su lomba y e pida carni ta bula sali. Kisas e golpi a haci dolor, pero esey a salba su bida.

Den hopi caso, expulsion por ta net e disciplina cu e pecador tin mester. Despues di mas o menos dies aña, e yiu homber expulsa di Julian—menciona na cuminsamento—a drecha su bida y a bolbe na e congregacion. Awe e ta un anciano y ta admiti: “E echo cu mi a ser expulsa a obliga mi enfrenta e consecuencianan di mi decisionnan. Di berdad mi tabatin mester di e disciplina ey.”—Heb. 12:7-11.

Aunke expulsion ta algo hopi tristo, e por ser remedia. Nos tur por contribui pa e disciplina cumpli cu su proposito.

Ancianonan mester haci esfuerso pa imita e amor di Jehova ora nan tin cu informa un persona cu a dicidi di expuls’e. Nan tin cu splic’e cu cariño y na un manera cla kico ta e pasonan cu e tin cu tuma p’e ser restaura den congregacion. Ademas, de bes en cuando, ancianonan por bishita personanan expulsa—cu ta duna algun indicacion cu nan kier cambia nan bida—pa corda nan kico nan tin cu haci pa bolbe cerca Jehova. *

Miembronan di famia por demostra amor pa e congregacion y pa e pecador ora nan ta respeta e decision cu e ancianonan a tuma di expulsa e persona. Julian a splica: “Mi no a stop di stima mi yiu, pero su comportacion a lanta un muraya entre nos dos.”

Tur ruman den congregacion por mustra nan amor. Con asina? Nan mester evita tur contacto y combersacion cu e persona expulsa. (1 Cor. 5:11; 2 Juan 10, 11) Di e manera ey nan ta sostene e disciplina cu Jehova a duna e persona mediante e ancianonan. Pero esey no ta tur cos. Tambe e rumannan mester duna e famia di e persona expulsa mas cariño y apoyo, ya cu nan ta sufri hopi. Nos no mester laga nan sinti cu nan tambe ta ser exclui for di asociacion cu e rumannan.—Rom. 12:13, 15.

Na conclusion, Julian a bisa: “Expulsion ta un medida necesario, ya cu e ta yuda nos biba di acuerdo cu e normanan di Jehova. Aunke e ta doloroso, riba largo plaso e ta produci bon resultado. Si mi a tolera mi yiu homber su mal comportacion, lo e no a recupera nunca.”